المقالة دي علشان حبيت أفكركم وأفكر نفسي إن انتخابات البرلمان قربت.. آه والله تخيلوا؟.. إيه اتفاجئتوا؟؟.. معلش أنا عارفة إن موضوع الانتخابات البرلمانية ده مفاجأة بالنسبة لكم.. وعارفة كمان إنكم مش فاضيين ليها خالص ومشغولين بحاجات تانية. علي العموم المشكلة مش فينا إحنا بس كمواطنين، لكن المصيبة إن الأحزاب هي كمان نايمة في العسل ولا هي هنا ولا كأن فيه حاجة.. أغلب الأحزاب عاملين من بنها كأن الموضوع مايخصهمش.. الأحزاب عندنا تحولت من مصطلح الأحزاب الكارتونية لمصطلح الأحزاب التليفزيونية. هتقول لي إزاي ما هم هاريين نفسهم طلوع في التليفزيونات ولقاءات وتصريحات وكيت وكيت.. حلو أوي تعالى بقى أنا هاخدك من إيدك كدة وننزل أنا وإنت الشارع، هنسأل الناس شوية أسئلة كالآتي: عزيزي المواطن.. تعرف إحنا عندنا كام حزب في البلد؟ عزيزي المواطن.. تعرف إيه الفرق بين برامج الأحزاب المختلفة؟ عزيزي المواطن.. تعرف إيه هي أيدلوجية الأحزاب اللي موجودة؟ عزيزي المواطن.. تعرف مين هما رؤساء الأحزاب الموجودة في البلد؟ عزيزي المواطن.. تعرف أعضاء الهيئة العليا لكل حزب؟ عزيزي المواطن.. تعرف مرشحين الأحزاب دي للانتخابات البرلمانية في دايرتك؟ أراهن إن الناس اللي هنسألها مش هتعرف إجابة أغلبية الأسئلة دي.. ودي بقى المصيبة عزيزي المواطن.. طب الناس هتنتخب الأحزاب دي على أي أساس؟ إيه هي المقومات اللي على أساسها الناس هتقول هدي صوتي للمرشح ده مش ده؟ الأحزاب سايبة الشارع، اللي هو أصلا أساس عملها، ومش بتفكر تقرب من المواطن، وفاكرين إن طلوعهم في التليفزيونات كده كفاية المواطن بقي عارفهم وفاهم هما هيعملوا إيه لما يدخلوا البرلمان. أعزائي الأحزاب.. شوية أسئلة حاولوا تجاوبوا عليها كدة: أعزائي الأحزاب.. هترشحوا أعضاءكم في الدوائر على أي أساس؟ أعزائي الأحزاب.. هل تعرفوا احتياجات كل دايرة هتنزلوا الانتخابات فيها؟ اعزائي الأحزاب.. عرفتوا قد إيه من الشارع بيكم؟ دي شوية أسئلة بسيطة حاولوا تجاوبوا عليها.. من الآخر لازم تتغيروا.. لازم تسيبوا كراسيكم وتنزلوا الشارع.. قربوا من الناس، فهموهم، ما تسيبوهمش لحد يلعب في دماغهم ويفهمهم صورة غلط عنكم، ويصطادوا في الميه العكرة اللي انتوا بإديكم سبتوها تتعكر بإهمالكم للشارع. هتسيبوا ناس تانية يوزعوا زيت وسكر، ويضحكوا على الناس باسم الدين، ويخدعوهم علشان حضراتكم مش فاضيين من كتر لقاءاتكم التليفزيونية؟. ما تكتفوش بالقاهرة والجيزة وإسكندرية.. انزلوا النجوع والقرى المهملة.. وصلوا برامجكم وصوتكم للناس.. الشارع هو سندكم.. الشارع هو اللي هيوصلكم لكرسي البرلمان، وهو الوحيد القادر يمنعكم توصلوا. فكرتوا هتعملوا إيه للمرأة؟.. طب واخدين بالكم إنها ظهير شعبي قوي لازم تحافظوا عليه؟ الأحزاب لازم تغير أسلوبها وطريقتها، وإحنا كمان لازم نغير نظرتنا ليها ونغير توقعاتنا منها.. هي مش جمعية أهلية.. الموضوع أكبر من كده. حسب الدستور، فالأحزاب اللي هتشكل البرلمان هي الحاكم الفعلي للبلد، للأن البرلمان هو اللي بيحكم. فوقوا يا مصريين عندنا معركة كبيرة.. فوقوا.
