محمد أبوذكرى يا أم الشهيد.. ابنك وليد.. الفرح عيد.. والحزن عيد.. أصبح شهيد.. في يوم سعيد.. صايم لربه. رمضان كريم.. قلبه بيدعي- إقبل صيامي- ويكون سلامي.. لحضن أمي وكل الاحبة في كل بيت. كان ع الحدود.. يحمي الوجود.. يحمي بلادي.. من كل غاشم من كل غاصب.. قلبة حقود.. الضربة جاتله من أخ مسلم.. الاسم مسلم. لكن جبان.. مين إللي باع.. مين إللي خان.. الأم تصرخ..أنا ابني راح.. دمعي جراح.. قلبي في نواح.. أنا ابن عمري.. سندي وضهري.. يا ناس ده راح.. أفديك بروحي.. بلسم جروحي.. بطني اللي شالت.. وعيني اللي سهرت.. ودموعي اللي سالت.. وفي لحظة قالت.. وبكت ومالت.. وقالت يا ناس.. أنا ابني راح.. ده الصبر قبر.. لطفك يارب. إنت اللي عالم وجع القلوب. وجع الفراق.. ومين يجيب حق الشهيد. قمنا بثورة.. حرة عظيمة.. علشان بلدنا تعيش كريمة.. خطفوها ناس قلوبهم غشيمة.. وبعيون لئيمة. راحو شبابنا من بين إيدينا.. الشيخ عماد.. وأخونا مينا.. وزيادة بكير.. وشباب كتير.. الصحبة واحدة.. والارض واحدة.. والموتة واحدة.. والرب واحد.. مئات الضحايا.. مئات القضايا مسكوت عليها.. ولحد إمتي يا حزن قلبي.. عليك يا ضنايا.. يا ميت خسارة.. ضحوا عشنا.. وفاتونا نبكي.. هم السنين.. دمع وأنين.. وإيه راح يساوي تعويض يداوي.. المجروحين. راعي البلاد.. غاب عن وداعه.. مين إللي خانه.. مين إللي باعه.. ياهلتري راعي البلاد.. خاف م العباد.. وإيه راح يقول لما يسأله رب العباد عن الشهيد.. في يوم الحساب. يوم الميعاد هو إحنا اصبحنا يا ناس.. ملناش لزوم.. وملناش ثمن.. وبقينا أرخص م البهيمة.. وبقينا خارج الزمن.. كل الخلايق ماشيه.. وخطاويهم بتجري للإمام. واحنا يا ولداه رجعين.. وخطوتنا لورا.. الكل ي.نهش فينا.. ولا حد يحمينا.. ولا حتي يواسينا.. والهم مالينا.. بهية كانت بتحمي ولادها.. وبتضلل عليهم زي شمعة منورة.. دلوقتي نورها ضلام.. وقلوبنا عتمه.. وضميرنا نام.. وكلمه الحق.. خايفة.. ومحبوسة جوه جوف الحلق.. وبتستخبي من كل ظالم.. وعارفه إنه ظالم- وتقوله يا محترم!. راعي البلاد.، فتح الحدود.. فتح السجون.. عشنا في ظنون.. وجانا هنية.. وقسم معانا.. لقمة هنيه.. والبلطجية صبحوا أسود. في كل شارع.. وفي كل حارة.. خرطوش..وألي وبانجو يا غالي.. اعلنها خمسة. أمن وأمان.. ورغيف زمان.. بنزين مرور.. ونضافة تفرح.. أصل النضافة من الإيمان.. صلوتنا خمسة.. الله أكبر.. ومفيش إيمان.. ولا فيه إمان.. وع الحدود.. ضربوا ولادي.. ساعة الأدان!. راعي البلاد.. ناسي العباد.. ومنح لنفسه أعلي وسام.. نياشين عشان.. تعب السنين.. ابكي يا عيني.. ابكي أنين.. كل الجروح.. عايزة تبوح.. ولمن نروح.. الدمعة أهه.. دنيا متاهة.. إيه اللي صابنا.. وبايديه شطبنا.. من الوجود. رب العباد.. غضبان علينا.. ولا إيه. راعي البلاد.. شكل حكومة.. قلنا يا هادي.. وهي قومة.. قنديل جميل.. نور علينا.. جمع الوزارة.. همة وشطارة.. فاتوا يومين.. ومفيش أمارة.. مترو مزرجن.. قطار يجنن. والميه نايمة.. والنور بعافية.. وبيوتنا ضلمه.. نتلم لمة في أودة واحدة.. ونهدي نورنا لكل الجيران.. دي غزة أولي.. والشمعة لينا.. حضن وحنان.. ابكي يا عين.. ابكي كمان. راعي البلاد.. قطع الرقاب.. مشير.. عنان.. خرجوا بأمان.. هيلاري شاطرة.. والكل راضي.. وكسب الرهان. وبكرة سينا.. تكون كاملة لينا.. ونغني ليها.. كل الأغاني.. إعلامنا حامي.. امسك حرامي.. الكلمة نار.. والقلب ساكت.. ابكي يا عين.. ابكي بمرار. إمتي يارب. ترحم قلوبنا.. تغفر ذنوبنا.. نعرف طريقنا.. والخوف يسيبنا.. ونعرف يا ناس.. مين إللي باعنا.. للامريكان.. ونرفع شعارنا.. ونحمي وطنا.. من كل عادي.. وشباب بلادي.. يرجع ينادي.. أفديك يا وطن. من كل غاصب.. من كل ظالم.. ومن كل جاني.. والعمر واحد. وكله فاني. والقلب واحد.. والرب واحد.هو اللي عالم وشايف المظالم.. قتلوا ولادي ع الحدود.. وسابونا نبكي.. وحصدوا المغانم!.
