اتكلم

لميس الحديدى: مساء الخير اليوم التالى لبدء المدارس نتمنى كل الصحة لولادنا التلاميذ والحقيقة سؤالنا النهارده ماذا سيحدث فى العملية التعليميه فى مصر؟ يعنى احنا الحقيقة اهتمينا بالكمامات والمطهرات وتنظيف الحمامات وكل الكلام ده نسينا حاجة بسيطة جدا جدا جدا فى النص التعليم يعنى على اساس ان التعليم طبعا من اولويات الحكومة التعليم دايما فى مقدمة اهتماماتنا والتعليم دايما اعلى ميزانية للدولة هى المخصصة للتعليم والتعليم هو اهم حاجة عندنا بس احنا الحقيقة نسينا موضوع التعليم دا شوية هنحاول فى هذه الحلقه ان احنا نهتم بقضية التعليم شوية ونشوف يا ترى الولاد السنة دى هيتعلموا؟ ولاهى سنة ضايعة وهنعديها وهنضطرنتعلم بقى فى البيت وبرامج تعليمية وحاجات كده ونجبيلهم سيديهات واللى معندهوش كهربا اساسا منعرفش هنشغلهاله فين؟ يعنى هنشوف موضوع التعليم ده يعنى موجود فين فى خريطة الاولويات ؟ طبعا لازم احيى انفلونزا الخنازير يعنى الحقيقة الحمد الله الانفلونزا نضفتالنا المدارس ونضفت الحمامات اللى ما كنتش هتنضف ووزعت الكمامات يعنى بدون انفلونزا الخنازير مش عارفة االولاد كانوا هيخشوا المدارس ازاى ؟ وظهرت الفلوس فجاه يعنى 40 مليون جنيه انفقوا على النظافة يعنى ظهر الحمد الله موجودين يعنى سواء من المصاريف سواء من الصيانة يعنى فيه بادجيك كده كانت دايما بتفضل موجودة معرفش ليه ما كنتش الحاجات بتتنضف لكن الحمد الله الانفلونزا نضفت المدارس ويعنى رب ضارة نافعة زى ما بنقول فيه حجاجات كده يعنى ربنا يكتر من امثالها الحمد الله لحد هذه اللحظة التقارير بتقول يعنى كل حالات الاشتباه فى وسط الاطفال والتلاميذ والطلبه كلها جات نيجتيف او سلبية حتى هذه اللحظه المدارس امنه ودوا ولادكم المدارس مفيش حاجة طبعا بكرة اجازة هنستريح شوية لكن ودوا ولادكم المدارس مفيش اى مشاكل فى هذه القضية كمان الحمد الله الكثافة موضوع الكثافه ده مهم جدا بدل ما الولاد بيقعدوا سبعه على الدكه الواحده بقم بيقعدوا اربعه يعنى انا جاتلى سيده فاضله قالتلى الحمد الله يا استاذه دا غير ان احنا بقينا 3 تيام فى الاسبوع ده بدل ما بنقعد 7 على الدكه معرفش 7 على الدكه ازاى بافتراض الطفل المصرى الطفل السلعوه يعنى يعنى رفيع قوى مش ممكن يقعد على دكه 7 بيقعدوا على دكه واحده الحمد الله بقوا ايه ؟ اربعه طبعا على مدار الايام القليله الماضية بنشاهد على شاشات التليفزيون فى الفضائيات والتليفزيون المصرى تغطيه شاملة وممتازة لجولات للساده الوزراء للمدارس عارفة المدارس دى شكلها نضيف لكن المدارس التانية شكلها غريب شويه لكن يعنى فيه مدارس وفيه مدارس الغريبه بقى انك لما تنزل تيجى تصور لازم تاخد اذن لازم تروح المديريه التعليميه علشان مينفعش تخش اى مدرسة كده قلنا ننزل نشوف المدارس الحقيقية يعنى هل المدارس دى اللى الساده الوزراء بيزوروها هى المدارس اللى كل الناس بيروحوها ؟ولا في مدارس لطيفه ظريفة بيوزعوا الكمامات وينضفوا الحمامات والكلام ده وفيه مدارس اخرى طبعا التصريح يعطى فقط لهذه المدارس اللطيفة الظريفة اللى هى شكلها مقبول في حمامات سيادة الوزير يفتح الحمامات علشان يشوف الحمامات نضيفة وكل الكلام ده لكن المدارس الاخرى اللى فى المناطق الاخرى هوريكوا بعض الصور بعد شويه مش ممكن تدخل تصورودايما فيه خناقة الفريق بتاعنا اتعرض لكثيرمن المضايقات بشكرالزميل وليد عبد الرحمن للمجهود الفظيع اللى عمله ومحاولة دخول بعض المدارس نجح فى بعضها وفشل فى بعضها سافرنا كذا مكان وحاولنا نشوف القرى والارياف مدارس الناس المصريين 19 مليون او 16 مليون تلميذ مصرى يدرسون فى هذه المدارس حبينا نجبلكم الصور الحقيقيه على قد ما قدرنا طبعا اتمعنا فى حاجات فى بعض الناس بتعونا اضربوا فى حاجات يعنى حاجات كلها بسيطة هذه هى متاعب المهنه هذه الحلقة عن العمليه التعليميه هو فيه تعليم ؟ هل هيبقى فيه تعليم السنادى ؟ هنعمل ايه فى موضوع الثانوية العامه ؟ هيرفعوا الدراجات ولا هيعملوا فيها ايه؟ قضية التعليم موجوده على اولويات الاجندة الحكوميه ؟ ولا المهم الحفاظ على المقاعد الوزارية؟
فاصل مشاهد من المدارس
تلميذ1 : كانوا بيقولوا فى التليفزيون انهم هيسلمونا كمامه ولا سلمونا كمامه بنقولهم النهارده قالولنا كل واحد يشترى لنفسه اللى هو عايزه
تلميذ2 : مفيش حاجة من اللى هما بيقولوها
لميس الحديدى: دى لقطات بسيطة هنتابعكم بباقى لقطات المدارس اللى زرناها فى الفترة القادمة لكن خلونى ارحب بالساده الضيوف الدكتور رضا ابو سليم مساعد وزير التربية والتعليم السيد جمال زهران عضو مجلس التعليم فى مجلس الشعب والنائب المستقل عن شبرا الخيمة والسيده سهام نجم عضو الفريق الاستشارى الدولى التعليم للجميع لمنظمة اليونسكو والمنسق العربى للتعليم للجميع للمجتمع العربى دكتور رضا خلينى بس اسالك فى الاول هو كان لازم انفلونزا الخنازير علشان كل هذا المجهود المجهود الحقيقه اللى مشكور يعنى من الحكومة لتنظيف المدارس ولصيانة المدارس وتركيب القزاز المكسور فى حجرات الفصول كان لازم انفلونزا الخنازير ؟
