في ثورتنا العظيمة اللي سقط النظام فيها لأنه ماذاكرش كويس قعدنا إحنا نذاكر 30 سنة عشان كده نجحنا وهو سقط . كلنا عارفين إن أغلب الناس خدت على قفاها كتير قوي لدرجة ظهور كتاب "عشان متضربش على قفاك" للدرجة دي قفانا معرض للخطر ! ... مشكلة ... و علي رأي محمود عبد العزيز فناننا الجميل لما قال "آه يا قفا آه يا قفا " يظهر كلنا عانينا من الموضوع ده.. اشمعنى القفا ؟ الصراحة أنا ماعرفش ، روحوا للحكومة القديمة اسألوها كان دايما بيجيلي سؤال هو كله ضرب ضرب و مافيش حاجة غير القفا ؟ لما نزلت المظاهرات و الأمن جري من قدام المتظاهرين ، كان أول مرة أحس إننا ادينا القفا العظيم في تاريخ مصر .. بعد كده كل مصري يكتب علي قفاه مغلق .. بس للأسف الشديد اكتشفت إن ضرب القفا عند بعض الناس زي الإدمان بالظبط ، قفا من بلطجية علي قفا من أمن دولة وهكذا ... و ماعرفش إمتي هتنتهي المسألة شديدة الحساسية دي إمتى أحلق زيرو و أنا مطمن