- عم صيام (وهو يقرأ على الموبايل): شفتى الخبر دا؟! - منى: خير؟ - عم صيام: بيقول لك يا ستى عادل إمام خد 50 مليون جنيه فى المسلسل بتاعه.. ومحمد رمضان 50 زيه.. وهنيدى 35 مليون. - منى: إيه الملايين دى كلها؟! - عم صيام: خير المصريين.. يصيب به من يشاء. - منى: تقصد خير ربنا! - عم صيام: طبعاً خير ربنا.. مش سبحانه وتعالى هو اللى فرض علينا الزكاة والإنفاق. - منى: مش فاهمة! - عم صيام (وهو يتكئ): أفهّمك يا ستى.. أصل المسائل العويصة اللى زى دى بتحتاج راجل راسخ فى العلم زى حالاتى.. هسألك سؤال: «إيه مصدر تمويل المسلسلات دى؟». - منى: المنتجين والقنوات اللى بتشتريها. - عم صيام: فاهم فاهم.. (يسألها): شركات الإنتاج والقنوات بتلم اللى دفعته منين؟!.. (ويجيب على نفسه): م الإعلانات طبعاً.. ركزى شوية مع إعلانات رمضان هتلاقيها بتتكلم عن التبرعات.. اللى يقول لك: «عاوزين نفطر كام مليون صايم».. واللى يقول لك: «ادفع زكاة مالك واحنا هنصرفها لك».. واللى يقول لك: «بلاها أيتام.. بلاه التعليم.. اتبرع لنا عشان نكنس الشوارع.. ونحافظ على الآثار».. أبواب الخير ما بتخلصش. - منى: يا رب بس الفلوس دى تكون بتوصل للى يستحقها. - عم صيام: أكيد.. إنتى هتعملى زى الواطيين اللى بيقولوا إن الجمعيات بتسرق فلوس التبرعات؟! - منى: بس ما قلتليش إيه علاقة كل دا بالملايين اللى واخدينها الممثلين فى المسلسلات. - عم صيام: ما هى واضحة.. مش اللى بيدفع حق الإعلانات دى الجمعيات الخيرية.. وبيدفعوها منين؟.. مش م الفلوس اللى بتيجى لهم.. يبقى ملايين الفنانين دى منين؟!.. طبعاً من فلوس الزكاة والتبرعات اللى بيدفعها المصريين الطيبين. - منى: لفة عجيبة! - عم صيام: مش عجيبة ولا حاجة.. الناس الطيبين همه اللى بيدفعوا للفنانين دول.. مش جمهورهم ولازم يساهم معاهم فى أى حاجة رايحة لله.. (لحظة صمت ثم يواصل): يا سلام جاتنى حتة فكرة دلوقتى. - منى: خير! - عم صيام: تعرفى، الممثلين دول من العاملين عليها. - منى (باستغراب): من العاملين على إيه؟! - عم صيام: من العاملين على الزكاة.. الممثلين أكتر ناس بتجيب رجل ع المسلسلات.. وبالتالى بيجيبوا رجل ع الإعلانات.. وفلوس الإعلانات جاية م الزكاة.. يبقى اللى بيجيب الزكاة مين؟! - منى: الممثلين طبعاً. - عم صيام: الممثلين والمخرجين واللى بيكتبوها.. وحتى اللى بيشوفوها. - منى (ساخرة): كمان! - عم صيام: طبعاً.. كل اللى بيشوف مسلسل بينوبه ثواب.. عشان بيزود الإعلانات.. والإعلانات بتزود التبرعات.. ولفى يا دايرة.. واكترى يا فلوس.. واقبضوا يا ممثلين.. وخدوا الثواب فوق البيعة. - منى (ساخرة): فيه ناس كتير بتفكر زيك كده يا صيام؟! - عم صيام: الأسهل تسألينى عن اللى ما بيفكرش كده.. شعب حكيم.. تخيلى بقى له 7 آلاف سنة عايش.. وبيشوف نفس المسلسلات وعمره ما زهق.. عارفة ليه؟! - منى (ضاحكة): ليه؟ - عم صيام: عشان بيدور ع الثواب. - منى (ساخرة): واضح إن الصيام عامل عمايله معاك النهارده! - عم صيام: إنتى فاكرانى بخرّف؟!.. يا منى افهمى.. أى بنى آدم بيجمع الزكاة أو بيشرف على توزيعها بيبقى من العاملين عليها.. وله شرعاً نصيب فيها. - منى: كل دا عشان تبرر اللى بتاخده من جمعية الصحابة؟! - عم صيام: حقى الشرعى.. مش عامل عليها؟!