كتير ياريس تنازلك وتوجيه الدعوة للقوي السياسية لمناقشة أزمة سد النهضة، كتير ياريس انك تعتبرهم الجيش والمخابرات وخبراء الري والهندسة وأساتذة القانون الدولي.. يانهار أبيض علي التواصل البناء بين الرئاسة والقوي الوطنية.. أحلي حاجة الحوار ياريس.. اللي زعلانين من اذاعة اللقاء علي الهوا يتفلقوا.. المهم شفافيتك ورقة عباراتك وجمال أحاسيسك.. خوفك علي السمك ياريس مبهر.. انتاج السمك هاينخفض في السودان بسبب تحلل النباتات واخراج الغازات، وكله بسبب السد؟! إنسانية متناهية.. طب وحياة ام أحمد وغلاوتها ماخفتش علينا نموت ياريس من العطش قبل السمك مايموت من الغازات؟.. سيادتك متصور كام قولون في مصر اتشنج عصبيا وصاحبه كان هايموت من الغازات بسبب رجعتك المباركة من اثيوبيا والإعلان مباشرة عن سد النهضة، واعتبار الخارجية إن السد لن يضر واستهزاء الري بكلامنا؟!.. قطع لسانهم ياريس اللي لسنوا علي شفافيتك ونزاهتك ونقلوا عن صحيفة اثيوبية اسمها نازرت انها بتقول ان سيادتك أخذت مليار دولار عشان تفوت السد من تحت الترابيزة.. قطع لسانك يانازرت ياوحشة.. طب تصدق بإيه ياريس ان تراجعكم خللي الدمعة هاتفر من عيني.. عين العقل.. صحيح تراجعكم جاه تحت الضغط الشعبي والإعلامي.. وصحيح إن التراجع سبب تشنج القولون تاني لأن الرياسة كانت بتقول أي كلام بدون أي دراسة وبتتحكم في مصير شعب عن دون علم.. لكن موش مشكلة ياريس.. إحنا فداك، صحيح الحوار مع القوي الوطنية علي الهوا مباشرة عمل شوية مشاكل تافهة ياريس.. السودان زعل قوي.. عيب برضه الكلام اللي اتقال في حقها وواجب نحب علي راسها، الأخت الشقيقة تتشتم كده عيني عينك ويتقال علي موقفها مقرف؟!.. طب موش موقفها كان نفس موقف الرئاسة قبل الهوجة علي السد؟.. موش مهم ياريس.. هو انت اللي قلت الكلام لا سمح الله؟.. انت سكت بس والسكوت موش علامة الرضا ولا أي حاجة.. المهم إن دي قوي وطنية واتحرقت خلاص.. اتبخرت ياريس.. بح.. طب تصدق.. ضربة معلم ياكبير.. الولاد بتوع اليوتيوب عملوها نكتة سيادتك.. قال ايه حضرتك ومدام باكينام عملتم الكاميرا الخفية للضيوف.. اللقطات اللي شايفينها كلها طبيعية.. اللي قالك الكورة ياريس هاتخليهم يوقفوا بناء السد.. واللي قالك نعمل اشاعات اننا هانضرب والمخابرات تلعب يا ألعاب، واللي قالك أبصر إيه.. وسيادتك الوحيد والست باكينام وسي خالد قزاز اللي كنتم عارفين ان دي موش تسجيلات تاريخية لحفظ الجلسة في ارشيف الرئاسة.. إيه الفرق بين الإذاعة علي الهواء وتسجيل جلسة للتاريخ؟ ولا حاجة ياريس.. التاريخ ممكن يختفي.. ماحدش يعرفه خالص.. يتزيف.. يتقال الرياسة دعت للحوار والناس لم تتجاوب.. لكن الهوا مالوش دوا.. الفضيحة بتحصل وخلاص.. الأدب حلو برضه وكل واحد كان لازم ياخد درس ويتعلم علشان بعد كده يلم لسانه.. ياريس الناس دي جت لسعادتك غلط.. كان لازم ييجوا الدستور مايطلع وقبل قانون الانتخابات وقبل التغيير الوزاري وقبل صندوق النقد وقبل قانون الصكوك وقبل مشروع اقليم القناة.. ماجوش في كل ده ياريس وفرحوا لما جبتهم في غرقة السد اللي موش شغلتهم خالص.. يستاهلوا اللي جرالهم ياريس.. ذعت خلاص؟! والست باكينام قالت نسيت تبلغهم؟! هوه فيه حاجة إسمها نسيت ياريس؟!.. يالله.. ياما ناس اتحرقت من بداية الثورة وحتي الآن.. وقعوا ماقاموش.. كانوا عاملين أبطال ومعارضة وقال اتسجنوا واتعذبوا وطلعوا في الآخر فاشيين ويبيعوا أي شيء.. جت علي دول ياريس.. وامتي؟ قبل النزلة الكبيرة للشعب يوم 30 يونيو ياكبير! موش فارقة ياريس مصر ولادة.