الذكريات.. هي الدليل لغياب حبيب هي اللي بتقول إنه كان.. من يومها بيشوف الصور.. من يومها بيقول كل يوم.. روحك غريبة عن المكان.. وكأنك المرة دي جاي البيت ده ضيف.. وحيطانه مش عارفاك.. كانت عينيه متثبتّة من بدري ع الشباك.. ينقل عينيه لألبوم صور.. بيشوفه لما بتوحشه.. ويقول لنفسه هاتلي يوم مكنتش فيه واحشاك.. كانت دماغه بتفتكر.. كان عندهم للست غنوة مفضلّة.. كانت تغني وهما كانوا يدندنوا.. "حيّرت قلبي معاك" بتقول وراه "ده كلام؟".. ساعة غنا "أنساك؟" لكنه من يوم الوداع.. مبقاش يقول.. بيانات بطاقته قديمة بتقول إنه زوج.. دلوقتي صار: أرمل يعول مبقاش يقلّب في البطاقة.. إلا أوقات اللزوم.. بردانة روحه في كل فصل.. والروح ماتدفاش بالهدوم.. مبقاش يعد سنينه كام العمر مش عداد سنين العمر يتقاس بالهموم.. وباللي فارقوا وباللي بيراقبونا من.. بلكونة عالية في السما.. ونورها بيزاحم نجوم.. من يومها بطّل يقرا أخبار الجرايد بس كان.. دايما مواظب يقرا أخبار برجها.. علشان يشوف.. باب حظك اليوم النهاردة شايل لها.. م الحظ إيه.. رغم إنها.. في الجنّة مش محتاجة حظ..