حديث المدينة

مفيد فوزى: أهلا بحضراتكم ، طول العمر الشباب والرياضة دايما في مصر في سلة واحدة بل في مبنى واحد الآن الشباب كيان وأصبح له وزير أسامة ياسين والرياضة كيان وأصبح لها وزير العامرى فاروق أجرى مع العامرى فاروق وزير الرياضة مباراة ودية على ملعب حديث المدينة فهل تأذنوا ، من أنت
السيد / العامرى فاروق: العامرى فاروق العامرى متزوج من السيدة مى طارق مسعود وعندى إبراهيم ومريم ، إبراهيم في 3 إعدادى ومريم في أولى حضانة كنت رجل أعمال أو عندي ما شاء الله منشآت الحمد لله خاصة بالتعليم بدور النشر ، بمجال الأدوية ، مجال الترجمة يعنى أكثر من منشأة الحقيقة ، دخلت العمل العام من خلال مجلس إدارة النادى الأهلى وأنا عمرى 26 سنة ، خضت انتخابات 26 سنة وخضت انتخابات 30 سنة وخضت 34 وخضت 38
مفيد فوزى: كل ده أنت عضو في مجلس إدارة النادى الأهلى
السيد/ العامرى فاروق: ما عدا 26 سنة ، 26 سنة دخلت ما وفقتش طلعت الثالث وكانوا بياخدوا 2 تحت 30 سنة دخلت ثاني يوم الحقيقة لإنى خدت الثالث الحمد لله بعدد كبير فارق بينى وبين الزميل اللي قبلى كان حوالى 100 بس ثاني يوم جيت واشتغلت في النادى الأهلى عضو في اللجنة الثقافية متطوع اشتغلت 4 سنين ثم القدر خدمنى إن ساعة فتح باب الترشيح كان يفرق عن ال30 سنة أسبوع فقدرت إن أنا أدخل تحت 30 سنة ثاني وطلعت الأول ، في الأهلى بطبيعة الحال التاريخ أثبت إن الناس بتيجى تحت 30 سنة وبعد ما بتخلص بتنسحب ما بتكملش في اللي فوق باعتبار إن تملى فوق ال30 سنة بيبقى الكبار أو الوضع بيختلف للنجوم قررت أخوض الانتخابات في أول مرة في تاريخ النادى الأهلى على مدار 100 سنة ربنا أكرمنى إن أنا طلعت الثانى بعدد كبير جدا من الأصوات جاءت الانتخابات اللي بعدها بعد ما اشتغلت 4 سنين كنت خارج قائمة حسن حمدى وكان تحدى بالنسبة لي عنيف جدا الحقيقة بس كانت يعنى الحمد لله بحمد ربنا وبشكر فضله ثقتى في الله كبيرة جدا إن المجهود اللي أنا بذلته واللى أنا اشتغلت به الناس هتقيمه في الجمعية العمومية وربنا أكرمنى ونجحت في انتخابات مصر كلها كانت بتتكلم عليها لحد الوقت الحالى ما خرجت من النادى الأهلى قبل الدورة الانتخابية ما تنتهي يعنى أنا المفروض دورتى الانتخابية تنتهي السنة الجاية ونصبت على كرسى حقيبة وزارة الرياضة برؤية جديدة إن شاء الله إن احنا نجتهد إن احنا نخدم بلدنا من الرياضة المصرية بزاوية مختلفة وفى أول سابقة أن يخرج من النادى الأهلى شخص من داخل جدران النادى الأهلى يتولى منصب داخل وزارة الرياضة أو حقيبة الرياضة كمجلس قومى للرياضة
مفيد فوزى: إيه دور صالح سليم في حياتك
السيد / العامرى فاروق: يعنى كابتن صالح طبعا كان بالنسبة لي النافذة اللي خرجت منها النادى الأهلى لإن الحقيقة أنا لما خضت الانتخابات كان 26 سنة كانت سنة 96 سمح لي إن أنا ألتحق باللجنة الثقافية وإن أنا اشتغل ادانى مشروع أشرفت عليه بتنسيق كامل منه الحقيقة وده اللي نقل النادى الأهلى كان تطوير وميكنة النادى الأهلى كله كمبيوترايزد بالكامل وعمل مركز دعم واتخاذ قرار ومجلس إدارة وأرشيف إلكترونى بجميع محاضر المجلس بنفسه يوم 7 ربنا أكرمنى الحمد لله وكانت ثقته في إن أنا أنجزت هذا المشروع والمشروع ده موجود لحد النهاردة بيعمل وبيعمل بكفاءة عالية جدا الحمد لله وبيتم تطويره من فترة لفترة فده بالنسبة لي كان له دور كبير جدا إن الكابتن صالح ييجى يثق فيك وانت عمرك كان في الوقت ده 30 سنة وكان من الطبيعى إن محدش بياخد الأدوار دى في مجلس إدارة إلا الكبار أول مرة يبقى شاب في النادى الأهلى وياخد هذه الثقة ويتكلم مع رئيس النادى واللى هو كان بيتعبر في فترات كثيرة جدا يعنى البعبع للناس مين يقدر يتكلم مع الكابتن صالح ومين يقدر يبص له أو يتناقش معاه في تفاصيل إنما الحقيقة بأمانة ربنا الsupport بتاعه
مفيد فوزى: كان صالح سليم انت عارف أنا سألتك ليه وقلت لك من أنت أول سؤال لأن عادة الناس في مصر دلوقتى أصبحت لما بتيجى سيرة اسم جديد طبعا من المؤكد إن كل الرياضيين يعرفوك إنما من المؤكد إن بقية الناس خارج إطار الرياضة يتساءلوا من هو العامرى فاروق