د/ رضا :انا بشكر حضرتك على المقدمة الجميله اللى بداتى بيها يعنى دا كلام يحتاج الى مزيد من الدقه لان على سبيل المثال موضوع صيانه المدارس ادى امثله عليه صيانة المدارس تنقسم الى نوعين صيانة جسيمة تقوم بها هيئة الابنية التعليميه اللى بتحتاج تغيير كبير فى دورات المياه و شىء من هذا القبيل وصيانة بسيطة اللى هى يستطيع ان يقوم بها مدير المدرسة فى ضوء ما يتوفر ليه من اموال من حوالى 3 سنين قبل موضوع على وجه التحديد تجربة اللا مركزيه وللاسف فيه حاجات كتير بتم فى وزارة التربية والتعليم ولا يتم القاء الضوء عليها بسبب الاحداث اللى دايما متلاحقة اتعملت قرارات وزارية بحيث ان هو يتم الابقاء فيه المصروفات الدراسيه بتاعت الطالب بتنقسم فى توزيعها الى عدد من البنود فيه بند محدد للصيانه دا كان كله بيروح للابنية التعليميه على اساس ان هى بتعمل كل الصيانه الجسيمه بصفه خاصة استبقى هذا العام والعام الماضى فى المحافظات اللى بيتم فيها اللا مركزية هذا الامر موجود يستطيع مدير المدرسة التنسيق مع الادارة التعليميه ان هو هذه الامور الجديد فى هذا الموضوع فى هذا العام فى بسبب المرض ان فيه تركيز عليه فلما يكون فيه تركيز من الاعلام على موضوع معين لازم يبرز ان فيه اه فيه تركيز كبير جدا عليه عليها علشان كده يظهر فى الصورة الكلام ده بيتم صيانه دوريه دى موجوده فى وزارة التربية والتعليم فى كل المدارس لازم تتم فى خلال شهور الصيف
لميس الحديدى:انفقتم قد ايه يا فندم ؟ يعنى السنادى مثلا انفقتم قد ايه ؟ 40 مليون مش كده د/ رضا :ال 40مليون دول اضافيه حضرتك امر عاجل علشان فيه مدارس كانت محتاجة صيانات اكتر من كده فى ظل الميزانيه اللى موجوده انا بعمل الصيانات المطلوبه هيئة الابنية التعليميه لكن ده ظرف موجود بشكل استثنائى ومحتاج الى عاجله
لميس الحديدى:المدارس اللى حضرتك بتزورها مع سيادة الوزير بتشوف ان يدوبك هذه الصيانه ب40 مليون الاستثنائى دول يدوبك بتعمل الاساسى انا مش شايفه يعنى ان المدارس اللى انتم زورتوها فيها شىء زياده انا شايفه انها يدوبك تحقق ادمية الطفل يعنى احنا بالماينص لو شيلنا ال40 مليون دول كنا بنحقق ايه بقى؟
د/ رضا : يعنى حضرتك الموضوع مش كده بالظبط دايما انا بتكلم فى ظل موازنه وميزانية محدده من وزارة التربية والتعليم وفيه ميزانيه موجوده للانشات اللى هى مبانى جديده وميزانية موجوده للصيانه لازم يحصل عملية توازن انا مقدرش ابدا احط كل البنود الموجوده عندى لانى انا عندى كم هائل من البنود اللى بيتم الصرف عليها مناهج جديدة كتب دراسيه صيانه مبانى وخلافه انا بتكلم عن 28 الف مبنى موجود فيه 43 الف مدرسة انا مش بتكلم على حجم تعليمى صغير انا بتكلم على حجم تعليمى ضخم جدا وبالتالى انا محتاج ميزانيات ضخمه جدا وفى ضوء المتاح انا بتصرف
لميس الحديدى: انت معاك حق فى موضوع الميزانيه ميزانية التعليم فى مصر يعنى من اضعف الموازنات ويعنى شىء لا يليق لا بحجم التعليم فى مصر ولا بحجم
د/ رضا : ومع ذلك نشوف الميزانيات زادت فى السنوات الاخيره قد ايه؟
لميس الحديدى:طب نشوف بس نستنى بس على الصور يا شباب لغاية ما نواصل الحوار سياد النائب فى دائرة شبرا الخيمه كيف ترى حال المدارس؟
جمال زهران : بسم الله الرحمن الرحيم انا فيما يتعلق بموضوع انفلونزا الخنازير انا شايف ان الحكومة بالغت فى هذا كثير والدليل على المبالغة حتى الان ورغم مرور ثلاثة ايام لم تثبت ان هناك حاله شايفوا انا من رؤية سياسيه ان كانت هذه مبالغة احدثت فزعا فى المجتمع ومن ثما نسب الحضور حتى الان محدوده ونسب التجاوب محدوده واثارها على العمليه التعليميه فظيعة للغايه يعنى زى ما تفضتلتى حضرتك فى هذه المقدمة المهمه ان العملية التعليميه ستتاثر هذا العام نتيجة مبالغة الحكومة فيه اثارة موضوع ادارة انفلونزا الخنازير
لميس الحديدى:هاجى للعملية التعليمية بالغت ازاى ما هى لما بالغت يدوبك نضفت المدارس؟
جمال زهران :لا هى القضية مش نضافة المدارس يا سيدتى القضية فيه جوانب اخرى للعملية التعليميه هيبقى هنا فيه حاجة اسمها مدرسة موازيه هتعمق فكرة الدروس الخصوصيه وهتزودها المواطنين لما جالهم الفزع مودوش اولادهم المدارس طبعا لما ما ودوش ولادهم المدارس لازم يتعلموا
لميس الحديدى:انت الوضع عندك فى شبرا الخيمة ايه ؟
جمال زهران :انا عندى فى الدايرة بتاعتى ما لايقل عن 100 مدرسة يعنى المدارس اللى هى زارها سياد الوزير يعنى كانت جيده مش ممتازة ولا حاجه جيده دى معده مجهزة للتصوير لكن اغلب المدارس حالها ردىء للغاية انا بدخل المدارس لكن التصوير ممنوع داخل المدارس الزبالة والقمامه حوالين المدارس اغلب المدارس انا عايز اقول لحضرتك حاجه ليلة بداية الدراسة يوم الجمعه بالليل انا عديت على المدارس عملت جولة بالليل لقيت اكتر من 80% من المدارس حواليها قمامه
د/ رضا : بعد اذن حضرتك انا عايز لما نتكلم نكون علميين فى كلامنا بمعنى ايه؟ انا عايز احسب نسبة اللى حضرتك بتشوفه من 43الف مدرسة انا بتكلم بشكل علمى انا مقلتش ابدا انى انا عندى 100% انما انا بقول لحضرتك هدورى على مدرسة او اتنين او تلاته
