كلام مسئول

محمد صلاح : يا مساء الخير .. كل سنة وحضراتكم طيبين وعلى رأى سيد حجاب يا ترى احنا اللى بنعيش الزمن وللا الزمن هو اللى بيعيشنا ، الزمن اتغير طب شهررمضان الكريم اتغير ، علاقتنا به من صوم وإفطار وتراويح وسحور وصلاة الفجر ثوابت لكن فيه ناس بتسأل بنسلى صيامنا إزاى دى بقى حاجة ثانية خالص زمان كنا بنستنى الراديو بفوازيره ومسلسلاته والمسحراتى وكمان ألف وليلة وليلة اللى هاجرت للتليفزيون من غير باسبور فما سابتش الاثر اللذيذ اللى سابته لما كنا حتى مجرد نسمع مقدمتها الموسيقية بيفضل الاثر ده جوانا الفوازير بدأت فى التليفزيون الثلاثى ثلاثى أضواء المسرح وبعدين جذبت نيللى وشريهان وغيرهم لحد ما وقفت هم اللى عملوها عباقرة قوى ما جاش حد بعدهم وللا ضعف الاهتمام بفوازير رمضان فى التليفزيون لحد ما حدش بقى عارف هى موجودة وللا اختفت وللا خلاص ما بقى لهاش جمهور وكان ده يعنى البعض بيعتبر كده برضه نتيجة طبيعية لعدم وجود فنانين يوزعوها بقى فن وثقافة وتكنولوجيا وديكورات وطبعا إخراج المسلسلات كمان إتغيرت كنا عايشين بمسلسل واحد 13 حلقة وللا 15 ولما يطول قوى يبقى 30 طول الشهر يعنى أو بمسلسلين وكانت مصر والعالم العربى كله يتهزوا تفضى الشوارع بقى عشان يتابعوا المسلسلين تبقى المواعيد بين الاصحاب يعنى والقرايب والناس بعد المسلسل والحكاوى فى الشغل ثانى يوم شفت مين عمل إيه وقريبى بقى اللى فى الكويت قال لى لانهم عرضوا حلقة بدرى إن البطل مش هتيجوز البطلة فنفرح أو نتضايق على حسب بقى البطل مين والبطلة مين دلوقتى من 40 ل 50 قول 60 مسلسل وعليهم وبقى وللا أدُّهُمْ شوية مسلسلات سورى على خليجى على تركى إيه الزيطة دى إيه الزحمة دى ماسورة مسلسلات وبرامج وانفجرت فى وشوشنا مفيش بقى ليالى الحلمية وللا رأفت الهجان وللا فوازير زى بتاعت نيللى وللا شريهان وللا مسحراتى فؤاد حداد وسيد مكاوى إيه اللى حصل فى رمضان كنا أبسط ، كنا أروق ، كنا أبيض وأسود ولما اتلوننا ضاعت ملامحنا المزاج أحسن من غير الزحام رمضان زمان دلوقتى فى الراديو وفى التليفزيون هيكون لنا عنه كلام مسئول
فاصل تقريرى
المذيعة : كان لحضور شهر رمضان فى الاذاعة المصرية تميز ذو نكهة وطبيعة خاصة كرستها الاغانى الرمضانية الرائعة المؤلفة خصيصا للشهر الكريم ، كل المطربين كانوا على موعد مع رمضان وكذلك نجوم الفن الكبار بأغانى وصور غنائية متنوعة فيما تطورت الابتهالات الدينية وأتحفت الاذاعة المستمعين فى رمضان ببرامج فذه امتد النشاط الاذاعى الحافل إلى التليفزيون وباتت الاعمال المخصصة لرمضان صوت وصورة وجاء زمن المسلسلات فاقتصر التليفزيون على تقديم مسلسل واحد على قناته الخامسة بعدها بدأت المسلسلات تركز على شهر رمضان باعتباره يحقق أكبر نسبة مشاهدة وزاد الاهتمام بعد عصرالتليفزيون الملون ولم تحقق المسلسلات انفجارها المدوى إلا بعد أن عرفت فرسانها فى الكتابة والاخراج والتمثيل وباتت من العلامات
محمد صلاح : رمضان جانا ودايما بيجئنا بنفحاته وخيراته وإبداعاته لكن الابداعات دى محتاجة نظرة محتاجة نعرف بدأت إزاى ورايحة فين محتاجة ترشيد استهلاك قراية للى فيها واللى عليها تليفزيون رمضان زمان ودلوقتى هيكون لنا عنه مع الاعلامى الكبيرالاستاذ وجدى الحكيم كلام مسئول ومن كلام الاعلامى الكبيرالاستاذ وجدى الحكيم " تربى جيلنا بأكمله على الاختبارات الصوتية والثقافية افتقدنا ذلك الان لانه لا توجد صالونات أدبية أو فنية ويوجد نميمة فقط فالكل يعتمد على المعلومة الجافة من الكمبيوتر أحمد الله أننى عشت فى هذا الزمن الجميل وسط هذه الباقة من الكبار وأعتبر نفسى محظوظا لان الزمن اعتصر سنوات عديدة لكى يجود علينا بهذه القامات العالية التى عشنا فى ظلالها ومازلنا نعيش على إبداعاتها ، فى الزمن الماضى كانت توجد منافسة شريفة ولم تكن هناك غيرة أو أحقاد كانوا كبارا بالفعل وإذا أخطأ أحدهم لا يستنكف من الاعتذار والعودة إلى جادة الحق " مائدة رمضان زمان رغم الابيض والاسود ما كانش فيه لسة ثورة الاتصالات ولا تكنولوجيا المعلومات ولا الحكومة الالكترونية عملت حاجات حلوة كتير رمضان يا سبحة وسجادة يا شمعة بالليل منقادة وسبحة رمضان 33 حباية وسيد مع حرمه فى رمضان والراجل ده هيجننى إلهى ليس لى الا انت عونا وماشى فى نور الله ماشى ، اليومين دول فيه إيه فيه الاعلامى الكبير الاستاذ وجدى الحكيم هيكون لنا معاه كلام مسئول ، أرحب بالاعلامى الكبيرالاستاذ وجدى الحكيم أستاذ وجدى كل سنة وانت طيب
أ / وجدى الحكيم : بعودة الايام إن شاء الله ورمضان كريم
محمد صلاح : الله أكرم ، أستاذ وجدى كنت معانا من سنة تقريبا فى حلقة من حلقات كلام مسئول فى ذكرى تحريرسيناء مش السنة دى السنة......؟
أ / وجدى الحكيم : اللى قبليها
محمد صلاح : السنة اللى فاتت وكانت واحدة من أنجح حلقاتى الحقيقة
أ / وجدى الحكيم :الله يخليك
محمد صلاح : السنة دى احنا موضوعنا رمضان كانت الاذاعة زمان يعنى جيلنا كده يعنى جيل الهكسوس وانت طالع للوراء كده يعنى فارضة سطوتها على الكل هى الوسيلة الوحيدة قبل بداية التليفزيون وحتى السنوات الاولى من تواجد التليفزيون لان كان تواجده لسة قليل كانت السينما بتقفل والمسرح
