النص ده سريالي يشبه لوحة.. لسلفادور دالي لو مش قادر تفك رموزه متسألنيش علشان أنا مؤمن جدا بنظرية موت.. الشاعر بودلير بيفكرني بمحمود المليجي شرير علي الشاشة طيب جدا.. في الواقع فامتستغربش .. لما ديكتاتور يتكلم ع الحرية ولا تستغرب تجار الحروب لما يقولوا.. سلام الشعراء الكلاسيك بيكتبوا ع البحر.. وموجه السما ونجومها الشمس الغايبة ورا الغيم وأنا كشاعر صعلوك قررت أكتب عن واد بيبع زلابية علي شاطئ روميل ودمعة محبوسة ورا ضحكته الباهتة لما جت سيرة أبوه مش عارف ليه.. مسألتوش.. عن مصير ه ممكن.. أسيبك.. وأنت بتقرا النص تتخيل ايه.. اللي جري له مش عارف ليه.. البنت اللي بتغرق في الاُبيض فكرتني بإيلان لقت اللي ينقذها واحنا قتلناه ضحكة ابني بتفكرني بنظرة عمران بيدين العالم من غير حتي ما يقول آه في البداية بنكتب علشان نغير الكون في النهاية بنكتب علشان نغير نفسنا حكمة قالها لي صاحبي علي القهوة مش عارف ايه علاقتها بالنص بس خليك فاكر اني قلت لك من البداية إنه نص سريالي.