أنا كبنت مصرية لما بسمع عن بطولات وإنجازات شباب أوروبا وأمريكا بهز كتافى كده بعظمة وألاطة وأقول وأيه يعنى ده أقل سواق ميكروباص فى مصر بيعمل أكتر منه. بجد يا جماعة سواق الميكروباص المصرى يستحق يدخل موسوعة جينيس من الكنبة الورانية أو جايزة موبل فى الزيت. ببساطة متعدد المواهب عبقرى خارق للطبيعة سوبر سوبر سوبر جينيس أولًا الوحيد اللى قدر يثبت إن المكيروباص بيطير وبيعوم وبيمشى بالجنب وبالورب وع الحيط كمان، العربية حمولتها 14 نفر هو بيخليهم 25 متسألنيش إزاى بيعرف يسوق وهو مقعد واحد على شماله عاااااااااادى جدًا بيعمل مليون حاجة فى نفس الوقت، بيلم الأجرة وينادى ع الزباين ويلف سيجارة ويتكلم فى الموبايل ويشرب شاى ويفك فلوس من اللى سايق جنبه ويسمعنا أغنية الست لما ويشحن الموبايل وأحلى حتة بتعجبنى أنا شخصيا بقى مطاردات توم وجيرى اللى بينه وبين الباشا الظابط اللى بتنتهى إنه يقدر يهرب ببراعة ويحكى للزباين عن بطولاته فى مكافحة الضباط الوحشين اللى بيعكننوا عليه ويخلوه يحمل 14 بس أو يجبروه يمشى فى خط سيره عادى كده زى الناس العاديين وهو طبعا مش عاااااادى. الأجرة مع بعض كده يا إخوانا خدى زميلتك على رجلك يا آنسة خللى الحاجة تقعد، حد يناولنى الأجرة من اللى متشعبط ورا، أربعة ورا وآخرنا المعصرة يلا تحرير رير رير رير رير . والوحيد فى العالم اللى ميعرفش يشتغل غير وهو عامل دمااااااااااااااااغ كم أنت عظيم أيها السائق المصرى. #صباح_النعناع