أ / وجدى الحكيم : بيقفل
محمد صلاح : إيه اللى حصل للاذاعة ؟ المنافسة ودت الاذاعة فين ؟
أ / وجدى الحكيم : لا الاذاعة موجودة
محمد صلاح : فى رمضان؟
أ / وجدى الحكيم : طبعا حتى مع ظهور التليفزيون كان فيه التليفزيون بيراعى إن فترة المغرب مش فترة تليفزيونية كان يتركها للاذاعة لان انت وانت بتفطر ممكن تسمع الراديو تسمع الفوازير بتاعت الراديو تسمع مسلسل فؤاد المهندس وشويكار
محمد صلاح : فى الاول؟
أ / وجدى الحكيم : وانت بتفطر إنما مش ممكن والتليفزيون شغال تقدر تفطر والتليفزيون شغال فكان فيه حرص إن فترة المغرب من المغرب للعشاء دى فترة إذاعية حتى الاذاعة كانت بتتنافس فيما بينها وإيزاء مواجهة السطوة التليفزيونية الاذاعة عملت فترة إرسال موحد تعالى يا برنامج العام أحسن برنامج عندك إيه إدوه لنا فى الفترة دى وصوت العرب و إلى آخره فعملت فترة مكثفة تستحوذ فيها على ودن الناس وأعتقد إن الاذاعة حققت وجودها حتى مع التليفزيون لما بدأ ، لما التليفزيون بدأ أخد أجمل ما فى الاذاعة وعمله تليفزيون
محمد صلاح : ما هواللى هنقوله إن الاذاعة فى الفترة دى خدت نجوم السينما وعملت بهم
أ / وجدى الحكيم : كل المسلسلات
محمد صلاح : شادية ؟
أ / وجدى الحكيم : لا مش نجوم السينما بس لا ده كمان المخرجين كبار مخرجى السينما أخرجوا للاذاعة حسن الامام ، صلاح أبو سيف ، الاستاذ عاطف سالم ، كبار المخرجين فى السينما أخرجوا للاذاعة لان كانت الاذاعة هى الاولى فى السماع فى درجة السماع وبعدين لما التليفزيون بدأ وخد الحاجات الاذاعية الناجحة
محمد صلاح : خد إيه بقى من الاذاعة ؟
أ / وجدى الحكيم : كله خد ألف ليلة وليلة إنما تسمع ألف ليلة وليلة فى الراديو غير ما تشوفها فى التليفزيون ، المسلسلات نادية ، لا شئ يهم ، شئ فى صدرى ، كل المسلسلات الاذاعية اللى نجحت خدها التليفزيون وحولها إلى مسلسلات تليفزيونية لكنها موجودة فى ذاكرة الناس النهارده يعنى سنة
محمد صلاح : 2010
أ / وجدى الحكيم : 2010 تقدر يبدأ رمضان من غير غنوة رمضان جانا لعبد المطلب ؟
محمد صلاح : لا يمكن
أ / وجدى الحكيم : دى غنوة
محمد صلاح : بس حطوه فى التليفزيون
أ / وجدى الحكيم : ما هو بس النهارده الغنوة دى من إنتاج الاذاعة سنة كام من أكتر من 55 سنة ليه الله يرحمه أبو نور حكى لى إزاى هو كان ما عندوش فلوس فسمع إن أحمد عبد القادر بيعمل عنده ربع ساعة يعمل فيها أغانى للاذاعة فراح له وقاله أنا محتاج فقال له هديك 6 جنيه وتغنى غنوة فادى له 6جنيه وغنى غنوة رمضان جانا
محمد صلاح : لا وحوى يا وحوى
أ / وجدى الحكيم : لا هى رمضان جانا الاول عبد المطلب بيقول لك إن ال6 جنيه دولة بيشكلوا ملايين الجنيهات بالنسبة له من حيث تواجده عبد المطلب مات بقى له كام سنة إلى متى تستطيع إنك انت ييجى رمضان من غير غنوته رمضان جانا ، من غير غنوة أم كلثوم الليلة عيد
محمد صلاح : آخر يوم
أ / وجدى الحكيم : آخر يوم آه يعنى فيه الاذاعة موجودة بالاغانى وفيه أغانى بقى لا يمكن تقدر تعمل بديل لها فى الزمن اللى احنا فيه يعنى مهما عملت محاولات تظل رمضان جانا هى الغنوة الاولى تظل غنوة يا بركة رمضان خليك فى الدار غنوة محمد رشدى موجودة ، كل الاغانى وكل الاعمال الاذاعية أنا أعتقد إنها موجودة فى التليفزيون حتى المقابلات ما هو انت مقابلاتك التليفزيونية دى مقابلات إذاعية
محمد صلاح : البرامج يعنى ؟
أ / وجدى الحكيم : حتى البرامج ، البرامج كلها مقابلات عبارة عن مقابلات إذاعية مصورة فيعنى الراديو موجود طالما حاسة الاذن سليمة
محمد صلاح : برضه الراديو يا أستاذ وجدى كلمتنى عن زمان هل الوضع ده لسة موجود دلوقتى آه التليفزيون خد والفضائيات بعد كده خدت من التليفزيون المحلى يعنى وضع الراديو إيه دلوقت ؟
أ / وجدى الحكيم : انت طول النهار بتقعد أدام التليفزيون وبتتابع كل الاعمال عند الساعة 11 ، 12 بتجد نفسك تشبعت فكل اللى بتعمله إنك تروح يا ترمى الريموت يا تطفى التليفزيون لكن لازم تسمع الراديو لازم
محمد صلاح : بس اللى حضرتك كنت بتتكلم عليه من شوية بقت الناس دلوقتى تقعد فى أوضة السفرة والكرسى اللى أدامنا ده فاضى عشان التليفزيون فى الوش
أ / وجدى الحكيم : ده دلوقتى بقى إيه مع دخول الفضائيات
محمد صلاح : المغرب اختلف من مكان لمكان
أ / وجدى الحكيم : يعنى كان فيه الاول احترام لفترة المغرب إن فترة المغرب دى فترة روحانية شديدة لابد إنها تبقى هادئة دلوقتى
محمد صلاح :صاخبة
أ / وجدى الحكيم : حتى الاذان ما بيتذعش فى كتير من المحطات التليفزيونية
محمد صلاح : نجيب برنامج
أ / وجدى الحكيم : ممكن نجيب إعلانات
محمد صلاح : صحيح
أ / وجدى الحكيم : طبعا الناس ساعة الافطار لازم تسمع الاذان بتاع محمد رفعت فى الراديو لازم يسمعوا دعاء النقشبندى بعد الاذان لازم الناس تحب قوى يسمعوا الفوازير فى الاذاعة رغم تعددها على كل الموجات فيه حاجات لان الاذاعة بتربى الانسان على عادات معينة يعنى انت الصبح لما تصحى من النوم الصبح تلاقى نفسك مرتبط ببرامج الراديو انت بتصحى مع التلاوات القرآنية وبعدين وقت التفسير بتخش الحمام وبعدين تطلع من الحمام تسمع كلمتين وبس وتفضل حركتك لحد لما تلاقى نفسك نازل تركب العربية وبتتابع
