تباينت ردود أفعال الطلاب عقب امتحان التاريخ للشعبة الأدبية للثانوية العامة، والذي أداه الطلاب اليوم الأحد. فصرخت طالبة: "حسبي الله ونعم الوكيل، مجاتش حاجة من بوكيلتات الوزارة، يعني مش كفاية الإنجليزي، طب هنعمل إيه، نموت نفسنا، تعبانين طول السنة، وطالع عينينا، وفلوس وسهر، وبرضة مفيش فايدة". وتابعت طالبة أخرى: "كل الأسئلة كانت جاية لفة، ولا سؤال جه مباشر غير سؤال الحملة الفرنسية، من بعد الإنجليزي وإحنا متوقعين كدة، الامتحان دة في مستوى الطالب فوق المتوسط، لكن مش المتفوق، هو ولا سهل ولا صعب للغاية يعني". وأضاف طالب: "الامتحان زي الزفت، مفيش ولا امتحان جه حلو من أول العربي، امتحان التاريخ جه من فصل واحد والأسئلة كلها غريبة". وأكد طالب آخر أن الامتحان طويل جدا وورق الأسئلة تم تسليمه بعد الوقت بحوالي 45 دقيقة، وتابع "في أولاد جوة بتعيط وحالتهم صعبة جدا تصغب عليك". وأشارت طالبة إلى أن الامتحان كان به أسئلة صعبة وأسئلة سهلة، ولم يكن من خارج المنهج لكنها غير متوقعة. وعلى عكسهم أكدت طالبة أن الامتحان كان به بعض "التكات" فقط، والأسئلة الصعبة كانت حوالي 3 أسئلة لكن الامتحان بشكل عام حلو.