حالة حوار

د/عمروعبدالسميع : مساء الخير وأهلا بكم في حالة حوارلا صوت فوق صوت كرة القدم ده هو شعار الكرة الأرضية الذي سيظل مرفوعا حتي تنفض وقائع مونديال جنوب افريقيا 2010 من أربع سنين بالتمام والكمال وفي المونديال السابق عملنا هنا في حالة حوار ملف الكورة والسياسة واتكلمنا فيه عن هذه المؤسسة الماليه والاقتصادية الكبرى اللي اسمهاكرة القدم وتأثيراتها السياسية النهارده هنكمل لكن كمان هنزاوج ما بين مصطلحات الكورة ومصطلحات السياسة ونشوف لغة كورة القدم تنفع في الاشتباك مع مفردات الواقع السياسي المصري اليومي ولا لأ هنتكلم عن ثقافة الفوز وثقافة الهزيمة هنتكلم عن اللعب خارج حدود الملعب القانوني هنتكلم عن العلاقة بالحكام هنتكلم عن تسعير اللاعبين ومدي واقعيته هنتكلم عن الخطة هنتكلم عن العشوائية دي طريقتنا المختلفة في حالة حواراللي بنشتبك فيها مع ملف المونديال ولا صوت يعلو فوق صوت كورة القدم اسمحوا لي أولا ان أرحب بضيوفي وضيوفكم الدكتورحسام بدراوي المفكرالكبير الأستاذ بطب القصرالعيني الكاتب والشاعر الكبيرمدحت العدل الصحفي والكاتب الكبيرسعد هجرس وأبنائي وبناتي شبات وشباب مصر أهلا وسهلا بكم دكتور حسام مش بعاد احنا برضه من السياسة عاوز أسألك في الحقيقة عن ظاهرة واكبت كاس العالم الذي نحن بصدد وقائعه هذه الأيام يعني احنا شوفنا98 جون ماري لوبان اللي هو زعيم حزب الجبهة الوطنية اليميني المتطرف في فرنسا شكك في الالتزام الوطني للاعبين اللي مش من أصول فرنسية السنة دي دومنيك المدير الفني للمنتخب الفرنسي استبعد لاعبين أساسيين في الحقيقة سمير نصري وكريم بن زيمة وبالتالي بقي في كلام وأقاويل كثيرة وبنتكلم عن ان الاستبعاد ده تم لنفس الأسباب هل قيم التسامح والتعايش هجرت العقليه الأوروبية الى هذا الحد يعني احنا مثلا طول الوقت يوجه لنا اتهامات وأنت في حقوق الإنسان وعارف كل وقت يقولوا لنا انتوا مش متسامحين انتوا مش بتعترفوا بالأخر مع اني عندنا الكابتن هاني رمزي قائد احد المنتخبات الوطنية ومع ان الزملاء في المواطنة أقباط مصر لما خرجوا بعد عيد القيامة بأيام قليلة ده علشان يحتفلوا معانا بفوز مصر بكأس الأمم الافريقية للمرة الثالثة يعني كل المظاهر اللي عندنا بنقول ان في تسامح كل المظاهر هناك لا تقول كده متشرح لنا الحكايه دي ؟
د/حسام بدراوي : جايزاختلف معاك في مسالة الاختيارات في منتخب فرنسا يعني دومنيك عاوز يكسب لان لو خسر هيروح
د/عمروعبدالسميع : هيخسر وهيروح ؟
د/حسام بدراوي : لأ وبطل فرنسا كان زين الدين زيدان ما هو من أصول جزائرية ولو بسيط في فرقة المانيا هي لأول مرة فيها 2 لعيبه من أصول غير المانية
د/عمروعبدالسميع : مظبوط
د/حسام بدراوي : وده يمكن المانيا هي كانت الأكثر ارتباطا شكلا تعصبها يعني للجيش الألماني اشك ان ده داخل فيه أي ارتباطات خاصة بالعنصرية لان كل فرقة في كاس العالم عاوزة تكسب بأفضل من لديها كريم بن زيمة ونصري مكنوش أساسيين في فريق فرنسا لكن هما طبعا من وجهة نظرنا احنا يعني لعيبه جميلة بس هو كريم بن زيمة مكنش أساسي في ريال مدريد يعني السنة دي
د/عمروعبدالسميع:أصل الحقيقة زي ما بقول لحضرتك هذاالكلام يتحط في سياق متصل مجموعة الإجراءات اللي تتخذ ضد العرب ضد المسلمين في أوروبامجموعة التصرفات الكتابات النظريات الأبحاث فيها هذا المعني الحقيقة
د/حسام بدراوي : يعني أنا بتكلم على وجهة النظر الخاصة بالرياضة اللي حضرتك سألتني عليها اشك ان في مدرب في أي فرقة أوروبية يكون لدية فرصة ان هو يكسب باي لعيب ومياخذوش معاه
د/عمروعبدالسميع : تعالي بقي للواقع المصري في الواقع المصري في الحقيقة احنا عارفين ان ملعب كورة القدم القانوني اللي هو مخطط بالجير ده الناس يخش تلعب فيه
د/حسام بدراوي : معدش جيرعلى فكرة
د/عمروعبدالسميع : معدش جير إنما هو ده المعني بنشوف عندنا قوة كثيرة وافراد كثيرين من يحبوا أو بينزعوا الى اللعب خارج حدود الملعب القانوني بنشوف مثلا جماعة الأخوان المسلمين بنشوف مثلا دكتورمحمد البرادعي مع كثير الأسف اللي هو احد تصريحاته الأخيرة يقول فيها ان الدستورغير دستوري بنشوف جماعات احتجاجية أخري متنوعة الدرجة والمستوي كله خارج بره الحدود ايه الظاهرة دي
د/حسام بدراوي : هو أنت خروج بره الخطوط هو الفوضى ويقتل اللعبة سواء كانت رياضية أو سياسية أنت كلنا نتذكر ان فرنسا دخلت البطولة دي بجول غلط " لتيري هنري بأيده وهو اعترف ومع ذلك قواعد اللعبة دخلتهم وايرلندا قبلت بغض النظر عن قواعد اللعبة تعجبني ولا لأ أنا لازم التزم بها الالتزام بالشرعية هو أساس نجاح الفكرة فاللي يخرج برة الشرعية ده عاوز يقتل الفكرة سواء كانت الفكرة دي مباراة كورة قدم أو مسابقة عالمية أو دوليه
د/عمروعبدالسميع : مظبوط
د/حسام بدراوي : أنا في إطاررؤيتي لأشياء كثيرة جايزميعجبنيش قانون من القوانين جايز متعجبنيش مادة من الدستورجايز ميعجبنيش تصرف بعينة لكني التزم بالشرعية علشان اقدرانقل المسابقة الى المستوي الأفضل
د/عمروعبدالسميع : مظبوط
د/حسام بدراوي : وحتي تكون المنافسة مبنية على معاييرمتفق عليها أنا مقدرتش أغير نظام اللعب بعدما المتش يبدأ
د/عمروعبدالسميع : طيب ليه بقي المتفق عليه هو الخروج أو النزوع للخروج أو التلويح بالخروج ؟
د/حسام بدراوي : هو رغبة الناس بالخروج عن المألوف أوعن الشرعية أنا في رأي دلائل ضعف مش دلائل قوة لأني أنا لو بلعب بالقواعد اقدر اكسب لو عاوز اغير القواعد يبقي أنا مش قادر اكسب
د/عمروعبدالسميع : تمام في هذا السياق ايضا احنا بنشوف في العالم كله اهتمام وناس في الحقيقة بكرة القدم يعني بنشوف الرئيس باراك اوباما رئيس الولايات المتحدة الأمريكية أزاي بيدعم شخصيا ملف استضافة الولايات المتحدة الأمريكية لكاس العالم شوفنا جاك شيراك الرئيس الفرنسي السابق قبل كده سنة 98 بيروح في المدرجات ويمسك الكوفية بتاعته ويقعد يلوح لفريق الديوك بتاعه وبنشوف رؤساء آخرين بيلغوا ارتباطات ومواعيد رئاسية ومواعيد مفاوضات علشان يروحوا يحضروا مباريات كورة القدم في تقديرك ده تعبيرعن ايه هل هو محاولة لاستغلال الكورة كأداة سياسية وتحقق الشعبية لنظام أو لرئيس ؟