محمد صلاح : هى كل الناس كدة وللا انت بس ؟
أ / وجدى الحكيم : لا أنا أعتقد الناس كلها أنا بعمل لان أنا الحقيقة مهموم بالراديو وبعدين إتربينا فى الاذاعة على الالتزام بعقد غير معلن أنا بدخل بيتك بدون استئذان فى مقابل إن أنا أحترم تقاليد بيتك وعاداتك وكل القيم اللى بتحرص عليها من خلال كل كلمة تصدر عنى
محمد صلاح : التليفزيون بقى دلوقتى فيه فضائيات
أ / وجدى الحكيم : أنا هقول لك فيه دلوقتى فضائيات أمهات بتشيلها من الريموت علشان الولاد ما يشوفوهاش يعنى مع الاسف
محمد صلاح : طب خلينا ليه فى أجواء رمضان هو ليه ما عادش فيه مسلسل دينى قوى زى زمان حضرتك إتكلمت من شوية على المسلسلات لما بدأ التليفزيون ليه ما عادش رغم إن الامكانيات كانت ضعيفة أكيد يعنى وشيقة قوى بس كانت برضه المسلسلات الدينية بتعلم لحد محمد رسول الله
أ / وجدى الحكيم : لما كانت كل الامكانيات متاحة ؛ كبار الكتاب كانوا بتفرغوا لكتابة ده ودول بقى كبار كتاب من الصفوة عبد الفتاح مصطفى ، طاهر أبو فاشا الاسماء العظيمة العالية دى النهارده مابقاش فيه
محمد صلاح : بقى المسلسل تاريخى مش دينى
أ / وجدى الحكيم : بقى مسلسل تاريخى مابقاتش الرسالة متحققة
محمد صلاح :يمكن عشان بيخافوا من الجدل الدينى يقول لك بقى الجو اللى احنا فيه حد داخل يروح مكفر حد
أ / وجدى الحكيم : آه ده وارد بيتعمل فى المقابلات
محمد صلاح : مش كده ؟
أ / وجدى الحكيم : إنما فى الدراما بيخش الكاتب يقول لك أصل ده إتكتب قبل كده أنا هقدر أكتب وأجارى اللى كتبه عبد الفتاح مصطفى قبل كده ؟ فبياخد منحى الجزء اللى هو إيه التاريخى اللى قريب من ده
محمد صلاح : بس ما بيطلعش برضه بنفس مستوى زمان رغم إمكانيات زمان كانت
أ / وجدى الحكيم : ما بيطلعش
محمد صلاح : أقل يعنى؟
أ / وجدى الحكيم : بس كان الفنانين كمان متفرغين أكثرالنهارده الفنانين وخصوصا بإغراءات العمل التليفزيونى مشغولين فى أربع خمس مسلسلات هتجيبه يعمل مسلسل دينى تاريخى ويتفرغ له 3 ، 4 أشهر يكون عمل فيهم 4 مسلسلات فنانين فيه فنانين دلوقتى حاطين هدومهم فى العربيات بالليل ما بيروحش بيفضل فى العربية مع الشماعات متعلقة باللبس بتاع كل مسلسل فطبعا التفرغ والهدوء اللى كان بتتعمل به مسلسلات زمان ما بقاش يتعمل دلوقتى
محمد صلاح : مع بدايات يا أستاذ وجدى التليفزيون إيه المسلسلات اللى علقت فى دماغك لحد دلوقتى؟
أ / وجدى الحكيم : كان فيه كتير الحقيقة يعنى عملوا الساقية والهارب فيه حاجات كتيرة اتعملت فى التليفزيون بعد كده بدأو يخشوا على الاعمال الاذاعية المشهورة اللى بدأو يحولوها لمسلسلات
محمد صلاح : أفضل مسلسل نجح فى الفترة دى يعنى على فترة الستينات مثلا
أ / وجدى الحكيم : هقول لك مثلا ألف ليلة وليلة
محمد صلاح : برضه؟
أ / وجدى الحكيم : يعنى ألف ليلة وليلة لما خدوه حولوه ضمن فوازير رمضان إتعمل يعنى
محمد صلاح : هكلمك على ألف ليلة وليلة لانها طبعا أكيد لها موضوع مهم يعنى لكن برضه لما اتحولت بعض المسلسلات الاذاعية إلى التليفزيون كان عند المستمع اللى بقى مشاهد بعد كده مقارنة انت كخبير بقى شفت أنهى كان أفضل
أ / وجدى الحكيم : لا بدون شك إن التليفزيون لما دخل غَيَّرْ حاجات خلانا احنا بقينا عايزين نتابع ونشوف حتى أنا وأنا بعمل مسلسل ونجح فى الاذاعة لما بيعملوه فى التليفزيون لازم أشوفه عشان أعرف الفرق اللى اتعمل
محمد صلاح : إيه بقى الفرق ده؟
أ / وجدى الحكيم : الفرق هنا إبهار الصورة والشخصية اللى موجودة أدامى برضه الشخصية دى آثرة غير اللى بتسحوذ على الناس من خلال الاذن لا ده هنا من خلال الاذن والعين والابهاروالاضاءة
محمد صلاح : بس برضه لحد ظهور أسامة أنورعكاشة بمسلسلاته وصالح مرسى برضه لما حصلت الالوان فى التليفزيون
أ / وجدى الحكيم : وفيه وحيد حامد
محمد صلاح : ما زال موجود
أ / وجدى الحكيم : وحيد حامد من كباركتاب الاذاعة وخرج من الاذاعة إلى التليفزيون أعتقد إنه استفاد من تجربته الاذاعية قوى يعنى
محمد صلاح : لما حصلت الالوان حصل دروب أو حصل مشكلة للمسلسلات ما علقتش مع الناس لحد ما بدأ الاستاذ وحيد حامد بقى كتب و الاستاذ أسامة أنورعكاشة وصالح مرسى وهكذا ليه ؟
أ / وجدى الحكيم : أنا أقول لك لان التليفزيون اللى حصل إن كان فيه صراع بينه وبين السينما يعنى المسألة بقت تليفزيون وللا سينما فكانت السينما أكترسخاءا فى الزمن ده لان كان فيه رواج سنيمائى فكانت المنافسة يتعمل مسلسل وللا سينما فمن هنا لما كان بينتصر التليفزيون ويستحوذ على كبارالمؤلفين أثرعلى السينما وعمل مسلسلات اتعملت خلت السينما تتوقف فى رمضان يعنى بدون شك إن
محمد صلاح : إزاى؟
أ / وجدى الحكيم : إنه يعنى تجربة وحيد حامد فى الاستحواذ وكان وحيد حامد ده استطاع إنه يقنع عادل إمام وكبارالنجوم اللى فى الساحة إنهم يشتغلوا فى التليفزيون فكان يعنى يمكن ده اللى خلى التليفزيون يتفوق على الاذاعة فى هذه الفترة
