كريمة عبد الفتاح "مناديل.. حد عايز مناديل.. بنص جنيه المناديل" صاحبة تلك الكلمات السابقة هى الطفلة آية محمد على بائعة المناديل فى محطة مترو المعادى وتبلغ من العمر 8 سنوات. تعيش فى منطقة العرب بالمعادى، تأتى يوميا للمحطة لتبيع المناديل بإذن من والدتها الست "أم حمادة" التى تبيع خارج المحطة المناديل أيضا. وعندما سألتها عن سبب وجودها تبيع داخل عربة المترو قالت: "إحنا مش معانا فلوس وأمى بتنزلنى معاها أنا وأختى عشان نساعدها، وأبويا شغال شيال رمل فى السيدة زينب وحصله "فتح" فى ظهره وقعد فى البيت فترة طويلة وبعد كده نزل تانى الشغل بس هو تعبان، وعندى 5 اخوات شغالين على توكتوك إيجار، وواحد منهم عمل حادثه بالتوكتوك ومركب شرائح كتير فى رجليه وإحنا كلنا كده عايشين فى أوضه" وعن الذى تتعرض له داخل المترو قالت "الناس بيشتمونى ويقولولى كلام وحش والعيال اللى بتبيع زيى بيضربونى ومش بعرف أعملهم حاجة غير إنى أعيط وأروح لأمى وتقولى معلش استحملى". وعن أحلامها قالت "نفسى أوى أدخل المدرسة انا وإخواتى ونبقى مهندسين بس احنا مش معانا فلوس نتعلم".