د/حسام بدراوي : ممكن طبعا تكون استخدام الأداة الشعبية وممكن يكون مشاركة من سياسي لو كان سياسي بارع في فرحة الآخرين فرحة قوي الشعب ايوه لان أنت لما تكون جزء من الناس أزاي تكون جزء من الناس وأنت سياسي قاعد على كرسي السلطة الرياضة في رأي تقرب السياسي ده أيا كان شكل رئيس ايطاليا في نهائي كاس في سنة 82 وهو يقف يتنطط كان يعني فوق ال 80 سنة متتنسيش فهي ممكن بعض السياسيين يخدوه كطريق لممالأ الشعوب لكن في بعض السياسيين الأذكياء هم يشاركوا الشعب الفرحة وفي بعض السياسيين اهتمامهم حقيقي ما هي متعه ومين قال ان السياسي لا يتمتع زيه زي باقي الناس خصوصا لما يكون فيها انتماء وطني ويكون فيها مكسب لبلدة بالإضافة الى ان المسابقات العالمية زي دي أصبحت ايضا مصدر رخاء اقتصادي إذا أحسن استخدامها أنا يجيب المسابقة في بلدي العالم كله النهارده في محطة مش بتتكلم عن جنوب افريقيا والاستادات اللي أتبنت والناس اللي رايحة والسياحة اللي بتروح والتعريف بها بالقطع المسابقات الرياضية العالمية لها دورفي العلاقات العامة للدولة ولها دور في جوانب اقتصادية إذا أحسن استغلالها وأيضا تقرب السياسيين من الشعوب
د/عمروعبدالسميع : خدنا الكورة على الجانب الرئاسي خلينا نأخذها على الجانب الشعبي الصحفي البريطاني " صيمن كوبر " راح لف الدنيا كلها وقابل مئات الأشخاص وألف كتاب اسمه الكورة ضد العدو في هذا الكتاب أشارإشارات واضحة الى ظاهرة استخدام كورة القدم في تأجيج المشاعر السياسية السلبية أو الايجابية عند الجمهور تقديرك الكورة تستخدم أزاي في مصر ؟
د/حسام بدراوي: لأ الحقيق الكورة بتستخدم في مصر سلبا يعني لازم أكون واقعي يعني اللي حصل ايام متش مصر والجزائر ده تأجيج للمشاعر ضد أفكار ترسخت وتراكمت عبر التاريخ في علاقة مصر والعالم العربي فانا لما أخد الموقف واصعده وأكبره والهبه لدرجة ان يبقي في معركة بين الشعوب فده استخدام سلبي لمشاعر الجماهير
د/عمروعبدالسميع : طيب بلاش مصر والجزائر واللي حصل مع جمهور الإسماعيليه من قوات الشرطة اسمه ايه ؟
د/حسام بدراوي : أنا لا اعلق على ما لا اعرفه بالدقة لكن أنا عارف ان كان في يعني شبه اشتباك الجزء اللي أنا شوفته بعينيه في التلفزيون كانت ناس بتشيل الكراسي وترميها ده اللي احنا شوفناه في التلفزيون جايز يكون في استنفار لهم سابق بس أنا معرفتهوش
د/عمروعبدالسميع : تم معالجة ده إعلاميا وصحفيا أزاي أنا عاوز أوصل للنقطة دي
د/حسام بدراوي : آه هنا بقي المعالجة بتوري ثقافة الاعلام في مواجهة هذه الأمور ممكن تأخذه ده وتدي به موقف ايجابي علشان ميتكررش
د/عمروعبدالسميع : تمام
د/حسام بدراوي : والجانب الفني ساعات يكبر الأخطاء علشان متحصلش تتكلم عليها من هذا المنطلق لكن لما نأخذ الإطار بتاع ده ضرب وده كسر وده سلبي وده سلبي ما حنا ممكن نجر المجتمع كله الى إطارمن السلبية لاحظ ان الجمهور ده برضه اللي بيكسر أحيانا إذا أنت عملت له قياده حكيمة لمشاعره هو الجمهور اللي أنت عاوزه يشجعك
د/عمروعبدالسميع : الروابط اللي هي شبة منظمات المجتمع الأهلي " الالترس والويت نيت " والحاجات دي تقديرك لها ايه ؟
د/حسام بدراوي : وماله كل ما يبقي في روابط تشجع ايجابيا وتجمع الناس حول
د/عمروعبدالسميع : أنت تقديرك انها بتشجع ايجابيا ؟
د/حسام بدراوي : في بعضها بيشجع ايجابي الحقيقة يعني أنا مش عاوز أقول ان كل الروابط فيها ناس مش كويسه بها ناس بتشجع ايجابيا وفي كل التاريخ دائما بيقول ايه دائما في مجموعة تقود الجماهير إذا كانت قياده الجماهير دي جيدة تبقي ايجابية وأنا عاوز أقول حاجة مهمة ويمكن الشباب يعني يسمعني في قول جميل يقول يعني يرتفع الناس الى مستوي ظن الآخرين بهم كل ما تتكلم أفضل على الناس كل منا يرتفع مستواهم يخافوا يبقوا قدامك اقل مما تظن بهم أنا في رأي ان الجمهور المصري على مر التاريخ كان ايجابي
د/عمروعبدالسميع : وهو كذلك لا يستخدم الفورفوزلا دكتور مدحت في الحقيقة ذكر دلوقتي حالا الدكتور حسام بدراوي ذكر موضوع أزمة مصروالجزائر في أم درمان احنا شوفنا بعد هذه الأزمة في الحقيقة بعد الكتبه الرياضيين من على منصات التأثير سواء كانت إعلامية أو صحفية قاموا بعمليات واسعة في الحقيقة للتحريض يعني انتقلت من التحريض ضد الجزائر الى التحريض ضد الشعب الجزائري الى التحريض ضد العروبة الى التحريض ضد القومية العربية ضد كل حاجة في الدنيا في الحقيقة لكن أمبارح كان المشهد لافت للنظر جدا المصريين كانوا سعداء وفخورين ومبهورين بأداء الفريق الجزائري أمام انجلترا كل الحملات دي ماثرتش في المصريين ليه ؟
د/مدحت العدل : لأنك ببساطة متقدرش تلغي تاريخ من الترابط العربي قادته مصر من أكثر من 50, 60 سنة من 100 سنة متقدرش تلغيه بمقالة أو برنامج تلفزيوني تخلي الناس تغلي بشكل وقتي لكن تغير وجدانها متقدرش تلغيه والحقيقة هي المشكلة كلها ان في حالة من حالات محاولة فصل المصري عن هويته العربية بقالها 40 سنة بشكل أو بأخر وادعاءات بان احنا مش عرب وان احنا فراعنة وان العرب دول ودونا في كذا ورجعونا هذه الادعاءات اتقالت كثيرجدا ودائما بيلاقوا يستنوا فرصة زي متش الجزائر كده وترجع هذه النغمة تاني لكنها لا تؤثر في الناس أنا أتذكر ان أنا ليه عمل اسمه الحلم العربي لم أكن أتخيل ان هذا العمل وسط الأغاني التجارية المنتشرة طول الوقت ان هذا العمل بنغمته الهادئة مجرد انه أتقال وبيتكلم فيه عن حالة التوحد العربية نجح على المستوي التجاري ونجح في المدارس ونجح في الأندية ونجح ومتقدرش تلغي وجدان الناس ولا تأثرهم لان الناس أكثر ذكاء من اللي بيقدموا برامج في التلفزيون ومن اللي بيكتبوا في الصحافة وأكثر وعيا رغم إحساسنا ان هما مش كده بيحدث شيء
د/عمروعبدالسميع : ايوه اللي بنتكلم عليه هوالضمير الشعبي
د/مدحت العدل : الضمير الشعبي والواقع والثابت ان كثير من الكتاب والمعلقين والبرامج التلفزيونية منفصلة انفصال تام عن الشارع اللي موجود الشارع العربي والشارع المصري ودي كارثة في حد ذاتها ان أنت مش حاسس أنت بتكلم مين
د/عمروعبدالسميع : ايه بيكلم الشارع الفنلندي مثلا ولا ايه؟
د/مدحت العدل : مثلا ده حقيقة أنت بتكتشف لما تنزل الشارع ان أنت مش من الشارع ده ومتعرفوش فاللي حصل أمبارح والناس كلها كانت متخيلة ان الناس مش هتشجع الجزائر الناس كانت فرحانة بالجزائر
د/عمروعبدالسميع : جدا
د/مدحت العدل : آه جدا الحقيقة وأنا كنت فخور
د/عمروعبدالسميع : أنا رحت أكثر من كافية الحقيقة علشان اختبر الحكاية دي قلت بما ان عندنا حلقة هنتكلم فيها فلازم أروح أشوف مشاعرالجمهور المصري شكلها ايه فرحت أكثرمن كافية بتعرض المباراة كان تشجيع هائل وحماسه بالغة يعني ؟
