الجماعة اللى فرحانين بتسريب امتحانات ثانوية عامة دول بيصعبوا عليا والله فرحانين كده وعاملين شاومينج بطل قومى. ليه بقى ليه هه. عشان يعنى هتقفل الامتحان كله وتبقى متفوق حلو، وبعدين تدخل كلية من كليات القمة. طب ما فكرتش إنك مش لوحدك ده بالمعدل ده الدفعة اللى جاية البلد كلها متفوقين ودكاترة ومش هتاقى عيان واحد تكشف عليه آه والنعمة زمبؤلك كده ولا تكونشى فاكر نفسك هتتفوق جدا قوى خالص وتبقى مهم وتشتغل شغلانة محترمة. هو انت يا حبيبى مسألتش على زمايلك القدام أوائل الثانوية العامة فى العشر سنين اللى فاتو راحو فين. أبدا هو بعد الحفلة والمباركات من طنط وخالتو اختفو ومحدش بقى يسمع عنهم ولا حتى فى طبق اليوم ودول كانوا متفوقين بجد مش نص لبة زيك. يبقى انت هتروح فين ياغلبان. والأمهات اللى فرحانة وبتحمل لابنها الامتحان المتسرب. حضرتك مستعجلة على إيه كده كده هيخلص ويقعد جنبك عالكنبة يقرالك ترجمة الفيلم. بصى هو أصا متفوق لوحدها متنفعش لازم تبقى متفوق وحاجة، متفوق وعايش برة متفوق وبابا صاحب شركة متفوق وعندك سوبر ماركت. انما متفوق بس وبالغش وفى دولة ترتيبها رقم 139 من 140 فى التعليم، لا ده انت اللى حالتك خطر ومجموعك يدخلك العباسية عنبر الخطرين.
