أوعي يا صاحبي يغرك طولك أو عرضك.. أو إن الكرسي اللي كنت بتحلم بيه ح يسند ضهرك.. وغرورك صورلك انك فارس عصرك.. وأوانك لسه مجاش وبكرة بيندهلك.. لو دامت يا صاحبي لغيرك.. عمرها ما كانت جاتلك.. كان غيرك أشطر.. واعرف ان الدنيا دي دوارة بكرة تلبسك الطربوش وبعده تسرقه منك.. وساعتها راح تخسر روحك وتخسر وياها نفسك.. وان النعمة اللي نزلت م السما وناديتلك.. لازم ح تزول من وشك علشان طمعك وظلمك للناس اللي كانت بتحبك وفي لحظة عرفت أصلك.. ياما طرابيش زيك قعدت علي ريش نعام.. وركبت علي ضهر الخلق.. وصبحت في الصف الأول قدام.. وكان ليها هيبة وطلة مهيبة.. واترفعت ليها الأعلام.. والناس عاملوها علي انها أساطير وكلامها ولا في الأحلام.. وعقولها بتفجر أفكار مكتوبة ع الجدران وفي عيون الأصنام.. لكنها أخدت أيامها وراحت وطواها النسيان بمرور الأيام.. وان كنت يا صاحبي عايز تعرف طربوش من دول.. ح أحكيلك عن طربوش طيب كان عايش وسطينا وفجأة ركب المركب ساق بينا.. لكن من يوم ما مسك الدفة نازل طلتيش فينا.. وعقله طاير منه واللي حواليه عارفين أخره وأوامرهم تسري عليه قبلينا.. وبعد أيام انكشفت أكاذيبه وألاعيبه لينا.. وان الدروشة والصلاة والصوم ما خالتش علينا.. وإن جماعته في اليبت هي الآمر الناهي.. وانه طربوش نعش زي ما راح زي ما جه.. وواخدنا في سكة مزنوقة وضلمة وكلامه بيجيب الهم ويفور في الدم والمركب راح تغرق بيه وبينا.. وهي كده الدنيا دايما بتجيب المعطوب المغلوب علي أمره.. علشان يتعجب صاحب العقل في أمره.. ويضرب ميت كف بكف ويصبر نفسه ويعصر علي نفسه لمونة.. ويدعي مليون مرة ربنا يقصف عمره.. وإن نصحه وقاله.. يا عم الطربوش اوعي تنافق أو حتي تغش.. وفكر في الناس.. دي الناس هما العزوة وهما الأهل.. تلقاه عصبي وعنيد وبليد التفكير وشاف طوله ومش شايف قصره.. ونافش ريشه زي الديك الرومي وعارف انه سابق عصره.. شاور عقلك.. حكم قلبك وارجع لصوابك ولأهلك.. وابني طوبة مع طوبة الكل ساعتها ح يناولك ويساعدك.. وياخد بايدك وعلي طريق الخير والنور ح يدلك.. وان كنت راكب راسك.. وشايل من قلبك احساسك ومخبي الأحلام في شرابك.. بكره يا صاحبي ح نقولك وحياتك.. الباب مفتوح قدامك مستني جنابك تخرج منه ومتقطعش في جواباتك.. وتصبح طربوش ضمن الطرابيش وتلعن أبو خاش اللي لبسوهالك في شبابك.. وريه وسكينة تغنيلك زي ما غنت للمسكينة.. حسرة عليها يا حسرة عليها.. جت رجليها ما جت رجليها.. ذنبك علي جنبك يا أمير وصباحك نادي ونشوف وشك علي خير.