وعدى التلت الأول من رمضان ومع ذلك لسة نيللى كريم لا ضحكت ولا نطقت ولسة غادة عبدالرازق فى العباسية، وليلى مش لاقية دافنشى. طب بصو يا جماعة يا صناع الدراما بعيدًا عن إن الدنيا ملعبكة معاكو ومضطرين تمطوا حصيرة الدراما عشان تغطى رجليكم قصدى تغطى التلاتين يوم رمضان طيب يعنى على الأقل نتعب شوية يا جماعة حللوا اللقمة اللى بتاكلوها من الإعلانات خلاص مصمم إن المسلسل تلاتين حلقة يبقى نتعب نفسنا ونحط حوار نملى بيه الحلقات ذنبى إيه أنا أقعد حلقتين أستنى ليلى علوى تلبس برقع عشان تقابل دافنشى مع إنه فى الحقيقة بيتلبس فى أربع دقايق يعنى سهلة خالص ثم مين اللى أفتى إن المسلسل لازم يكون تلاتين حلقة ليه مش عشرين أو 15 هيحصل إيه يعنى هيبقى صيامنا باطل مثلًا ولا لا يجوز؟ وبعدين الناس اللى عملت مسلسلات الكيف وليالى الحلمية شوفوا لا التاريخ ولا الجمهور ولا أبو سيد البواب هيسامحكم على العملة دى. خلاص يعنى مافيش أفكار مافيش روايات جديدة مالية السوق مافيش أدب عالمى مترجم مافيش صفحات حوادث حتى تقروها تطلعوا منها بأفكار والله عيب عليكم. ثم لما هو مافيش أفكار لازمته إيه نعمل هبروميت مسلسل ما نعمل خمسة بس يكونو معمولين صح وناجحين ويبقى فل الفل وبعدين الناس اللى بتختار الممثلين ايه الفكرة ان بيومى فؤاد يطلع فى كل الأدوار وكل المسلسلات وكل الحنفيات والإعلانات والسلطات والمحشيات والله هو ممثل جميل وشاطر وكل حاجة بس مش معنى كده ان بفضل قدام عنينا طول الوقت فى كل حتة كده إهدار لطاقة الراجل ومضر جدًا بقوانا العقلية وإحنا أصلًا مش ناقصين.