لا أنسى البيان الذى تلاه عمر سليمان يوم التنحى.. لا أنسى ملامح وجهه.. لا أنسى حين ختم بيان تكليف مبارك للمجلس الأعلى للقوات المسلحة بإدارة شئون البلاد.. الفارق كبير بين بيان التنحى وبيانه أمس بخوض انتخابات الرئاسة.. كأن مبارك هو الذى تلا البيان الأخير.. الإخوة والأخوات أخدنا الصابونة.. إليكم تفاصيل الحوار: ■ شفت التمثيلية.. مظاهرة واعتصام.. بعدها بيان على طريقة مبارك! ■ هتجنن.. البيان جاهز، والتوكيلات جاهزة.. والانسحابات كمان! ■ عمر سليمان نزل.. كله خلاص «بيتك بيتك»! ■ آآآآه، عمر سليمان جالكم.. خبوا عيالكم! ■ طيب والإخوة المرشحون.. اللى فلقوا دماغنا.. وبعدين بدأوا ينسحبوا! ■ غريبة.. كلام عن انسحاب شفيق.. الأنكت منه خيرت الشاطر! ■ تفتكر ممكن شفيق.. بس الشاطر ليه؟! ■ الصفقة كده.. وصال ودلال ورضا وخصام.. يسخن وينسحب! ■ بيان الترشح يحتاج دراسة.. طريقته وصياغته.. من كتبه؟! ■ صراحة.. اللعب على كبير أوى.. أيها الإخوة والأخوات! ■ تصور عمر سليمان يتحدث عن استكمال الثورة.. وتحقيق الاستقرار فى البلاد! ■ المجلس العسكرى هيساعده، والإخوان كمان قبل الفلول! ■ دلوقتى هما فى موقف رهيب.. لأن الشاطر نزل متسرعاً؟ ■ تمنى الإخوان لو ترشح «سليمان» قبل نزول «الشاطر».. علشان اللعبة تبقى مبلوعة! ■ الإخوان هيدوا لمين؟.. الشاطر ولا سليمان؟! ■ إنت قاااااسى أوى؟.. إلى هذا الحد هما بلا مبدأ؟! ■ لأ يا سيدى.. المتغيرات على الساحة، والظروف والجوابات، والذى منه! ■ ورجال مبارك يفضلون عمر سليمان.. شفيق يبقى النائب، والشاطر رئيس وزارة! ■ شفيق نفى انسحابه.. وأعلن استمراره فى الماراثون! ■ إيه يعنى؟.. مش معقول هينسحب من أول يوم.. سليمان لحد إمبارح كان بينفى! ■ فعلاً.. ماتاخدش على كلامهم.. ولو حلفوا على المصحف. ■ كله كداب.. بيستغلوا عبطنا.. إحنا دايما بننسى! ■ النغمة كلها اتغيرت من امبارح.. ولسه لما الباب يتقفل! ■ عندك طعون وعندك تنازلات.. والحكاية هتبان وتنكشف! ■ لو اتفق شفيق وسليمان.. عمرو موسى راح فى الكازوزة! ■ يا حبيبى المهم واحد منهم.. كلهم واحد، وكلهم مبارك! ■ نفسى أشوف موقف الرئيس عمر سليمان، من محاكمة الرئيس المخلوع! ■ ده أول خازوق، يقابل أى رئيس جديد! ■ صبيحة حلف اليمين الدستورية.. وحياتك! ■ أحياناً أتساءل: وإيه رماهم على المر؟! ■ حلم الرئاسة يا صاحبى.. أو فكرة تغيير مسار الثورة! ■ بيقولك هنستكمل الإصلاحات الثورية.. وهيعمل الاستقرار! ■ جيل الاستقرار مايعملش ثورة.. ولا يستكملها.. ولا يؤمن بها! ■ أموت وأعرف همه فاكرينا هُبل ولا عُبط؟! ■ والله الدور على الشعب.. هوه اللى هيختار. ■ الشعب زهق وكره الثورة.. لعبوا على النقطة دى فى الفضائيات! ■ لأ، عملوا سياسات وثورة مضادة.. بعد كده إعلام الفلول اشتغل! ■ الشعب يريد حسنى مبارك.. يريد من ينقذه من الثورة! ■ ههههههه.. حقيقى وصلنا لكده.. بيقولوا فين أيام مبارك؟! ■ خلاص هيرجع لهم مبارك.. متفرقش كتيييييير! نقلًا عن "المصري اليوم"