مفيش شاب دلوقتي مش بيدور على فرصة عمل مناسبة ليه، ولو لقى الفرصة دي بيبقى محتاج يكون مؤهل ليها عشان ما تروحش منه، ولأن "كلمتنا من الشباب وللشباب" ويهمنا انكم تلاقوا الفرص المناسبة في شغلكم،هنقدم لكم بالتعاون مع خبيرة الموارد البشرية "رشا خليفة"، وصاحبة جروب "نصايح رشا" على الفيس بوك.. كل النصايح اللي انتم محتاجينها، وكمان "رشا" هترد على كل استفساراتكم وهتقول لكم على كل اللي انتم محتاجينه عشان تلاقوا فرص العمل المناسبة، ابعت انت بس واسأل عن اللي انت عايزه على.. [email protected] السلام عليكم جزاك الله كل خير علي اللي بتعمليه، أنا سمعت حضرتك في نجوم اف ام، و كنت سعيد جداً، أنا باختصار حاصل علي ليسانس حقوق 2001 بتقدير جيد، و حاصل علي ماجستير في القانون من جامعة عين شمس، وأقوم حاليا بتحضير رسالة دكتوارة، واجيد استخدام الحاسب الالي. بحثت عن عمل في شركات البترول والطيران و البنوك بمرتب كويس، لكن للأسف لم أحصل علي عمل منذ ذلك الحين أي منذ 2001 ، كنت فاكر الأول إن ده نصيب ورزق بس اكتشفت ان الموضوع واسطة، و مش عارف أعمل إيه، للعلم أنا قدمت في النيابة العامة 3 مرات و مجلس الدولة 5 مرات وهئية قضايا الدولة والنيابة الإدارية، لأني حاصل علي تقدير جيد في الليسانس ولكن لم يحالفني الحظ وأتمني المساعدة، و بغض النظر عن أي حاجة أشكرك بأسم جيل باكمله علي المجهود المبذول ..و ألف مليون شكر. أسف علي الإطالة بس اللي عندي يطول شرحه و الله .أسف مرة تانية. أولاً ما شاء الله عليك يا دكتور " قريب إن شاء الله ". الحقيقه مش هقدر أقولك بالنسبة لمجلس الدولة والنيابة تعمل إيه ؟ لأن أنا معنديش فكره كبيرة عن الموضوع ده، لكن في الأول ده نصيب، بس لو أنا مكانك، 5محاولات مش هترضيني، يعني أنا برفع الراية البيضة بعد المحاولة ال 100، الحقيقة اللي أقدر أقولها هو إنك طول ما فيك نفس ، قدم وإن شاء الله توصل . بالنسبة لشركات البترول والطيران والبنوك، هو أنت ليه حاصر نفسك في الشركات دي بالذات؟ بالشكل ده أنت بإيدك بتقلل الفرص بتاعتك في الحصول علي الوظيفة، نصيحتي ليك إنك توسع النطاق شوية، يعني مش هنركز علي النشاط لكن هنركز علي حجم الشركة و نحط أولويات. يعني هنقسم المستهدف درجات، بغض النظر عن المنتج اللي بيقدموه كالتالي : •الشركات متعددة الجنسيات (MULTINATIONAL COMPANY). •شركات محلية لها نشاط كبير ومعروفة في السوق. •شركات محلية.. معروفة بس. أعتقد كده فُرَصَك هتكتر، و كمان بالنسبة للمرتب هتقدر توصل للمرتب اللي انت تتمناه . و علشان توصل للشركات دي المفروض تعمل التالي : •انجليزي 100% يعني لازم تتكلم انجليزي كويس جدا جدا. •توزع السيرة الذاتية بتاعتك علي كل شركات التوظيف اللي ممكن تلاقيها. •تعمل حصر بكل شركات البترول الي موجوده في البلد والطيران واللي انت عايزه وتبعت الCV بتاعتك عندهم.
