لو ناوى تعيا فى مصر تعالى اقولك على قوانين مستشفيات مصر عشان تعرف هما قد ايه بياخدوا بالهم من صحة المواطن، والكلام ده موجود فى كل مستشفى سواء عام أو خاص متفرقش يابنى والله، المريض كده كده ميت مافيش داعى نتعب نفسنا ونعالجه، من حق أهل المريض يصوتوا عليه وهو عايش زى ما هما عايزين، ده بيعجل بوفاته قصدى بيرفع معنوياته. -الدكتور كائن فضائى مبهم لا يرد عليك ولا يطمنك ولا طايقك أساسًا هو كائن صامت. -الممرضة بقى مش صامت دى فيبريشن آه والله أصلها بتبقى ماشية تهز فى المستشفى ولو يعنى عاوزها ترد عليك اظرفها تعرفها وابجها تجدها. -وانت جوا المستشفى أعضاؤك مسئوليتك يعنى لو اتلطش منك كلية أو فص كبد ولا قرنية عين ملناش فيه القانون لا يحمى العيانين. -أثناء إقامتك فى المستشفى لو جالك فيرس أو ميكروب أو أى عدوى ده لامؤاخذة سوفنير مننا مجانا عشان عيونك يابرنس. -لو الدكتور نسى حاجة فى بطنك فوطة موبايل مقص ده مش إهمال منه لا سمح الله ده معناها إنه حبك ومستأمنك على حاجاته. -وبعد ده كله لو فضلت عايش فاتورة المستشفى الخاصة هتجبلك سكتة قلبية وتريحك من عذابك. وإجراءات الخروج من المستشفى الحكومى هتجيب دماغك ما انت الغلطان هو يعنى لازم تعيا فى مصر بطلوا دلع بقى. مع احترامى لكل طبيب بيؤدى واجبه بضمير بس اللى قولته فوق ده أقل بكتير من اللى بيحصل.