الحكاية عجب

الحكاية يا ناس عجبْ
فين الشرف؟! فين الرجولة؟!
فين المبادئ والأدب؟!
فين الضمير فين الأمان؟!
دا العيال ماشية بسلاسل واللبان
وع الشواطئ فى النوادى
كله عادى
الحرام يظهر يبان
امشى ع الكورنيش ف زحمة
دا الهدوم كاشفاها لحمة
واللى شفاف واللى ضيِّق
واللى ماشية كمان تزيِّق
والشباب شكله جنان
مين هيَّه سوسو ومين رجب؟!
الحكاية يا ناس عجبْ
واللى ماشية تك تك
ماشية تلعب doublekick
والولد مخه يفك
والشمال يضرب يمين
والبنت تكاكى تكاكى
ياخدها فى الملاكى
يعزمها على كنتاكى
ويبقوا مهنتمين
لا تقوللى بابا وماما
ولا مين بيحاسب مين
والحكاية يا ناس عجب
فين الرجولة والشهامة؟!
ابن الأصول دا ليه علامة
فين المبادئ والأدب؟! غاب.. !
دا احنا عايشين جوا غاب
شايفين شباب
ماشية تعضعض كالكلاب
مسعورة تنهش كالذئاب
يشدوا من هانم غطاها
ويشدوا من أختك حجاب
إيه الحكاية ومين سبب
دا الحكاية يا ناس عجب
بنت ماشية شمال يمين
واللى لابسين عريانين
والعيال مبرشمين
واللى صايع واللى ضايع
واللى بالع واللى قالع
واستريتش كمان لعين
والمحزَّق والملزَّق
واللى بيشيِّش هباب
فين المبادئ والأدب؟! فين الحياء؟!
ضاع ومات راح واحتجب
الحكاية يا ناس عجبْ
مين ضحية؟!
واللى جانى هوَّا مين؟!
هوَّا أب يكون أنانى
راح وسافر للأمانى
ساب ولاده من سنين
ولاَّ أم سابت بناتها
ياله ماكياجها وحاجاتها
بس بتفكَّر فى ذاتها
سايبة أخلاق ويَّا دين
الحكاية يا ناس عجبْ
واحدة ماشية فى الشوارع
عارضة أزياء بالكوارع
واللى يتحرَّش ببت
واللى بيشدشد فى ست
واللى بيعاكس فى نت
أخلاقنا تييت وتوت وتيت
دا الحكاية بقت عذاب
والضمير أصبح بيصرخ
والقلب من حزنه ندب
الحكاية يا ناس عجبْ
الحكاية عايزة رابط
لمَّا إعلام يبقى خابط
لحم عارى وفن هابط
حاجة تدوش راس جنين
لمَّا فلم يكون مهين
دور الرقابة يا ناس وجبْ
الشباب دولا ضحية..؟!
أم جناة؟!
اللى يزرع شىء جناه
دا المدارس دورها غافل
والجامعة زيطة فى المحافل
والقهاوى جمع حافل
بانجو شيشة مهيصين
ومهجيصين
ومهلسين ومهنتمين
دول ضحية أم جناة؟!
واللى يزرع شىء جناه
واللى جانى يبقى مين؟!
مهر الزواج خلُّوه تقيل
والشباب مديون ذليل
والدخول يا ناس قليل
والحكاية يا ناس عجب
لمَّا إعلام يبقى راقى
ولاَّ تعليم يبقى جيد
يبنى ابنى وليه يشيِّد
وأب يبقى ف بيته سيِّد
يبقى أكيد هنشوف أدب
يبقى أكيد هنشوف أدب