حكت الفنانة الكبيرة ليلي علوي عبر صفحتها علي مواقع التواصل الاجتماعي" فيس بوك" حكاية أول بطولة لها في السينما فقالت ..أول فيلم أقوم ببطولته كان البؤساء.. وكنت مرعوبة وقتها لاني همثل مع عملاقين وهما يوسف وهبي وفريد شوقي... واللي رشحني للبطولة وقتها النجمة الكبيرة هدى سلطان وده بعد ما شافتني في مسرحية (ثماني ستات)وكانت مبسوطة مني جدا، ووقتها قررت تعزم مخرج الفيلم عاطف سالم عشان يجي يشوفني في المسرحية واتبسط جدا ووقتها قرر يسندلي البطولة رغم أني كنت صغيرة ولسه بروح المدرسة، وكانت ناهد فريد شوقي تضطر تجيلي كل اليوم المدرسة عشان تخدني للتصوير. أصعب حاجة أن أول مشهد كان مع يوسف وهبي وأكيد كنت خايفة جدا، ومش عارفه هعمل إيه، لكن لقيته نداني وبدأ يتكلم معايا قبل التصوير عشان يحاول يكسر الخوف اللي جوايا وسالني إنتي عندك كام سنة؟ وساكنه فين؟ وفي مدرسة إيه؟ ولما لقاني مش خايفة منه وبتكلم معاه عادي قال للمخرج يلا أحنا جاهزين. الفيلم بطولة:يوسف وهبي، عبد الوارث عمر، فريد شوقي، عادل ادهم، محسنة توفيق، فردوس عبد الحميد، نبيل نور الدين و ليلي علوي.
