** من حقي أفرح ومن حق قلبي يتنطط لما أشوف الرئيس السيسي كل يوم رايح العاصمة الإدارية الجديدة يتابع ما يجري فيها..فما نراه من مشروعات تظهر للنور سريعاً تجعل الشعب يفخر بوجود رئيس بيشتغل وبيشتغل بس للبلد وللمواطن بيحقق اللي بيوعدهم بيه ويسابق الزمن لينفذ البرنامج الذي وضعه للبلد خلال فترتي رئاسته ولاينظر للعائد الشخصي له ** أفتكر إن متابعة الرئيس السيسي المستمرة والفريق محمد زكي وزير الدفاع والإنتاج الحربي القائد العام للقوات المسلحة لإعداد وتدريبات طلبة الكليات العسكرية يوضح الفارق الشاسع بينهم وبين خريجي بقية الكليات ويؤكد ليه المؤسسة العسكرية الأكثر انتماء للوطن وللشعب.. حقاً القوات المسلحة مصنع الرجالة . ** ياسلاااام علي عظمة شعبك يامصر.. الناس احتفلت بعيد الشرطة في الشوارع ومحدش جاب سيرة مؤامرة يناير..صدقوني الناس فهمت الدرس وعرفت إن مصلحتها مع بلدهم مش مع اللي بيبيعوها بتراب الفلوس..!! **علمت أن إيناس عبدالدايم وزيرة الثقافة مش مبسوطة من أداء بعض قيادات الوزارة وعشان كده هاتعمل حركة تنقلات وتعيينات.. وأهمس في أذنها بأن هناك قيادات تستحق التواجد في مكانها وأخري تتخلص منها..!! ** معظم الأهلاوية شجعوا الزمالك قدام بيراميدز "أنا وابن عمي علي الغريب".. عشان كده فطست من الضحك وأنا باسمع الأخ حسام البدري - اللي دمر فريق الأهلي - بيطلب من جمهور الأهلي تشجيع بيراميدز .. يا أخينا إنت اللي بعت الأهلي وزحفت للفلوس وعارف إن مالكش كلمة ولا قرار في بيراميدز وإن مصيرك إنت والشماشرجي هايبقي زي التوءم إللي باعوا البورسعيدية بالفلوس زيكم بالظبط لأن الكلمة الأولي والأخيرة لصاحب النادي تركي آل الشيخ .. أما حسام حسن كفاية الشتيمة القذرة اللي الناس شافتها .. وأما نصه الحلو "إبراهيم" لخبط في الأهلي ميعرفش إن"تركي" أهلاوي بس ..وحق البورسعيدية رجع.. واللهم أهلك الظالمين بالظالمين.. وخلاص الأهلي فاق لكم وهايحطكم في مكانكم الطبيعي..!! ** ميزة عمرو الشناوي إنه طلع السلم من أوله وفي نفس المكان وهذا سر نجاحه والمفروض يطلع درجة سلم كمان .. مش زي قيادة هبطت بالبراشوت من أوضتين وصالة وعفشة ميه علي قصر كبير..!! ** سوزان حامد..مخلوق رقيق هادي خبرة.. والقنوات الإقليمية بقت زي الساعة وبنشوف برامج حلوة ومذيعات جديدة..ومحدش سامع لها حس..برافو. ** لا حديث في حجرات وطرقات التليفزيون إلا عن شيئين ..الأول أن إعلام المصريين هاينفض السجادة والموكيت سريعاً عشان نائلة فاروق ماقدرتش تعمل كده .. والثاني عن مؤامرة يدبرها رجالة مجدي لاشين للإطاحة برئيسة التليفزيون وواحد منهم قال بالحرف" دي طلعت تعبانة ومش هاتاخد غلوه".. وعلي فكرة أحد المقربين منها نصحها كثيراً لكنها ماسمعتش كلامه..!! ** أسوأ تنويهات موجودة في مصر تشوفها علي القناتين الأولي والثانية.. لأن المسئول في الطراوة ..عمرنا ماشفنا الفواصل بين البرامج تبقي أغنيات عاطفية بالقناة الأولي وهي القناة الرسمية ..ولما المسئول يكتشف شخصاً سيئاً جداً وبرضه يعتمد عليه نقول عليه إيه.. تخيلوا اللي غرق نهلة عبدالعزيز في أزمتين هو الشخص السيئ ده.. وهو برضه اللي هايغرق المسئول ده..!! ** معقولة.. محدش قادر يحاسب خالد يوسف.. في البرلمان واللا نقابة السينمائيين.. يبقي الجدع ده جاااااامد قوي بصحيح..ومن حقه يعمل اللي عاوزه..لأه..وكمان يطلب حماية الدولة من اللي بيشوهوا حضرته في الذكري الهباب إياها.. وأقول له" أي نائب في العالم الغربي لو حصله كده بيستقيل فوراً ..لكن إنت نائب في العالم التالت".. وأسأله" كام فيديو ومحضر شرطة إتعملك لحد دلوقتي.. وياتري اللي بتعمله ده هو اللي بيحافظ علي وجه مصر..؟ مالكش دعوة بمصر وشوف نفسك..!! **كل الممثلين في "تياترو مصر"دمهم خفيف وعسل وبيضحكوا الجمهور.. ماعدا بيومي فؤاد مهما عمل ربنا خلقه كده دمه "2 طن".. وبرضه مش عاتق برنامج إلا وبيطلع فيه..أرزاق ..!!