لميس الحديدى:انا ما بقلكش كام مدرسة انا بقلك كام فى ال%
د/ رضا :يعنى اعتقد الكل بيشهد تغيير كبير حصل فى المدارس
لميس الحديدى:لا فيه بعض المدارس
د/ رضا :غالبية المدارس
سهام نجم: انا عايزه بس اعمل مداخله انوا يتم تعريفى اننى انتمى لجمعية المراة والمجتمع ودى موجوده فى محافظة الجيزة فى ارض اللوا المنطقة بتاعة الازمة انا عايزة اقول بس احنا جمعية بنشتغل مع وزارة التربية والتعليم وبنشتغل فى مدارس من اصعب المدارس على مستوى الجمهورية لانى معروف ان محافظة الجيزة بتلقى يعنى الخدمات التعليميه فيها مش قوية ضعيفة النتيجة مثلا انى انا كنت بعمل تقرير خاص بالتعليم الاساسى فاكتشفت ان فيه ارقام بتقول ان المدارس الاكثر احتياجا للتدخل فى 43الف مدرسة موجودين فى مصر منهم 20,5 % مدارس فى اشد الاحتياج للتدخل المباشر
لميس الحديدى: فين ده ؟
سهام نجم: متقسمين على مستوى الجمهورية وفيه محافظات متركزه فيها المدارس معيارها انها تنفذ اكثر من فترة دراسيه دى واحده ان المبنى المدرسى بيستوعب 4 تلاف الى 5 تلاف طفل يوميا مفيهاش كمية كافية من عدد المدرسين اللى ممكن يقوموا بعملية تعليميه احنا خلينا بس فى القطاع الصعب لكن فيه مدارس ممكن تاخد تعليمات الوزارة وتنفذها كويس انا بعمل اتصال يومى فى اليوم الاول والتانى والتالت فى بداية المدارس مع اولياء الامور ومع المدارس ومع الجمعيات القادرة من انها تقدر تقدم اتقال ان فيه مدارس نفذت تعليمات الوزارة بشكل جيد وبتعمل غرف العزل وعاملة التنظيف ما الى ذلك لكن فيه مدارس لازم نبصلها بعين قوية ال20,5%دى من اجمالى المدارس دى اللى لازم نركز عليها انا بشتغل فى مدارس فى صفط اللبن كثافة الفصل الواحد 140 طفل المحيط بالمدرسة مجمع مدارس 4 مدارس كله محيط بالزبالة
لميس الحديدى: انا عايزكم تشوفوا احنا صورنا صور الزباله اللى هى فى صفط اللبن طب هل انتم تدخلتم فى هذه المدارس ولا اخترتم مدارس سهلة الحركة يعنى يعنى تنضفيها اسهل يعنى صور المدارس دى مدارس موجوده فى منطقة الكابلات فى منطقة بهتيم فى منطقة بشتيل محطه قطر بشتيل او سكة قطر بشتيل هذه المنطقة مليئة بالمدارس مليئة بالقمامة زى ما احنا شايفين والولاد الحقيقة هتشفوهم فى التقرير التانى بيتضروا يقفلوا القزاز لان الريحة صعبة جدا يضطروا يفقلوا زجاج الفصول
جمال ظهران :انا عايز اقول ان دية مش تجنى على وزارة التربية والتعليم يعنى هذه ليس مشكلة التربية والتعليم دى مشكلة المحليات ما بيقموش بواجبهم كما ينبغى الشىء التانى كمان انت عارفه ان كل مدرسة لازم تدفع 100 جنيه اسبوعيا للحى علشان يشيل الكمامه ولو مدفعوش مش هتتشال القمامة فى حين ان الوزارة بتقول ممنوع التبرعات
لميس الحديدى: دكتور رضا انتم رصدتم كام يعنى خلينى اكتر دقه كام ما هو المبلغ اللى اترصد لكل مدرسة ؟ كل ناظر خد فى ايده كام كده علشان يظبط المدرسة ؟
د/ رضا :عايزة اقولك انت بتتكلمى على اللى موجود من حاصلة المصروفات فيه كذا بند اللى حضرتك بتتكلمى عليها
لميس الحديدى: اعتمادات كام لكل مدرسة علشان نبصط الموضوع ؟
د/ رضا :الموضوع فيه تلت اجزاء فيه صيانه اصلا بتيجى مع موازنة الوزارة مخصصات الوزارة انشاءات وصيانه والبند التانى من مصروفات الدراسه اصلا فيها بند صيانه ثم ال40 مليون الاخريين
لميس الحديدى:توتل بقى ناظر المدرسة خد فى ايده كام علشان يظبط المدرسة ؟
د/ رضا :على سبيل المثال ال40 مليون الاخريين دول علشان طارىء وعلى شكل عاجل كان على اساس عدد الطلاب فى كل مدرسة انما التانيين بيتوزعوا على سبيل المثال بند الصيانه من الابنية التعليمية على حسب نوع الصيانة لمصلحة المدرسة
لميس الحديدى: بيتراوح من كام لى كام يا فندم ؟
د/ رضا :فى مدرسة ممكن تاخد ربع مليون فيه مدرسة ممكن تاخد نص مليون للصيانه الجسيمة بتاعتها على حسب ما تقدره هيئة الابنية التعليميه انما انا بتكلم على الصيانه العاجله انواع الصيانه كتير جدا انا عملت مثلا مجلس الامناء مجلس الامناء
لميس الحديدى:250 الف معلش يعنى كل 3 سنوات جدا مبلغ ضعيف جدا فى النهاية
د/ رضا :ما هو فيه مدارس قديمة ومدارس جديده انا عندى 28 الف مبنى موجودين عدد 43 الف مدرسة موجودين فيه انا ما بقلش حالة المدارس 100% مره تانيه انما بحاول اوصل باكبر عدد ممكن من عدد المدارس بتاعتى الى ما هو افضل ما يكون انما الى ما هو موجود حول المدرسة والى ما هو موجود فى المدرسة ؟ لماذا تم اشراك الساده المحافظين وعلى انا بنتهز هذه الفرصة وبشكرهم
لميس الحديدى:بتشكرهم ليه ؟ معلش انا ما بشكرهمش فى الحقيقه لان
د/ رضا : لا لا لا يا فندم من الظلم بما كان انى انا ادور على عدد بسيط من المدارس حصل فيها اخطاء وخصوصا وخصوصا موضوع القمامه وخلافه وما بذل من الساده المحافظين وكان تعاون الى اقصى درجة انا اول يوم دراسة وتانى يوم دراسه وحتى هذه اللحظة الساده المحافظين بيزورا المدارس
لميس الحديدى:طب ما احنا مستعدين نزورها
جمال زهران : ما هو لما بيزورها يا دكتور رضا المدارس بتترتبله يا دكتور رضا لا لا لا
لميس الحديدى:انا عندى سؤال ليه ما بتسمحوش بما ان هذا الوضع وانتوا شايفين انوا يعنى انتم بكل ما تستطيعونه من اجل هذه النظافه وهذه الصيانه ليه ما بتسمحلوناش ان احنا نزور اى مدرسة ؟
