يا مصر يا محروسة.. منين أجيب الفرح.. والدمعة محبوسة.. ابني وأخويا وأبويا ع الحدود.. كان هناك موجود .. راح دمه هدر .. ساعة الأدان .. ايدين الغدر الخسيسة الخبيثة.. قررت تمحي اسمه م الوجود .. فين الأمان .. فين الحنان .. فين شياطين الإنس والجن اللي قالوا عنها بتختفي في رمضان .. فين الرجولة.. والشهامة.. والشرف.. فين الدين يا أهلنا.. يا مسلمين.. فين كرامة الإنسان .. فين الخوف من الواحد الديان .. مصر ذليلة يا إخوان!! رمضان السنادي يا إخوان.. مش زي زمان.. رمضان في قلوبنا خايف جبان.. روح المحبة والمودة والحنان.. غابت.. وضاعت.. فين رمضان وروحه السمحة الكريمة ولمة الطبلية.. واللقمة الهنية.. المعجونة بعرق العافية.. والضحكة البريئة الصافية .. فين أهلي .. وناسي.. فين إحساسي .. فين إسلامي .. وسلامي.. فين حب القلوب.. فين لما كنا بنستني الأدان.. وحبة الميه اللي بتروي العروق.. فين الذوق.. والأخلاق.. والحياء.. والرحمة والحنية.. فين مصر اللي قالوا عنها بهية!! قومنا بثورة .. شابة عفية.. حرمونا م النور والمية والأمن والأمان.. وغموسنا بقي يتيم.. محروم.. من حتة اللحمة.. والشمعة والدمعة صبحوا سلوتنا.. في وحدتنا.. وضلمتنا.. يا مين يورينا سكتنا.. وترجع لنا ضحكتنا.. ونصوم ونصلي زي زمان بأمان. ريسنا مرسي.. قال إيه أصدر بيان. وإيه يفيد بيان الشجب والضرب بايدين من حديد علي الورق.. وع الشاشات والتكشيرة والحزن وفوق الوش والفلاشات.. بدون فعل.. واضح.. وفاضح.. ورادع وقاطع لكل إيدين خسيسة.. قتلت ولادنا ع الحدود.. يا ميت خسارة.. ع الإمارة.. فتحنا الحدود والحضن بجرأة وجسارة.. وأهي جت لينا الضربة من كل نفس أمارة.. وإيه يسوي الكلام.. بعد اللي راح ياناس.. دي حماس ناوية علي نية.. ودولة الخلافة مستنية.. وأرض سينا صبحت سداح مداح .. لكل حمساوي وهنية.. يا فرحة وشماتة شارون.. وهيلاري.. وأوباما.. واللي باعوا القضية.. اشرب يا عم مرسي.. بركاتك حلت علينا.. وآه م المستخبي يا بهية!! وايه يفيد الندم.. بعد اللي راح يا ناس.. نفس البيان اتقال من تلاتين سنة.. من غير مروءة أو احساس.. الهم.. والغم.. داخل علينا من كل باب.. جوه.. وبره.. إخوانا جوه عايزينها مغالبة وكله في الكتمان.. والجري للجدعان.. واخوانا بره شغالين أعوان لكل جبان.. لازم نفوق من الغفلة.. ندافع عن شرفنا ودمنا.. ونحمي حياتنا.. وبلدنا.. ونقوم قومة راجل واحد.. لا نخاف من سلطان.. ولاسجان.. ولا إخوان.. وعلشان نعيش بكرامة وشهامة ونقول بعلو الصوت أنا إنسان.. ونقطة الضوء.. في القلوب.. تنور.. تبني.. تعمر.. يجينا الفجر بايدينا.. وكلامنا.. وسلامنا.. وعلامنا نكتبه بدموع عينينا.. ونقول كلنا في رمضان اللي جي طلع البدر علينا.. ونرفع شعار ثورتنا.. عيش حرية.. عدالة اجتماعية .. بصدق.. ونفوق بجد ونعرف اللي جري لينا.