السيد / العامرى فاروق: وليه العامرى فاروق
مفيد فوزى: وليه العامرى فاروق فده حبيت يعنى إن أنا أبدأ بهذا السؤال عشان خاطر تبقى الأرضية مشتركة
السيد / العامرى فاروق: ممكن يكون السبب إن كان لي دور في الأهلى وفى الإنجازات الإيجابية والقوانين واللوائح والدستور بتاع النادى الأهلى كنت مشترك في عدد كبير جدا من اللجان كل ده أعتقد ممكن يكون له دور في إن الفترة اللي جاية محتاجة حد يعيد ترتيب أوراق
مفيد فوزى: من الذى اختارك
السيد / العامرى فاروق: في الوزارة
مفيد فوزى: نعم
السيد / العامرى فاروق: أنا بالضبط جاء لي تليفون الساعة 9 صباحا من مكتب رئيس الوزارة الحقيقة انطلبت تفاصيل منى في بيانات معينة الساعة 12 بالضبط وأنا قاعد في مكتبى شفت في الtelevision إن رئيس الوزارة هيعلن أسماء الوزراء في مؤتمر صحفى وبالتبعية فضلت أسمع واشوف الوضع لإن خلاص الموضوع حسم وأكيد فيه حد لإن كان فيه مرشحين الكابتن هادى خشبة والكابتن علاء عبد الصادق وهم لهم كل تقدير واحترام فلما لقيت المؤتمر لإعلان الاسم قلت خلاص أكيد الموضوع حسم في نهاية المؤتمر الحقيقة معالى دولة رئيس الوزراء الحقيقة راح قايل وزارة الرياضة ووزارة الطيران المدنى هتحسم خلال نص ساعة في نفس التوقيت جاء لي التليفون من مكتب رئيس الوزراء عليك التوجه لمقابلة السيد رئيس الوزراء التقيت الحقيقة معاه حوالى 35 دقيقة في حوار كامل في تفاصيل ، في رؤية للفترة الجاية ممكن تبقى عاملة ازاى وهل نقدر إن احنا نتحرك في ده قال هتنتظرنى شوية دخلت انتظرته في الصالون الثانى بعدها بثلث ساعة كده استدعونى ثاني قالوا لي سيادتك تتفضل تسلم على السيد رئيس الوزراء وتطلع من هنا على قصر الاتحادية لحلف اليمين
مفيد فوزى: إيه كان شعورك في اللحظة دى
السيد/ العامرى فاروق: مسئولية ، مسئولية كبيرة
مفيد فوزى: هل تمنيت هذا المنصب هل فكرت فيه
السيد/ العامرى فاروق: بزاوية مختلفة يعنى أنا ما تخيلتش وأنا رايح إن أنا ممكن أبقى وزير الرياضة في مصر بس أنا طول عمرى أمنية حياتى إن أنا أعمل حاجة لبلدى وإن أنا أشتغل فيها بزاوية عملية أكثر فحسيت إن ربنا كافئنى وبيقول لي انت موجود أهه هنشوف هتعمل إيه أو هتتحرك ازاى أو هتخدم بلدك ازاى
مفيد فوزى: طيب انت قلت عبارة مهمة قوى قلت الدورى قادم ، قادم
السيد/ العامرى فاروق: إن شاء الله بمشيئة الله
مفيد فوزى: بتراهن على إيه
السيد/ العامرى فاروق: المفهوم بتاع حال دولة في مصر خلال الفترة اللي أنا موجود فيهم يمكن في فترة ال20 يوم دول احنا راصدين إن القصة ماهياش الناحية الفنية والكروية فقط احنا عندنا مشكلة كبيرة جدا إن فيه كم من الناس الحقيقة انضرت من توقف النشاط الرياضى عمال ، موظفين ، كوادر بتعمل في الحقل الرياضى بشكل كبير جدا كل ده مضرور مع ظروف المعيشة والحياة بتغلى الناس دى توجهت الحقيقة إلى أعمال كثيرة جدا مش بتاعتها مش قدراتها فيه ناس ظروفها صعبة جدا المادية فالرؤية رايحة إن يا جماعة لازم نحس بالناس دى الأندية كمان خلال الفترة دى لو ما رجعش النشاط الرياضى هتعلن إفلاسها
مفيد فوزى: هو يرجع النشاط الرياضى بجمهور
السيد/ العامرى فاروق: هناخدها خطوة خطوة
مفيد فوزى: إيه الفرق بين الجمهور واللا جمهور
السيد/ العامرى فاروق: مع حالة الهياج الفكرى في مصر وإن الناس بطبيعة الحال بدأت تناقش كل حاجة إنها حقها ، حقها ، حقها فيه ناس عندها حق وفيه ناس محتاجة تهدأ وفيه ناس محتاجة إنها تاخد وقت يعنى الأمور مختلفة كثيرا فجزئية بالجمهور أو عدم الجمهور مع الأحداث اللي مرت بها خلال قصة الأهلى والمصرى والتداعيات والأحداث والكلام ده كله أثرت على الجزئية دى احنا رايحين نرجع بالنشاط الرياضى إن شاء الله بدون جمهور بالنسبة لجزئية الدورى لحد الدور الأول فيه اشتراطات نيابة عامة فرضتها علينا الظروف لازم نخلصها جيت أنا الحقيقة لقيت مفيش حاجة اتعملت قبل كده كل اللي اتعمل إن الوزارة هنا تمتلك 14 استاد فيه ميزانية كانت مرصودة من قبل الدولة كانت 90 مليون تم إرسال 14 مليون جنيه منها مبدئيا إلى المديريات دون النظر إذا كانت هذه الاستادات هي اللي هيتلعب عليها الدورى وللا لا