محمد صلاح :الفوازير- الاذاعة اشتهرت دايما بالفوازير ولحد دلوقتى بعض المحطات بتقدم فوازيرحتى الخفيفة عليها إقبال وفيه رسائل وفيه متابعة لكن لما اتنقلت للتليفزيون ظهرت بشكل مختلف على فترات بدأت بشكل كوميدى شوية بالثلاثى ؛ ثلاثى أضواء المسرح ثم مرت كذا سنة ثم بشكل مبهر مع نيللى وبشكل مبهر آخر مع شريهان وبعدين اتكعبلت بقى واتعطلت مع كذا حد لحد ما احنا ما بقيناش عارفين هى موجودة وللا ما بقيتش موجودة أصلا
أ / وجدى الحكيم : لا هى دلوقتى مش موجودة
محمد صلاح : آه
أ / وجدى الحكيم : لكن
محمد صلاح : بقت فى خبر كان
أ / وجدى الحكيم : ما بقيتش موجودة خلاص يعنى
محمد صلاح : آه
أ / وجدى الحكيم : وبعدين انت الفوازير بتاعت الاذاعة فوازير مناقشة ذهنية إن أنا بقول فزورة بحكى لك عن حاجة فانت وانت بتاكل بتفطر الله ده كذا وللا كذا فيه مناقشة ذهنية إنما فى التليفزيون الصورة والابهار اللى فيها هو اللى أتاح فرصة انتشارها لانه يعنى الشكل الاستعراضى اللى اتعملت به الفوازير منذ بدأها ثلاثى أضواء المسرح ما كانش ممكن يتعمل فى الاذاعة لان الفوازير فى الاذاعة تعتمد على صوت وعلى مقدمة الفوازير لما تكون مذيعة مشهورة أو مذيع مشهور بتقدمها ساعات كنا بنجيب محمد عبد الوهاب يقول فوازير كنا بنجيب عبد الحليم يقول فوازير
محمد صلاح : آه بالضبط
أ / وجدى الحكيم : فوازير الاذاعة دائما مناقشة ذهنية إنما فوازير التليفزيون تتطلب حالة من الاستعراض والامكانيات الضخمة اللى تعجز عنها الاذاعة ما تعملهاش
محمد صلاح : طب هفكرك ونفكر السادة المشاهدين بفوازيرثلاثى أضواء المسرح نشوف الثلاثى فى الفوازير
فاصل
عبارة عن لقطات من فوازير ثلاثى أضواء المسرح
محمد صلاح : آدى الثلاثى فى الفوازير ما كانتش الامكانيات كبيرة قوى يعنى ؟
أ / وجدى الحكيم : يكفى إن كان فيها حسين السيد
محمد صلاح : آه
أ / وجدى الحكيم : هو حسين السيد ده كان شوية هو اللى بيكتب ده أنا أعتقد إن ظهور ثلاثى أضواء المسرح كان من خلال فكر حسين السيد يعنى هو اللى كان بيحدد لهم الايقاع يعنى وكان لما تقعد معاه رحمة الله عليه كان إنسان عظيم وبيدى لك إيقاع كل شئ حتى لما كان يكتب غنوة عشان يلحنها ملحن وهو بيقراها له يدى له الايقاع بتاعها والايحاء بتاعها فكان أعتقد إن جزء من ثراء تجربة الثلاثى
محمد صلاح : طب دكتور وجدى يعنى ليه توقفت التجربة رغم إنها كانت بتحظى بحضور أنا من الجيل اللى شاف ثلاثى أضواء المسرح على التليفزيون فى الفوازير ومش أكيد وفاة الضيف أحمد هى السبب لانهم صوروا فى المسرح بعد كده فترة طويلة وللا الشكل ده كان خلص وكان مطلوب شكل آخر ؟
أ / وجدى الحكيم : لا لما مشى محمد سالم غياب محمد سالم كان عنده جنون الفكرة محمد سالم رحمة الله عليه يعنى كان جاى من أمريكا بثقافة يعنى ووهج حالة من الوهج عايز ينقلها للتليفزيون المصرى جنون الفكرة اللى عنده هى اللى خلته يعمل الفوازير بتاعت ثلاثى أضواء المسرح لانه ما كانش شئ موجود قبله فغيابه أكيد أفقد التليفزيون ففى نفس الوقت ربنا سبحانة وتعالى بيعمل إحلال يعنى عمل إحلال بمحمد سالم بوجود فهمى عبد الحميد
محمد صلاح : كنت هسألك بقى يعنى بعد فترة الثلاثى ومحمد سالم ظهر فهمى عبد الحميد ونيللى
أ / وجدى الحكيم : آه بالحِيَلْ ودخول صلاح جاهين معاهم
محمد صلاح : بالضبط يعنى صلاح جاهين وتركات الحيل التليفزيونية اللى كان بيستخدمها فهمى عبد الحميد
أ / وجدى الحكيم : و
محمد صلاح : وحضور نيللى بقى
أ / وجدى الحكيم : والحيل دى كانت فى وقتها حاجة عالية جدا شوف دلوقتى الجرافيك بيعمل لك أديها 100 مرة
محمد صلاح : آه
أ / وجدى الحكيم : إنما وقتها كانت الحيل دى بالنسبة لها
محمد صلاح : خلينا نشوف حاجة مع بعض كده ونرجع
أ / وجدى الحكيم :يا ريت حاجة جميلة عموما
محمد صلاح : نشوف نيللى وفهمى عبد الحميد الراحل وفوازير نيللى
فاصل
عبارة عن لقطات لاحدى فوازير الفنانة نيللى
محمد صلاح : طبعا فات الزمن دلوقتى بقت فيه حاجات ثانية ؟
أ / وجدى الحكيم : شوف نيللى ما شاء الله كانت اللياقة ما كانش اختيارها لمجرد إنها ممثلة مشهورة إنما كان اختيارها فى مكانه يعنى لياقتها ، حرصها على الاستمرارية فى تقديم هذا اللون أكترمن سنة هو اللى أتاح لها فرصة كانت بتحرم نفسها من الاكل والشرب طول السنة عشان تعمل التمرينات عشان تستطيع إنها تعمل
محمد صلاح : بس خلينا نتكلم فى الكونسيت نفسه أوالمغزى أوالمعنى من الفزورة لان الثلاثى كان قبلها على طول معتمدين على الضحك والمواقف اللى كان بعضها ارتجالى يعنى رغم إن فى التوقيت ده كان التسجيل نفسه صعب وربما حتى لو حصل غلطة بيضطروا يعيدو من الاول
أ / وجدى الحكيم : من الاول ثانى
محمد صلاح : من أول وجديد يعنى إلى شكل فيه فخامة وفى نفس الوقت فيه تقنيات عالية بمعايير الزمن ده المشاهد هنا تقبل ده إزاى ونجحت فوازير نيللى رغم إن فوازيرالثلاثى كانت على شكل آخر وكانت ناجحة برضه ؟
أ / وجدى الحكيم : المشاهد دايما بينتظر لان المفروض الناس اللى فى الاعلام يكونوا أسبق من المتلقى فكان دايما
محمد صلاح : لان هم الخبراء هم اللى دايما بيفكروا.
