وجه الإعلامي عمرو أديب انتقاداً لحملتي المُرشحين الرئاسيين، حمدين صباحي و المشير عبدالفتاح السيسي، وقال: «مفيش حملة انتخابية في العالم زي كده، لما تيجي تتكلم على حمدين، يقولك لا محدش يضايقه أصله هيمشي، ولما تيجي تتكلم على السيسي، يقولك لا ده مرشح الكتلة الكبيرة والناس بتضايق». وأضاف «أديب» خلال برنامجه «القاهرة اليوم» الذي يُعرض على شاشة «أوربت»، مساء السبت: «أنا عايز أعرف رأي حمدين في برنامج السيسي، ورأى السيسي في برنامج حمدين»، و تسائل: «ليه بتخترعوا انتخابات رئاسية، ليه كل واحد بيتكلم على أساس أنه المرشح الوحيد، كلمونا عن بعض، انتخابات ايه دي وكل واحد قاعد في حته». وتابع: «بلاش مناظرات، اختراع غربي سافل تستفيد منه القنوات الفضائية، طب كلمونا عن بعض، وإيه مش عاجبكم في برامج بعض». وأضاف متسائلاً: «قولولي فين حملة انتخابية في العالم عاملة كده، كل واحد بيقول لا علشان التاني ميزعلش، مايزعل ولا يتفلق، فين البرامج، وهتجيبوا الفلوس منين، الناس رايحة الانتخابات الخميس، مين اللى بيجهز الإنتخابات، هل شايفين إن 26 ده هيكون يوم جبار، ولا الهوا، ما السيسي هيكسب، هتندموا ندم غير عادي».