كشف الرحالة المصري أحمد حجاجوفيتش عن مصير القطة المصرية التي إختبأت في حاوية علي متن سفينة بمصر حتي وصلت إلي بريطانيا. قال حجاجوفيتش أن 'كتير من المصريين كانوا بيتكلموا الفترة اللي فاتت علي القطة المصرية سندباد اللي هربت من مصر لبريطانيا في سفينة شحن و فضلت حوالي 5000 كم و 17 يوم مستخبية في حاوية علي السفينة من غير ولا مياة و لا أكل لغاية ما وصلت بريطانيا و البوليس إكتشف إنها موجودة هناك و جابولها الإسعاف و طاقم الرعاية الصحية و الشعب البريطاني إتبرع ليها بأكتر من 4000 جنيه إسترليني '47000 جنيه مصري' عشان يتحملوا مصاريف رعايتها في ملجأ الحيوانات الأليفة، مش بس كده ده فيه ناس كتير حقدوا علي القطة و عملوا عليها كاريكاتيرات'. وأكد الرحالة المصري أن 'الجميل إن القطة سندباد ما كانتش أول حيوان مصري يحصل فيه كدة الحصان اللي في الصورة ده إتولد في مصر و كان حيموت خلاص من المرض و الإهمال الشديد بسبب إنه أعمي عماء كامل من أول ما إتولد.. لولا إن صاحب أكبر مؤسسة للرفق بالحيوان بالنمسا عرف بالموضوع.. فقرر يشتريه عشان ينقذ حياته و يوفر له حياة آمنة و مريحة، مش بس كدة، ده مجموع تبرعات الناس للحصان المصري الأعمي في النمسا حتي الأن وصل 500 ألف يورو ' حوالي 5 مليون جنيه مصري '. وتابع 'الحصان ده بيجيب حوالي 300 زائر يومياً لمزرعة مؤسسة سالزبورغ للرفق بالحيوان بالنمسا عشان يشوفوا أد إيه الحصان المصري مثال للصبر و العظمة، و بالفعل الحصان دلوقتي بجييله كمان مئات اليورو 'آلاف الجنيهات' تبرعات يومياً من كل أنحاء العالم و ده عشان يعيش أطول فترة ممكنة و يتوفرله حياه كريمة'. ونوهه أحمد حجاجوفيتش أن 'الغريب في الموضوع إن مؤسسة سالزبورغ للرفق بالحيوان عندها دلوقتي آلاف الحيوانات و الطيور، لأنها فاتحة بابها لجميع الناس من أنحاء العالم إنها تبعتلهم أي حيوان أو طائر مريض أو يتيم أو محروم من السعادة و الحرية و هما حيتولوا رعايته كاملة، بس المهم إنك تدفع مصاريف شحن الحيوان أو الطائر لغاية عندهم و تكون الحالة مستدعية الرعاية.. و إطمن خالص لأن اللي إنت حتبعته حيعيش عيشة 5 نجوم و مثال علي ده الكلبين اللي في الصورة دول حد في العراق لقاهم مرميين في الزبالة في الشارع و بعتهم للمؤسسة و شايفين إزاي عايشين في أوضة خاصة بيهم بس بسرير و كنبة و سجادة و بطاطين و نجفة كريستال و الأوضة مكيفة في الصيف و مدفأة في الشتا'. واختتم كلامة قائلاً 'الأغرب من ده كله إن فيه قسم خاص في المزرعة ديه مخصصة للحيوانات اللي بتتعالج من الاكتئاب.. الإنسانية حلوة مفيش كلام'.