أ / وجدى الحكيم : آه كان دايما فيه تفكيرودايما فيه تحدى إن هم لازم يسبقوا المشاهد وبيبهروه حتة إبهارالمشاهد ودى دى مهمة جدا لان أنا لوالمشاهد سبقنى أنا بقيت تخلفت فكان التفكيربياخد اللى بيتعمل نوع من الحشد طوال السنة للفكرة الجديدة اللى هتبقى
محمد صلاح :كنت عايزأسألك هل برضه رمضان كان بييجى فجأة فى التوقيت ده وانت معاصره وعايشه ؟
أ / وجدى الحكيم : كان بييجى بس بيكون سبقه تحذيرورغم كده ما تعرفش ليه استمرار العمل فى رمضان بيبقى له طعم
محمد صلاح : اللى هى تكملة اليوم لحد السحور؟
أ / وجدى الحكيم : لا ده الفوازير كانت بتسجل حلقة بحلقة فى رمضان
محمد صلاح :يعنى الحالة اللى بتحصل دلوقتى موجودة من زمان ليه ننزل كده بالزبادى والفول؟
أ / وجدى الحكيم : بس أقول لك لها طعم كان لها طعم والمبنى كان بيبقى فى حالة وهج كل الاستديوهات بتاعته منورة ، كل الاستديوهات بتاعته شغالة وبعدين عارف حتة الالية دى بتدى لك زى الاكلة الطازة يعنى
محمد صلاح :خلص وقوم بعدها على طول
أ / وجدى الحكيم : لما أعمل الفزوة دى قبلها بشهرين تبقى زى الخضارالبايت
محمد صلاح :أنهى حلقة اللى هتتذاع ويبقوا مش عارفين أنهى حلقة اللى هتتذاع؟
أ / وجدى الحكيم :آه وأحيانا لما تتعمل فى نفس اليوم بيخش فيها بحوارات آلية مرتبطة باليوم نفسه أعتقد إن ده كان بيدى وخصوصا إحساس الناس إن الفوازيربتتعمل يوم بيوم وإن شريهان مقيمة فى استديوهات التليفزيون ما بتروحشى إلا بعد رمضان
محمد صلاح :آه شريهان واحنا كنا بنتكلم عن نيللى فهنتكلم عن شريهان برضه؟
أ / وجدى الحكيم : يا سلام
محمد صلاح : إيه الوهج اللى عملته شريهان رغم كان الشكل قريب قوى مقدمة موسيقية ، راقصة ، فيها إبهارتكنولوجى بمعاييربرضه الوقت ده مع فكرة تتعلق بهذه الفزورة ثم خاتمة فيها برضه استعراض وكده يعنى إيه النقلة اللى حصلت والناس حست بالفرق إزاى؟
أ / وجدى الحكيم : عارف شريهان دى ربنا يديها الصحة أنا بشوف إنها كانت ظاهرة يعنى مرتبطة بكلمة جدا يعنى نقول طفلة جميلة جدا ، ممثلة جيدة
محمد صلاح :جدا
أ / وجدى الحكيم : ممثلة استعراضية راقصة جيدة جدا فكلمة جدا دى كانت مرادفة لها منذ أول تجاربها فى المسرح ولما دخلت التليفزيون الناس فى البيوت احتضنوها كَبِنْتُهُم الشقية بنتهم الشقية اللى بتغنى وبترقص وتتنطط
محمد صلاح : أمال ليه حصل كده إيه الفرق
أ / وجدى الحكيم : بس شريهان دخلت بشكل مبكرمن حيث السن
محمد صلاح :آه
أ / وجدى الحكيم : نيللى أنا كنت عايش معاها فى تمثيلياتها مع عبد الوهاب لما عملتها فى الستينات مع محمد عبد الوهاب
محمد صلاح : وأفلام طبعا؟
أ / وجدى الحكيم : إنما ظهورشريهان ظهرت على طول
محمد صلاح : بس دى نوع من الحنان بين المشاهد وبينها
أ / وجدى الحكيم : دى بنتك الشقية اللى بتقول لها قومى أرقصى بقى ورى عمومحمد صلاح إيه الحكاية فبقول لك إن شريهان الحمد لله يعنى كانت حالة من الوهج الجميل وحالة فن جميلة
محمد صلاح : طب تعالى نشوف ؟
أ / وجدى الحكيم : يا ريت
محمد صلاح : نشوف معا شريهان
فاصل
عبارة عن لقطات لاحدى حلقات فوازير شريهان
محمد صلاح : شفتوا بقى شريهان
أ / وجدى الحكيم : آه أمال
محمد صلاح : الفترة دى يعنى بعد شريهان إتغيرالشكل خالص اتغيرت فكرة الفوازيروبقت أفكارأخرى لعبت على نفس الوتر بس ما نجحتش هل شريهان خلصت على الشكل ده قدمت كل حاجة للناس فماعادش ينفع يبقى فيه بعد شريهان اللى هى جاءت بعد نيللى بشكل آخر لسن أو كاراكتارشكل يعنى قريب من اللى شفته؟
أ / وجدى الحكيم : عملى فيه تجارب اتعملت اللى اتعملت لصابرين وهالة فؤاد بس ما كانتش بنفس الزخم والشحنة الفنية اللى كانت عند الناس ، الناس كانت مشحونة يعنى بوجود الفنان النجم فى العمل ده بيبقى رقم 1 أنا أذكر إن أنا لفيت فى الوطن العربى فى ظروف الفوازير دى والتقيت بأحد أستاذة الجامعة هناك قال لى يعنى انتوا ليه ما بتعملوش اتحاد أصدقاء شريهان دى حاجة لازم تهتموا بها يعنى فيه ناس كانت بتيجى عشان تدورعلى شريهان ففى أعمال بتبقى مرتبطة بشخصية النجم ؛ النجم اللى بيبقى مكتمل التركيبة اللى فيه التمثيل وفيه الغناء وفيه الرقص وفيه النص الجميل وفيه حاجات كثير خصوصا إن هى كانت مجال لحواديت كثيرة طوال العام فكانت الشخصية دى لها سيطرتها على المجال خصوصا إنه كان فيه كتاب على مستوى عالى كان عبد السلام أمين الحقيقة
محمد صلاح :آه طبعا
أ / وجدى الحكيم : عشان يبقى فيه كاتب يكتب الفوازير بعد صلاح جاهين كان
محمد صلاح : تحدى.
أ / وجدى الحكيم : شئ صعب جدا فلما ييجى عبد السلام أمين يكتب وبعدين ييجى بعديه سيد حجاب وييجى مثلا جمال عبد الحميد يخرج يعنى المركب ما تقفش استمرت حتى بعد رحيل فهمى عبد الحميد الحمد لله يعنى فيه ناس أثبتت وجودها وعملت الفوازيربشكل جيد جدا
محمد صلاح : لما سميرغانم عمل فوازيرفطوطة تفتكركان نجاحها لانها فزورة والناس عايزة فزورة فعلا وفيها برضه نوع من الابهارالتقنى وكذا والشخص برضه اللى بيظهر بحجمه الطبيعى مع شخص ثانى بكاراكتارصغير كده بصوت مختلف شوية بيكون حتى مثير للضحك مجرد ما ينطق هل ده اللى نجحها وللا لانها كانت أقرب شوية للاطفال؟
أ / وجدى الحكيم : هى دى الاطفال
محمد صلاح : يعنى اللى أنا قلته صح
أ / وجدى الحكيم : طبعا الاطفال بيفرضوا يعنى أحيانا إيه تبص تلاقى شركات الاعلانات ذكية جدا
محمد صلاح : يشبط العيل فى الحاجة إسألنى أنا عايز من ده.
