موال الفول و اللحمة ________ عن موضوع الفول واللحمة صرح مصدر قال مسئول ان الطب اتقدم جدا والدكتور محسن بيقول ان الشعب المصري خصوصا من مصلحته يقرقش فول حيث الفول المصري خصوصا يجعل من بني ادم غول تاكل فخده في ربع زكيبه والدكتور محسن مسئول و البروتين الكامن طيه نادر زيه في ايها فول يديك طاقة وقوة عجيبة تسمن جدا تبقى مهول لحمة نباتي و لا في حاتي تاكل قدرة تعيش مسطول ثم اضاف الدكتور محسن ان اللحمه دي سم أكيد بتزود أوجاع المعدة وتعود على طولة الايد وتنيم بني ادم اكتر وتفرقع منه المواعيد واللي بياكلوا اللحمة عموما حيخشوا جهنم تأبيد يادكتور محسن يامزقلط يامصدر ياغير مسئول حيث ان انتو عقول العالم والعالم محتاج لعقول مارأى جنابك وجنابهم فيه واحد مجنون بيقول احنا سيبونا نموت باللحمة وانتو تعيشوا وتاكلوا الفول ايه رأيك ياكابتن محسن مش بالذمة كلام معقول؟!!