د/ رضا : حضرتك قدمى طلب وانا اوافقلك على طول
لميس الحديدى:حضرتك الطلبات اللى بتتقدم بيوافق فقط على المدارس النضيفه
د/ رضا :لا لا لا حضرتك لو رحتى اول يوم كان موجود كم هائل من الكاميرات القاهرة ما بداتش من يوم السبت يوم السبت كان موجود عدد هائل من الكاميرات
لميس الحديدى: هى مدارس بعينها يا فندم
د/ رضا :يا فندم انا عايز انظم العملية ولا اكثر بمعنى ان احنا مش اى هيجى باى كاميرا ويدخل اى مدرسة
لميس الحديدى:ليه ؟هى منطقه عسكرية لا لا لا دى مدرسة
د/ رضا :لا لا لا انا اسمح لاى حد يدخل المدرسة ؟ ازاى الكلام ده دى اكتر من منطقة عسكريه حد هيتعامل مع اطفال ويتعامل مع اولاد انا معرفش من اللى داخل
سهام نجم: فيه 43 الف مدرسة فى مصر بالاضافة الى مدارس التعليم الازهرى اجمالى الطلاب مع قبل التعليم الجامعى حضرتك 19 مليون 17 فى التعليم العام وحوالى مليون و 700 فى التعليم الازهرى يعنى حوالى 19 مليون نضيف لهم هيئة التدريس اللى حوالى مليون نص يبقى حوالى 20 مليون انسان داخل مؤسسات تربوية يوميه موجوده فى زمن واحد فى وقت واحد داخل اطر معينة يعنى لو حصل اصابه واحده مش عايزة ارجع بقى لوزارة الصحة اللى بتقول 10 % من اجمالى السكان لان ال20ونص يمثلون 25% من اجمالى السكان بالاضافه لى اسرهم لو كنت هرجع بقى للاتصال المباشر انا عايزه اقول ان وزارة التربية والتعليم حطت خطة حمائية ووقائية ونزلتها المدارس لكن ما فيش ضمانه نقدر نمسكها ونقول ان اكيد 100% يا دكتور رضا هيتحقق هذه التعليمات القوية بالنسبه للوزارة عند المدارس ما فيش حاجة بتقول كده وبالذات ان قوى المتابعه او ادارة المتابعه لسه مش شايفناها مش ملموسه بالاضافة كمان ان تعبئة القوى المجتمعيه اللى ممكن تكون مساهمة بشكل قوى جوا هذه المدارس لسه متحطتش خطة مشتركة مع الوزارة الوزارة لسه ما عملتش هذا الجهد دا لازم يكون موجود على الخريطة اهمية تعريف دور المجتمع المدنى انوا يدخل فى برامج التوعية لان ولية امر قالت لى انا بنتى جت من المدرسة امبارح للاسف المدرس الموجود مدهمش معلومات كافيه عن انفلونزا الخنازير
لميس الحديدى: ايه دوركم كمجتمع مدنى ؟
جمال زهران:ممنوع واحد من المجتمع المدنى انوا يدخل المدرسة الا بتصريح مسبق دا لو محاضر ما يقدرش يدخل احنا مصرح لينا كمجالس امناء على مستوى مجالس الامناء
د/رضا :يا فندم انا باعول بشك كبير جدا على المشاركة المجتمعيه انا مش عايز اقول كم الناس اللى تبرعت بشكل مباشر لمجلس الامناء محافظة الاسكندرية الكمامات اللى كانت موجوده فين ما جتش من الوزارة فى المنيا رجال الاعمال تبرعوا مش عايز نبص للقاهرة واللى تحت ايدنا بس انا عايز نشوف مصر 43 الف مدرسة فيها
سهام نجم: انا مش عايزة اولياء امور يجيوا علشان يدفعولى تمن المطهرات ولا عايزة رجال الاعمال علشان يغطولى فجوه موجوده انا عايزة يكون المجتمع تعبئة المجتمع لمواجهة هذه الجائحة لانى لو جت فى وزارة التربية والتعليم هتبقى كارثه لو جت فى اى حته تانيه هتبقى محدودة
لميس الحديدى: هل لجا اليكم وزارة التربية والتعليم يعنى ما قالكمش تعالوا يا مجتمع مدنى نتكلم مع بعض احنا محتاجين انكم تنزلوا معانا ؟
سهام نجم:مفيش خطة لحد دلوقتى تم وضعها داخل الوزارة فيه ادارة اسمها ادارة الجمعيات الاهليه والجمعيات الاهليه هى اللى سعت الى انشاء هذه الادارة مع سياد الوزير سنة 98 لكن احنا عايزين نقول مفيش خطه واضحه بشكل مشترك علشان نقدر نعمل حاجة مشتركة لسه ما تصنعش ده لازم نعمله وبسرعه دور المجتمع المدنى والجمعيات الاهليه دور مجالس الامناء الاتنين لازم يمثلوا متابعه قوية مع الوزارة لان الوزارة زى ما بقول مش هتقدر تتابع ال43 الف مدرسة او حتى التقارير اللى ممكن تيجيلها تبقى تقارير او يعنى متوزانه لكن اللى يقدر ينقل ده بشكل قوى هو المجتمع المدنى
جمال زهران: ما نقدرش نتكلم عن المجتمع المدنى يعنى او المشاركة المجتمعيه او احنا نبقى ضدها وتفعيل مجالس الامناء دا شىء هل هذه المجالس فى المجتمع المدنى هتحل مشكلة الكثافه انا عندى كثافه 80 و 90 ميزة انفلونزا الخنازير ان هى كانت كائفة لامراض التعليم المزمنه احنا ما نقدرش نقول لا الوزير الحالى هو المسئول عنها لكن دى امراض موجوده داخل المجتمع علينا نواجهها بمنتهى الحزم يعنى كام مدرسة على مستوى الجمهورية بكلم الدكتور رضا يجاوبنى كام مدرسة فيها كثافه؟ يعنى احنا العملية التعليميه المتميزة لابد ان تكون الكثافه من 25 لى 35 ومن 20 لى 35 النهارده فى مدارس انا معايا مذكرة فى شبرا الخيمة اللى انت حضرتك بتكلم عنها كثافات بامضت المسئولين عن الادارة فيها 8 فصول 700 تلميذ 8 فصول 731 يعنى الكثافه 95 رسمى اما يجيى النهارة يقولى ايه انا هاعالج المشكلة دى يا اما بالفترتين يا اما بالتلت تيام هذه البدائل صعبه لما يجى الدكتور رضا يقول ان الصور مش بالشكل ده لا 80 % كثافات موجوده فى دايرتى وهات اى حد من الدايرة دا كلام رسمى انا لان احنا شركاء فى النهوض بعملية التعليم احنا مش اعداء لا دا احنا شركاء
