مساء الخير أنا متزوجة من سبع سنوات واستحالت العيشة بيني وبين جوزي فرفعت قضية خلع ولسة ما اخدتش حكم .. مش دي المشكلة .. المشكلة من الناحية القانونية والشرعية أنا رفضاها أنا رافضة فكرة ان عشان أنا اللي بطلب الطلاق يبقى أنا اللي أتنازل عن حقوقي كلها او بعضها حتى ... طيب .. قانون ايه الغافل عن ان فيه أزواج بيطلعوا عين زوجاتهم لغاية همة اللي يطلبوا الطلاق عشان ما يدفعش حاجة ويحرمها من حقوقها طيب فين هنا الدليل على ان الزوج عايز الحرق بجاز مثلا وبيقول ايه الشرع في الامور دي ؟ ليه محدش من علماؤنا يطلع يقول كلمتين يتحاسب عليهم بس يقولهم بحق ربنا ... يا جماعة فيه رجالة كتير جداً بتزهق زوجاتهم علشان الخلاص من اي نفقات وفيه زوجات مش طالبين الطلاق اصلا والزوج هوة اللي جاله مزاجه لواحدة تانية فيفضل يطلع عينها علشان هية اللي تطلب الطلاق ويكون خلص منها بالطريقة دي ... مش بيحصل الكلام ده برضه ؟ اما بالنسبة لمشكلتي .. أنا واحدة من الناس اللي لو هشحت في الشارع هيبقى اكرملي من جوزي اللي بيبهدل فية ليل نهار اصل البيه صاحب كيف وراجل عايز جزمتين على دماغه .. لا بيغير علية ولا بيشوف طلبات بيته وبيشرب حشيش ولسانه أطول منه وابن امه .. طيب فضل ايه عشان يبقى مش راجل ؟ هوة الستات لازم يطلع روحهم في اولها وآخرها .. فين القانون والشرع في القصة دي فين اللي هيحمي الست بعد ما البيه جوزها يخلص منها بالقانون وهوة يعيش حياته ببلاش على قفاها وقفى غيرها .. حسبي الله ونعم الوكيل م. ا
