لقاءات خاصة

تاريخ الحلقة: الأربعاء 29-8-2012
تقديم: عمرو الشناوى ، رشا نبيل
ضيف الحلقة: د.هشام قنديل – رئيس وزراء مصر
موضوع الحلقة: حوار مع السيد رئيس وزراء مصر
أعدته للنشر: رباب عبد الجواد
عمرو الشناوى: مساء الخير في الرابع والعشرين من يونيو عام 2012 كشف الرئيس محمد مرسى عن رئيس الوزراء الدكتور هشام قنديل بعد رحلة بحث طويلة بين الأسماء والشخصيات زادت فيها التكهنات والاحتمالات وتكاثرت الشائعات والتسريبات الدكتور هشام قنديل بدوره وبعد لقاءات شملت أكثر من 80 شخصية في مصر اختار حكومته والتى تحرص على التأكيد بأن الكفاءة هي المعيار الوحيد فيها للاختيار وأنها أيضا حكومة تكنوقراط تضم كفاءات مهنية لا تنتمى لتيارات سياسية بعينها ولكن الحكومة الجديدة قبل أن تبدأ حتى قبل أن تبدأ عملها قوبلت لحملات إعلامية قاسية منها دعاوى بقلة الخبرة السياسية وتواضع التاريخ المهنى لعدد من الوزراء بالإضافة لاتهامات بإن العديد من الوزراء قريبوا الفكر والتوجه جدا من الإخوان والتيار الإسلامى انتهى الأمر وكأن البعض يفسره وكأن هناك محاولات متعمدة من قبل البعض حتى تتعثر حكومة الدكتور هشام قنديل أو أن تغرق أزمات تشغيلها عن الملفات الأساسية التي تحتاج فعلا لحلول عاجلة
رشا نبيل: مساء الخير وأهلا وسهلا بحضراتكم ودي أول مقابلة تليفزيونية يجريها رئيس الحكومة بعد توليه منصبه الحقيقة خلينى أقول لحضراتكم إن هدفنا بشكل بسيط من هذه المقابلة هو التعرف على رؤية رئيس الحكومة المصرية في التعامل مع التحديات اللي بيواجهها المجتمع المصري وهى تحديات ليست قليلة على الإطلاق بنتكلم عن مواطن بيؤرقه ليل ، نهار ملف الأمن بنتكلم عن تحديات اقتصادية الاقتصاد المصري في أحسن الحالات يوصف بأنه في موقع محرج للغاية ، لدينا رئيس حكومة جديد تم تكليفه وشكل حكومته بعد وجود رئيس جمهورية منتخب من المصريين وبالتالي زى ما المصريين بيقولوا النقاط بقت ع الحروف لدينا رئيس منتخب ، لدينا حكومة مكلفة وعلى هذه الحكومة أن تقوم بواجبها هذا ما ينتظره المصريون بعد فترة عناء كبيرة في فترة انتقالية تحمل فيها المصريون الكثير من أجل أن يأتى يوم يصبح فيه أو تصبح فيه حكومة موجودة ومسئولة عن مواجهة التحديات التي يعانى منها المصريون دكتور هشام قنديل رئيس الحكومة في أول حوار تليفزيونى وطبعا شرفتنا في التليفزيون المصري أهلا وسهلا بحضرتك
د.هشام قنديل: أهلا بك يا فندم سلام عليكم ورحمة الله وبركاته
رشا نبيل: أهلا وسهلا
عمرو الشناوى: معالى رئيس الوزراء اسمح لنا قبل ما نبدأ هذا اللقاء هنشوف تقرير صغير نحاول نتعرف فيه على شخصية الدكتور هشام قنديل
د.هشام قنديل: اتفضل
تقرير
الدكتور هشام محمد قنديل من مواليد 17 من سبتمبر من عام 1956 لأب مصرى وأم مصرية
متزوج ولديه 5 بنات
تخرج في كلية الهندسة عام 1984 ثم استكمل دراسته في الولايات المتحدة الأمريكية وحصل على شهادتى الماجستير والدكتوراه بخبرة تتعدى ال27 عاما