د/مدحت العدل : ما هو الموضوع على فكرة برضه احنا مش عاوزين الدم المراق والناس اللي ماتت معانا في 67 و 73 الشباب اللي كان بيشجع الجزائر يمكن ميعرفش
د/عمروعبدالسميع : فاكرين يا ولاد الرئيس هواري بو مدين الرئيس الجزائري الأسبق أرسل قوات جزائرية للحرب معانا كانت على قناة السويس حاربت واستشهد فيها ناس
د/مدحت العدل : هل من الحكمة ان احنا نستغل قنوات تليفزيونية علشان نعمل حالة من الفوضي والبلبلة وتأجيج المشاعر في ناس كانت معترفة بشكل حكيم ما هو في ناس اعترضت
د/عمروعبدالسميع : طبعا طبعا الطبيعي ده ان نعترض آه
د/مدحت العدل : لكن لم نصل الى حالة الملاسنة والى حالة ان أنت تتعدي الحدود وان أنت تتكلم كلام سخيف ملوش معني وده كان الوضع الطبيعي ان أنت تغضب من حاجة أنت شايفها وزعلان منها
د/عمروعبدالسميع : تغضب من حاجة احنا بقي نلاحظ ان احنا بنغضب من فكرة الهزيمة الرياضية يعني معندناش لا ثقافة فوز طبيعية ولا ثقافة هزيمة طبيعية
د/مدحت العدل : في اختلاف
د/عمروعبدالسميع : نقول لنا الحكاية دي مردودها السياسي ايه على الحالة العامة في مصر؟
د/حسام بدراوي : تطرف سياسي
د/مدحت العدل : طبعا وفوضي حالة من الفوضي اللي كان الدكتورحسام بيقولها ان أنت بتخرج بره إطارالشرعية وكل مع اني أنا مختلف في حاجة مع الدكتور حسام
د/عمروعبدالسميع : مش معايا يعني ؟
د/مدحت العدل : لأ مع الدكتور حسام ان بعض عندما تحس ان القواعد التي تحكمنا بعضها قواعد جائرة فأنت تحاول بقدرالإمكان ان أنت متنتميش الى هذه القاعدة أو تحاول تغييرها أو تحاول فيصبح هناك نوع من أنواع الفوضي هنا وهنا فإحنا مش عاوزين دائما نقول ان جميع القواعد الموضوعة من البشرهي قواعد سليمة 100% وبالتالي فعلينا ان ترضخ لها وتحييها حتي ولو انها بتظلمنا وفي نفس الوقت مش كل الناس اللي يتعرض على هذا الظلم يتعرض بنسبة سليمة تكون هناك نيات ارخي فلابد ان ننتظرالى الأمور من الجانبين
د/عمروعبدالسميع : بس ينبغي ان يبقي في رضوخ أو انصياع لمؤسسة رمزية ومعنوية ثقيلة العياراسمها القانون يعني حضرتك بنلاحظ مثلا ايه جمهورالكورة بتعنا لما ميعجبوش قرارالحكم يقولك شيل الريست ايه اللي يقدريشيل الرست
د/مدحت العدل : آه يشيلة أزاي يعني ما هو زي ما الدكتورقال هناك حد ادني من الانصياع لقواعد اللعبة اللي أنت قبلت الدخول فيها
د/حسام بدراوي : ووسائل بتعديل القواعد إذا احتجت لتعديله برضه حتي الوسائل يجب ان تكون شرعية ما في الكورة عملوا مثلا الجول الذهبي وبعدين لغوه وعملوا
د/مدحت العدل : محكمة رياضية
د/حسام بدراوي : وفي وسائل لتغيير ما لا تريده في إطارمن الشرعية
د/مدحت العدل : هي الحقيقة الخطاب الإعلامي كان اسوأ ما يكون في أزمة الجزائرالحقيقة أنا كنت أتفرج على التلفزيونات والتلفزيونات في برامج مش قادرأتخيل
د/عمروعبدالسميع : الفضائيات الخاصة وتلفزيونات الخاصة وكله .
د/مدحت العدل : مش قادرأتخيل ان هذا الانفعال المجنون
د/عمروعبدالسميع : والمصطنع ايضا .
د/مدحت العدل : والمصطنع
د/عمروعبدالسميع : لان مفيش حد يحب مصر وميحبش عروبتها أزاي دي انفصام شخصية
د/مدحت العدل : هو في نوع من أنواع التناحروالصراع بين الفضائيات وصل الى حالة من حالات التردي يفكرنا مجالات
د/عمروعبدالسميع : وعملوا رموزكسورايضا في الاعلام الرسمي والجرائدالرسمية للأسف الشديد
د/مدحت العدل : لأنه انصياع غير مدرك وغير عاقل هو نفسه اللي بيكتب تحول الي نوع من أنواع الفوضي لدرجة انه مش قادر يحدد بالظبط هو بيكتب ليه وعلشان ايه ويفكرنا بالمسرح زمان لما كان فرقة على الكسار تعمل مسرحية فترد عليها فرقة الريحاني علشان يحبوا جمهور فتحول إعلام الخاص بشكل خاص يعني علشان هو اللي كان بيتابعه أكثر نوع من أنواع أسف على الفظ الردح لمحاولة
د/عمروعبدالسميع : إحياء ثقافة الإذاعات الأهليه بتاعة زمان يعني ؟
د/مدحت العدل : بالظبط كده
د/عمروعبدالسميع : أستاذ سعد الحقيقة انه ما دمنا جبنا سيرة صحفي انجليزي نجيب سيرة صحفي أمريكاني واحد اسمه " مايكل مور " عمل كتاب ايضا كبير طويل عريض عن الكورة لكن من زاوية جديدة ومبتكرة جدا هو شاف ان الكورة وسيلة من وسائل التجاوب مع مقتضيات عصر العولمة يعني عابرة للحدود الوطنية عابرة للهويات الوطنية وان ده يساعد على حركة التجارة العالمية ويساعد على حركة قيم واحدة في العالم طبعا الكلام ده عاوزين نناقشه في إطار انه ربما تكون الكورة وسيلة للتشدد الوطني يعني احنا بنشوف الناس والإعلام في المدرجات ومنفعلة اد ايه ومستميتة اد ايه وممكن تخرج تعمل حتي كوارث زي الجمهور الانجليزي ما بيعمل طول عمره يعني تقديرك ايه ؟
أ/سعد هجرس : طيب اسمح لي بس قبل ما اعلق على النقطة دي اني أنا اهنىء البرنامج بعيد ميلاده الخامس
د/عمروعبدالسميع : وأنت بالصحة والسلامة
أ/سعد هجرس : وأنت عارف يا دكتورعمرو مش من هواه المدح اذ مبمدحش المسئولين والوزراء مش همدح زميل صحفي يعني زي وأنت عارف يا دكتورعمرو مش من هواه المدح اذ مبمدحش المسئولين والوزراء مش همدح زميل صحفي يعني زي حضرتك إنما أنا انتهزهذه الفرصة أولا وأهنئك بالعيد الخامس ويوقل ان ده برنامج من البرامج القليلة الحوارية المحترمة في مصر والعالم العربي حوارجاد وأنا شخصيا طرحت في هذا البرنامج كان قبل كده خطوط حمراء وافتكر انك أنت تتذكر انه أول يمكن برنامج في مصر طرحت فيه مثلا أفكارمهمة زي تعارض المصالح اللي الناس دلوقتي بيتكلموا عليها كان أول برنامج طرحنا فيه وأنت تذكراني أنا يوم ما طرحت هذه الفكرة كانت محل استنكار من الضيوف اللي كانوا معايا سواء كانوا رجال أعمال ولا وزراء دلوقتي بقي كل
د/عمروعبدالسميع : الفضل هنا ينسب في الحقيقة لقيادة الاعلام اللي أتاحت هذا القدرمن الحرية حتي ولو كان في بعض يطرح هذه النقطة ليس من اجل اني أجاملك ولكن من اجل مثل هذه البرامج الجادة تستحق انه تأخذ فرصة أوسع يعني احنا نريد مزيد من حالة حوار في المجتمع لان احناعندنا حالة من حالات احتباس ديمقراطي أنا أريد انه تحتاج انه حالة حوار دي ميبقاش برنامج واحد وعمرو عبد السميع واحد يبقي برامج كثيرة نحن في حاجة احنا مجتمع مبيكمش بعضه لسه عاوزين نتكلم
د/عمروعبدالسميع : يعني تعمل الاستنساخ بس على إعلامنا ؟