مفيد فوزى: لما جيت إن ده هيحصل الدورى إن شاء الله يعنى أنت مصر على أنه يعود
السيد/ العامرى فاروق: هي مش قصة الإصرار هو فيه توجه دولة
مفيد فوزى: هل يبقى مجموع بسيط للناس أو يمثلوا في الجمهور كام
السيد/ العامرى فاروق: يمكن احنا في خلال الفترة اللي فاتت لو حضرتك متابعنا فيه تنسيق كامل الحقيقة مع وزارة الداخلية ، فيه تنسيق كامل الحقيقة مع رئاسة الوزراء يعنى فيه حوار مفتوح ، فيه اتصال مباشر
مفيد فوزى: أصل قرارك مش سهل
السيد/ العامرى فاروق: طبعا أنا مستوعب
مفيد فوزى: يعنى لما يبقى فيه جمهور في الأندية وفى الدورى يعنى أنا أأمل طبعا إن الناس
السيد/ العامرى فاروق: احنا رايحين بدون جمهور عشان تكون الأمور أكثر وضوحا بدون جمهور الدور الأول
مفيد فوزى: آه يعنى القرار إن الدورى عائد بدون جمهور
السيد/ العامرى فاروق: آه أنا الخطاب الحقيقة اللي باعته أول امبارح إن احنا طالبين إن السوبر يبقى يوم 8 من يوم 17 إن شاء الله بداية الدورى بمشيئة الله تعالى وبدون جمهور
مفيد فوزى: كده
السيد/ العامرى فاروق: آه مكتوب في الخطاب
مفيد فوزى: عدم وجود جمهور النادى هيستفيد إيه
السيد/ العامرى فاروق: لا مبدئيا إن النشاط الرياضى يرجع في حد ذاته النادى بيستفيد بث فضائى بيستفيد إعلانات موجودة داخل جدران الملعب بيستفيد إن الدورى
مفيد فوزى: طبعا ده بيذاع
السيد/ العامرى فاروق: طبعا
مفيد فوزى: وبالتالى
السيد/ العامرى فاروق: فيه عائد طبعا للأندية وفيه للاتحاد
مفيد فوزى: من الإذاعة
السيد/ العامرى فاروق: آه طبعا
مفيد فوزى: فقط لا غير
السيد/ العامرى فاروق: من الإذاعة والإعلانات
مفيد فوزى: إذن الجمهور يتفرج على المباراة في البيت
السيد/ العامرى فاروق: لفترة مؤقتة على الرغم إن احنا وزارة الداخلية الحقيقة أعلنت وده برضه الحقيقة كان شئ إيجابى جدا منهم احنا نقطتنا تملى في عدم دخول الجمهور هي إن احنا بنحاول نرتب العلاقة اللي ما بين الأمن وما بين الجمهور
مفيد فوزى: طيب هو ده مش يتعبر زى ما بسمع وأفهم إن هو الضلع الثالث
السيد/ العامرى فاروق: طبعا أساسى
مفيد فوزى: اللاعب رقم 13
السيد/ العامرى فاروق: طبعا ، ممكن يكون هو اللاعب الأول كمان ساعات في لحظات كثيرة
مفيد فوزى: كمان
السيد/ العامرى فاروق: آه طبعا
مفيد فوزى: ده بيبقى أثره إيه على اللعيبة
السيد/ العامرى فاروق: سيئ عدم وجود جمهور معناه إن انت جسد بلا روح خلينا نكون واقعيين يعنى لما كنا بنروح أنا لما كنت بحضر مباريات الفترة اللي فاتت دى الاستاد فاضي انت بتسمع صوت اللعيب وهو بينادى على زميله ده ما بيحصلش ده مش طبيعى إنما فيه ظروف حكمتها علينا الوضع الخاص هنعدلها بس واحنا بنعدلها لازم نعدلها بشئ من التأنى لإن احنا مش حمل إن احنا نصطدم ثاني
مفيد فوزى: هل استبعدت نادى المصرى
السيد/ العامرى فاروق: بمعنى
مفيد فوزى: إنك استبعدته من اللعب خالص
السيد/ العامرى فاروق: خالص
مفيد فوزى: لإن أنا قريت تصريح لك بتقول فيه فيما معناه إن أن ينسب إلى أن النادى المصري يستبعد ده كإنه حد عاوز يصفينى سياسيا
السيد/ العامرى فاروق: لا دى حاجة ثانية
مفيد فوزى: اللي هي إيه
السيد/ العامرى فاروق: كان فيه خبر طلع في جريدة الوفد في الصفحة الأولى
مفيد فوزى: بيقول
السيد/ العامرى فاروق: إن العامرى فاروق أصدر قرار باستبعاد جميع أندية بورسعيد من جميع الجمعيات العمومية لجميع الاتحادات
مفيد فوزى: آه بالضبط
السيد/ العامرى فاروق: مفيش الكلام ده خالص
مفيد فوزى: انت حسيت بإيه ، ده مش صحيح
السيد/ العامرى فاروق: لا خالص وأنا خاطبت الجريدة بخطاب رسمى خاطبت نقابة الصحفيين واتخذت إجراءاتى وهم الحقيقة بصراحة ربنا أبدوا أسفهم ونزلوا ثاني يوم تصحيح للخبر
مفيد فوزى: انت تخليطك إيه فيما يتعلق بأندية بورسعيد اللي هي حواليها جدل كثير
السيد/ العامرى فاروق: بص حضرتك أصل الرياضة في مصر ماهياش كورة ، الرياضة في مصر حتت كثيرة جدا وأسباب كثير جدا احنا عندنا خلل ، عندنا خلل موجود في الرياضة في مصر خلل في اللوائح بشكل عنيف جدا ، اللوائح مرنة ، منطقية غير قابلة إنها تفسر بتفسر ب50 طريقة