لميس الحديدى: هنخرج فاصل اعلانى وهنرجع مره تانيه ملف العملية التعليميه فين التعليم من كل ده يعنى وزعنا الكمامات نضفنا بعض الحمامات فين بقى التعليم من القصة دى كلها هو احنا لسه فاكرين ان فيه تعليم فى البلد ؟بعد الفاصل
فاصل
تلميذ : مفيهاش اى حاجه من دى خالص مفيش ولا صابون ولا مناديل ولا اى حاجه
مواطن : الريحة العامة اللى طالعه من الشبابيك نفسها على الفصول ولا على المدرسة نفسها جوا مش تجيب انفلونزا بس دى تقتل العيل جوا الفصل فى شارع جمال عبد الناصر فى مجمع مدارس احنا عايزين نوضع حل علشان المسئولين اللى نايمين فى بيوتهم ومش سائلين فينا
تلميذه: ريحة وحشه وبيخلونا نقفل الشبابيك ومافيش هوا
تلميذ: التخت كلها مليانه تراب
لميس الحديدى: دى منطقة بشتيل فى الجيزة اعتقد دى اكيد من المدارس يا استاذ سهام من المحتاجه تدخل عاجل
د/ رضا :محافظة الجيزة من المحافظات عالية الكثافه
لميس الحديدى: ارجوك ما تشكرش المحافظ لان المشاهد دى لا تدعوا لشكر اى مسئول
د/ رضا :خلينى اكمل بعد اذن حضرتك
لميس الحديدى: اتفضل
د/ رضا :من ضمن موضوع الكثافات اللى اثاره الدكتور جمال الموضوع مش ناقصة موازنه على سبيل المثال فيه اماكن لا تستطيع ان انت تجد فيها ارض للبناء لان السبيل الوحيد ان انا افرض الكثافات انى انا ابنى مدرسة جديده علشا تستوعب العدد الاقل بالنسبه للفصل فيه اماكن مفيهاش ارض علشان ابنى فيها وفيه اكتر من مثال موجود فى الجمهورية الحل قدامى حاجه من اتنين يا اما اعمل اللى هو نظام الفترتين او انى اقدر ازود فى بعض المدارس الحكوميه انى ازود دور مثلا فى المدرسة تبقى اربعة تدوار يعنى دا شىء استثنائى تماما انما فيه اماكن موجود فى الجمهورية بسبب الوضع السكانى بتاعها لا استطيع انى الاقى قطعة ارض
جمال زهران: ماشى انا هديك مثال واحد فى قرية النجار قرى من قرى القطاع الريفى فيها مدرسة الكثافه فيها 95 تليميذ فيه ارض وفرناها فدانين خلصناها واجراءات وجاهزة على التنفيذ وحتى الان مؤجله يكتبها عنده الدكتور رضا اتنين جبنا نص فدان فى قرية اسمها كومه شبين اتبرع بيها مواطن على روح ابنه فقد فى حادث حتى الان الاجراءات معطله تلاته ان عندنا مدرستين تجريبيتين متميزتين معمولة للاغنياء والقادرين فى منطقة فقيرة مستفزة الكثافة فيها 25 تليميذ فيها 100 فصل فاضيين واشتكيت للدكتور رضا ولسيادة الوزير واثرت فى مجلس الشعب وخد قرار من مجلس الشعب والفصول فاضية وراهم مدرستين مدرسة اسمها سوزان مبارك ومدرسة اسمها جمال عبد الناصر هذين المدرستين كثافتهم 90 ليه مشغلش الفصول الفاضية واعمل تنسيق لكن العند للمحليات والتفويض اللى بيتكلموا عنه المحليات والمحافظين بيخلى فيه اضطراب للعملية التعليميه وفى التفاصيل هقولك اكتر مدرستين تجربيتين فيهم 100 فصل فاضيين
د/ رضا :دكتور جمال لما رد على كثافات الفصول ما قلش فى شبرا لما قال ان هو قدر يوفر ارض ما قلش فى شبرا
لميس الحديدى:طب ايه المشكلة طب ما ممكن يكون وفرها فى منطقة تانيه؟
سهام نجم: انا عايزة اقول لابد ان احنا نجد حلول غير تقليديه يعنى احنا فى سنة 2002 لاقينا فيه مجموعه من المدارس موجوده فى مطار امبابه الكثافة كانت واصله فيه الى 130 سنة 2002 ودى كانت صعبه سياد الوزير ساعتها قرر والوزارة قررت ساعتها تعمل حاجه اسمها مجمع مدارس فقللت الكثافة نزلت الكثافة لحد ما وصلت 80 فى هذه المدارس ونقل الزيادات كلها فى حاجه اسمها مجمع مدارس موجود فى هذه المنطقة استوعب كل الزيادات لان المدارس اللى واصله فيها الكثافة 120 ، 130انهى عملية تعليميه هيتلقاها الطفل؟ وانهى قدرة للمعلم ان هو يوصل الرساله العلمية بتاعته
لميس الحديدى:الكلام اللى حضرتك بتقول بيعنى انى انا اسلم بالامر الواقع واقول والله انا عندى مناطق
جمال زهران: لو هما فترتين كاملتين اليوم لازم يبدا الساعة 7 او الساعه 8 وينتهى الساعه 2 لكن هوبيختصر اليوم لازم تشتغل بفترتين مختلفتين و لازم تشتغل بمدرسين مختلفين
د/ رضا :فيه خريطة دراسيه موجوده كل اللى بيحصل فى الوقت ده فى المدرسة انى انا ببختصر زمن الفسحة
لميس الحديدى:جيالك انا على زمن الفسحة اللى بيروح بس خلينا اسئلك
د/ رضا :بعد اذنك انا مكملتش كلامى حضرتك انا عندى ساعات معينة وخصوصا فى فصل الشتاء بيبقى اليوم قصير ازاى انا اقدر اكثف يوم بدون ما انا حاجات معينه مش على حساب الخريطة الدراسيه الخريطة الدراسيه فى توقيتات معينة فيها لان لابد من وقت معين يتم فيه التدريس انا مقدرش اقول انى انا هكفى عدد الساعات بالكامل انما انا بختصر زى ما انا قلت فى زمن الفسحة وفى زمن الحصص انى انا اوصل لعدد الساعات التدريسيه علشان ميبقاش فيه خلل بين المدارس المختلفه
لميس الحديدى:دلوقتى موضوع التلت تيام ده خلينا فى الوضع الراهن دلوقتى الكثافات العليا بقت
الولاد بيخشوا الساعه 7 الصبح بيمشوا الساعه 10 انا سالت 10 انا عندى ناس اعرفهم
سهام نجم: انا عايز اقول ان احنا بنعمل قوه رصد على مستوى الجمهورية وعلى مستوى محافظة الجيزة بننسق مع اولياء الامور ومع المدارس المشاكل اللى موجوده يوميا واحدة قالتلى انا ولادى وصلوا الساعه 11 ونص روحوا