أ/سعد هجرس : ده طبعا وبعدين وأتنقل من ده الي نقطة ثانية قبل برضه ما أجاوب على السؤال اللي هي متعلقة بقواعد اللعبة لأنه احنا في الحوار بنتكلم عن قواعد اللعبة المستمدة أو المستوحاة من رح كورة القدم طبعا أنا موافق على الكلام اللي قاله دكتور حسام ودكتور مدحت ولكن مع تعديلات أولا انه في بعض قواعد اللعبة الموجودة عاوزة إعادة نظر يعني مثلا م ضمنها الحكام الأجانب يعني ايه الحكم الأجنبي معناه اني أنا مش واثق في الحكم بتاعي المحلي الوطني ومش واثق فيه ليه
د/عمروعبدالسميع : دي زي كده أيام الخديوي المحاكم المختلفة ؟
أ/سعد هجرس : آه وبعدين إذا أنا يأخذ الحكم الأجنبي في الكورة يبقي اجيبه في الانتخابات مقدرش اجيبة في متش الكورة ومجبوش في الانتخابات يراقب الانتخابات الحاجة الثانية إذا الحكم بتاعي المحلي الوطني مستواه ضعيف اني أنا ابحث ليه مستواه ضعيف ليه الناس لا تثق فيه ليه الأهلي لما يجي يلعب مع الزمالك لازم يبقي الحكم أجنبي نشوف ايه الأسباب
د/عمروعبدالسميع : الأسباب تتعلق بالأهلي مش بالزمالك ؟
أ/سعد هجرس : فالحاجة الثانية انه نشوف ان قواعد اللعبة بتتغير ونشوف ايه في قواعد اللعبة مش مظبوطة عندنا حاجات كثيرة ان من ضمنها ان الخصم يبقي هو الحكم مينفعش اني أنا بلعب معاك وتبقي أنت الحكم بتاع الكورة ومع انك بتلعب معايا الحاجة الأخيرة تخصنا كصحفيين ان جزء من قواعد اللعبة أنت بتلعب كورة ممكن لو احنا بنلعب في فريق فانا اعمل فيك فاول فالعقوبة بتاعتي ايه في الحالة دي بإنذاريا الحكم يطردني من اللعبة إنما ميودنيش القسم إنما لو احنا خرجنا بره الملعب وارتكبت معاك نفس الفاول تروح القسم والنيابة هنا بقي قواعد اللعبة بتعاتنا كصحفيين انه في جرائم النشر ميصحش تحبسني يصح أتغرم ودي ميبقاش ان الصحفي على رأسه ريشة ده جزء من قواعد اللعبة بالظبط زي ما اللعب يعمل فاول يبقي ياخذ يتحاسب عليه فاول بس نفس الحكاية لو أنا غلط كصحفي أخد فاول الفاول بتاعي هنا ميثاق الشرق الصحفي يطبق عليه يا بالكثير ادفع غرامة
د/عمروعبدالسميع : بس الفاول في كرت اصفر وبعدين كرت احمر .
أ/سعد هجرس : آه طيب أنا عندي في ميثاق الشرف الصحفي فيه تصل لغايه التجميد بعضوية في النقابة والحرمان من مزاولة المهنة لمدة وفي الأخر كرت احمر
د/عمروعبدالسميع : طيب ما تجاوبني على سؤال بقي قبل ما تجاوب على سؤالي كنت بتلعب كورة ؟
أ/سعد هجرس : أنا لعبت كورة آه
د/عمروعبدالسميع : لعبت في مركز ايه ؟
أ/سعد هجرس : لعبت حارس مرمي
د/عمروعبدالسميع : حارس مرمي طبعا كان بيخش فيك أجوال للصبح ؟
أ/سعد هجرس : ده صحيح لأنه أنت تندهش أنا كنت حارس مرمي فين
د/عمروعبدالسميع : فين ؟
أ/سعد هجرس : أنا كنت في المعتقل السياسي معتقل الكورة السياسي وكانوا الكاباتن بتوعي مثلا اللي خد عشر سنين وبتاع وحاجات زي كده
د/عمروعبدالسميع : أي فصيل اللي كان بيجيب فيك أجوال أكثر؟
أ/سعد هجرس : لا هو دي كانت مباراة كانت مثيرة شوية لان احنا في المعتقل كان فيه يسار وكان فيه أخوان مسلمين وكان فيه ناس لا أخوان ولا يسار
د/عمروعبدالسميع : آه مستقلين ؟
أ/سعد هجرس : احنا في المعتقل أنت شم عارف هتخرج إمتي غيرلوأنت واخد حكم عارف انك تخرج بعد سنة بعد سنتين وده كان في الستينات الكلام ده كان بعد هزيمة 67 فكان معتقل يهود المصريين ودي حاجة سيئة جدا انك تعتقل علشان أنت يهودي مثلا فالمهم الأخوان المسلمين يا أخوان مسلمين تعلبونا كورة قالوا لأ ما نلعبكوش
د/عمروعبدالسميع : قالوا لأ ليه مستحرمين ولا
أ/سعد هجرس : أنا جيلك في الإجابة فقلنا لليهود تلعبونا كورة قالوا نلعب معاكم كورة فجأة بلغنا الإدارة وكده كان في معتقل طرة السياسي المهم اليهود كانوا عيال صغيرين شوية وأعضاء في نادي الجزيرة ونادي كذا وكذا وشبان صغيرين ونزلين بتشرتات وشبان وإحنا بقي فريق أنا كنت شاب إنما كان معانا المهم كان معانا ناس اللي معتقل 10 سنين قبل كده وناس سياسيين والناس في الكورة يعني فطبعا اليهود غلبونا 10/1 وأنا كنت حارس المرمي
د/عمروعبدالسميع : هي دي نكسة 67 فعلا
أ/سعد هجرس : المشكلة ان لاحظنا اثناء المباراة ان الأخوان المسلمين بيشجعوا اليهود الله فسالناهم بعد ما خرجنا كان الله يرحمه الأستاذ مصطفي مشهور فرحنا له الله انتوا بتشجعوا اليهود ضدنا ليه فضحك مصطفي مشهور وقال أصل أهل كتاب برضه
د/عمروعبدالسميع : يا سلام
أ/سعد هجرس : المهم ارجع لسؤالك المتعلق بالرياضة والعولمة طبعا العلاقة وثيقة جدا وأنا افتكر انه كان المونديال اللي أتلعب في اسبانيا سنة 1982 كان نقطة تحول نقطة تحول مهمة في تاريخ الفيفا اللي هي اتحاد الدول لكرة القدم نقطة تحول من عدد من الزوايا أوزاويتين أساسيتين الزاوية الأولي انه دخل مفهوم الرعاة في الكأس والحاجة الثانية البث التلفزيوني حقوق البث التلفزيوني نقل المباريات بالتلفزيون لان دي مرتبطة بالفوز المعلوماتية والعولمة لأنه بدأت تبقي في الأقمار الصناعية وانه
د/عمروعبدالسميع : وصلنا دلوقتي الى ان حجم المال الذي يتم تدويره في صناعة كورة قدم 250 مليار دولار أما في ملابس رياضية أما في تذكارات وهدايا أم في منشات رياضية أم في أي حاجة من الكلام ده
أ/سعد هجرس : أصبحت الفيفا دولة عظمي بمعني الكلمة بل ان ميزانيتها اكبر من ميزانيات كثير من الدول في حين انها بدأته سنة 1904 ب 500 فرانك سويسري 500 فرنك النهارده دول تحولوا الى مليارات البث التلفزيوني فقط في الدورة بتاعت جنوب افريقيا 3.5 مليار دولار احنا بنتكلم على مليارات ضخمة جدا المحترفين اللي بيلعبوا في الدورة 363 محترف قيمتهم ثمنهم 6.5 مليار دولار
د/عمروعبدالسميع : ثمنهم أنا بقي بلاحظ حاجة في هذا السياق يعني احنا مثلا لما نشوف لاعب زي ليونيل ميسي لاعب الأرجنتين الشهير اللي بيلعب في برشلونة ده راجل كتبت فية مجلة الفرنس فوتبول ان دخله السنوي 33 مليون يورو هنا مفهوم لان أنا بتفرج على لاعب استثنائي وبيجيب أجوال استثنائية محصلتش وبيصنع لعب محصلش وكل حاجة بشوف بقي اللعيبه بتعنا يعني دائما يتراوح الرقم ما بين مليون وعشرة مليون في السنة غيراللي فوق التربيزة واللي تحت التربيزة وعمليات السمسرة وعمليات العولمة ومش عارف ايه يعني زي أي حاجة كده كويس لكنة محس ان ده ثمن اللاعب هل التسعيرات في مصر حتي بالنسبة للعيبة الكورة تسعير مزاجي ملوش دعوة باليات السوق
