عايزة أقول رأيي المتواضع وبكل صراحة فى الإنتخابات واللى حصل فيها والتيارات والاحزاب والتحالفات والتكتلات وكل الكلام ده ،بس انا مش هدخل فى سياسة ،أنا هقول رأيي من منظور تانى خالص أه بصراحة مش بحب التيارات الدينية لا الإخوان المسلمين ولا حتى السلفيين،طيب ماهو من حقى . ده أنا من ساعة ماكنت صغيرة وأنا بشوف وأسمع حاجات كتير بتخوفنى منهم. الإعلام دايماً مطلعهم إرهابيين ومتزمتين والنظام البائد ماكنش مدى لحد فرصة يقول انا أهو...... ومع العلم إنى زى ما قلت مش بميل للإخوان المسلمين أنا وناس زى كتير إلا إنى أشهدلهم بأنهم يستحقوا الفوز بالنسب الكبيرة دى فى الإنتخابات أيوووووووووووون يستحقوا ماهو هما دول اللى يعتبروا معروفين عند الناس ،بقالهم يجى 60 سنة بيحاربوا عشان يعلنوا عن وجودهم وكانوا بيتقابلوا بالرفض والقمع الرهيب وتشويه الصورة ناس كتر خيرهم قبل الإنتخابات نزلزا الشارع للناس يعرفوهم بنفسهم وببرامجهم الإنتخابية وناويين يعملوا إيه وينفذوا إيه وأكتر خطاباتهم كانت بتخص شباب الجامعات وانا وغيرى شاهد عيان على ذلك. عرفتوا يستحقوا الفوز ليه ؟ -لأنهم جماعة منظمة جداً وعارفة هى بتعمل إيه -لإنهم بينزلوا يعرفوا الناس بنفسهم وجهاً لوجه مش بميكرفونات وأغانى وحاجات غريبة للدعايا كان بيستعملها أعضاء برلمان موافقة بالإجماع . -عارفين هما عايزين إيه وبيخططوا ليه وبينفذوه وبيتخطوا أى عقبات تقابلهم عشان يوصلوا للهدف ، وبالفعل بيوصلوا :) عرفتوا أنا قصدى إيه ،يارب يكون وصلكوا كلامى صح ياريت كلنا نتعلم من جماعة الإخوان المسلمين أنا عارفة إنى إخترت مثال سياسى غريب عشان أوصل رايي وده لأنه المثال البين اللى بيفرض نفسه دلوقتى على الساحة إنت بقى وإنت وهو إيه اللى منعك عشان تبقى زيهم ، مش قصدى فى فكرهم أقصد فى تفكيرهم تفرق ! إيه اللى منعك عشان تخطط وتنفذ وتتحدى كل المشاكل عشان توصل لهدفك مقالى ده مش بحث عن الإخوان المسلمين ولا دعايا ليهم :) أنا بس بلفت نظركم لحاجات ممكن مناخدش بالنا منها فى ظل القيل والقال والإشاعات والكلام اللى كل يوم بنسمعوا عنهم وعن غيرهم من الاحزاب أنا بس نفسى مانبصش لكل حاجة بسلبيتها والوحش اللى فيها وبس نفسى مانكونش رأى مجمل عن شئ سواء بالسلب أو بالإيجاب ، لأ كل شئ فى حلو ووحش . فيها إيه لو انا مش بحب تيار أو فكر معين دى حرية ، بس فيها إيه بقى لو طلعت ناصح شوية وبصيت على الموضوع تفصيلياً، أطلع الإيجابيات وأستخدمها أنا لصالحى وأستفيد منها . عرفتوا برضه انا ليه قلت هتكلم عن الإنتخابات والسياسة من منظور تانى