مفيد فوزى: آخر قانون للرياضة في مصر امتى
السيد/ العامرى فاروق: سنة 75
مفيد فوزى: ومن سنة 75 حتى الآن زى ما هو
السيد/ العامرى فاروق: مفيش تغيير خالص على الرغم إن انت داخل في مشاكل كثيرة جدا مع الاتحادات الدولية ومع اللجنة الأولمبية نتيجة الصدام اللوائح بره بتتطور وانت اللوائح في مصر ثابتة اللي بيغير بقى اللوائح حضرتك ما هو احنا عندنا قانون وعندنا لوائح تنفيذية اللي بيغير لوائح خلال الفترة بتاعت 10 سنين اللي فاتت دى اللوائح متغيرة 5 مرات مفيش ثوابت مفيش رؤية تتلغى البنود وترجع بعدها بسنتين بعدها هي ، هي وترجع بعد سنتين ثاني تتلغى نفس مفهوم حضرتك إلغاء سنة سادسة في الابتدائية ورجوع سنة سادسة هو نفس مجلس الشعب اللي ادى الحيثيات في الإلغاء هو نفس مجلس الشعب اللي ادى الحيثيات في الرجوع
مفيد فوزى: هل عندك رغبة في قانون جديد للرياضة
السيد/ العامرى فاروق: فورا
مفيد فوزى: إيه اللي غير التراث
السيد/ العامرى فاروق: شكلت لجنة بالفعل أول امبارح والمفروض هيعلن وأنا كنت بأعانى الحقيقة من إن الوزير اللي بيقى موجود أو كان رئيس المجلس القومى للرياضة يمكن دلوقتى هي وزارة إنه بيغلق على القانون لشخصه وما بيطلعوش للرأي العام وهذا بالنسبة لي كلام مرفوض القانون سيعلن للرأي العام سيناقش مع جميع الهيئات اللي موجودة مع الاتحادات سيناقش من مجموعة عمل كبيرة جدا لازم الناس تشارك لإن الرؤية كبيرة والموضوع كبير
مفيد فوزى: تتمنى يبقى في الدستور شئ عن الرياضة
السيد/ العامرى فاروق: فيه
مفيد فوزى: فيه
السيد/ العامرى فاروق: احنا بحثنا ورحنا وحضرتك أنا وقبل ما أكون وزير كمان أنا رحت حضرت في مجلس الشورى 3 مرات الحقيقة مع لجنة الشباب والرياضة في مجلس الشورى مع الأستاذ محمد حافظ وناقشنا تصور واتحط واتبعت للجمعية التأسيسية ولما ربنا أكرمنى وأصبحت وزيرا للرياضة رحت جلسة في مجلس الشورى جلسة عامة وناقشت رؤية وزارة الرياضة في الدستور المصري وعملنا تركيز على إن ضرورى إن الرياضة في مصر تتوضع في الدستور والناس كلها في الجمعية التأسيسية وعدت بهذا الكلام وأعتقد إن دى نقلة لإن الرياضة في مصر ماكانتش محطوطة خالص الحقيقة على الخريطة السياسية ولا على فكرة يمكن اللي الناس ما تعرفوش إن الناس بتبص للرياضة في مصر يمكن أنا قاعد معاك دلوقتى على الكرسى الوضع اتغير المعطيات اختلفت الأوراق شفتها بزاوية أكبر شوية ، الإدارات ، المنشآت ، المحافظات التناسب ما بين الملاعب وما بين الهيئات وما بين عدد السكان وحاجات كثيرة جدا الحقيقة كلها حاجات ما كانش محطوط لها الحقيقة رؤية
مفيد فوزى: الألتراس ليه اتغيروا هم كانوا شباب واعد
السيد/ العامرى فاروق: هم مش اتغيروا هو الجو العام والمشاحنات الكثيرة والمنافسات الكثيرة ما كانش فيه برضه يعنى الدولة ما كانتش قايمة بالدور إنها ازاى تمتص ، ازاى توجه ازاى تعامل كانت فيه شد وجذب الحقيقة ما بين الأمن وما بين الألتراس يظهر ده يظهر إن ممكن الجمهور يسافر لمحافظة ثانية والمحافظة الثانية تيجى لمحافظة أخرى فتفاجئ بإن مثلا عربيات بتتكسر حد بيضرب وبالتالي الماتش اللي بعديه ده عاوز يرد على ده دخلوا في حسابات كثيرة جدا ممكن يكون برضه الرؤية الأمنية ما كانتش في الفترة اللي فاتت أو كان بيتم التعامل معاهم الحقيقة بطريقة كان فيها إجحاف شوية
مفيد فوزى: الخلاصة اللي انت خدتها من تجربة مذبحة بورسعيد
السيد/ العامرى فاروق: لا بص حضرتك هي فيه أسباب كثيرة لقصة مذبحة بورسعيد سواء قديمة أو جديدة قديمة إن الجمهور نفسه بيعامل معاملة سيئة
مفيد فوزى: الجمهور
السيد/ العامرى فاروق: آه طبعا على جميع المستويات ، على جميع المستويات وعلى جميع الفرق مثلا انت بتدخل الجمهور الساعة 12 الصبح الماتش الساعة 7 بالليل وهو داخل بتاخد منه إزازة المية وبتاخد منه الأكل وبتاخد منه كل حاجة ومش موفر له منافذ جوه طب هو ازاى يعنى ازاى انت متخيل يعنى
مفيد فوزى: هل ده اللي بيخلق التوتر
السيد/ العامرى فاروق: طبعا
