روح يا محمد اشترى من عند عمك عبدالله السكر والشاى محمد: بس يا ماما دا بعيد قوى ما أجيب من عند عم جرجس لأ يابنى حرام لازم ننفّع عمك عبدالله علشان مسلم محمد: حاضر *** حسين بيلعب فى الشارع مع أصحابه يروحوا يقولوله بتاكل إيه؟ يقولهم باكل ساندوتش عملتهولى أم أبانوب يقولوله الله يقرفك إزاى تاكل من نصارى انت مش عارف إنهم بيستحموا بالزيت *** بطرس بيكلم أخوه فى التليفون من كندا بيقوله يااااااااااااااااااااااااااااه الحمد لله ياخى مش ساكن جنبى ولا حد مسلم على بعد ولا 2 كيلومتر أخيرا أنام مستريح *** كل ما يسمع عبدالرحمن صوت أجراس الكنيسة يقول مش عارف ياخى قلبى بيتقبض لما أسمعها ومش عارف هما ليه بيبنوا الكنايس جنب الجوامع وكل لما يسمع ماركو صوت الأذان يقول: صوته بصراحة عالى قوى حرام عليهم *** مفيش واحد مسيحى مسمعش فى ضهره كلمة من دول: نصرانى.. كفتس.. أربعة ريشة.. عضمة زرقا ومهما تقنع قائلها إنها ممكن تضايقه يقولك هما عايزين إيه أكتر من كده على أساس إن المسيحيين دول مش من البلد *** أيمن بيخرج مع أصحابه فى الشارع ويصادف يكون أحد أعياد الأخوة المسيحيين يروحوا يقولوله: عارف ياد يا أيمن النصارى بيعملوا إيه فى الكنيسة دلوقتى؟ يقولهم إيه يعنى؟ دول بيطفوا النور ويبوسوا بعض أيمن: لا يا عم مش ممكن حرام عليك تفترى عليهم كده العيال: آه والمصحف انت بتتكلم إزاى *** رايح فين يا ريمون ريمون: رايح أذاكر مع محمود صاحبى أم ريمون: يعنى ملقتش غير محمود ده يابنى دا أبوه دقنه لحد نص صدره دا ممكن يسمك ولا يعملك عمل ريمون: إيه يا ماما الكلام ده بس أم ريمون: ياد انت ما شفتشهمش عملوا إيه زمان فينا فى أسيوط ومن غير سبب اسمع كلامى وذاكر مع حد تانى *** لو راح مصطفى علشان يشتغل عند عم جوزيف الجواهرجى يقوله معلش.. عندى عدد كفاية فى حين لو جاله إسحق لازم حيشغله *** مايكل فى لجنة الشفوى عند د. مينرفا يادوب يجاوب على نص الأسئلة تروح تقوله شد حيلك دا انت اسمك على اسم ابنى ويجيب الفول مارك أما بقى أحمد يجاوب أحسن منه ويادوب يجيب النص *** عماد يا عينى علشان مسيحى وطلع من أول عشرين على الدفعة يلف على أقسام كلية الطب قسم قسم ويقولهم أنا ليا تعيين فى الكلية وهما يقولوله لو جيت مش حنثبتك وابقى ارجع بقضية لو راجل وفى الآخر راح قسم جراحة أورام ورجله فوق رقبته *** أما بقى لو حبيت تقول كلمة حلوة فى أخ مسيحى: هو تاجر مسيحى بس أمين هو دكتور مسيحى بس شاطر هو مهندس مسيحى بس بيفهم هو مسيحى بس راجل محترم جداً