علم مصر، صفارة، لافتات تحث المواطنين على المشاركة، أشياء بسيطة نزل بها وليد محمد وأصدقاؤه أمام اللجان الانتخابية بمدارس منطقة المعادى، مقررين أن يشاركوا فى الساعات الأولى للانتخابات الرئاسية: «عشان محدش يرجع يقول الشباب مضحوك عليهم ومش موجودين، إحنا شباب المعادى ونازلين عشان خاطر بلدنا». فى السادسة صباحاً، نزل الشاب العشرينى وأصدقاؤه من منازلهم، فى محاولة لتأمين اللجان الانتخابية بالمنطقة: «قلنا نساعد الجيش فى تأمين المدارس، واتفقنا ننزل من الفجر عشان نقف قدام اللجان ونشجع الناس على النزول»، مضيفاً: «لازم الشباب يرجع دورهم تانى واللى مضحوك عليه يفوق، عشان كده قررنا ننزل». «الوعى الانتخابى» من أهم أهداف نزول «أحمد» وأصدقائه إلى الشارع وسط أهالى منطقته «الناس فاكرة إن اللى فى المعادى كلهم ولاد ناس وذوات وفاهمين، بس الحقيقة إنها زى أى منطقة فيها اللى فاهم وواعى وفيها الغلبان اللى محتاج حد يفهمه ومناطق فقيرة محتاجين حد يوعيهم صح».