كنت أتمنى دائماً أن يكون لدىّ بنت، رزقنى الله بولدين أفخر بهما وهما قرة عينى ولكنى كنت أحلم بالبنت أيضاً وأحسد «أبوالبنات» على كم الحنان وإشعاع البهجة وروح السعادة التى تضفيها البنت على البيت وساكنيه خاصة الأب، ولكن ما يحدث الآن من تحرش وحشى فاجر وسافل للبنات فى مصر وأد وأجهض هذا الحلم لأنه من المفروض عليك مع كل بنت تخلفها أن تتبعها بخلفة خمسة بودى جاردات يصحبونها إلى حيث تذهب ويرافقونها فى كل خطوة، وباء التحرش الذى لا بد أن نخجل منه كمجتمع يطعن فى رجولتنا وإنسانيتنا، وباء حوّل بعض المراهقين إلى حيوانات وبعض الرجال إلى وحوش كاسرة بلا مشاعر أو قلب، وثّق بعض البنات شهادتهن عن التحرش فى الأيام الماضية بشجاعة وجسارة لا يملكها الرجال، شهادات مغموسة فى الدمع والدم، كأنك تشاهد فيلم رعب تبصق بعده على جميع رجال المشهد الذين فقدوا النخوة والضمير والإنسانية، تبصق على مجتمع يتعامل مع البنت كدمية جنس ويتصرف مع جسدها كدبيحة جزار مستباحة لذباب الشارع، اقرأوا هذه الشهادات لعل الضمائر تستيقظ ولعل الأمل يعود فى مصر التى علمت العالم الذوق والحضارة والإنسانية ونخشى عليها من أن تتحول إلى غابة، سأعرض عليكم شهادة واحدة كنموذج، فاقرأوا وعوا: شهادة سلمى شامل: مسكت فى صاحبتى جامد جدا وأنا حاسة بكل الأيادى بتفعّص فى كل حتة فى جسمى وبعد كدا محسيتش غير وهمّا بيزقونا، وفى وسط كميات رهيبة وتدافع رهيب بنتحرك بعيد عن عربية الفول (اللى كانت حامية ظهرنا) وفجأة بقينا فى نص الشارع والخمس إيدين بقيت أكتر بكتير بيمسكونى من كل حتة فى جسمى وبأصابعهم يضعونها فى مؤخرتى وفى سوستة بنطلونى بمنتهى العنف والوحشية. شعرت بشىء مدبب وخفت جدا لقيت واحد بحاجة صغيرة مدببة بيحاول يدخلها بنطلونى. كنت باصرخ ومخنوقة جدا وباعيط ومش عارفة أعمل أى حاجة... فضلت أصرخ بهستيريا... فضلت أصرخ «حرام عليكم.. حرام عليكم» لفترة طويلة جدا، مش عارفة ليه... ما كنتش شايفة صاحبتى خالص، كانوا بيشدوا الكوفية حولين رقبتى وبيخنقونى وبيجرونى منها وأنا مخنوقة ومش عارفة أتنفس، نسيت كل النصائح، نسيت إنى لازم أبقى هادية وإن صراخى بيجذبهم أكتر، كل ما صرخت اعتدوا عليا بوحشية أكتر، وشفت بعينى شخص (أنا فاكرة شكله، أقل من عشرين سنة وقصير وفى منتهى الوحشية) بيقطع البلوفر بتاعى وقلعه لى وفضل يمسك صدرى وفى نفس الوقت ناس بتنتهك جسمى من كل حتة، كنت قرفانة وتعبانة جدا، حسيت إنى بيغمى عليا، كنت خايفة جدا إنى أقع على الأرض، تكاثرت الأيادى والتدافع وأنا فجأة بطلت أصرخ، كنت مش عارفة أتنفس ودايخة جدا وكنت خايفة إنى أقع وأموت، أنا فعلا كنت حاسة إن الموت مش بعيد تماما، التدافع والزحمة كانت لا تصدق، وفضلت أقول للولد اللى ماسكنى من صدرى إنى باموت وفضلت أحاول أقنعه إنى هاموت وإنى مش عارفة أتنفس، فى وسط كل التدافع دا والبلوفر وصل لرقبتى وبقيت عارية الصدر تماما وكل اللى حواليا بيمسكونى من صدرى وواحد بيحاول يفك حزام بنطلونى ويشد بنطلونى بعيد عن جسمى عشان يبقى فيه مكان لواحد تانى يدخل إيده، دخل إيديه جوه بنطلونى وقعد بصوابعه يخربشنى ومسك فيا بكل قوة وحضنى وقعد يصرخ «سيبوها يا ولاد.. سيبوها» وهو بيصرخ بيدخل صوابعه كلها جوة بنطلونى وكتير بيمسكونى من صدرى وناس كتير جدا بتزق، وأحزمة بتضرب فى كل حد فى كل حتة، كنت حاسة إنى هارجع ودايخة جدا، ماعرفش فات وقت قد إيه وتدافعنا إزاى لحد ما وصلنا لركن فى الحيطة وحمينا ظهرنا فى الحيطة اللى جنب بيتزا هت وراجل قعد يضرب كل اللى حوالينا ويقول حرام عليكم هتموت منكم، فجأة لقيت نار مولعة قدامى من سبراى والجموع كلها بتتفرق، زى الحشرات. فضل المتحرشين لازقين فينا مكملين اعتداء، وهنا شفت صاحبتى جنبى تانى، وأقذر المخلوقات ماسكانى من كل حتة فى جسمى ويصرخ وكأنه يدافع عنى وهو فى الحقيقة إيديه جوة بنطلونى، يصرخ سيبوها سيبوها (كان كل تركيزى إنه مايفكش حزامى، وفى نفس الوقت كان فى اتنين فى منتهى الهدوء واقفين جنبى يضعون أصابعهم ويمسكون بمؤخرتى، ولعوا نار أكتر وفجأة بقى فى ممر إننا نجرى ندخل بيتزا هت، الناس زقتنا لجوة وحاول باقى المتحرشين الدخول والهجوم على الناس اللى واقفة برة وكانوا بيصرخوا ويرزعوا على الباب. قفلوا الباب بالحديد تماما وادونى بلوفر وصاحبتى دماغها كانت كلها دم.