أ / وجدى الحكيم : آه جملة الاعلان يعملها جملة يحفظها الطفل لان الطفل لما يحفظ الجملة دى بيفرض الاعلان على البيت طول النهارعمالين يرددوا وببلاش واخد بالك فالاطفال إتشدوا قوى لهذا العمل خصوصا فطوطة لان كان دمه خفيف وحكاية الطفل اللى الصغير اللى بيبقى صغير وبيكلم الكبيرويعمل مقالب فيه ومش عارف إيه إضافة إلى سميرغانم وخفة دمه
محمد صلاح : نشوف شوية حاجة كده.
أ / وجدى الحكيم : نشوف يا سلام
محمد صلاح : نشوف فطوطة وخفة دمه.
فاصل
عبارة عن لقطات لاحدى حلقات فوازير فطوطة
محمد صلاح : يعنى سميرغانم قدم الفزورة بعد تحدى كبيرقوى هو بدأها مع جورج سيدهم والضيف أحمد كبداية للفوازيربعدها نيللى وشريهان لكن حكاية الاطفال دى نجحت
أ / وجدى الحكيم : نجحت سميرغانم
محمد صلاح : مش كده
أ / وجدى الحكيم : لان سميرغانم
محمد صلاح : شخصية فطوطة.
أ / وجدى الحكيم :آه لان هو كان جزء من الثلاثى لما بقى سميرغانم لوحده وعمل فطوطة أصبح موجود
محمد صلاح :بمناسبة الشغل اللى بيتقدم فى رمضان مخصوص للاطفال نجح بوجى وطمطم بشكل مذهل بدرجة أقل شوية بكارمثلا يعنى تفتكر ليه بقى ما عادش بيتقدم فى رمضان أعمال مذهلة ناجحة بالشكل ده للاطفال هل لان هى كترت فعلا موجودة بس مش ناجحة قوى نتيجة تعدد القنوات اللى موجودة زى حكاية المسلسلات برضه إن بقى فيه 60 مسلسل 70 مسلسل اللى عنده بيشوف يعنى نفس القصة وللا المستوى بيقل
أ / وجدى الحكيم : لا المستوى بقى كله تقليد
محمد صلاح :تقليد؟
أ / وجدى الحكيم : كل اللى بيتعمل جديد ده تقليد للعمل والموضوعات اللى اتعملت والموضوعات اللى اتعملت دى اتعملت بشكل جميل ورائع واللى بيطلع كله بيحاول إن هو يعنى يبقى موجود من خلال التقليد لكن أقول إن مثلا بوجى وطمطم يعنى بوجى وطمطم لما كان بيكتبه العظيم يوسف عوف رحمة الله عليه
محمد صلاح : آه الله يرحمه
أ / وجدى الحكيم : اللى هو صاحب الشخصية دى
محمد صلاح : ده بعد كوميديا توصل للى عنده 70 سنة
أ / وجدى الحكيم : يوسف عوف ده كان وراء كل شئ جميل فى حياتنا يعنى لما تمسك من أول ما بدأ فى ساعة لقلبك
محمد صلاح : ساعة لقلبك؟
أ / وجدى الحكيم : وعمل شخصية محمود ومراته
محمد صلاح : آه
أ / وجدى الحكيم : فاكرها
محمد صلاح : آه محمود وكانت خيرية أحمد أنا فاكر كل حاجة يا أستاذ وجدى أنا معاك
أ / وجدى الحكيم : آه تبص تلاقى يوسف عوف ده كان وراء كل حاجة كل شئ جميل كان أحلى مسلسلات كوميدى فى الاذاعة كتبها يوسف عوف ، فى التليفزيون صباح الخيريا جارى كل شئ كان يوسف عوف فوجود يوسف عوف أما بيقعد يتفرغ وعمل بوجى وطمطم لان الكوميديا جواه عالية قوى فكانت بتطلع على الشاشة لما ييجى يوسف عوف ونجيب بهجت قمرونجيب سميرخفاجى
محمد صلاح : المفروض إن دى سنة الحياة يعنى تظهرأجيال جديدة
أ / وجدى الحكيم :بس
محمد صلاح : هواحنا فى الفقرة يعنى بتاعت مفيش فيه إيه
أ / وجدى الحكيم :لا احنا فى فترة صعبة قوى يعنى أقولك إيه إن الفترة اللى احنا فيها دى أنا بحس إن احنا مفتقدين إلى حاسة جميلة جدا راحت
محمد صلاح : اللى هى حاسة الانتظار؟
أ / وجدى الحكيم : اللى هى حاسة الانتظار
محمد صلاح : هنرجع لها ثانى
أ / وجدى الحكيم : لان الانتظار ده كان بيخلينى أنا مهيأ لقبول شئ أنا بستناه دلوقتى ما بقيناش نستنى
محمد صلاح : طب كنا بنستنى زمان لحظة الافطارعشان نسمع بعد كده ألف ليلة وليلة
أ / وجدى الحكيم :يا سلام
محمد صلاح : موسيقى كورساكوف مين اللى اختارها ، مين اللى بدع الفكرة الجميلة دى يجيب صوت زوزو نبيل اللى كانت قبل كده بتعمل أصوات الفيلين أدوارالفيلين أوالشريرفى السينما عشان تعمل الصوت النسائى الناعم اللى كل الدنيا تتعاطف معاها عشان خاطرقادرة تخلى شهريار يسيبها ليلة فتخليه ألف ليلة وليلة وما تموتش الفكرة دى بدأت إزاى ؟
أ / وجدى الحكيم :بابا شارو، بابا شارو كان من عشاق
محمد صلاح :عبقرى
أ / وجدى الحكيم : آه طبعا أعتقد إن هوكان من كبارالرواد وكبارالمخرجين
محمد صلاح :ومثقف وواعى وفاهم وسامع موسيقى كورساكوف وسامع غيره فيعرف يختار
أ / وجدى الحكيم :كانوا الممثلين بيعملوا حساب قوى للتمثيل أدامه لان هوما كان يقبل 80 % ولا 90 % يقبل 100 %
محمد صلاح : يعنى .
