بما إن ما فيش وقت نضيعه في مقدمات مالهالش لازمه فأنا هدخل في الموضوع علطول .. بأه بص يا سيدي وصحصح معايا كده، النهارده يبقي إيه في أيام ربنا !؟ أيوه ياعم عارف إنه السبت، أنا أقصد يعني الموافق كام في الشهر ؟ ممممم .. شكلك كده مش عارف .... مش عارف .. صح !؟ أهو ده بأه اللي كنت خايف منه لأن نسيانك ده في حد ذاته شيء ينذر بكارثة هتحط فوق دماغ سيادتك في القريب العاجل وأقرب مما تتصور كمان ..! طيب انتبه عزيزي الرجل الغافل .. النهارده 13 فبراير ولما النهارده يبقي 13 فبرابر يبقي بكره إيه! ها مافهمتش لسه أقصد أيه ؟ طب من غيرلف ودوران هقولك بأه ان بكره يبقي 14 فبراير .... اظن كده فهمت!؟ ايه ده ولا اي اندهاش ! .. معقوله مش بيفكركوا بأي حاجه التاريخ ده !؟ طالما وصلنا للحاله دي من الزهايمر العاطفي فأنا مضطر ارجع معاكم بشريط الذكريات شويه بمكن تفوقوا من الغفله و برود الاحساس اللامتناهي ده... 14 فبراير بتااع زماان فاكرينو .. 14 فبراير بتاع ايام الكليه وبوكيه الورد والكارت اللي بيعمل موسيقي لاف ستوري .. 14 فبراير بتاع ايام الخطوبه والدبدوب الاحمر اللي اشتريته وانت بتتقطع من جواك .. 14 فبراير بتاع اول سنه جواز واخر مره تقول فيها كل سنه وانتي طيبه يا حبيبة قلبي... مش فاكر لسه ؟ معقوله ! كده يبدو ان الزهايمر وصل لمرحله مستعصيه يصعب معها العلاج بالنوستولجيا تماما .. انا كده مضطر استخدم اسلوب العلاج بالصدمات واصدمكم بأه واقولكم صراحة ان بكره 14 فبراير عقبال عندكم كده يبقي الفلانتين داي .. ايوه بكره عيد الحب يا اعزائي الرجال المحترمين اعاده الله علينا و عليكم بالسلام والوئام ويعدي علي خير امين يا رب العالمين.... ولكن ولاجل ما يعدي اليوم ده علي خير تعالوا تتفق علي شوية حاجات بسيطه هنعملها مع بعض بكره ونتيجتها مضمونه باذن الله .. أول حاجه واهمهما ان سيادتك لازم تعرف ان مراتك او" حبيبتك" النهارده الساعه 11:59 هتكون في حالة تحفز تامه ليك وبمجرد الساعه ما تدق 12 هتبدأ تقولك كلام من عينة " مش عايز تقولي حاجه النهارده " أو "ياعيني عليا وعلي بختي الهباب " وكلما مر الوقت تدريجيا كلما ازدادت حدة الكلمات وقسوتها .. ولذلك فأول نصيحه لك يا صديقي العزيز انك تخليك انصح منها وتفوت عليها الفرصه دي بانك الساعه 12 بالظبط تقولها كل سنه وانتي طيبه يا حبيبتي النهارده الفلانتين .. اوعي تكون بالسذاجه دي وتفتكر انك بكده خلاص نفدت من كمين الفلانتين داي .. لا ابسولوتلي تبقي عبيط لو فكرت كده .. الحقيقه انك اجتزت اول مرحله من صعوبات يوم عيد الحب اما بعد فستبدأ هي فورا في استخدام الخطه البديله للنكد الازلي بأن تعايرك انك ماجبتش هديه ولو ورده وتبدأ تقولك كلام من عينة "علي فكره الهديه مش بقيمتها لكن الهديه بمعناها" او تقولك "لو كنت جبتلي ورده كانت هتبقي اغلي هديه عندي لكن انا عارفه انى مش فبالك" مع فاصل حزن وغم ونكد .. وطبعا تاني نصيحه ليك عزيزي الدكر المصري انك تفوت عليها الفرصه دي برضو ويكون معاك هديه ايا ما كانت وطبعا كل علي قدر سعته فاللي ماعوش وعلي اد حاله يجيب ورده مثلا اما اللي ربنا فاتحها عليه ومتيسر الحال فانصحه برضو يجيب ورده لان كده كده هيه هتستخدم الخطه التالته البديله وهتبدأ تطلع القطط الفاطسه في هديتك ايا ما كانت وتبدأ تقارن بينها وبين هدية عديلك اللي جابها لأختها وهتنسي تماما كلامها ليك من ثواني بتاع "انا راضيه بورده صغيره والهديه بمعناها مش بقيمتها" وفي الحاله دي يا ايها الشرقي الهمام انصحك نصيحه اخيره ودي بتفرق اوي في نفسية اي امرأه الا وهي كلمات المديح والمجامله ويا سلام لو قلتلها مثلا "انتي خسيتي اوى" أو "شكلك بتصغرى مش بتكبرى ويا سلام سلم بأه لو تقولها ان ملامحها احلي من نانسي عجرم وجسمها اجمل من هيفا ويا عيني عليك تبقى ولد بجد لو صاحب كل ذلك الكدب الحلال خروجه في مكان رومانسي وبرضو كلا علي حسب مقدرته فلو انت ربنا مضيقها عليك ممكن تخرجها علي الكورنيش وتجيبوا ترمس وحمص وسميط او تضربو كشري من ابو طارق ولو ربنا فتحها عليك فانصحك برضو انك تسترخص و ماتوديهاش مكان تدفع فيه دم قلبك لانها في النهايه هتستخدم الخطه الرابعه للنكد الازلي وهتبدأ تتابع تحركات عينيك وعدد دقات قلبك وسرعة انفاسك ويبقي حظك اسود لو كانت واحده حلوه قاعده عالترابيزه اللي جنبك فستكون حضرتك موضع اتهام بالبصبصه والخيانه وهتفتحلك القديم والجديد ومش هتخلص فعشان كده الكورنيش انسب مكان بشرط وشك يكون للنهر الخالد وقفاك ليها اقصد للشارع ولناس وللمخبرين وكده ... اما بالنسبه لاصدقائي الرجال اللي مستتقلين اوي يتنازلو ويقولوا كلمه حلوه لسيداتهن في تلك اللحظه الفارقه التي لا تتكرر الا يوما كل عام فدول بأه مالهمش ديه عندي و حلال فيهم كل اللي يحصل لهم بصراحه وهما اللى جابوه لنفسهم. بعد كل السيناريوهات اللي فاتت تعالوا نتكلم بجد يا بني جنسي الاعزاء واقولكم عيب اوي لو كانت فاتت سنه ما قولتش فيها لمراتك بحبك يا روحي . . انما لو ده حصل لاي ظرف فافتكر ان بكره فرصه لا تعوض لان بكره بالنسبه للسيدات يوم الحسنه فيه تمحو ذنوب سنه قبلها وسنه بعدها .. فحيا علي الحب غدا وليغفر الله لمن اضطر ان يكذب غير باغٍ ولا عاد .