مفيد فوزى: مباشرة
السيد/ العامرى فاروق: حضرتك ممكن تتخيل إن انت ممكن تقعد 7 ساعات قاعد على كرسى والكرسى كمان مش مريح إذا كان فيه كرسى إنما فيه استادات مفيهاش كراسي بلا مية وبلا أكل وبلا كل الكلام ده هل ده منطق ، هل ده عقل لا طبعا الاستادات بره كلها في العالم ممكن المباراة بساعة الاستادات تتملى وبعد المباراة بنص ساعة الناس تروح وده شئ آدمى ما ينفعش إنك تقف طوابير كل ده شئ لازم يعاد ترتيبه ده مش هيتعمل في يوم وليلة عشان برضه نبقى مستوعبين بس لازم يتحط لازم الناس تبتدى تاخد أكشن لإن ده هيبقى في الفترة اللي جاية إذا كنا كمان رايحين وعايزين في يوم من الأيام نستضيف كاس عالم ونستضيف بحر متوسط ونستضيف أي أوليمبياد ونستضيف كل الكلام ده لازم يكون عندنا رؤية vision ، vision للرياضة الخريطة راحة فين
فاصل غنائى
مفيد فوزى: الرياضة النسائية يعنى هل تشغل مساحة في رأسك
السيد/ العامرى فاروق: أكيد
مفيد فوزى: ازاى
السيد/ العامرى فاروق: بس يعاد ترتيبها خليني برضه بص حضرتك عايز أديك مفهوم عام كده لو سمحت لي يعنى عشان الناس بتشاهدنا حضرتك ما شاء الله مشاهد بشكل كبير جدا الرياضة في مصر عشان تبدأ تتنسق وتترتب أدامى كذا محور أتحرك عليها محور إن أنا محتاج أرجع النشاط الرياضى في أسرع وقت ممكن عشان الأندية اللي موجودة والقائمة والناس اللي عايشة تقدر تعيش وإلا مش تعيش
مفيد فوزى: يعنى انت في ذهنك إعاشة هؤلاء الناس
السيد/ العامرى فاروق: آه طبعا لإن الأندية بتعلن إفلاسها خلال الفترات اللي جاية كلها على فكرة لو الرياضة ما رجعتش ناس كثير جدا هتبدأ ما بتاخدش رواتبها ظروفها الدنيا من أسوأ إلى أسوأ في الجزئية دى فضرورى إن النشاط الرياضى يرجع ولازم الناس تستوعب هذا الكلام ولازم الناس تساعدنا لإن ماهواش شخص بيدير القصة لوحده فده مبدئيا عشان الدنيا تقدر تتحرك على الأقل to be stable يعنى يبقى فيه شئ من الاستقرار إنما وأنا موجود في مكانى ده عشان أسلم حضرتك الوزارة مستقرة أبقى أنا راجل فاشل أنا المفروض أسلم حضرتك الوزارة متطورة دى الخطوة اللي المفروض أنا بتحرك فيها أنا مش جاى إن أنا أخلى الوضع مستقر ما كنتش قبلت إن أنا أكون موجود فيها أنا جاى أطور الدنيا لغة الحوار مع الاتحادات مفيش ربط نهائى مفيش ميكنة خالص ما عندناش حتى الجمعيات العمومية بتاعت الاتحادات موجودة كقاعدة بيانات موجودة جوه الوزارة مفيش
مفيد فوزى: لا توجد في مصر قاعدة بيانات رياضية خاصة بالوزارة
السيد/ العامرى فاروق: الجمعيات العمومية ، الاتحادات
مفيد فوزى: لا توجد
السيد/ العامرى فاروق: لا توجد خالص كل ده لازم يتغير
مفيد فوزى: الله أمال الناس كانت بتشتغل ازاى
السيد/ العامرى فاروق: والله يا فندم أنا جيت أول يوم طلبت أنا عايز أعرف أنا استلمت الوزارة دى فيها عدد أد إيه عشان أعرف إن أنا نجحت وللا لا يوم ما آجى أسلمها لإنى أكيد هسلمها في يوم من الأيام يعنى ده أمر طبيعى وسنة الحياة في أي حاجة لازم أعرف هسلمها له ازاى عشان الناس تستوعب الناس دى عملت إيه كنا فين واتنقلنا فين كنا كام منشأة وبقينا كام منشأة كنا كام استاد وبقينا كام استاد كنا كام لاعب وبقينا كام لاعب
مفيد فوزى: انت مؤمن بلغة الأرقام
السيد/ العامرى فاروق: طبعا
مفيد فوزى: هي الحديث
السيد/ العامرى فاروق: هي حضرتك اللي انت هتتحاسب عليها يعنى مش هنقدر نسترسل في الكلام هي لغة أرقام انت كنت موجود والوضع كان عامل ازاى والاقتصاد المصري في مجال الرياضة كان عامل ازاى وبقى ازاى ده محدش فكر إنه يناقش وزارة الاستثمار في إن لا يوجد بند واحد في الاستثمار الرياضى في قانون الاستثمار في بلدنا مفيش افتح قانون الاستثمار لو لقيت بند واحد يقول إن حضرتك فيه استثمار رياضى في مصر يبقى عند حضرتك حق الرؤية دى احنا حطينا 21 نقطة الناس تقدر تستثمر فيها رياضيا مش بالضرورى حضرتك تعمله
مفيد فوزى: أمال أسعار النجوم اللي بيسافر واللى بياخد له 5 مليون