أ / وجدى الحكيم : وبالتالى كل فنان لما يروح له أوردر إنه مع بابا شارو فى ألف ليلة وليلة يحضرنفسه ويبقى جاى فى مباراة فى الاداء وهو بيقعد ويسمع أكترما إنه يتابع ويدى توجيهات إلى جانب إن كان جنبه كبارمؤلفين كان طاهر أبوفاشا ، عبد الفتاح مصطفى يعنى كان جنبيه مؤلفين كبارجدا
محمد صلاح : ويمكن يا أستاذ وجدى معلش ده سؤال فرض نفسه وحضرتك بتتكلم عن المؤلفين من ألف ليلة وليلة الام اللى هى مجهولة المصدرأومجهولة المؤلف وللا على نفس التيمة كل واحد بيعمل لنفسه
أ / وجدى الحكيم : كانوا بيعملوا لما كانوا بياخدوه كانت هى الاساس لكن بيبسطوا الحدوتة كتاب ألف ليلة وليلة صعب قوى حتى لما استبعد بابا شاروألف ليلة وليلة الحقيقية من أصفهانى للاصفهانى إزاى عملها وإزاى خد تاريخ الغناء وعمله فى مسلسل بسيط جميل يوصل للناس كان شئ عبقرى ومن هنا أقول لك إن الحاجات دى لما انتقلت التليفزيون ما اتنقلتش بالجمال لان أنا فى الراديو بعيش وبأحلق فى آفاق من الصعب إن يحققها التليفزيون
محمد صلاح : بس عايزين نسمع ألف ليلة وليلة بصوت زوزو نبيل عشان نشوف تقليدها فى التليفزيون تمت إزاى نشوف ألف ليلة وليلة والراحلة زوزو نبيل
فاصل
عبارة عن مسمع من إحدى حلقات ألف ليلة وليلة الاذاعية
محمد صلاح : بلغنى أيها الملك السعيد ذو الرأى الرشيد طب أنا عايز أعرف الرشيد يا أستاذ وجدى لما اتنقلت ألف ليلة وليلة إلى التليفزيون بالاضافة إلى موضوع الخيال ما نجحتش خلينا نقول بصراحة يعنى ما لاقتش نفس النجاح اتقدمت بأشكال مختلفة وبنجوم
أ / وجدى الحكيم : لا اتقدمت بنجوم شديدة
محمد صلاح : آه
أ / وجدى الحكيم : وكان فيها شريهان برضه
محمد صلاح : بالضبط
أ / وجدى الحكيم : كان فيها شريهان وفهمى عبد الحميد وعمرالحريرى
محمد صلاح : هل لان الناس كانت مرتبطة بزوزو نبيل وحالة الخيال اللى خلقتها فى وجدانهم لسنوات طويلة وللا لان فيه نوعيات عمل ينفع إذاعة بس ما ينفعش تليفزيون
أ / وجدى الحكيم : أنا مش قلت لك من شوية احنا شعب
محمد صلاح :فكرنى قل لى تانى.
أ / وجدى الحكيم : احنا شعب عشرى
محمد صلاح :احنا عشريين قوى
أ / وجدى الحكيم : وعشان احنا عشنا ألف ليلة وليلة فى الاذاعة
محمد صلاح :حبيناها كده
أ / وجدى الحكيم : حبيناها فى الاذاعة وفى نفس الوقت نشوفها فى التليفزيون اتعملت إزاى يعنى ليه فيه رصيد فيه الناس فيه حاجة أنا عارفها وعشتها قبل كده ما يمنعش إن أنا أعيشها مرة ثانية مع التليفزيون لان أنا لما عشتها مع الراديو حسيت بسعادة أبتدى أعيشها ثانى مع التليفزيون وأبتدى أقارن بقى وأقول هنا أحسن وللا هنا أحسن لان احنا دائما بنحب الحاجة اللى لنا ذكريات معاها يعنى لما بسمع غنوة معينة مرتبطة بذكرى فى حياتى بعد 50 سنة لما تتعاد
محمد صلاح : اسمعها من أول وجديد
أ / وجدى الحكيم : اسمعها بقول لك احنا دايما فيه حاجات بنحبها وأنا بتوقف عند تجربة ظريفة يعنى عشتها فى الاسبوع اللى فات حكاية وأنا جاى فى العربية شغلت شريط لعبد الحليم لقيت غنوة أنا توقفت قوى يا أستاذ صلاح
محمد صلاح : إيه؟
أ / وجدى الحكيم : لانها بتغنى لشئ ما بقاش موجود فى حياتنا
محمد صلاح : خالص؟
أ / وجدى الحكيم : الجواب فيه حد النهارده ، الجواب ده بييجى مثلا من الضرائب إنما مفيش جوابات ثانية مفيش حد بيبعت جواب لصاحبه ولا لقرايبه فأنا لما أشوف عبد الحليم لما عمل دى حسيت إن فيه واحد عمل حاجة ليؤرخ لزمنه فى الزمن الجاى احنا لازلنا لحد النهارده لما أسمع غنوة جواب برجع للزمن الماضى وأفتكر العديد من الجوابات
محمد صلاح :طيب فى الزمن برضه اللى فات بس لسة موجود ومستمر بمناسبة أغنية عبد الحليم جواب المسحراتى أنا مش هقول لك إن أنا حضرته يعنى كان فيه مسحراتى فى الاذاعة زمان
أ / وجدى الحكيم : طبعا
محمد صلاح :بعد كده فؤاد حداد وسيد مكاوى شفناه فى التليفزيون
أ / وجدى الحكيم : ما هو ده اللى كان فى الاذاعة يعنى بدأ فى الاذاعة ونجح فى الاذاعة قوى خصوصا إن الشيخ سيد مكاوى كان من عشاق الميكروفون كان يحب قوى قعداته اليومية يبقى فيها ميكروفون بنته الكبيرة لما كبرت إيناس حرص إن هو يدخلها الاذاعة وتبقى مذيعة فى الاذاعة يعنى كان محب للراديو يعنى بحكم إن الراديو ده صديقه وصديق ودنه فلما بدأ يعمل المسحراتى عمله فى الراديو بشكل جميل للغاية والناس كلها عجبها لانه كان بيتذاع فى نفس توقيت المسحراتى اللى كان بيفوت فى الشارع
محمد صلاح :أنا عندى سؤال هنا بس عايز نفتكر مع الناس الشيخ سيد مكاوى وكلام فؤاد حداد فى المسحراتى نفتكره مع بعض
أ / وجدى الحكيم : ياريت
محمد صلاح : والرجل تدب مطرح ما تحب وأنا صنعتى فى البلد مسحراتى نشوف الشيخ سيد مكاوى
فاصل
عبارة عن لقطات للمسحراتى بصوت الشيخ سيد مكاوى وكلمات الشاعرفؤاد حداد
محمد صلاح : شفنا الشيخ سيد مكاوى وهو مسحراتى لما اتنقلت للتليفزيون هو أصلا فيه حد ممكن يفتح يعنى أنا ممكن أبقى نايم فأسمع المسحراتى فأصحى دلوقتى طبعا المسحراتى بيتكعبل فى الناس اللى ماشية
أ / وجدى الحكيم : آه
محمد صلاح : هم اللى بيسحروه دلوقتى.
أ / وجدى الحكيم : ما بيبانش
محمد صلاح :فيه حد هيقوم يفتح الاذاعة عشان يسمع المسحراتى وفيه حد هيفتح التليفزيون عشان
أ / وجدى الحكيم : حاليا وللا زمان؟
محمد صلاح : الاثنين
أ / وجدى الحكيم :دلوقتى أنا أقول لك أصل دلوقتى الناس كلها
محمد صلاح : الناس بتسهر
أ / وجدى الحكيم :صاحيين بيبقى قاعد مع التليفزيون بيتابع التليفزيون لكن الراديو اللى جنبيه شغال عشان لما ييجى المسحراتى يفكره بالسحورعشان يبقى فاكرفالراديو موجود وبالتالى المسحراتى فى الراديو له طعم ومذاق لان عشان تعمل المسحراتى فى التليفزيون بياخد وقت وتكلفة وتصوير وبتاع إنما فى الراديو بيبقى فيه التنوع اللى بيتكتب فى الموضوعات بتاعت المسحراتى متحققة من وفرة الكتاب اللى لازالوا لسة محبين للاذاعة ويكتبوا للاذاعة وعشان كده الصوت له إيقاع وتأثيرالودن دى لا يمكن هتغفل ما تغفلش الودن لا تنام بيسمع كل شئ وبيتنقى ولما يغيب عنه الراديو شوية يحس يقول لك الله هو الراديو عطلان وللا إيه لان الراديو معاه باستمرار فى العربية
محمد صلاح : باين انحيازك للراديو.
