من رحم المعاناة والقسوة يولد النجاح ومع الإصرار والرغبة في النجاح يخلق الأمل ومن شدة ضربات المجتمع يظهر المعدن النفيس تلك صفات سعدية السيد الأم التي اختارت الحلال طريقا لقوتها وقوت أولادها بعد أن طلقها زوجها لتصارع أمواج الحياة من فوق تروسيكل لنقل البضائع داخل منطقة الفجالة. وتروي سعدية قصة كفاحها ل »الأخبار» التي بدأت تظهر من عيون قمر ابنتها الكبري التي تفتخر بكون والدتها أشهر سواقة تروسيكل في الفجالة لتوجه للمجتمع رسالة أن ستات مصر (جدعان ) وأن الشغل في مجتمع ذكوري مش عيب بشرط أن تكون لقمة العيش حلال. • في البداية سعدية انتي إيه حكايتك ؟ - حكايتي بسيطة جدا أنا عندي 3 أولاد ومطلقة من كذا سنة وزوجي ترك لي أولادي فكنت قدام اختيارين الأول اما نتسول أو اشتغل في حلال ربنا وده الاختيار اللي اختارته. طيب وإيه حكايتك مع التروسيكل ؟ - في الحقيقة التروسيكل ده مصدر رزقي معنديش غيره والله علشان أعلم ولادي وأكلهم وأشربهم فكرت اشتغل إيه لاقيت فكرة التروسيكل جت في بالي ومكنتش وقتها بعرف أسوق ودعيت أسوق والحمد لله بقيت سواقة بريمو. وجبتي حق التروسيكل منين ؟ - أنا اشتريت التروسيكل من 3 سنين بألفين جنيه وقسطت الباقي والحمد لله دفعت حقه كله من عرق جبيني والحمد لله. سعدية مكوك الفجالة ده الاسم المشهورة بيه هنا اشمعني؟ - والله ده شرف ليا الناس توصفني إني ست بتاعة شغل ليل نهار والله بشتغل واشيل الشغل علي كتافي وبوصل كتب وأدوات مدرسية من محل للتاني أو من مخزن لمحل أو من منطقة لمنطقة وربك بيكرم. وزنك وشكلك قليل أوي إزاي بتشيلي الأحجام دي ؟ - اقسم بالله ربنا سبحانه وتعالي بيديني قوة غريبة تخليني اشيل حاجات الرجالة نفسهم مش بيقدروا يشيلوها تقدر تقول كده ببركة الله. والمعاكسات اللي بتقابليها والتحرش وانتي بتشتغلي وسط مجتمع ومنطقة ذكوريّة بتتعاملي معاها إزاي؟ - انا بحترم نفسي أولا فالكل بيحترمني الكل عارف مين سعدية ( أم قمر ) ودي بنتي الكبيرة واللي بيفكر يتعدي حدوده بعرف أكون وقتها راجل وأتعامل معاه كأني راجل وقتها مش بيفكر يقرب ناحيتي. ولماذا اخترت منطقة الفجالة ؟ - الفجالة منطقة جميلة كل اللي فيها ولاد بلد جدعان والله يرحمه جدي كان بيشتغل فيها زمان وليه ناسه اللي كانت بتحبه. واضح إن شغلك مواسم في نقل الكتب الدراسية والكشاكيل وده معناه إنك بقية السنة عاطلة ؟ - فعلا أنا شغلي مواسم لكن أنا مش بحب قاعدة البيت ربنا بيرزقني بنقلة موبيليا كام جهاز موبايل علي كام حتة قماش واهو بترزق. سعدية انتي متعلمة ؟ - أبدا أنا لا بعرف اقرا ولا اكتب أنا كل خبرتي من الدنيا وحكاويها. وإيه حلمك ؟ - نفسي أعلم أولادي التلاته وأشوفهم في وظايف حلوة أتشرف بيهم. بنتك قمر في الصف الأول الإعدادي مش بتتكسف أو بتخبي إن امها سواقة تروسيكل ؟ - بالعكس بنتي قمر فخورة بيا جدا وبتتعب في المذاكرة علشان عارفة أد إيه أنا بتعب علشان اجيبلها القرش اللي يعلمها وكمان أصحابها بيحبوني جدا وساعات بوصلهم عالتروسيكل. سعدية سواقة التروسيكل صعبة ؟ - والله صعبة جدا جسمي بيتكسر وعضمي كمان من سواقته وفي رجالة كتير صعب عليهم سواقته انا أوقات بروح بيتنا مش حاسة بكل جسمي من التعب. وإيه حلمك انتي الشخصي بعيدا عن أولادك ؟ - نفسي في شقة تلمني أنا وأولادي وأهم من كده حلمي أعيش وأموت مستورة. محمد عوّاد