لميس الحديدى:مدرسة الزهور فى الهرم بيخشوا الساعه 7 الصبح بيمشوا الساعه 10 بيروحوا بيوتهم على 11 مثلا يكونوا فى بيوتهم 3 ساعات بيتعلموا ايه ؟ فى التلت ساعات دول ؟
د/رضا :اذا كان هناك مخالفات فى بعض المدارس انا عندى جهاز متابعة استطيع انى انا ابعته انا كل اللى انا عايزه مساعدة المجتمع المدنى والمحلى واولياء الامور لو فيه اى قصور فى العملية التعليميه وافاديها
لميس الحديدى:هتخلص المنهج ازاى ؟
د/رضا :ما هو ده اللى بقولك عليه هنا اتعمل خفض للفترة الدراسيه اللى هى 90دقيقه الى 60 دقيقة علشان يكفى العدد الحصة اللى زمنها 45 دقيقة تبقى 30 دقيقة ليه؟ انا مرتبط هنا بالزمن التدريسى للحصه انا معتمد على زمن تدريسى للمنهج فى موضوعات معينة اساسيه فى المنهج لابد ان الطفل يستوعبها طفل فى تلته ابتدائى لازم يدرس موضوعات معينه اللى مترتب عليها مثلا فى الرياضيات وخلافه موضوعات اخرى مقدرش ابدا الغى جزء من المنهج ان هناك زياده فى الانشطة او فى بعض التمارين او فى اشياء اخرى من الممكن ان اكلف الطالب فيها او الطفل يقوم فيها فى البيت والمدرس يراجعها معاه لكن لكن الخريطة التدرسيه تانى مره باوكد هى هى نفسها اذا كان الموضوع بيتشرح فى الشكل الفلانى المدرسة بتعمل يوم كامل كما هو لابد الطفل اللى فى المدرسة التانيه انا عندى 17 % من المدارس اللى فى مصر هى اللى فيها الكثافات العليا انا الكثافه عندى محدده ب 40 50 وفوق ال60 وفوق ال80 انا بتكلم على43 الف مدرسة انا مستعد اجيب 100 اسم مدرسة وانا قاعد
سهام نجم:المصدر هيئة الابنية نمرة واحد نمرة اتنين
د/ رضا :غير سليم انا اسف غير سليم اجيب لحضرتك هيئة الابنيه وحضرتك اتصلى بمدير هيئة الابنيه على الهوا اذا كان انا مش مصدقة كلامى دا موضوع تانى بقى حضرتك رحت اسوان ولا الاقصر ولا غيره
سهام نجم:انا بقول اعتمادا على المصدر الصادر من هيئة الابنية هيئة الابنية قالت المدارس اللى فيها تعدد الفترات وقايله المدارس اللى فيه كثافات فوق ال 60 طالب الاتنين دول لما يتجمعوا على بعض يدونا حوالى 20% من المدارس اللى موجوده فى مصر
د/رضا :
يا فندم بتقول متوسط الكثافة فى مصر 70 طالب فى الفصل هذا كلام غير سليم الكثافة فى مصر17%
لميس الحديدى:اللى انتم اللى شايفنوه هو اللى صح انتم شايفين ان الولاد 25 ماشى اللى الحكومة شايفاها هو ده اللى صح ماشى ال70 طالب دول مش موجودين ال120 اللى انا شفتهم فى مدرسة الزهور دا كان حلم كان كابوس بالنسبالى وكل ده كان مش موجود خلينا
جمال زهران: وايه ذنب الاولاد حتى لو افترضنا ان هذا الرقم صحيح 17 % ايه برنامج الحكومة فى القضاء على هذه الظاهرة ؟ايه ذنب ال 17 % دول انوا ما يخدوش تعليم جيد معارض للدستور الماده 18اللى بتقول انوا على الحكومة ان تقوم بواجبها بتقديم تعليم جيد ومجانى
لميس الحديدى:دلوقتى احنا عندنا الحصة اللى نزلت من 60 دقيقة من كام كانت الاول كام ؟90 دقيقه يعنى الحصة انخفض وقتها طب ما هومبقاش فى وقت لا الولاد يقدروا يتناقشوا مع المدرس ولا يقدروا يحلو تمرينات و لايقدروا يعملوا اى حاجة بقى يدوبك المدرس يكر المنهج ويمشى احنا عندنا مشكلة فى لب العملية التعليميه لب فكرة التعليم فى مصر
د/رضا :بشكر حضرتك على السؤال ده علشان نتكلم فى الموضوع الهدف من الحلقة نفسها اول حاجة انى انا دا وضع استثنائى اتنين انا بحاول اعمل توازن دقيق ما بين الحفاظ على صحة الاولاد دا رقم واحد اتنين انى انا لازم اقدم الخدمة التعليميه والا يضيع العام الدراسى زى ما حضرتكم بتقولى ايه السبيل ؟ واحد مشكلة الكثافات لازم اخفضها اتنين بيترتب على انى اخفض مشكلة الكثافات انى بينشاة عندى الفترتين او اذا كان اصلا عندى مدرسة فيها الفترتين فبضطر انى اعمل ال3 تيام وال3 تيام ايه الطريقة ولو حضرتك قلتلنا على طريقة تانيه انا مستعده نتبعها فى وزارة التربية والتعليم ايه الطريقة انتى انا ممكن اكفى بيها مدرسة زى ما حضرتك بتقولى الكثافات بتاعتها عالية واصله فوق ال90 وفوق ال80 ما فيش قدامى لانها فترتين اصلا غير انى اشتغل 3 تيام و3 تيام
لميس الحديدى:هنخرج فاصل ونرجع وعايزة حضراتك تقوللنا على الطريقة موضوع انفلونزا الخنازير دا مش فى مصر بس دا فى دول العالم اجمع طبعا فى مصر فيه كثافه عاليه وفيه عدد سكان كبير لكن اكيد مثلا فى الصين اكيد عندهم حل فى دول شديدة الكثافه اكيد عندهم حل نشوف بقى الحلول غير التقليديه فى دول اخرى بعد الفاصل
فاصل
لميس الحديدى:مرة اخرى مصير العملية التعليميه فى ظل يعنى انفلونزا الخنازيرالحلول بقى
د/رضا :انا عايز اقول انى انا عندى القنوات التعليميه هتشتغل علشان يبقى فيه اضافه اخرى لمساعدة الطالب حينما يكون هناك قصور ما نشا عن هذا الوضع الحالى