شغل الدكتور هشام قنديل رئيس الوزراء العديد من المناصب المحلية والدولية استطاع أن يجمع خلالها العديد من الخبرات والمهارات الإدارية والشخصية بجانب خبرته الفنية وذلك على صعيد التخطيط مثل بناء وتطوير استراتيجيات التنمية والتخطيط الاستثمارى وبناء القدرات وإدارة الموارد البشرية ومهارات القيادة كل هذه الخبرات أثقلته وجعلته يتمتع لسمعة دولية وعلاقات خاصة بإفريقيا
تقلد رئيس الوزراء العديد من المناصب في بنك التنمية الإفريقى كان منصبه كبير خبراء الموارد المائية بالبنك الإفريقى بتونس كان آخرها حيث قام بإعداد خطة لتنمية الموارد المائية والرى بالقارة الإفريقية بالإضافة إلى الإعداد والإشراف على تنفيذ مشروعات تنمية الموارد المائية والرى بالعديد من الدول الإفريقية ومن رئاسة قطاع مياه النيل إلى وزارة الرى والموارد المائية التي تولى الدكتور هشام قنديل حقيبتها يوم ال21 من يوليو من عام 2011 وحتى ال24 من يوليو لعام 2012 حيث تم تكليفه بتشكيل مجلس الوزراء من قبل الرئيس المصري الدكتور محمد مرسى ، يعتبر الدكتور هشام قنديل الرئيس الأول لوزراء مصر عقب انتخاب أول رئيس مدنى بعد ثورة ال25 من يناير التي أطاحت بنظام الرئيس السابق بالإضافة إلى كونه شخصية وطنية مستقلة غير منتمى لأى حزب سياسى
عمرو الشناوى: معالى رئيس الوزراء خلينا نبتدى من آخر مشهد في التقرير ده لما تم تكليفك بتشكيل مجلس الوزراء ده هل توقعت هذا التكليف وتلقيته ازاى يعنى حجم المسئولية اللي انت داخل عليه
د.هشام قنديل: يعنى في البداية طبعا خلينى أشكر هذه الفرصة وأنا حريص على أن يكون أول لقاء تليفزيونى في التليفزيون المصري وأول لقاء إذاعى وأنا نازل من هنا عدينا على محطة راديو مصر عملنا لقاء يعنى لمدة 10 دقائق الحقيقة لما كلفت بهذا الموضوع من السيد رئيس الجمهورية كانت مفاجأة بالتأكيد لم أكن أتوقع ذلك لقد طلبت فعلا مقابلة الرئيس مرسى في وقت عرض قضية المياه عليه لكنى فوجئت به قال لي أنه قرر أن يكلفنى بتشكيل الحكومة ورئاسة مجلس الوزراء فيعنى بالتأكيد ما كنتش متوقع ذلك أصبت بالدهشة مفيش كلام وطلبت مهلة للتفكير لأن هذا قرار ليس بالسهل واستشرت أسرتى فيه وتوكلت على الله
رشا نبيل: دكتور هشام خليني أكلم حضرتك بقدر عالى من الصراحة أن هذا القرار لم يكن فقط مدهشا ومفاجئا لحضرتك بس كان مفاجئا للرأي العام أيضا لإن احنا عندنا طوال التاريخ المصري كان منصب رئيس الوزراء غالبا ما يكون شخصية اقتصادية وباستثناءات عديدة تعد على أصابع الأيدى الواحدة كانت شخصيات سياسية الناس قالت الدكتور هشام قنديل مع كل خبرته في مجال مياه النيل لكن لا هو شخصية اقتصادية بالمعنى الصريح ولا سياسية بالمعنى الصريح وربما يكون تكنوقراط ولكن أيضا بتحفظات
