حامد عزالدىن اسمه سيد شاب مصري أسمر اللون واضح انه من صعيد مصر "الجواني" لم يتلق أكثر من بعض التعليم الذي لم يتخط مستوي الصف الرابع الابتدائي لكنه ابن بلد بكل ما تعنيه الكلمة من معني فهو ذكي لماح "يفهمها وهي طايرة" كما يقولون. لم يسبق لي أن تحاورت معه من قبل علي رغم معرفتي البعيدة به فهو يعمل في صالون الحلاقة الذي أتردد عليه كل شهر أو نحو الشهر في احدي مناطق مدينة نصر. يوم الجمعة الماضي كان موعدنا الذي ترافق مع أحداث العبث وغيبة العقل والحكمة في منطقة العباسية التي شهد خلالها المصريون من الجنون أقصاه عندما حاول شباب مصريون وشابات مصريات استفزاز رجال القوات المسلحة المصرية أمام مقر وزارة الدفاع باستخدام أحط الأساليب وأقذر العبارات في اطار الرغبة في اشعال الحرائق وهدم آخر رموز هيبة الدولة المصرية في تنسيق شيطاني ينتهي باشعال النيران عن طريق احراق عمدي للنيران حول المكان بعد وصلات من القاء الطوب والحجارة والأخشاب وكل ما تصل اليه ايديهم حتي تؤدي قناة الجزيرة دورها المرسوم بنقل صورة مصر التي تشتعل فتسعدهم وتسعد كل الأعداء المتربصين بمصر . ودار الحوار التالي أنقله حرفيا : مارأيك في اللي بيحصل قدامنا ده أمامنا يا باشا - مشيرا الي شاشة التلفزيون - ؟ قلت : ربنا يستر علي البلد يا سيد فالأمور تسير في طريق أسود . تقصد يعني انه مفيش أمل والا ايه ؟ نعم هذا ما أقصده تحديدا.. أين تقيم ياسيد ؟ في المقطم يا بيه من ساعة ما تجوزت قبل كده كنت ساكن في المطرية وكم طفلا لديك ؟ ثلاثة اثنان توأم خمس سنوات والثالث عمره شهرين بس ربنا يخليهمولك يا سيد.. هل ادليت بصوتك في الانتخابات الأخيرة ؟ ولمن أعطيت صوتك ؟ طبعا يا باشا انتخبت وصوتي اديته للكتلة المصرية لماذا .. من الذي طلب منك أن تفعل ذلك ؟ محدش يابيه بصراحة انا حاسس ان الكتلة ناس كده عاديين ما لهمش شكل محدد لا في اللبس ولا في الدقن ولا غيره زيي وزيك.. بس صوتي ما نفعهمش بصراحة عشان انا ما غيرتش محل الاقامة وصوت في المطرية وبصراحة الاخوان والسلف كانوا مرتبينها تمام هناك . يعني ايه مرتبينها قصدك انهم موجودين وسط الناس بيشوفوا مصالحهم ؟ لأ يابيه الجماعة كانوا بيهتموا بان الخضار والبقالة تنزل السوق بأقل من سعرها وكانوا بيبعتوا عربيات نص نقل توزع كل حاجة في فترة الانتخابات عشان الناس تحس ان نجاح الاسلاميين حيخلي الدنيا تمام وايه اللي حصل يا سيد أمال ؟ ياباشا كله رجع زي الأول والفقرا ماعادوش لاقيين ياكلوا وحتي في أزمة الأنابيب الجماعة بداوا ينزلوا أنابيب رخيصة في الأول وبعدين سابوها تغلي شوية شوية لما التجارة حليت في عنيهم. ايه اللي مدايقك دلوقت يا سيد ؟ يابيه الناس بقت تخاف من يوم الجمعة كل جمعة مليونية ومظاهرة واعتصام والبلد حتستحمل ايه والا ايه . عارف يا بيه الناس بتنزل السوق كل يوم خميس تشتري اي حاجة تقدر عليها لأنها خايفة من اللي حيحصل يوم الجمعة فالحاجة كلها بتغلي وكله علي دماغ الغلابه؟ الغلابة بس يا سيد؟ يا باشا اللي بيحصل بقي علي دماغ الناس كلها الفقرا بقوا خايفين علي لقمة عيشهم واللي عندهم بقوا خايفين من وقف الحال وان اللي عندهم يروح . علي فكرة انت فكرتني بحاجة مهمة يا بيه. قول يا سيد فيه واحد تاجر بيجيلي احلقله لقيته من شهرين كده ربي دقنه وطلب حلق الشنب قلتله ليه عايز تعمل كده قاللي هو ده اللي ماشي اليومين دول! يعني تفتكر يا سيد لو الانتخابات اتعادت ايه اللي يحصل في النتيجة؟ أنا شايف ان الناس ماعدتش حتدي الاخوان ولا السلف بعد اللي بيحصل اليومين دول لأنهم كان المفروض هما اللي يهدوا الدنيا بعد ما وصلوا للحكم مش يسيبوها كده هايصة ومحدش عاد بيحترم حد ولا بيخاف من حد. يا بيه الناس بقت بتتفرج علي مصر واللي بيحصل فيها وتتحسر علينا وعلي حالنا . لكن يا سيد الاعتصام والتظاهر ده حق للناس عشان يعبروا عن آرائهم أيوه يا باشا بس ما هو كمان ماينفعش نوقف حال الناس اللي مش لاقية واللي بتاكل لقمتها يوم بيوم ونقول ده حق يعني احنا ياباشا لما نقفل المحل ومانلاقيش نأكل عيالنا يبقي حق برضه. وبعدين يعني ما احنا بنشوف الناس بره تتخانق شوية تتظاهر شوية وخلاص لكن كده عمال علي بطال يبقي ايه المقصود بقي ؟ يعني حضرتك شوفت الناس بتوع العباسية اللي حالهم واقف من ييجي 8 ايام لما زهقوا وطهقوا من وقف الحال عملوا ايه نزلوا ياخدوا حقهم بايديهم ولما الناس في كل حتة حيعملوا كده محدش حيقدر يوقف الموضوع وتولع البلد كلها.. ده يرضي مين بقي بالذمة ؟ !. لكن استخدام القوة لفض المظاهرات مرفوض يا بو السيد يا باشا الجيش بيضرب بالطوب والجنود والظباط بيتهزقوا بكلمات خارجة وعايزينهم كمان يطبطبوا علي اللي بيعملوا الكلام الفارغ ده ؟.. بصراحة دي حاجة تجيب الضغط حرام عليكوا يا بيه اللي بيحصل في مصر. وتواصل الحديث بنفس الشكل وفي النهاية لم أجد أفضل مما قاله سيد الحلاق كرسالة أتمني أن يتشارك الناس جميعا فيها . لكنني علي يقين أن فهم سيد لما يجري هو أمر يستحق كل اشادة وتقدير . اللهم احفظ مصر وطنا للعدل والحرية والأمن والأمان .
