نانسى: خلى شكلى وحش وسط عيلتى.. هو عارف أنا بنت مين دفاتر محاكم الأسرة لا تحمل المآسى فقط، فوسط حكايات الفواجع والخيانة توجد قصص تصلح فى إعادة كوميديا السينما إلى مجدها. دعوى خلع أقامتها إحدى الزوجات، التى تنتمى للفئة المرفهة من مجتمعنا، بعد زواجها بأقل من أسبوعين، لأنه اشترى لها خاتمًا من الألماس ب 250 ألف جنيه، الأمر الذى اعتبرته «إهانة بالغة من زوجها وتعمده التقليل من شأنها ووضعها فى موقف حرج للغاية أمام عائلتها وصديقاتها، نظرًا للثمن الزهيد للخاتم، مما دفعها للانتقام منه برفع دعوى خلع أمام محكمة الأسرة لاستحالة العشرة بينهما»!!. تقول نانسى 26 سنة، فى دعواها للخلع «الحمد لله إن ربنا كشفهولى دلوقتى، قبل ما أنجب منه ولاد يذلنى ويذلهم ببخله، الواحدة بتتجوز راجل عشان يرفع راسها أمام أسرتها وصديقاتها مش يقلل منها ويتعمد إهانتها ويخلى القريب والبعيد يتريق عليها وعلى بخل زوجها». وأضافت الزوجه «زوجى عارف أنا بنت مين كويس وعارف إنى من عيلة كبيرة، من قبل ما يتجوزنى، ودخل بيتنا وعرف إحنا عايشين إزاى، أنا طول عمرى وإخواتى بنتعلم فى المدارس الأجنبية لغاية ماتخرجنا أنا وإخواتى من الجامعة البريطانية، والدى دفع مئات الألوف على التعليم بس، ولازم أتجوز من راجل يعيشنى فى نفس المستوى اللى عشت فيه، وما يخلنيش أقل عنه لا أنا ولا أولادى، لكن زوجى خدعنى وخدع أهلى بعد ما أوهمنا بأنه هيحافظ لى على المستوى اللى عشت فيه فى بيت أهلى، لكنه طلع بخيلًا جدًا وضايقنى أوى بعد ما جاب لى هدية الجواز خاتم سوليتير ب 250 ألف جنيه بس وخلى شكلى وسط أهلى وصديقاتى وحش أوى، وبصراحة بقيت مكسوفه منه». واختتمت الزوجه «أنا مش ندمانة انى هخلعه بعد أسبوعين من الزواج لانه مايستاهلش يتجوز واحدة بنت ناس ولا يدخل عائلات الهاى كلاس، أنا مش أقل من صديقاتى وبنات عائلتى فى حاجة عشان يجيبلى خاتم بالمبلغ ده، هو اتعمد يقلل منى ومن عائلتى ويخلى شكلى وحش، فكنت لازم آخد قرار بسرعة وأتخلص منه قبل ما يذلنى ويذل أولادى ببخله».