أ/سعد هجرس : آه طبعا شوف أولا أنا عندي موقف أصلا من حكاية بيع اللاعبين وأنا رأي ان ده جزء من مسالة يعني خليني افصل بين حاجتين يعني الظاهرة الخاصة ارجع لها بس الظاهرة العامة المرتبطة بمسالة العولمة ده جزء منها جزء من تحويل الرياضة الى بزينسس أصبحت بزينسس ضخم جدا وأنا في المسالة دي شايف ان في جانبين الجانب السلبي أوالجانب الايجابي من وجهة نظري وشايف ان ده شكل من أشكال التجارة في البشر
د/عمروعبدالسميع : الله ده أنت كده تتفق مع الأخ العقيد معمرالقذافي قائد الثورة الليبية اللي عمل لسه من أيام بمناسبة افتتاح كاس العالم هاجم فيه مؤسسة الفيفا وقال انها تتاجرفي البشر وقال انها لا تسمح بإقامة مثل هذه الدورات في البلاد الفقيرة لكنها بتعملها في البلاد الغنية
أ/سعد هجرس : أنا في الحدود دي أنا متفق مع العقيد معمرالقذافي يعني كويس
د/حسام بدراوي : إنما بقيت الكلام
د/عمروعبدالسميع : لأ احنا لسه بنتكلم عن اللعب بره الحدود
أ/سعد هجرس : يعني كويس في الحدود دي فقط اني متفق مع العقدي القذافي وشايف ان ده شكل من أشكال التجارة في البشر وتحويل هوية ومتعه جميلة للبشر الى بزينسس الحاجة الثانية اربط ده بقضية ثانية الغالبية العظمي من الفراء في العالم محرومين من هذه المتعة الان نتيجة التشفير بص للمصريين دلوقتي على سبيل المثال الأفارقة اللي بتتلعب الدورة عندهم أنت عارف كام أفريقي وخدين تذاكر في كاس العالم 11 ألف واحد 11 ألف أفريقي من القارة كاس العالم في الملاعب من الأفارقة
د/عمروعبدالسميع : يعني الفقراء مهمشين حتي في كرة القدم
أ/سعد هجرس : طبعا وده جزء من العولمة المتوحشة
د/حسام بدراوي : أنا مختلف في الكلام ده
أ/سعد هجرس : طبعا احنا مختلفين في دي مع ان احنا متفقين في حاجات كثير إنما طبعا جزء منها أصبحت الان حتي الرياضة حتي متعة المشاهدة دي أصبحت مفيش حاجة اسمها مشاهدة مجانية معاك فلوس تتفرج معكش فلوس متتفرجش مش بس في الملعب ده حتي في التلفزيون
د/عمروعبدالسميع : كورة القدم أصبحت تجسيدا للعولمة المتوحشة ونتواصل بعد الفاصل
د/عمروعبدالسميع : عدنا لنواصل التقليب في ملف المونديال الشباب اللي عاوزيقوم يسال أتفضلوا
علم الدين محمود- كلية الاعلام القاهرة : ولا أي كلام أغاني حبيبتي مصر أنا مصر حبيبتي في كفة وكل الدنيا بكفة دي بلد عن نجيب واحمد زويل والخطيب والمعلم غني عن التعريف هنا كل العالم يحبون كرة القدم والمصريين خصوصا وغير ذلك كل دول العالم تتمني ان يكون كأس العالم على أرضها السؤل هنا هو لسان حال كل مصري هل هناك بصيص آمل ليكون كأس العالم على ارض مصر وهل أم الدنيا لديها الإمكانيات لاستضافة كأس العالم على أرضها
د/عمروعبدالسميع : لديها يا علم الدين وهنعمله هنا وهنعمله مرة عندكم في غزة ان شاء الله يالا زميلتك
منه السواقي- كلية إعلام جامعة القاهرة: أحداث مصر والجزائرالسابقة عملت على تهييج الرأي العام واختلطت السياسة بكرة القدم نتيجة تلك الأحداث سؤالي هو هل كرة القدم تؤثر بالفعل على الرأي العام أم ان أحداث مصر والجزائر يمكن اعتبارها حالة خاصة
د/عمروعبدالسميع : أنتي رأيك ايه في ده ؟
منه : في ظل ظروف معينة
د/عمروعبدالسميع : أنت رأيك ايه ؟
منه : أنا رأي انها حالة خاصة نتيجة ظروف معينة
د/عمروعبدالسميع : لكن كرة القدم في رأيك مابتاثرش على السياسة طوال الوقت ؟
منه : مش في كل وقت في أوقات معينة
د/عمروعبدالسميع : ايه بقي الأوقات المعينة ؟
منه : لما يكون في تعبأه أصلا إعلامية يعني نتيجة تأثير الاعلام في المجتمع
د/عمروعبدالسميع : تمام زميلك
محمد عبد الوهاب خفاجة- طالب في كلية العلام جامعة القاهرة : أنا لي سؤالين السؤال الأول موجه للأستاذ سعد حضرتك كيف تستطيع دولة فقيرة ان تنظم مسابقة رياضية كبري بحجم كأس العالم في مقابل انها لا تستطيع يعني اقتصادها ضعيف فهي لا تستطيع وسيادة العقيد معمر القذافي أتكلم في الوضع ده كان عاوز من الدول الفقيرة هو أنا اعتقد ان هو عاوز ينظم البطولة
د/عمروعبدالسميع : طيب السؤال الثاني .
محمد: هل ممكن وضع رقابة لحد التجاوزات للقنوات الفضائية والخاصة والتي أصحبت منتشرة جدا بعد إثارة مشكلة دع دول شرق افريقيا وهي الجزائر ومدي ردود الأفعال ؟
د/عمروعبدالسميع : زميلك
وائل محفوظ -أمانه شباب الحزب الوطني محافظة بني سويف : نري في المجتمع المصري الاختلاف من اجل الاختلاف والكلام من اجل الكلام متى ينفق المجتمع المصري بجميع أطيافه سواء أحزاب معارضة إعلام على رؤية واحدة لخدمة هذا الشعب
د/عمروعبدالسميع : علاقته ايه بالكرة ؟
وائل: في ظل انه حصلت اتفاق واحد وهو في عام 2006 , 2008 , 2010 على تشجيع المنتخب المصري فكيف نستغل هذا الاتفاق
د/عمروعبدالسميع : تمام زميلك
هشام شعبان إعلام القاهرة : بالنسبة لمسالة أسعار اللاعبين المصريين وارتفاعها أنا شايف ان السبب عدم اعتماد الاندية الكبيرة زي الأهلي والزمالك على قطاع الناشئين عندها أنا عاز اعرف رأي الأستاذ سعد هجرس في هذا
د/عمروعبدالسميع : أنت أهلاوي ولا زملكاوي ؟
هشام : أهلاوي
د/عمروعبدالسميع : زميلك
احمد كمال كامل- تجارة القاهرة :دكتورحسام بدراوي ماهي مقترحاتك بالنسبة لدخول مباريات كاس العالم 2010 مع امتحانات الثانوية العامة وامتحانات الجامعات المصرية هل هذا يؤثر ايجابيا أم سلبيا على نتائج الثانوية العامة والجامعات المصرية ؟
د/عمروعبدالسميع : تمام زميلك
عبد الحميد السعيد- الفرقة الأولي كلية إعلام جامعة القاهرة : بالنسبة لكاس العالم هل عمل كاس العالم على الهاء الشعب المصري عن قضاياه الداخلية
د/عمروعبدالسميع : يعني أنت عايز تقول ان الفيفا و32 دولة اللي رايحين جنوب افريقيا دول كانوا عاملين مخطط لإلهاء الشعب المصري ؟
عبد الحميد : لأ لأ اقصد ذلك بتكلم عن كون الشعب المصري لمشاهدته لهذه المباريات
د/عمروعبدالسميع : أنت تعتقد انه منع الشباب المصري من انه يشوف كرة القدم أو يزاول ما يراه من منع حقيقة وده حقه الإنساني شايف ان ده يحضره في الأمور اللي أنت شايف انه لازم ينحصر فيها ؟
عبد الحميد : ممكن
د/عمروعبدالسميع : ممكن يعني أنت عاوز تصل الى تقييد حرية الناس الى هذا الحد ممكن ؟
عبد الحميد : أنا اقصد مثلا القضية الفلسطينية الصراع العربي الإسرائيلي من الممكن ان يؤثر على ذلك ويلهي الشعب المصري والوطن العربي
د/عمروعبدالسميع : أنت عاوزتقول ان ما فيش أولويات من وجهته نظرك أنت أنا ما فيش أولويات صحيحة في اهتمامات الناس لكن أنت متقدرش ولا أي قوة في الدنيا تقدرانها تمنع الناس من الاستمتاع بحياتها زميلك
