تداولت انباء علي مواقع التواصل الاجتماعي تويتر وفيس بوك عن سرقة حذاء المشير طنطاوي عقب صلاة العيد . وتعددت التعليقات الطريفة عقب انتشار هذا الموضوع وتداول الاعضاء ردود افعال بعض الشخصيات المهمة علي الساحة منها مرتضى منصور : (أنا عندى سيديهاية اللي سرق جزمة المشير و معايا مقاسه كمان) توفيق عكاشة : (يا سيادة المشير ما هو انت يا خويا لو كنت واخدها تحت باطك و انت داخل ما كانتش إتسرقت .. اتعلموها بقي يا خويا) أحمد سبايدر : (هذا مخطط ماسوني لمعرفة مقاس المشير .. انتو مش فاهمين حاجة يابلد) منصور العيسوي : (المشير معندوش جزمة أساسا) التليفزيون المصري : (قلة مندسة و أصابع خفيه تلعب في جزمة المشير و لكن مازال الرباط شديد بين الجيش والشعب) العيال بتوع احنا آسفين ياريس : (حملة مكثفة لجمع أموال لشراء بيادة كلاركس للمشير بدل اللي اتسرقت بعنوان "احنا اسفين يا جزمة") حملة ترشيح المشير لرئاسة الجمهورية : (ها هو المشير سرقوا حذائه كمواطن بسيط و يلبس أوبئاب كمواطن بسيط و يطرقع و هو ماشي كمواطن بسيط ... يا له من مواطن حافي بسيط يستطيع أن يقود أبناء وطنه الحافين إلى استقرار الكوتشي و إنسيابية الإسبدرين و رقي الكعب العالي و هيبة الشبشب أبو وردة) طلعت السادات : (يقدم بلاغ للنائب العام ضد 6 إبريل بأنهم هم من خططو لسلت جزمة المشير من أمام باب الجامع بتمويل صهيوني إيراني مستكوفي مستعفن) لجنه تقصي الحقائق : (لقد تم سرقة جزمة المشير و هو لابسها) المجلس العسكري : (أيها الشعب العظيم لقد فقدت مصر جزمتا ... من أغلى المحال ... جزمة ... من أقوى النعال ... جزمة ... كان يضرب بها الرجال .. و بما أننا حمينا الثورة و مش عارفين نحمي الجزمة .. فنحن من هنا نناشد شعب مصر الشرفاء ... اللي يلاقي الجزمة يسلمها لأقرب وحدة شرطة عسكرية و هنيالك يا فاعل الخير ... و إلا فإن المشير مش هيعرف يسلم العهده ... و هتلبسوه للأبد .... و الله الموفق والمستعان)