إيه اللى مضايقك فيها ؟ قررنا فى يوم ننزل فى شوارع بلدنا نسال الناس سوال بسيط هو ايه اكتر حاجة مضايقاك فى مصر ؟ جاءت ردود اكيد مختلفة فقررنا نعرض عليكم اكتر عشر حاجات مضايقة المصريين فى مصر . - الزحمة هى اكتر حاجة مضايقة الناس فى مصر . واكتر تعبير كان معبر عن الموضوع ده كان لبنت قالت " انا المشوار اللى بخدوا فى 5 دقايق دلوقتى ممكن اخدوا فى نص ساعة بسبب الزحمة " - الغلاء فى المركز التانى . وكان تعبير بسيط من راجل هو كمان بسيط ماشى بقفص العيش قال " اتحججوا بازمة الغلاء العالمى وغلوا كل حاجة طيب دلوقتى لما حصلت الازمة الاقتصادية دى اشمعنا احنا بس اللى عندنا لسة الحاجة غالية ؟ احنا ايه من عالم تانى ؟ " - السلبية كان تعبير من ست شغالة فى محل ملابس " ان مصر بلد جميلة بس احنا اللى مضيعنها بسلبيتنا " - معاهم حق طبعاً كل اللى اختار السلبية لان احنا شوفنا الموضوع ده فى عين الناس اللى رافضة حتى تقولنا هى مضايقة من ايه مع ان الموضوع ده عشان يعبروا عن نفسهم . - البطالة كان رد شباب كتير سالناهم قالوا " قلة الشغل - عدم تكافو الفرص - الوسطة " وكان رد من ست كبيرة قاعدة على الرصيف مستنية الاتوبيس قالت " مفيش شغل الواد ابنى من يوم ما اتخرج حفى عشان يلاقى شغل " - التعليم جاء فى المركز الخامس باننا عندنا مشكلة كبيرة فى التعليم . عجبنا راى بنت قالت " فرق كبير قوى بين اللى الواحد بيتعلموا وبيلاقيه فى الواقع يعنى مثلاً يفضلوا يقولوا مصر جوها معتدل والمطرة مغرقة الشوارع " - التلوث " الشوارع مش نضيفة " كان رد سريع لناس كتير بيتمنوا يشوفوا منظر حلو تحت بيتهم أو جو مليان هوا نضيف " - الحكومة جاءت فى المركز السابع وكان اغلبية راى اللى اختار الحكومة " الحكومة هى سبب كل مشكلة فى مصر " . لا تعليق - قلة النظام فى المركز التامن . مدام صغيرة قالت " احنا معندناش نظام فى اى حاجة ولا فى خدمات بتتقدم ولا فى مصالح حكومية ولا عندنا حتى نظام فى بيوتنا " - المعاكسة والتحرش " انا بقيت خايف على بنتى ومراتى من نزولهم الشارع . شوارعنا فقدت الامان " كان رد سريع لرجل كبير بدون اى تفكير - كل حاجة وده رغم انه اختيار جاء فى المركز العاشر الا اننا شايفينه اخطر نقطة واهم نقطة ان فى ناس حتى لو فئة قليلة مش شايفة فى مصر حاجة حلوة . خارج النص فى اراء جاءت خارج العشر اختيارات دى بعضها مشاكل عامة وبعضها مشاكل شخصية - " انا ابنى مضايقنى قوى " راى لست شغالة فى كوافير - " المعاشات خنقاني ومش عايزين يدونى معاش جوزى " - " عدم الالتزام بالمواعيد " ده راى واحد كان مستنى حد بعربيته - " السواقين اللى بياخدوا رخصة وهما معندهمش اخلاق ولا احترام يعنى تمشى 100 متر يشتموك 100 شتيمة " راى سواق تاكسي - " الناس مضايقانى قوى " تعبير لولد من أطفال الشوارع " بلا ماوى " وهما دول اكتر حاجة مضايقة المصريين فى بلدهم ورغم كده صدقونا بيموتوا فيها وبيحبوها بس اشتكوا عشان نصلح من نفسنا وتبقى بلدنا احلى واحسن بس لو كل واحد قام بدوره . شكراً لكل من اشترك معانا ولكل من اكتفى بانه يقولنا شكراً مش عايز اتكلم .