وجيه فهمي من إعلام القاهرة : أنا هقول شوية تعليقات على أول مناقشة حضرتك عملتها مع الدكتور حسام بدراوي حضرتك الأول شبهت ان حدود الدستور بالمستطيل الأخضر
د/عمروعبدالسميع : مش بالجول بالملعب
وجيه : آه الخطوة البيضاء بتحط نهايه المستطيل الأخضر تمام كده فأي جامعات بتمارس أي نشاط خارج الحدود دي فدي ظاهرة طبيعية لأي أمه عريقة ما اعتقدش ان هي مشكلة
د/عمروعبدالسميع : أزاي الحدود دي يا حبيبي هي القانون ما فيش أمه عريقة الناس تخترق فيها مؤسسة القانون ابدا ايه النقطة الثانية ؟
وجيه : حضرتك ان دكتور حسام بدراوي قال ان الخروج بيكون هدفه قتل الفكرة مش شرط ان كل خروج يكون هدفه قتل الفكرة ممكن تكون الناس دي هدفها انها تصلح بس محتاجة توجيه النقطة الثالثة ان استضافة مسابقات مربح في غير مصر لان في أي دولة ثانية غير مصر لان مصر منجحتش انها استفيد أو تحقق استفادة حقيقية للشعب ككل من حاجة رأي قناة السويس أو السياحة لما ومصر تحقق استفادة ككل للشعب كله من الاثنين دول
د/عمروعبدالسميع : أنت بتقصد توزيع عوائد ؟
وجيه : آه
د/عمروعبدالسميع : طيب أنت متصور انها لو نظمت بطولة رياضية هتقوم بتوزيع عوائدها على المواطنين بصكوك مثلا ؟
وجيه : لأ أنا مش اقصد كده بس اقصد ان احنا مثلا لو هننظم بطولة في مثلا الأسعار بتغلي علشان توفر فلوس للبطولة دي انها تتنظم
د/عمروعبدالسميع : أنت عاوز تقول ان الزيادة في الدخل القومي لا تنعكس على المواطن نفسه مش كده يالا زميلك ؟
احمد عبد الرؤوف شادي- الفرقة الثانية كلية الحقوق جامعة الزقازيق عضو برلمان شباب الشرقية : سؤالي مقدم للأستاذ سعد هجرس حضرتك تكلمت عن ضرورة الالتزام بالشرعية مؤكدا على كلام الدكتور حسام بدراوي سؤالي هو لماذا لا يتم تطبيق قو اعد كرة القدم تطبيق فعلي على كل مجالات حياتنا بمعني أخر لماذا لا يظهر ارتفاع أو لماذا لا يتم ظهور الكروت الصفراء والحمراء لكل من تسول له نفسه ان يستغل سلطاته استغلال سيء ولماذا ؟
د/عمروعبدالسميع : يعني أنت عاوزعقاب المسئولين عن التقصيرأو المخالفين للقانون ؟
احمد : ايوة بالظبط كده
د/عمروعبدالسميع : أيا كانت طبيعتهم أو جماهيريتهم يالا زميلك
هيثم المهدي- كلية زراعة جامعة القاهرة الفرقة الثالثة : الأداء في الملاعب بالنسبة لمنتخبات التي شاهدناه ليست بالأداء الذي يتخطي أداء منتخبانا المصري خاصة في البطولة الافريقية الأخيرة
د/عمروعبدالسميع : بس احنا لسه في الأدوارالأولي ده لسه أنت عارف انه بيحصل نوع من الارتفاع التدريجي لمستويات الفرق طول البطولة خلي بالك
هيثم : حضرتك برضه شاهدنا مصر أمام البرازيل في بطولة القارات وأمام ايطاليا بالنسبة لدول أهم فرق البطولة السابقة والبرازيل فريق معروف فشوفنا أداء منتخب مصر فهل لو دخلت مصر كأس العالم 2010 كانت هتعمل ايه أمام المنتخبات دي ؟
د/عمروعبدالسميع : أنت اللي تقول لنا كانت هتعمل أيه ؟
هيثم : حضرتك كنا هنوصل لترتيب معين هنوصل للنهائي بس كنا هنعمل ترتيب يمثل افريقيا كلها في البطولة
د/عمروعبدالسميع : في ناس كثيرة متفقة معاك زميلك
عمر عادل- كلية إعلام جامعة القاهرة : هو سؤالي حول استضافة جنوب افريقيا لكأس العالم هل ممكن ان يعطي الاتحاد الدولي لكرة القدم شرق استضافة مونديال كاس العالم لدولة افريقيا مرة أخري خاصة بعد الشكوى الأمنية اللي بتراود المونديال حاليا خاصة بعد خروج الجزائر على تقديم ملف استضافة مونديال عام 2026 ؟
د/عمروعبدالسميع : تمام زميلك
محمد محمود محمد- كلية الآداب جامعة عين شمس : أنا سؤالي موجه للكاتب سعد هجرس والدكتور حسام الريادة أو الكرة بشكل خاص لها شعبية عالية جدا فلماذا لا توجد ثقافة استغلال هذه الأحداث في الترويج للقضايا العامة يعني احنا شوفنا آه حملة مستشفي السرطان 5757
د/عمروعبدالسميع : وحملة لا للمخدرات مثلا ؟
محمد : أكيد في قضايا أخري تستحق الالتفاف أكثر زي قضايا المشاركة السياسية ومثل هذه القضايا يا ولا هل أصبحت الرياضة ولاعبيها سلعة تدار وفقا للسوق والاقتصاد
د/عمروعبدالسميع : يعني أنت عاوز تسيس الرياضة أكثر من كده ؟
محمد : فمينفعش تستخدم اللاعبين في إعلانات مثلا المنتخبات الغذائية أكثر والحاجات دي كلها تستخدمه في قضايا عامة لان حجم المشاهد يبقي كبير في هذه التوقيتات
د/عمروعبدالسميع : إجابات و تعقيبات المنصة أستاذ سعد .
أ/سعد هجرس : في ثلاث أسئلة اتسئلوا السؤال الأول عن أسعار اللاعبين في مصر في هنا كذا نقطة بسرعة جدا أولا حاجة ده يخضع للعشوائيات
د/عمروعبدالسميع : مش بسرعة كل واحد عنده أربع دقائق .
أ/سعد هجرس : أولا دع للعشوائية الموجودة في كل حياتنا بتنعكس في تسعير اللاعبين نفس الحكايه الحاجة الثانية ان في معايير مختلة في مصر بحيث انه تلاقي واحد بقامة سيد ياسين بياخذ معاش 1500 جنية وبياخذ من الأهرام 5000 جنية يبقي كله على بعضة 6500 جنية سيد ياسين يبقي دخلة كده
د/عمروعبدالسميع : والله الواحد هيموت من الخجل وهو بيسمع الأرقام دي على أي حال .
أ/سعد هجرس : فانا بقول لك ده جزء في حين ان لاعب كرة القدم صغير لسه ومستواه على اده يأخذ الاف مؤلفة فده هنا خليك أنا مش ضد ان لاعب الكرة يأخذ فلوس باعتباره بيسعد الناس ولكن يبقي في تنافس يبقي نفس الشيء بالنسبة للكاتب بالنسبة للصحفي بالنسبة للطبيب بالنسبة للصيدلي الحاجة الثالثة زي الأسعار الاحتكارية وما هو مين اللي قال ان الأسعار في مصر حقيقية برضه لان في خلل في العرض والطلب ولأنه في قوة احتكارية موجودة كذلك نفس الشيء بالنسبة للرياضة أخيرا بالنسبة للنقطة دي انه الرياضة ما زالت ظاهرة فوقية في مصر ملهاش جذور احنا مبنتكلمش عن الرياضة كظاهرة مجتمعية احنا شوية أندية من فوق ومفيش لا رياضة في المدارس اللي هي الأساس في الرياضة مفيش رياضة للجميع ده مش موجود احنا بنتكلم هنا عن حاجات عشوائية جدا وفوقية جدا وبالتالي ده بينعكس كله على الأسعار أخيرا ليس احنا بنتكلم عن ظاهرة فساد الرياضي احد أهم الركائز الفساد في مصر وبالتالي ده
د/عمروعبدالسميع : متشرح لنا الحكايه دي ؟
أ/سعد هجرس : أولا عندك أنت أولا ملف اتحاد الكرة القدم مقدم للنيابة العامة الان وعندك أنت
د/عمروعبدالسميع : ده مش دليل فساد .
أ/سعد هجرس : ده دليل في شبة فساد
د/عمروعبدالسميع : ده تحت التحقيق .
