السلام عليكم ورحمة الله كيف الحال استاذتنا أسف ما اخدتش بالي من رد حضرتك على الميل الأخير ومتشكر جداً لاهتمامك ،، دلوقتي انا داخل في مشكلة من نوع ما وردش علية أبدا وما سمعتش حتى عنه من أصحابي .. انا متجوز والحمد لله راضي بعيشتي تماماً وزوجتي ست فاضلة وأنا بحترمها واتجوزنا بعد قصة حب شهد عليها الجميع ومعنديش استعداد أفرط فيها وربنا يخليلي أولادي وبالمناسبة انا في اخر الثلاثينات من عمري . من فترة مش طويلة لقيت جارتي اللي في الشقة المقابلة وهية جوزها مضيف جوي يعني مش موجود معظم الوقت مواظبة على عادة غريبة جداً وهية أنها تقعد معظم الوقت فاتحة باب شقتها مش فاتحاه للاخر لكن موارباه بس كل حاجة باينة واحنا عندنا نظام البيت اول ما افتح الباب يبقى في وشة على طول الصالة وهية عندها نفس النظام .. جميل ؟! .. طيب .. وأنا مواعيد شغلي غير منتظمة لأني شغلي خاص بية مش شغال مع حد وبنزل حسب ظروف الشغل ومراتي ست في حالها وملهاش اختلاط بحد من الجيران .. المهم كل ما أجي اطلع من باب بيتي ألاقي الجارة قاعدة في وش الباب متسنطرة وقال ايه بتتفرج على التلفزيون .. لابسه ايه بقى !!!! مرة شورط وتي شيرت ومرة قميص نوم قصير ومرة هدوم عادية لكنها غير عادية ابدا يا رجااااالة .. بقالها على الحكاية دي حوالي شهرين وشوية وفي مرة حكيت لجاري اللي ماسك اتحاد ملاك العمارة وأول ما سمع فضل يسب ويلعن وطبعا الوضع ضايقه واقترح انه يخلي مراته تتكلم معاها على أساس ان مراته بتعمل نشاطات اجتماعية خيرية بالاشتراك مع سكان العمارة وبتجمع كل شهر رمضان وأوقات تانية كتير تبرعات وهية مسئولة عن جمعية خيرية خاصة فبالتالي ليها كلام مع كل ستات العمارة .. وفعلا راحت زوجة جاري كلمتها بالمعروف لكن الغريب ان الولية الوقحة جارتي اللي في وشي بجحت فيها وردت عليها بكلام لغاية دلوقتي مش راضية تقوله لا لية ولا لجوزها واضح كدة أنها كيلتلها ههههههه وأنا دلوقتي مش عايز أقول لمراتي عشان ما الفتش نظرها ويحصل بيننا مشاكل ولا قادر أكلمها بنفسي أحسن تفتكر ان ده جر كلام وهكذا .. والمصيبة بقى ان الولية الغريبة دي ابتدت تقوم بتصرفات تانية غير أنها قاعدة بلبس ملتهب والباب مفتوح اسمحولي مش هقدر اشرح بالتفصيل عشان ما يصحش لكن ممكن أقول أنها بتقوم بعمل بعض الاهتمامات الخاصة الحريمي والباب مفتوح برضه والله العظيم انا مش مصدق عيني ... الغريب اني لسة قارئ في فضفضة مشكلة بعنوان ( جارتي المزة الصايعة ) قعدت بصراحة اضحك مت من الضحك ههههههه قلت يانهر اسود هية الستات جرالها ايه !! بس بالنسبة لجارتي دي الموضوع بدا من مدة بسيطة قبل كدة كانت مختفية مكنتش بشوف لا باب مفتوح ولا غيره وقابلت جوزها كام مرة كدة في الاسانسير والله ما عارف دول حكايتهم ايه بالظبط ومش عايز اعرف لكن سايبلكم الرد والحل وحد يقول لي لو هوة مكاني هيعمل ايه لأني بصراحة انا بقيت محرج من خروجي برة باب بيتي والله العظيم مش ببالغ انا فعلا بقيت احسب الف حساب قبل ما اخرج من باب بيتي يخرب بيت الولية دي خوتتني ربنا يحرقها ست فاجرة . احمد Fadfada@ elfagr.org