السيد/ العامرى فاروق: لا دى عشان الكرة لها حسابات خاصة ونتيجة إن البطولات اتغيرت شوية بقت بطولة إفريقيا بقت بفلوس لما تكسب تاخد مثلا مليون دولار لما تطلع تلعب كاس أندية عالم بتاخد 2 مليون يورو أو كذا أو كذا فبقت الحسابات مختلفة فبدأت انت غصب عنك بتحاول إن انت تجيب لاعبين مميزين تجيب كذا
مفيد فوزى: الناس فاهمة إن البورصة دى يا فندم هي الرياضة في مصر
السيد/ العامرى فاروق: لا ولو حضرتك اتحركت كده يبقى الوضع صعب جدا
مفيد فوزى: خطر
السيد/ العامرى فاروق: المنشآت حضرتك وزارة الرياضة بتعمل المنشأة يعنى أنا مثلا امبارح أنا كنت في زيارة لمحافظة الغربية فيه منشآت في محافظة الغربية وأنا رايح محافظة الغربية لإن أنا برصد دلوقتى جميع المحافظات اللي فيها المشروعات اللي اتصرف عليها ملايين وواقفة عندي مشروعات اتصرف ملايين وواقفة مش شغالة ولو شغالة ، شغالة بمخالفات ولو شغالة بمخالفات شغالة نتيجة حمامات سباحة بتسرب ومتكلفة 10 مليون و 12 مليون و 16 مليون كم مخالفات مالية وإدارية عنيف جدا
مفيد فوزى: ما عندكش مفتشين بيشوفوا ويراقبوا
السيد/ العامرى فاروق: عندي بطريقتهم إنما ما عنديش بطريقتى
مفيد فوزى: يعنى إيه طريقتك
السيد/ العامرى فاروق: أنا يا فندم اللي بينزل إدارة التفتيش اللي بتنزل ما بتنزلش بالتصور الكامل إنها تروح تفتش بتنزل للشغل الروتينى ده إن نزلت الوزير محتاج إدارة وده خلاص أنا يعنى خدت فيه قرار إدارة تفتيش تابعة لمكتب الوزير مباشرة لما تنزل تفتش وتلاقى الاتحاد ده ما اتفتشش عليه إدارة التفتيش اللي تحت تتحول كلها للتحقيق بالكامل ما ينفعش إن أنا أبقى عندي إدارات تحت تفتش على الاتحادات ومش شغالة
مفيد فوزى: يا فندم مسألة التفتيش دى بترجع دائما باستمرار بكلمة واحدة إن كل شئ 100 فل وعشرة لإن كل ميت فل وعشرة ، ميت فل وعشرة دى أذت حياتنا
السيد/ العامرى فاروق: بص حضرتك لما يكون فيه حد الحمد لله نعمة من عند ربنا فاهم الوضع بيتغير يعنى أنا جاء لي اليومين اللي فاتوا دول نازل لجان تفتيش في حاجات كثير جدا فبيجينى فالأمور بتبقى واضحة لو عرف كويس قوى وحس كويس قوى إنك فاهم القصة ممكن يتفتش على ازاى ولما ينزل نادى يفتش في إيه ولما ينزل الاتحاد يجيب الورق ازاى ويفتش ازاى أنا أثبت لهم التجربة بنفسى أنا نزلت فتشت على الغربية وكان معايا المستشار محمد عبد الغنى محافظ الغربية الحقيقة وعرفوا كويس قوى إن العامرى فاروق لما ينزل يفتش ، يفتش ازاى أنا ما عنديش مشكلة خالص إن أنا أفتح درج وأجيب وللا أروح هنا وللا أروح هنا وللا أطلع ورق أنا جبت دفاتر الإيصالات وقعدت وشفت ورينى الساركى بتاع النادى واستلمت إيه من الوزارة كلها مختومة وللا لا وكلها متسجلة أنا ما بهزرش الكلام واضح والصورة لازم تكون منقولة يمكن أنا جميل جدا إن أنا أنقل الصورة في برنامج زى ده أي حد هلاقيه مخالف ماليا وإداريا أنا من خلال حضرتك بقول أنا هاخد إجراءات غير رسمية مهما كان هو وأنا ما عنديش مشكلة خالص يعنى حساباتى ماهياش حسابات خاصة وأى حد هيشتغل معانا وهيطور من نفسه هيلاقينا في ظهره احنا لن نسمح بأى حاجة غلط أنا النية خالصة لله إعادة ترتيب الأوراق في الرياضة في مصر وإن شاء الله ربنا هيكرمنا ويوفقنا لإن فيه ناس كثير بتكلمنى خد بال حضرتك يمكن الأعباء دلوقتى الكثير اللي على أنا والله مش بروح بيتى أنا باجى 8.30 بروح الساعة 12 بالليل فتخيل حضرتك يعنى ممكن الوضع يبقى عامل ازاى
مفيد فوزى: إيه المشقات اللي بتقابلها بأمانة
السيد/ العامرى فاروق: هي المعوقات إن التوقيت خدمنى والتوقيت ضرنى
مفيد فوزى: بمعنى
السيد/ العامرى فاروق: التوقيت خدمنى إن أنا جيت في توقيت فيه انتخابات 26 اتحاد عندهم انتخابات عدد كبير جدا من الأندية عنده انتخابات كمية الطعون ، نوعية هزلية فبالتبعية مش واضحة الموظف اللي بياخد قرار باستبعاد ده واستبعاد ده النواحى بتفسر برؤيته الخاصة
مفيد فوزى: أد إيه حجم الطعون