جمال ظهران: اول حاجة فيما يتعلق بالحلول العملية الوزارة بتتفادها علشان مكلفه بالنسبالهم من حق التليميذ اولا المساواه بين الجميع جميع التلاميذ لازم ياخدوا حقهم دا احنا بتنقسم على احترام الدستور مش هيحترم الدستور الدكتور رضا بيقول ان بدل ساعة الا ربع هنخليها نص ساعه لا وياخد اليوم الكل لان من حقه ومن حقه الفسحة ومن حقه ياخد اليوم الكامل بيخرج الساعه كام الساعه اتنين الساعه اتنين ونص تبدا الفترة التانية الترم التانى يستبدل اللى كانوا بيجوا الصبح يجوا اخر النهار واللى يجوا اخر النهار يجوا الصبح يبقى هنا فيه نوع من العداله فى التطبيق لكن هيستلزم صيانه اكتر للمدرسة هيستلزم عمالة اكتر للمدرسة الوزارة مش عايزة تعمله ادى بديل اتنين استثمار امثل للفصول الفاضية اما يكون عندى مدرستين فيهم 100 فصل فاضى
سهام نجم:انا هتكلم على المستوى الوطنى قبل ويبقى علاقاتها بانتظام الدراسه كان فيه تحدى قدام وزارة التربية والتعليم تحديين حاليا التحدى الاول قدرتها انها تطرح للراى التطور اللى هى اقدمت عليه والراا العام يشوف نتايجه هتشغتل على اى قضية من القضايا الجوده واى قضايا اخرى وتطرح للراى العام حاسبونى سنة كذا على هذه القضية انا عايزة اسال الوزارة عايزة اسال الدكتور رضا مع الازمة الجديدة وتقليص الفترة الدراسيه البرنامج الدراسى اليومى الى اى مدى ده؟ دا نمرة واحد نمرة اتنين احنا عندنا حاجة كما احنا عندنا التزامات كمان دوليه يعنى مبادرة التعليم للجميع يعنى الدكتور رضا عارف ده واهداف الالفيه المائية دى مسائل من المسائل المهمة جدا على مستوى العالم مع كل قاده العالم فى الامم المتحده الشهر اللى فات واقره ان الجائحة او الازمة الاقتصادية العالميه لا يمكن ان يحدث ان تمس درجة من التعليم دا بشكل نهائى فالى اى مدى ممكن ياثر ده كمان تعهدات مصر فى المعاهدات العالميه فى مجال التعليم احنا عارفين ان العالم اعترف بان مصر بدجات تاخذ اجراءات ايجابيه فى مجال الجوده على مستوى جزء من التعليم اخر زى محو الاميه تقيمنا سىء جدا
د/ رضا :فى عجاله فى ثانية واحده بس ان ده بيوضح انا بقول لحضرتك لو جه اى بدائل اخرى احنا مستعدين نطبقها
جمال ظهران: واليوم الكامل مش بديل يا استاذ رضا
د/رضا :ما انا بطبق اليوم الكامل
جمال ظهران:لا ما بطبقش اليوم الكامل
بتكلم على الوزارة انتجت وطلعت خطة استرتيجيه على 12 برنامج وزى ما بقول تانى الضوء الاعلامى لا يتركز الا على ما هو يعنى مشكله حضرتك فى مدارس حصلت على شهاده الاعتماد والجوده حكوميه 168 مدرسة
لميس الحديدى:من 43 الف مدرسة
د/ رضا : يعنى الوزارة ملتزمة تماما بالخطة الاستراتيجيه بتاعتها ؟
لميس الحديدى:ملتزمة ازاى اذا كنت حضرتك هتشيل الفسحة وتشيل حصص الانشطة حتى التقويم الشامل اللى هو بيقوم على 50% على الانشطة للطلبة دا مش موجود
د/ رضا : لا لا لا انا مرتبط بالخريطة الدراسيه الجديده والانشطة لان الانشطة اساس التقويم الشامل
لميس الحديدى:من سبعة لعشرة ؟
د/رضا :يا فندم واحد ولا اتنين هتلي
سهام نجم:انا بس عايزة افهم الجزئية دى
لميس الحديدى: مين معاى سعاد من الاميرية اتفضلى يا سعاد
سعادبقول لحضرتك انا متشكرة جدا على برنامج حضرتك اللى انتى بتقدميه دوت بس انا وديت بنتى النهارده المدرسة على امبارح رحت الصبح ادفعلها المصاريف ولقيت مهيصه ومفيهاش اى حاجة والزبالة موجوده فى المدرسة بطريقة غير طبيعيه
لميس الحديدى: مدرسة ايه يا سعاد ؟
سعاد: مدرسة فى الاميرية على شارع بورسعيد
لميس الحديدى:على شارع بورسعيد شكرا يا سعاد منى من شبرا الخيمة اتفضلى يا منى
منى: ايوه سلامو عليكم فى الفصل ابنى فى سنه اولى
لميس الحديدى: مدرسة ايه يا منى؟
منى :مدرسة شبرا الخيمة الاعداديه بنين
لميس الحديدى:خدنا المعلومة هناء المطرية اتفضلى يا هناء
هناء:سلامو عليكم
لميس الحديدى:وعليكم السلام
هناء:حضرتك انا ليا بنت وولد فى مدرسة المطرية الثانوية بنات والثانوية بنين المدرستين على التوالى مفيش نظافة التراب مالى الفصول بشكل غريب الشكل والعيال منعهم من النزول علشان يغسله ايدهم منعهم ينزلوا تحت دورة الميه خالص
لميس الحديدى:ليه ؟
هناء: معرفش كل ما يجيوا يقولوا عايزين نغسل ايدينا عايزين ننزل الحمامات ممنوع محدش ينزل خالص العيل اللى يحط الكمامه على بقه يقولوا لا شيل الكمامه الفصل مفهوش باسكت يرموا الزباله ورا الباب مفيش اى نوع من النظافة نهائى
لميس الحديدى:طيب شكرا يا هناء نتابع بس لحد ما تليفوناتنا تتوالى
سهام نجم:القائد اللى فى مكانه هو اللى يستطيع ان يدير العمليه بشكل جيد احنا سنة 2002 علشان نقلهم الزبالة اللى حوالينا المدرسة دى ليه موجوده ؟ الناظر قالى جمله واحده قالى دا ما يخصنيش انا اللى يخصنى جوا المدرسة قلتله لا يخصك لانه فى النهاية لو حصل وباء هيدخل لاولادك المدرسة وبعدين لما عملنا برامج تدريبيه مع النظار علشان ياخد قرار يبقى لهم سلطة القرار ويتعامل مع الاجهزة التنفيذيه قلتله انت من حقك ابعت خطاب واتنين ولو مردش نصعد هذا الموضوع هى دى فكرة القائد ان هو يقدر يدير بشكل كويس يحاتفظ على كيان مدرسته يقدر يدافع عنها ولذلك يدافع ايضات على سور المدرسة من بره انا رحت لسياد اللواء المحجوب الاسنه اللى فات بوسيقه كامله من المدارس اللى كنا بنشتغل معاه حول البيئه حوالين المدرسة والمنظر اللى موجود عارفه حضرتك لما قبلت الادارة المحليه مسئولى الادارة المحليه قلتله ليه حاطط صناديق الزباله على سور المدرسة ؟ مجمع مدارس فى صفط اللبن فيه 9 تلاف طفل ومع ذلك حاطط صناديق القمامه على سور المدرسة قاللى لان مش عارف احطها قدام بيوت اهالى قلتله ليه ؟
