أثار مقال نشر عبر مدونة، تحت عنوان :" أوعي تتجوزي مصري"، حالة من الجدل على مواقع التواصل الاجتماعي فيس بوك وتويتر، وتداوله النشطاء بصورة مكثفة، خلال صفحاتهم الشخصية، وفتح باب للنقاش والجدل. وجاء المقال كالتالي: انتي أكبر من كدة بكتير.. ليه تتجوزي واحد أكبر طموحه إنه هياكل محشي على الغداء.. ليه تتجوزي واحد مفهومه عن الرياضة لا يتعدى متابعة نتائج ماتشات كرة القدم.. عادةً بتكون الماتشات المحلية.. ولو هو رياضي أصيل.. ممكن يتابع الماتشات العالمية... ليه تتجوزي واحد شايف الكرش عزوة.. والبنات لعبة.. ليه تتجوزي واحد شايف نفسه ضحى بنفسه علشان عمل لنفسه كباية شاي.. ليه تتجوزي واحد ماسابش فيلم إلا وعلق على كل بنت فيه.. ليه تتجوزي واحد درس تضاريس كل بنت قابلها في حياته ولسبب مجهول قرر يتنازل ويعرفك.. ليه تتجوزي واحد خايف من فكرك... ليه تتجوزي واحد خايف من قوتك... ليه تتجوزي واحد كل هدفه إنه يكسر ارادتك.. ويدمر طموحك.. ليه تتجوزي واحد مفهومه عن القوامة إن التفاهم إتجاه واحد.. وطبعاً انتي ديماً المستقبل.. ليه تتجوزي واحد مش عارف يعني إيه بنت.. مش فاهم احتياجاتها ولا ظروفها.. ليه تتجوزي واحد شايف إنه مسؤلية الرجل محصورة في إنه يجيب فلوس للبيت.. ده بغض النظر هل انتي كمان بتشتغلي أو لأ.. ليه تتجوزي واحد مفهومه عن الاطفال انهم وجع دماغ.. ليه تتجوزي واحد حياته في القهوة وصحابه أهم من أي حاجة وأي حد.. ليه تعملي كدة في نفسك! إذا كان هو لسة مش فاهم يعني إيه مسؤلية... متعمليش كدة في نفسك وتشيلي مسؤلية طفل عنده فوق ال 25 سنة.. إذا كنت والدته مش قادرة على رعاية هذا الطفل الكبير جداً... نصيحتي ليكي... متعمليش كدة ف نفسك.. محدش قال انك مفروض تكملي مسيرة والدته!
خلاصة الكلام... نحن نعاني في مجتمعنا المصري من مشاكل إجتماعية لا حصر لها.. مفاهيم الزواج والإرتباط لدينا غير موجودة.. وإذا وجدت فإنها مشوهة.. ونتيجة لهذا.. نشأت أجيال لا تعرف معنى الزواج.. ولا مسؤليات الزواج.. ولا واجبات الزواج.. وإذا كنا فعلاً ننوي أن نعالج المجتمع.. فلنبدأ بأنفسنا.. ونتعلم ما هو الزواج.. ومنها ممكن أن نعرف أي قيم علينا أن نزرعها في أطفالنا.. لعل وعسى أن ينشأ جيل جديد.. لعله يعرف حقاً.. ما هو الزواج!.
وتسبب المقال في ردود فعل متباينة، حيث قال أحمد عز تعليقًا على ما جاء به"التعميم خسرنا كتير"، وقال أخر:"رجعنا لنقطه الأمراض المجتمعية ودي وليده سنين من انعدام الأخلاق والبعد عن العادات والتقاليد الاوصليه اللي لسه بتتدرس للاجناس الاخري والي قامت عليها حضارات أنا مش بنكر كل السلبيات اللي انتوا ذكرتوها ".
وقال حسام محمد:" المشكلة كمان، إن المصري مكثف مجهوده انه يعدل في المرأة"، وتابع أخر:" على أساس إنكم لاقين مصريين أساسا طيب بطلوا تدوروا على عرسان تعلقوهم".