السيد/ العامرى فاروق: رهيب ، رهيب وفيه تجاوزات كمان يعنى إيه فيه تجاوزات يعنى ما تحسش إن فيه اتحاد مافيهوش طعن وكإن لغة العصر إن أنا بدل ما أنافسك إن أنا أطعن فيك عشان أستبعدك وآسف في التعبير يعنى أنا فيه ناس بعد ما استبعدتها خدت قرار باستبعادها ناس عليها أحكام قضائية وناس كذا كله كان واضح وخدت فيها قرارات ابتدينا نتكلم على إن مفيش حكم الحكم أدام عيني ويطلع للرأي العام والإعلام الرياضى لازم يستوعب يعنى أنا ضمن المشاكل اللي قابلتنى كم التصاريح اللي نزلت على لسانى غريبة الشكل وأنا ما قلتش حاجة
فاصل
آذان المغرب
مفيد فوزى: كنت عايز أسألك سؤال وأقول لك الإعلام الرياضى خلص السؤال
السيد/ العامرى فاروق: الإعلام الرياضى أنا حاطه في التصور الجديد بتاع القانون بتاعنا وكيفية تفعيله وكيفية التعامل معاه وده جزء هيتناقش مع وزارة الإعلام يعنى أنا عندي في القانون والتصور الجديد أبواب هتناقش مع وزارات فيه باب مع وزارة الاستثمار ، فيه باب مع وزارة العدل ، فيه باب مع وزارة الإعلام ، الإعلام الرياضى صعب
مفيد فوزى: فهمنى يا فندم هل كل مقدم برنامج يعنى ومعظمهم إلى حد كبير من نجوم الكرة الأفاضل هل لابد أن يكون حامل أجندة معينة يعنى مثلا لما الأهلى مثلا على سبيل المثال
السيد/ العامرى فاروق: أول حاجة هو الكم كبير جدا بالنسبة لعدد البرامج الرياضية اللي بقى بيغطى فبقت المشكلة تملى في عدد الجرائد والإعلام والمواقع الألكترونية وكل واحد عايز ينفرد بقرار وكل واحد
مفيد فوزى: دى مساحة أكبر مما تتصور
السيد/ العامرى فاروق: آه طبعا
مفيد فوزى: أكبر
السيد/ العامرى فاروق: آه طبعا على الرغم إنها مطلوبة لإن وضوح الرؤية مطلوب إنما وضوح الرؤية بس بأمانة يعنى ما ينفعش إنك تعلن عن واحد قرار لمجرد إن واحد قال لك شفت ده العامرى عمل كذا ، كذا ، كذا النهاردة انت ما اتأكدتش العامرى عمل إيه انت رحت منزل الخبر اللي قاله في التليفون ده كان له هدف سياسى له هدف sorry مع احترامى إنه خد موقف ضده x,y بقى زى ما نشوفها في الآخر انت كراجل مسئول ما رفعتش سمعت التليفون أو شفت أو تأكدت أو تحريت الدقة ودي المشكلة اللي في الإعلام الرياضى
فاصل غنائى
مفيد فوزى: هل النهاردة وزير الرياضة في مصر يستطيع يعنى أن يشعر بإن كروش المصريين ينبغى إنها يحصل لها استقامة كده
السيد/ العامرى فاروق: آه طبعا
مفيد فوزى: هل حضرتك فكرت في ده قبل كده
السيد/ العامرى فاروق: آه
مفيد فوزى: طب فكرت ازاى ده أنا
السيد/ العامرى فاروق: هقول لحضرتك
مفيد فوزى: ده أنا بسأل السؤال وخجلان لأن مصر الناس فيها ما يعرفش كروشها من إيه من عدم الرياضة وللا زيادة أكل سيادتك رأيك إيه
السيد/ العامرى فاروق: مصر شعبها طيب جدا لو نجحت إنك تعمل له حالة عامة هتنجح
مفيد فوزى: حالة عامة
السيد/ العامرى فاروق: حالة عامة إذا عملت حالة عامة لمزاولة الرياضة في مصر الدنيا تتغير الحالة العامة دى تتوجد من 5،6 اتجاهات تتوجد من وزارة الرياضة تتوجد من وزارة الإعلام تتوجد من المدارس تتوجد من الأندية تتوجد من كل حاجة في وقت واحد
مفيد فوزى: ثقافة دولة
السيد/ العامرى فاروق: ثقافة دولة
مفيد فوزى: وتتحرك كلها في وقت واحد
السيد/ العامرى فاروق: هتلاقى إن انت مفيش ما يمنع إنك انت ممكن تركب العجلة وتمشى محدش هيزعل وبره عشان الحالة العامة كده فما وزير يطلع يروح مكتبه بعجلة الناس ما بتتضايقش لإن ما هياش حاجة مهينة لإن ده الطبيعى في الحياة العامة انت ما عندكش ده انت لو واحد طلع ماشى في الشارع وللا جرى وللا الصبح بدرى قام يجرى شوية ممكن الناس تاخده بزاوية مختلفة فهى النجاح إنك توجد حالة عامة للشارع المصري بشكل جيد لمزاولة الرياضة وده محطوط برضه في حساباتنا خلال الفترة اللي جاية إن ازاى نوجد الثقافة دى نفس القصة الحالة العامة للجماهير المصرية
مفيد فوزى: من هم أعداءك
السيد/ العامرى فاروق: دلوقتى وللا قبل كده
مفيد فوزى: معرفش ليه عندي إحساس إنك ممكن تقابل حد من حزب أعداء النجاح من النادى الأهلى
السيد/ العامرى فاروق: لا
مفيد فوزى: لا خلاص يبقى نشيل ده
السيد/ العامرى فاروق: شوف حضرتك
مفيد فوزى: مش متوقع
السيد/ العامرى فاروق: وغير كده أنا اشتغلت في النادى الأهلى وبذلت مجهود والناس في النادى الأهلى ناس عندها قيم وناس محترمة ممكن نختلف في وجهات النظر ولكن في الآخر الأهلى له مبادئ
مفيد فوزى: من الذى يواجهك