لميس الحديدى: طيب اسماء من سوهاج اتفضلى يا اسماء
اسماء: الو ايوه يا استاذة لميس اجحنا بالنسبه للمدارس كل المسئولين بيطلعوا فى البرامج بيقولوا كله تماما كله بخير هو فى المدرسة الابتدائى بيطلعوا الساعه 10 وما بيخدوش حاجه فى المدرسة وعاملين يلفوا على الفصول عاوزين مصاريف النمدرسة ورسوم الكتب علشان العيال تاخد الكتب ما بيردوش يدوا حد الكتاب
لميس الحديدى:انتى فى مدرسة ايه يا اسماء ؟
اسماء:انا اخواتى فى المدرسة
لميس الحديدى:مدرسة ايه ؟
اسماء:مدرسة من سوهاج
لميس الحديدىمن سوهاج يعنى قولى اسم المدرسة متخافيش
اسماء:لا مش هقدر اول اسم المدرسة
لميس الحديدى:خايفه طب قرية ايه فى سوهاج ؟
اسماء:مركز سقلت
لميس الحديدى:طيب نبيل من عزبة النخل اتفضل يا نبيل
نبيل :الو مساء الخير يا فندم
لميس الحديدى:مساء النور اهلا بيك
نبيل :حضرتك دلوقتى كل اللى بيتقال فى وزارة التربية والتعليم دا كله مفيش اى حاجة حصلت منه نظام الفترتين وال3 تيام مفيش الكلام ده حصل خالص فى عزبة النخل عندنا ولو سمحتى مش رجاء لوزير التربية والتعليم رجاء لرئيس الجمهورية تاجيل الدراسه انا عندى 3 عيال فى المدرسة كل يوم عايزين كمامه ب5 جنيه هنجبلهم فلوس منين ؟ فلو سمحتوا ارحموا الشعب علشان خلاص احنا تعبنا
لميس الحديدى:عادل من القاهرة اتفضل يا استاذ عادل
عادل :السلام عليكم
لميس الحديدى:وعليكم السلام
عادل :حضرتك كل اللى بيقولوا دكتور رضا ما بيحصلش تماما تماما تماما
لميس الحديدى:انت ولادك فين يا عادل ؟
عادل :انا مش هقدر اقول اكتر من كده
لميس الحديدى:اللناس خايفه طيب يعنى دى عينه من الجمهور على فكره يعنى دى عينه من الجمهور عشوائية تماما الناس بتتصل علشان تقول مشاكلها ما بتصدق تشوف مسئول تقول مشاكلها المدارس اللى انتم روحتوها دى كانت عهينه بسيطه جدا مش كل الحقيقه يا دكتور رضا
جمال زهران :انا بس عايز اقول لحضرتك حاجه بتتعلق بتشغيل العمليه التعليميه فى داخل المدارس ممكن يكون عندنا مدرسة نظيفه ودا شى طيب جدا لو تعاونا يبقى كويس تشغيل العمليه التعلميه اولا احنا قلنا الكلام ده فى اخر لجنة تعليم علشان نناقش انفلونزا الخنازير كل مدرسة محتاجة 3 عمال ثابتين على الاقل على مستوى المدارس كلها 50 الف مدرسة محتاجين 150 الف مدرسة لازم يتعينوا فورا وبقرار رئيس الوزراء واحد اتنين مدرسين الانشطة مش موجوده نهائى موجود فى كل مدرسة لازم يكون مدرسة فيها 40 فصل و 50 فصل لازم موسيقى وتربيه فنية وتربية زراعيه او تربية رياضيه مش موجودين يا فندم الحاجة التالته ومعلش اختم بيها بعد اذن حضرتك تشغيل باجر احنا اصدرنا قانون اسمه كادر المعلمين ازاى النهارده يصدر قرار باحدى المحافظات القاهرة الكبى مش عايزة اسميها يعنى وان سميتها القلوبيه يصدر قرار بتعين 5 تلاف مدرس باجر فاعلين ازاى ؟ هو لازم يشغل كادر المعلمين ةمفيش مدرس يدخل الا اذا كان تربوى
لميس الحديدى:رفقا برده بالوزارة لان الوزارة دى او اللى فاتت او اللى جاية لديها موازنة محدوده جدا احنا بنصرف على التعليم 6% من الناتج القومى الاجمالى لا توجد دولة فى العالم تريد ان تنموا تريد ان تتقدم تصرف 6% احنا بنصرف على الطالب 800 جنيه فى السنه فى اسرائيل بيصرفوا 2500 دولار فى السنه دولار فانت انت بتتكلم عن ايه ؟ فى النهاية دا دور برده مجلس الشعب
د/ رضا :كان هناك نوع من عدم الضبط والانضباط فيه دا جاى نتيجة ان عندى حجم التعليم ضخم فى الادارات التنعليميه وخلافه او المدارس نفسها من المسئوليه انما زى ما بقول احنا فى ظرف بشكل استثنائى
لميس الحديدى:انت مطمن فى نهاية هذا البرنامج ان الولاد هيتعلموا كويس
د/ رضا :انا مطمن تماما للعملية التعليميه
لميس الحديدى:هتنجحوا العيال فى الثانوية العامه؟
د/ رضا :لا لا لا اطلاقا انا بتكلم على عملية تعليميه منتظمه ودا ظرف استثنائى
لميس الحديدى:سياده النائب هل انت مطمئن ؟
جمال زهران:انا غير مطمئن لان التعليم بيواجه امراض كبيرة جدا تفوق مساله الظرف
الاستثنائى
لميس الحديدى:استاذه سهام
سهام نجم:لا الحقيقة انا قلقه جدا من العملية التعليميه فى ظل هذه الظروف واعتقد ان فيه يعنى القوة او الالتزام بفكرة تطوير التعليم والجوده ومعايير الجوده اللى طرحتها الوزارة اعتقد هتتاثر الى حد كبير نتيجة اختصار اليوم الدراسى واختصار ايضا العمليه التعليميه واختزالها
لميس الحديدى :انا هضطر يعنى اختم هذا البرنامج لان طبعا النشرة ازفت بشكر ضيوفى وبشكر كل التليفونات اللى اتصلت بينا احنا موجودين علشان نسمعكم ونسمع ايضا اراء جميع الاطراف زى ما انتم شايفيين جايبيين من الحكومة والمعارضة والمجتمع المدنى يعنى بيصعب عليا جدا ما قاله عميد الادب العربى الدكتور طه حسين ان التعليم يجب ان يكون كالماء والهواء ما كنش يعرف طه حسين من خمسين سنه ان الميه ملوثه والهوا بكره 6 اكتوبر كل سنة وانتم طيبيين وهذه لميس الحديدى تحييكم وتصبحوا على خير