أ / وجدى الحكيم :آه يا أخى
محمد صلاح :وتصميمك على إن الراديو هيرجع تانى زى الاول تفتكر؟
أ / وجدى الحكيم :موجود طبعا لما تطلع على القنوات الفضائية بقيت تسمع الراديو وأنت فى كندا تسمع القنوات الفضائية وبالمناسبة بقى يعنى وانت فى كندا مش هيجى لك التليفزيون من مصر
محمد صلاح : لا بييجى برضه
أ / وجدى الحكيم : أحيانا إنما الراديو معاك وأنت فى كندا
محمد صلاح : حتى وأنت فى الشارع بقى
أ / وجدى الحكيم :بتسمع آه لازم تسمع الراديو وتسمع راديوالاذاعة المصرية وتسمع لان الغنوة اللى بتسمعها وانت فى مصر بتسمعها بودنك وانت خارج مصربتسمعها بودن تانية فيها حالة من الاعتزاز ببلدك اللى عملت الغنوة دى ولما بتسمع الغنوة فى إذاعة أجنبية نفس الغنوة تحس باعتزاز شديد جدا
محمد صلاح :طبعا
أ / وجدى الحكيم :إن فنك واصل للاذاعات دى وبالتالى الراديو سيظل موجود لانه مثلا التجمعات العربية فى العالم بره لازم الراديو موجود عشان مواعيد الاذان
محمد صلاح :طب بمناسبة الاذان يا أستاذ وجدى يعنى احنا ارتبطنا فترة طويلة قوى قبل صلاة الفجر بالتواشيح
أ / وجدى الحكيم : آه طبعا
محمد صلاح : الله يرحمه النقشبندى الله يرحمه قعد فترة طويلة ومازالت طبعا ليه ده بقى ما اتكررش يعنى يمكن إتكررت محاولات ثانية فى الفوازير فى المسحراتى نجحت بعضها وما نجحتش بعضها ، فى المسلسلات طبعا سواء بتتكرر أو جديدة بتنافس القديم ده لون ما اتكررش خالص
أ / وجدى الحكيم : آه ليه ده بيعتمد على شخصية المنشد ، المنشد نفسه
محمد صلاح : هو ده
أ / وجدى الحكيم : هو ده ما يبقاش يعنى كان يعنى طوبارالفيومى وكان عمران
محمد صلاح :بالضبط
أ / وجدى الحكيم : وبعدين جاء النقشبندى حالة اكتسحت السوق ولازال يسيطرعلى الاذان لما تسمع أى موشح إلا لازم تشعر بعظمة النقشبندى ، النقشبندى لما بليغ لحن له مولاى إنى ببابك مولاى وأقول امتى يا رب أمتى أشياء
محمد صلاح : تخلى جسم الواحد يقشعروهو عمال بيسمع وربطته بالحالة اللى موجودة سياسيا طب ودلوقتى؟
أ / وجدى الحكيم : دلوقتى تحس إن هو بيغنى لك دلوقتى
محمد صلاح :بالضبط
أ / وجدى الحكيم : زى ما عبد الحليم بيغنى لك فى الوطنيات أحلف بسماها وبترابها ما تغيب الشمس العربية طول ما أنا عايش فوق الدنيا فيه حاجات ما تروحش وفيه حاجات تحس دلوقتى بنحس ما أحوجنا إلى هذه النوعية اللى تقربنا من بعض اللى تخلينا نمسك إيدين بعض اللى تخلينا نقعد نسمع مع بعض دلوقتى محدش بيسمع مع بعض كل واحد بيسمع لوحده
محمد صلاح :آه
أ / وجدى الحكيم : إنما فيه نوعية أول ما تطلع تلاقى الناس بتتجمع عشان تسمعها
محمد صلاح :لما الواحد بيبقى قاعد كده أدام التليفزيون فواصل يعنى ما بين البرامج وبعضها بتسمع كارم محمود وهو بيقول مرحب شهرالصوم لياليك عادت بأمان دى أغنية أصلا من إنتاج الاذاعة لو انت مكانى وقاعد بتسمع انت بتسمع إذاعة أكترمنى يعنى وسمعت الاغنية وبعد ساعة وللا ساعتين وانت قاعد أدام التليفزيون سمعتها بتحبها فى الاذاعة وللا التليفزيون أكتر
أ / وجدى الحكيم : لا فى الاذاعة طبعا
محمد صلاح : لان فيه صورة محطوط عليها مونتاج
أ / وجدى الحكيم :بتشتتنى
محمد صلاح : بتشتتك ؟
أ / وجدى الحكيم : بتشتتنى مع معانى الصورة فبتخلينى أبعد عن معانى الجميلة اللى بتسيطر على وأنا بسمعها فى الراديو وعشان كده أقول لك إن يظل الراديو موجود رغم تعدد روافد المعلومات
محمد صلاح : ال7 آلاف مسلسل اللى شغالين دلوقتى انت بتشوف إزاى يعنى الناس بتشوف إزاى أصل أنا ساعات بسرح ؟
أ / وجدى الحكيم : الناس كلها بتحدد بيشوفوا وفى الاخر بيحدد
محمد صلاح : على ما يحدد يكون رمضان خلص
أ / وجدى الحكيم : آه هيحدد المسلسل ده بعد كده بقى يشوفه فى العيد بقى وعلى مدى السنة لان احنا بنقدم ده وبعدين كل المسلسلات والاعمال دى بتتعاد طول السنة ومن هنا أنا بحدد أنا شفت بفتح وبحدد أنا بعد المغرب هشوف المسلسل الفلانى وبالليل هشوف المسلسل الفلانى والظهر هشوف ده بس
محمد صلاح : شفت حالة عشقت بين الاستاذ وجدى الحكيم الاذاعة رغم كثافة البث التليفزيونى لبرامج وأغانى ومسلسلات وأفلام وسهرات لكن الراجل لسة عاشق للاذاعة ومصمم إنها موجودة وكمان هترجع احنا شخصيا حابين الاذاعة لانها فى جيلى على الاقل اتربى عليها لحد ما بقى التليفزيون فارض نفسه لكن كل النقد اللى ممكن يوجه لكثافة البث التليفزيونى ممكن ترشيده وممكن يحصل التوازن بينه وبين الاذاعة حضور فتهدى شوية من ثورة التليفزيون على عيون وآذان الناس وقال الاعلامى الكبيرالاستاذ وجدى الحكيم النهارده كلامه معنا كان كلام جميل ، كلام معقول ، كان كلام مسئول كل سنة وانتو طيبين وخلص الكلام سلام نلتقى فى حلقات أخرى نورت يا أستاذ وجدى
أ / وجدى الحكيم :أشكرك