قال الرئيس عبدالفتاح السيسي، إنه لا تزال هناك الكثير من فرص العمل في المشروعات القومية للدولة. وأضاف الرئيس السيسي في كلمته بالجلسة الختامية للمؤتمر الاقتصادي، اليوم الثلاثاء: "5 مليون شخص شغالين بقالهم 7 سنين، والله والله، بحلف بالله ما قلقان، أنا شايف بعمل إيه والناس بتاخد إيه، والناس شغالة إزاي، حتى لو فيه مليون فرصة عمل كل سنة، لسه عندي تاني". وتابع: "مصر كلها لازم تبقى كده، إزاي؟ لا تاكل ولا تنام ولا ترتاح". وتحدث الرئيس السيسي عن طرق الحصول على إيرادات للجهات الحكومية، قائلًا: "هيئة قناة السويس طول عمرها يجيبها دخل تديه لوزارة المالية، قلت لرئيس الهيئة معاك فلوس كام؟ قالي معيش، وجه الدكتور مصطفى وهو وزير إسكان، قولتله معاك كام في هيئة المجتمعات، قالي 750". ووجه الرئيس حديثه إلى الدكتور عاصم الجزار وزير الإسكان: "قول يا دكتور معاك كام؟". وقال الجزار: "أنا عندي دلوقتي استثمارات ب890 مليار جنيه على الأرض، هي أعمال لسه متمش تحصيلها، عندنا شراكات مع القطاع الخاص ب13 ألف فدان في مدن الجيل الرابع، حجم استثماراتهم تريليون وشوية، حصة الدولة 300 مليار جنيه وشوية، هذه المساحات المضافة، ضافت للدولة وأصولها". وعاد الرئيس السيسي للقول: "ساعة ما قلت الكلام ده، كان المهندس شريف إسماعيل رئيس وزراء، قالولي ناخد الفلوس وأي استثمار عايزها يعملها، قولتلهم لأ، الفلوس مع هيئة المجتمعات، وهو مسئول عن كل مشروعات البنية الأساسية، وإحنا بنعمل حياة كريمة، المسئول هيئة المجتمعات، طب هي ممكن تروح وزارة المالية، يزعل الدكتور معيط عشان معندوش موارد، أنا أسيبه يطحن نفسه". وأضاف: "قلت لرئيس هيئة قناة السويس، معاك كام؟ قالي معيش، قولتله يا راجل ميبقاش معاك ملاءة مالية 400 مليار جنيه، بالمناسبة المليارات عندي ملهاش قيمة عشان الحلم كبير أوي". وتابع: "والله العظيم والله العظيم ال68 مليار جنيه اللي لمناهم عشان نعمل قناة السويس الجديدة، كان ممكن ندبرهم، بس دخلنا الناس عشان الأمل ونشجعهم".