د.هشام قنديل: خليني أقول إن الدكتور مرسى شخصية عقلانية جدا وفى تعاملى معه أعتقد إن هو بيختار دائما بيحط معايير للاختيار التي تلائم المهمة فهناك برنامج الرئيس المنتخب وجد الرئيس إن هذه الشخصية رئيس الوزراء هشام قنديل بما يبلغ من خبرات قيادية وخبرات فنية وخبرات إدارية يستطيع أن يقود فريق العمل وعلى هذا الأساس يعنى تم اختيار فريق العمل ليلائم المهام المنوطة بنا ، منوطة برفع مستوى الشعب المصري من الناحية الاقتصادية ، رفع المعاناة بصورة سريعة من خلال محاور ال100 يوم ، إحداث نقلة نوعية في التعليم وفى الصحة والخدمات كل هذه الأمور ليست بالضرورة يعنى في مجال واحد ولكن تتطلب خبرة في العديد من المجالات فلا يمكن أن تختار رئيس وزراء خبيرا في التعليم أو الصحة أو الموارد المائية أو الزراعة أو الصناعة أو التجارة أو التمويل وما إلى ذلك فيعنى هو رأى وإن شاء الله تكون رؤيته صائبة أن هذا الشخص الذى يتمتع بخبرة قيادية وقدرة على الإدارة اللي هو أنا تتيح لي فرصة إن شاء الله إن احنا نحقق طموح الشعب المصري في مرحلة قادمة
عمرو الشناوى: خلينا نتكلم برضه بصراحة إن احنا فيه اتهامات وجهت للدكتور هشام قنديل إن هو قد تم اختياره لإن هو ينتمى لجماعة الإخوان المسلمين وللتيار الإسلامى انت رفضت هذا الرأى قلت أنا مصرى قد أكون متدين لكن دى حاجة طبيعية
د.هشام قنديل: هو خليني بس أتحفظ على كلمة اتهام لإن بالتأكيد الانتماء للتيار الإسلامى أو لجماعة الإخوان المسلمين أو لأى حزب آخر ليس اتهام لكن أنا أكدت في المؤتمر الصحفى الثانى أو الثالث اللي عقدته وقلت أنا مش هتكلم في الموضوع ده ثاني لإن كل مرة بأسأل نفس السؤال وأعطى نفس الإجابة لأن هذه الحقيقة لا أنتمى لجماعة الإخوان المسلمين ، لا أنتمى إلى حزب سياسى لكن الانتماء ليس اتهام ، ليس عيبا لكن ليس حقيقى بالنسبة لي
رشا نبيل: طب دكتور هشام لما تم تكليف حضرتك بتشكيل الحكومة حضرتك حيرت الناس شوية يا دكتور هشام لإن حضرتك قلت سأكلف حكومة تكنوقراط الحقيقة إن توليفة الحكومة اللي موجودة دلوقتى محيرة الناس يعنى هي عاطية وزراء من الحكومة السابقة حكومة الدكتور الجنزورى مع كبار الموظفين في الدولة الذين كانوا يعملون في النظام السابق مع مقاعد وحقائب في غاية الأهمية في حزب الحرية والعدالة كالإعلام والتعليم والقوى العاملة وبعض الحساسة والشباب وهى حقائب مهمة وحساسة فحضرتك حيرتنا هي دى حكومة لا هي حكومة ائتلافية سياسية بأحزاب مصرية ولا عاطية تكنوقراط خالص
د.هشام قنديل: هي بالتأكيد هي ليست حكومة ائتلافية لإن لو يعنى هو طبعا ده اللي تناقشت مع سيادة الرئيس في بداية الأمر لإن أنا لم يكن رأيى وهو لم يكن من رأيه أيضا أن يتم الاختيار على أساس ائتلافات لإن بالتأكيد لو اخترنا حكومة ائتلافية بتجمع الأحزاب السياسية والقوى المدنية فسوف يعنى نحضر إلى مجلس الوزراء والجدال وكل واحد هييجى في المجلس وراءه أهداف مشروعة من وجهة نظره لكن لن نستطيع أن ندفع إلى الأمام وهو دوة هدفنا فأنا في الحقيقة في اختيارى زى ما