"عارفة يابت ياعارفة" .. من يوم ماعرفتك وأنا البت عارفة، ماكبرتش لحظة، وبفرح قوي لما تقولهالي. البت دي عرفت عمرها الحقيقي لما سيبتها ومشيت.. خلاص مابقاش فيه البت عارفة. بس عارف أنا فرحانة لك قوي عشان قال إيه ياخويا عامل لنا دوشة وكل شوية تطلع لنا بمشوار.. (إيه رأيكم لو زورنا الشيخ محمد عبد السلام )، (إيه رأيكم لو خدنا الواد مسعد وحضرنا مسرحية في دمنهور)، (الواد صبحي يوسف أجازة وعايزين نطلع بيه ع الشاعر)، ( ما تنسوش معرض الواد علي عاشور)، (إيه رأيكم لو نزلنا الميدان جبنا أكلة سمك).. دوشة لولاها ما كناش فضلنا متواصلين للنهارده..قوم إيه بقي تسهر في القهوة وتطلع تآخد حمام وتقعد ع الكرسي.. وخلاص.. ياسلام.. يعني كل الدوشة دي ومش ح نعرف نزورك في مستشفي ولا في بيت.. ياحلاوة. أنا بصراحة بأحسدك وأتمني أمشي زيك كده من غير دوشة .. عموما ماتروحش كده ولاكده. استناني أنا عارفة إن مواعيدك مظبوطة، بس أنا مش ح أعرف أديك ميعاد.. إتوقع إني ح أجيلك في أي لحظة وساعتها ترجع تقول لي... "عارفة يابت ياعارفة" .