أ/سعد هجرس : آه طبعا مهواش دليل لكن لما مصرتأخذ صفر وإحنا متقدمين للمونديال ده فساد في الملف الرياضي وبعدين في كلام كثير جدا في هذا الموضوع إنما الفساد ليس بعيدا الملاعب الرياضية ليس بعيدا برغم تناقضه طبعا مع الروح الرياضية النقطة الثالثة اللي سألوا برضه الشباب عن المحاسبة ولماذا لا نطبق معايير يعني قواعد الرياضة وقوانينها على المجتمع أنا مع تطبيق المحاسبة بشكل عام بس بثلاث شروط الشرط الأول احنا بنتكلم كوطن ميبقاش الحكم أجنبي الحاجة الثانية انه يبقي فو ق مستوي الشبهات يعني ميبقاش الحكم مطلع قرار يبقي لازم أنفذه حتي لو كان غلط يبقي الحكم لازم يبقي عادل الحاجة الثالثة انه تطبيق القانون يبقي على الجميع مجيش أعاقب فريق علشان من المنصورة والأقاليم ومحاسبش الأهلي لأنه ده زي الحزب الوطني على طول بياخذ كل حاجة بالتالي لابد ان يكون القاعدة على الجميع
د/عمروعبدالسميع : على أي حال نشأة الأهلي وفدية مش حزب وطني يعني .
أ/سعد هجرس : يعني ميبقاش في خيار وفقوس في أخر نقطة متعلأ بأهمية اللاعبين ولماذا لا نستفيد بأنهم سفراء للنوايا الحسنة أو بأنهم يلعبوا دور في المجتمع يا ريت ده معناه انك لعيب الكورة ده النجم الكبير ده يكون عنده حاجة يقدمها للناس إنما أنا بصراحة باستثناءات قليلة أنا ميجبش التعميم لما بشوف لاعبي الكرة بيتكلموا في التلفزيون نادرا لما ألاقي واحد عنده ثقافة عنده اهتمامات عامة عنده عمق في التفكير وشانهم شان الكثير من المهن في مصر الان
د/عمروعبدالسميع : طبعا حتي لعيبه الكرة زمان يعني أنت لما تشوف زمان لاعب الكرة صالح سليم كان بيتكلم أزاي الموضوع مختلف خالص ؟
أ/سعد هجرس : شوف رفعت الفناجيلي شوف مش عارف كانوا ناس لأ كانوا شخصيات عامة مهمة ومؤثرة إنما دلوقتي في تسطيح في كل حاجة فانا عاوز استفيد بده بس هو هنا هتيجي الحكايه ديه مربوطة بالنقطة الثانية ان تبقي عندنا رياضة إنما احنا معندناش رياضة النقطة الأخيرة
د/عمروعبدالسميع : الأخيرة جدا
أ/سعد هجرس : الأخيرة جدا متعلأ بالفقر والرياضة هل ممكن دولة فقيرة تستقبلا كأس العالم طبعا ده جزء من الظلم في النظام العالمي ان الفقراء ملهمش حظ ان هم لان علشان تنظم كأس العالم لازم يبقي عندك بنية أساسية يبقي عندك فنادق ويبقي عندك ملاعب قانونية وعندك نظام صحي كويس يعني أنا بصراحة الناس بتتباكي ان مصر منظمتش كأس العالم أنا بقول ان ظروفنا بالشكل ده وبالأداء اللي احنا فيه دلوقتي منقدرش ننظم كأس العالم بشكل كويس لأنه تصور القاهرة اللي احنا بنعاني فيها من مشاكل المرور دي أزاي تستقبل
د/عمروعبدالسميع : طيب ما المرور في جنوب افريقيا علشان يروحوا الملعب بياخذ ساعتين ونصف .
أ/سعد هجرس : طيب أولا أنت عندك مشاكل مفتكرش ان عندنا الملاعب اللي موجودة في جنوب افريقيا
د/عمروعبدالسميع : كانت هتتعمل ما هو أنت لو قبل ملفك الملاعب بتنشأ .
أ/سعد هجرس : طيب أنت مقبلش ملفك ليه ما هو لازم نحاسب نفسنا
د/عمروعبدالسميع : لم تحسن غرض إمكانياتك يا أستاذ سعد دكتور مدحت
د/مدحت العدل : أنا هتكلم في نقطة اللي هي حته البيزنس والاحتراف احنا لا يمكن ان نتخلف عن العالم والعالم ماشي في الاتجاه متقدرش أنت ترجع للوراء أولا ارتفاع الكفاءة دلوقتي مرتبط بالبيزنس ومرتبط بالفلوس لانك أنت لما تتفرج على الكرة زمان وتتفرج عليها دلوقتي تضحك زمان ةتتفرج على الكرة زمان تضحك من البطء ومن الفلوس اللي بتضخ في كرة القدم هو بيزنس آه بس هو السبب في انك بتستمتع دلوقتي بكرة القدم بتستمتع بلاعبين زي مسي ده جزء من اللعبة يعتمد على الإعلان معتمد على الميديا زي بالظبط لما تقول أنت ليه بتجيب ممثل تدي له 5 مليون كمنتج أنت بتدي له خمسه مليون لأنه بيجيب إعلانات تغطي الخمسة مليون وبالتالي كل شيء مرتبط بالثاني منقدرش نقول ان في جرنال يقدر يطلع من غير إعلانات وبالتالي الجرنال وكرة القدم والتليفزيون وأنا وكل اللاعبين دول مرتبطين ارتباط بالإعلان والإعلان مرتبط بالفلوس ومرتبط بالميديا وهكذا حتة برضه لاعب زمان ولاعب دلوقتي أنا شايف من وجهة نظري لاعبي الان أكثر ثقافة وأكثر قدرة على التخاطب من لاعبي زمان إذا حضرتك ضربت مثل بالكابتن صالح سليم فهو مثل وحيد استثنائي
د/عمروعبدالسميع : مش بس صالح سليم وحمادة أمام مثلا .
د/مدحت العدل : معلش برضه مثل استثنائي لكن هتلاقي لاعبي زمان كلهم مش زي لاعبي دلوقتي سفراء نوايا حسنة كلهم أولاد لاعبي كثير جدا أولا كلهم خريجين جامعة وده مكنش متوفر زمان وكلهم أولاد مثقفين ودارسين وسافروا وارتبطوا بالعالم وده بحكم ان بقي في كمبيوتر وبقي في نت وبقي في اتصال بالعالم نفسه ثورة الاتصالات خلت الأولاد طريقة تفكيرهم وطريقة عرض أفكارهم وطريقة ثقافتهم مختلفة عن زمان ده بالنسبة اللي قاله الدكتور سعد في كلام بقي قاله حد من الحزب الوطني اللي هو أزاي نتفق ليه منستغلش ان احنا كلنا اتفقنا على الكرة ونتفق على شيء طبعا ده منظور حسب وطني تماما ان ضرورة نتفق على كل شيء
د/عمروعبدالسميع : مفيش أمه في العالم تتفق على كل شيء ابدا .
د/مدحت العدل : بنتفق في الكرة لان منتخبنا القومي بيلعب وكلنا عاوزينه يكسب
د/عمروعبدالسميع : ده احنا قاعدين في الأستوديو ده كل واحد فينا دولة مستقلة لها علم وجيش .
د/مدحت العدل : أقول للأخ اللي سال ان تحتفي ثقافة الاختلاف وليس بثقافة الاتفاق على كل شيء والتنوع كأس العالم والثانوية العامة والراجل بيقول وأنا فاكر كأس العالم 78 كان بيتلعب في الأرجنتين وأنا كنت في كلية الطب وكنت بتفرج على جميع المباريات كانت بتيجي الساعة 3 صباحا وكنت بتفرج عليها وبطلع على الامتحان وكنت متفوق فيمكن الكرة بتعمل لنا حالة من حالات البهجة والسعادة والإحساس بأنك أنت بتشتغل كويس لأنك مستني متش تتفرج عليه
د/عمروعبدالسميع : ماهوأصل ده يا دكتور مدحت ده تفكير تحدي يعني دائما ايه متعملش حاجة علشان تعمل حاجة ثانية أنت ممكن تعمل عشرحاجات ومن ضمنهم انك تستمتع وتعيش حياتك حب حياتك حب نفسك .
