وزير التموين الجديد نزل من قطار البرلمان وركب قطار الوزارة ويدوب »القطر» اتحرك وراحت دماغ الوزير شغالة علي طول، طيب اللحمة الناس كرهتها بسبب الغلا وحرمتها علي عيالها، والفراخ الناس زهدتها وبطلت تفكر فيها بعد الكلام عن تعاطيها حبوب منع الحمل مع العلف وأمراضها اللي ما بتخلصش اشي انفلونزا طيور واشي كوكسيديا ونيوكاسيل وحاجات غريبة ما كناش بنسمعها زمان.. يبقي فاضل في التموين إيه، فاضل المقررات التموينية وأرغفة العيش، نبدأ بالزيت والسكر نخلي لتر الزيت اللي هو أصلا 800 جرام وبنبيعه علي أنه كيلو نزود سعره من 7 إلي 8 جنيه والسكر نخليه ب 10 ونص بدلا من 9 جنيه ونقلل الكمية ونشوف، الناس صرخت شوية في الفضائيات وبس.. كده طيب نشوف العيش، الناس مبسوطة والأشيا معدن والمنظومة جميلة وموفرة العيش للناس كلها وما فيش مشاكل، طيب وهو ده ينفع برضه؟! لازم نشوف الحكاية إيه، قالوا إن حصة الدقيق بتكفي المخابز اللي معاه بطاقة ياخد العيش واللي ممعهوش ياخد برضه بالبطاقة الورقية ما هي لها حصة دقيق، واللي ممعاهوشي لا دي ولا دي ياخد عيش حر، ناس بتبيع الرغيف بعشرين قرش وناس بتبيعه بربع جنيه، طيب نشيل بقي حصة البطاقات الورقية يقوم تحصل أزمة ويبقي فيه طوابير وشكاوي وتصريحات وحركة كده، حصلت الأزمة والناس قطعت الطرق في بعض المحافظات والشرطة نزلت تتحايل عليهم وتبوس راسهم وتوزع عليهم العيش ببلاش، عرفتم بقي ليه الست بتاعة المنوفية اضربت عن الطعام لحد ما ماتت لأن جارها بني جنبها وسد عليها الشارع وما لقيتش حد ينفذ لها القانون.