السيد/ العامرى فاروق: أي حد هيحاول يقف أدام مسيرة نجاحى خلال فترة وزارة الرياضة وده أكيد هيبقى موجود لإن طبعا أنا حطيت إيدي في عش دبابير كثيرة جدا ومكمل فده أمر طبيعى إن هيحصل مواجهات وأنا بطبيعتى قادر على المواجهات وبحب المواجهات يعنى ما عنديش مشكلة خالص
مفيد فوزى: هل انت شخصية متحدية ، هل التحدى جزء في شعار حياتك
السيد/ العامرى فاروق: التحدى للنجاح وليس التحدى بغرض إن فيه مشكلة شخصية
مفيد فوزى: امتى تفشل عفوا
السيد/ العامرى فاروق: والله بص هي نعمة من عند ربنا لحد دلوقتى نقط الفشل اللي في حياتى دى ما كانش لها دور بالنسبة لي تخلينى إنى أتراجع أو كده يمكن الخطوات كلها اللي أنا خدتها في حياتى إيجابية ربنا أكرمنى بها ممكن بقى تقول بركة دعا الوالدين ممكن رضا ربنا على رضا والدى ووالدتى تكاتف اخواتى الناس حاسة بى حاسة بمجهودى حاسة إن أنا نفسي أعمل حاجة ما تعرفهاش ازاى بس هي ماشية بهذا الشكل
مفيد فوزى: لعبت كرة شراب
السيد/ العامرى فاروق: ممكن يكون الكرة الشراب مش بمعنى إن أنا يوميا بلعب بده لا لإن كانت أيامينا الكرة الكفر إنما على فترات كان ممكن لو فيه حاجة زى كده بنلعب بس كنت بلعب في الشارع
مفيد فوزى: أصل أنا لعبت يا فندم كرة شراب بس كنت بلعبها حافى
السيد/ العامرى فاروق: لا أنا ما لعبتش حافى لا ، لا خالص أنا من منطقة الدقى اتولدت في منطقة الدقى وعايش لغاية دلوقتى في منطقة الدقى كان زمان فيه شئ جميل إن فيه شوارع في منطقة الدقى تلعب قصاد بعضها يقول لك الشارع ده يلعب قصاد الشارع ده والناس تبتدى تنور نور وتبتدى تلعب إنما كانت فيه حاجة جميلة جدا الساعة 9 ، 90.30 تلاقى الوالد بقى لازم تدخل
مفيد فوزى: ما فكرتش تبقى لاعب كرة مشهور زى الخطيب وأبو تريكة وفاروق جعفر
السيد/ العامرى فاروق: ما جاءتش في حساباتى
مفيد فوزى: ما اتمنيتش
السيد/ العامرى فاروق: مش كده يعنى أنا في فترات في الأول خالص في بداية حياتى رحت أشبال النادى الأهلى في الأول خالص بس ما كملتش يعنى 10 سنين 11 سنة يعنى
مفيد فوزى: ما شافش فيك صالح سليم مواهب
السيد/ العامرى فاروق: ما كانش الكابتن صالح سليم هو اللي شافنى كان الكابتن مصطفى حسين الله يرحمه إنما كانت حساباتها زمان برضه خد بالك مختلفة خالص كان والدتك ووالدك كان يقول لك كورة إيه انت تشوف مستقبلك تشوف دراستك شوف شهادتك دلوقتى الحياة بتتغير
مفيد فوزى: كانت هذه هي ثقافة زمان
السيد/ العامرى فاروق: آه أنا بكلمك بقى من واقع إن أنا
مفيد فوزى: عشتها بنفسك
السيد/ العامرى فاروق: آه وفى مجال ثاني بقى دلوقتى إن أنا من ضمن الشغل بتاعى الخاص عندي مدارس خاصة فعايشها بالزاوية الأخرى إن أولياء الأمور بتطلب إن أولادها تلعب الرياضة عن الدراسة لإن الرياضة بتجيب فلوس بقت لعيب كورة ممكن تصرف والدنيا تتغير والرؤية تختلف والوضع مختلف خالص فالزمن غير الزمن والحياة غير الحياة عشان كده لما بتقول لي حضرتك الرياضة أصلها قلت لك آه طبعا
مفيد فوزى: مين اللي في المجتمع ده السؤال الأخير مين اللي في المجتمع أكثر نضارة لاعب الكرة وللا ممثل المسرح وللا الفنان التشكيلى من فضلك رتبهم لى
السيد/ العامرى فاروق: الممثل حياته أطول يعنى ما عندوش وقت للاعتزال يعنى ممكن لحد 70 سنة يعنى لحد دلوقتى يعنى ربنا يدى له الصحة يا رب الفنان سمير غانم بتفرج عليه ، الفنان محمد صبحى ربنا يديهم الصحة يا رب مسافتهم أكثر
مفيد فوزى: كويس اثنين
السيد/ العامرى فاروق: الكورة تلاقى 40 سنة stop يعنى واخد بالك
مفيد فوزى: الاعتزال بدرى
السيد/ العامرى فاروق: آه إنما الكورة لو بتلعب في أهلى وزمالك ونجحت وحطيت بصمة عنيفة جدا التاريخ يذكرك مدى الحياة فدى نقطة
مفيد فوزى: من في ذيل القائمة
السيد/ العامرى فاروق: الألعاب الفردية
مفيد فوزى: لا أنا بتكلم عن الفنان التشكيلى الرسام
السيد/ العامرى فاروق: ييجى الفنان التشكيلى
مفيد فوزى: في ذيل القائمة
السيد/ العامرى فاروق: آه لإن الثقافة المصرية على مستوى المثقفين يظهر
مفيد فوزى: إنما على مستوى الشعب
السيد/ العامرى فاروق: لا ما يظهرش خالص