د/مدحت العدل : وده يا دكتورعلى فكرة احنا هنبعد حته زمان كان الطبيب طبيب وعالم وفيلسوف ومناظر اجتماعي وسياسي وكل حاجة يعني الشخصيات الموسوعية اللي زي ما حضرتك بتقول تقدر تعمل مية حاجة ماعدتش موجو دة دلوقتي ينحصر دماغك يا في الثانوية العامة يا متش الكرة وتقول الناس محتاجة تقرءا وتتفرج على كرة وتقرءا كذا وتتتفرج على برنامج تلفزيوني وتذاكر وتنجح وكل حاجة
د/عمروعبدالسميع : كان في رئيس أمريكي اسمه جنرال فورد كانوا بينكتوا عليه في الصحافة الأمريكية يقولوا مبيعرفش يتكلم ويندغ لبانه في نفس الوقت أتفضل .
د/مدحت العدل : في حاجة هنا كمان هل احنا نقدر كنا ننظم كأس العالم لو أتيحت لنا الفرصة أنا بقول نقدر لان في هذا الشعب طاقات كامنه بتخرج وقت اللزوم لان احنا لما نيجي نشوف أكتوبر والعبور مفيش حد في الدنيا كان يقول ان الشعب يقدر يبني الهرم فبالتالي هذا الشعب العريق اللي بني الهرم واللي عبر يقدر ينظم كأس العالم لان أنا رحت جنوب افريقيا زرتها وأنا شايف ان الإمكانيات البشرية المصرية والإمكانيات الاستنفار الداخلي للشعب المصري يملك جدا احنا بنحب كرة القدم جنوب افريقيا مبيحبوهاش ومبيتفرجوش هي اللعبة الثانية يمكن في جنوب افريقيا يعني ان احنا ننظم بدليل ان احنا نظمنا كاس العالم للناشئين اعلي نسبة مشاهده في جميع الدورات اللي عملت موجودة في مصر الجيش عمل إستادات رائعة في جميع المدن
د/عمروعبدالسميع : إستاد برج العرب اللي حصل فيه الافتتاح حاجة تحفة .
د/مدحت العدل : حاجة رائعة على وجه السرعة فما بالك لو كنا بنظم كاس العالم
د/عمروعبدالسميع : فاكرينها البطولة دي بتاعت بوجي وعفرتو .
د/مدحت العدل : آه مش عاوز أقول ان اقل حاجة فيها كان مستوي المنتخب اللي لعب يعني لكن أنا نفسي أقول لا يجب ان ننظر بسوداوية لإمكانياتنا وبرضه ما نتفائلش قوي علشان لا نقع في السراب لكن نحن نملك إمكانيات ونقدر ننظم كأس العالم وزى ما حضرتك قلت كانت المشكلة كلها في عرض الملف لكن مش في قدرتنا على التنظيم
د/عمروعبدالسميع : مظبوط دكتور حسام .
د/حسام بدراوي : الحقيقة أنا لازم ابتدي بما ان الكل أتكلم على الحزب الوطني وأنا ممثل له على مسالة الرؤية المحدد علشان وائل وهو بيتكلم عليها وأنا متفق طبعا مع مدحت على الموضوع ده أوعوا تفتكر وان احنا كلنا يبقي عندنا نفس الرؤية ده هي القضية في تعدد والقضية ان احنا نحترم التعدد بيننا وبين بعض فالمسالة دي يا وائل لازم تكون واضحة في ذهنك ان التعددية أساس الديمقراطية وأننا وإحنا بنتعدد بنستفيد فوائد جمع من رؤية وجهة النظر الأخرى لكن ده لا يمنع ان احنا نتفق على قيم عامة نتفق على أسس واحدة احنا عاوزين نتفق ان مصر دولة مدنية حديثة ان المواطن يتمتع بالحقوق ان الحقوق الرئيسية له في التعليم والصحة والمواصلات والدخل
د/عمروعبدالسميع : وان محددات الأمن القومي كذا وكيت .
د/حسام بدراوي : لامانع من الاتفاق عليها وأنا بوصل للهدف بتاعي جائزاختلف عن الأستاذ سعد في طريقة الوصول عن مدحت وعن الدكتورعمرو وعنك ولا مانع على الإطلاق أنت بقي كمجتمع بتختار الشخص أو الجهة أو المؤسسة اللي بتري ان الوسيلة وبتعرضها أمامك للوصول للهدف ده اقصر مناسبة قد تحقق الهدف وده ياخذ للتعليق الثاني اللي اتقال على من أكثر من شاب وشابة الخاص بتمثيلنا أو ان نقدر نعمل كأس العالم ولا لأ وهل ممكن كأس العالم يروح دولة فقيرة ولا لأ اسئلة كلها مرتبطة بشيء مهم جدا مؤسسة الفيفا دي مؤسسة وضعت قواعد دي بتعمل مسابقة هي اللي عملاه أنا عايز أغير لهم
د/عمروعبدالسميع :ومرتبطة بعدأذن حضرتك بثقافة الهزيمة في نفوس الناس همامش متخيلين ان احنا نقدرنعمل حاجة بكده أنا انبسطت بإشارة الدكتورمدحت على حكايه العبور ؟
د/حسام بدراوي : لأ طبعا نقدر بس احنا وإحنا بنقدر معناه ايه ان أنا بدرس القواعد اللي على أساسها بيتم اختيارالجهة اللي هتعمل الإجراء إذا أنا ملتزمتش في إطار عرض لمتطلبات ده مش معناه ان أنا وحش ده معناه ان أنا لم التزم بمتطلبات اللي هو عاوزها
د/عمروعبدالسميع : لم استوف المعايير ؟
د/حسام بدراوي : القضية يا جماعة في التنافس مبنية على ان أنا مش بتنافس في فراغ أنا بتنافس في إطارملعب وقواعد صاحب الأمر اللي هيدي لك حط قواعد يا إما تلتزم بها وتؤديها أفضل من غيرك باقل تكلفة بأفضل جودة باقل وقت في الوقت المناسب يبقي أنت اللي كسبان في حياتك كلها كل شيء لازم تعرض ان أمامك اختيار وانك أنت مش هتأخذ حاجة ببلاش هتاخذها لأنك كفء لأنك قادر لأنك فكرت لأنك درست لأنك خدن قرارصح في الوقت المناسب
أ/سعد هجرس : مش قادر تعمل ملف بتاعك هتقدر تعمل تنظيم البتاع ده أنت الملف نفسه مش قادر
د/عمروعبدالسميع : أنا بقي هنظم المناقشة دي ولما يبقي حد معاه الكلمة محدش يقاطعه يالا يا دكتور .
د/حسام بدراوي : بس هي قضيتين مختلفتين علشان بس الأمور لان احنا فعلا نظمنا مسابقات قبل كده وكانت ناجحة وجيدة الفكرة الثانية بقي ان احنا لو حصرنا تفكيرنا في عدم قدرتنا مش هنعمل حاجة ابدا
د/عمروعبدالسميع : هو ده
د/حسام بدراوي : لو حصرت تفكيرك وأنا مثلا بقول ايه أنا عاوز 6% من الدخل القومي علشان أطور التعليم وحد يقولي معندناش فلوس متطورش التعليم ده احنا تفكير داخل الصندوق لا نفكر في أفكار إبداعية اللي ممكن نجيب موارد أكثر لأ ده أنا التعليم عندي ممكن يكون موارده أكثر من الثقافة ده غاندي سنة 57 قال خطبه قال ايه أيها المواطنون بيكلم الهنود
د/عمروعبدالسميع : 47 كان نهروا بقي
د/حسام بدراوي : أنا أسف نهروا سنة 57 قال أيها المواطنون بيكلم الهنود ان الهند فقيرة جدا لدرجة إننا يجب ان ننفق على التعليم بسخاء ومشفش الضعف هو شاف القوة لان أنت تقدر وأنت والمثل اللي دكتور مدحت قاله أنت لو بالورقة والقلم حسبت 73 لا كنت عملت حرب ولا كنت عديت لكن أنت استنفرت طاقات كامنة واستغلت قدرات في المجتمع علشان نحقق أكثر من الورقة والقلم اللي بيقوله في بلاد عملت اولمبياد وخسرت وفي بلاد عملت اولمبياد وكسبت هي نفس الاولمبياد ونفس الناس دي أدارت بشكل جيد فحققت مكسب لبلدها ودي أدارت بشكل سيء فحققت خسارة المكسب بقي هنا ايه انك بتعمل بنية تحتية انك بنيت ملاعب انك صلحت الحمامات العامة انك صلحت المواصلات أنت بتكسب أموال وبتكسب رؤية العالم لك ويتكسب بنية تحتية تعتمد عليك أنت فأرجوكم ان احنا نأخذ الأمور بقدرتنا وأنا في رأي ان احنا قدرتنا أكثر بكثير جدا مما تعرضه للعالم
د/عمروعبدالسميع : قدرتنا اكبر بكثير جدا مما تعرضه للعالم و النقاش مستمر وحالة الحوار قائمة وعلى لقاء ان شاء الله