ذكر التقرير أنا قابلت أكثر من 80 واحد وصدقا يعنى أنا كنت أعمل من الثامنة صباحا حتى الثانية صباحا وقابلتهم واتعرفت عليهم بعرفهم نمرة واحد بقرأ السى في بتاعته السيرة الذاتية بتعرف على مهاراته القيادية ، خبراته الإدارية ما هي رؤيته لتطوير القطاع أو الوزارة التي سيكون مسئول عنها وما هي البرامج التي يطرحها ما هو علمه لبرنامج الرئيس لإن هو اللي هيكون منوط بتنفيذه يعنى التقييم يعنى حقيقة تقييم شامل وجيد وأنا سعيد باختيارات اللي توصلنا إليها وأعتقد إن بعد متهيأ لي النهاردة 18 أو 19 يوم عمل الناس شعرت إن الموجودين دول على الأرض في جميع الأوقات على اتصال مع الشارع يعلمون ما هي التحديات ولديهم رؤية واضحة وإن شاء الله النهاردة برضه نؤكد على هذا الموضوع
رشا نبيل: طب مسألة يعلمون هنشوفها الناس إدراكها إيه للحكومة وهيبقى عندنا تقرير بيرصد رأى الشارع المصري لكن برضه الناس بتسأل هي التكنوقراط والكفاءات دى ما كانتش موجودة غير في الحرية والعدالة عشان نجيب منهم مقاعد مهمة وحساسة
د.هشام قنديل: هو يعنى هل من الواجب أن نقصى حزبا أو آخر لم نقص أي أحد
رشا نبيل: أحضرت حزبا فلتحضر الجميع
د.هشام قنديل: لم يكن اختيار حزبى وإنما كان الاختيار على الكفاءة وأؤكد أنا أتذكر في أحد الوزارات صدقا أنا قابلت 9 شخصيات حتى أختار الشخص منهم 9 شخصيات كل واحد منهم حوالى 25 دقيقة
عمرو الشناوى: في وزارة معينة
د.هشام قنديل: أفندم
عمرو الشناوى: في وزارة معينة
د.هشام قنديل: آه لأحد الوزارات لكن مش هقول هي إيه يعنى لكن أنا قابلت 9 شخصيات وال80 شخصية دول يعنى مش معنى كده إن أنا ما شفتش أكثر على الأوراق يعنى شفت أوراق أكثر ، يعنى تحدثت مع آخرين تليفونيا لكن أنا بعتقد إن أنا إن شاء الله يكون اختيار موفق ويشعر به الجمهور أو المواطن المصري على الأرض
رشا نبيل: طيب عايزة أسأل حضرتك على حاجة يعنى ناس كثيرة جدا بتفكر فيها في هذه المرحلة حضرتك تم تشكيل حكومتك قبل أن يتم الانتهاء من إن المشهد السياسى يبقى فيه شرعية واحدة هي شرعية الرئيس حكومة حضرتك كلفت حينما كان ثنائية في المشهد ما بين رئيس الجمهورية وما بين المجلس العسكرى وبالتالي توقع البعض أن تكون هناك نوع من التفاهمات أو الصفقات قد تمت بين الأطراف للخروج بهذه التشكيلة وبالتالي توقع البعض أن بعد قرارات رئيس الجمهورية في 12 أغسطس بإقالة وزير الدفاع ورئيس الأركان وتكليف وزير دفاع جديد أن تكون هناك تغييرات لاحقة في حكومة قنديل
د.هشام قنديل: أولا أؤكد لحضرتك إن ليس هناك تفاهمات عند تشكيل الحكومة يعنى لم يكن هناك أي تدخلات في تشكيل الحكومة بالمرة بل على العكس في بعض الأوقات يعنى كنت تريد أن تأخذ مساعدة يعنى بدون تدخلات يعنى
عمرو الشناوى: ولا من مؤسسة الرئاسة
د.هشام قنديل: لا طبعا السيد الرئيس التشكيل بيتم بالتنسيق معاه لإن هو رئيس السلطة التنفيذية ده شئ أكيد يعنى لكن لم يكن هناك تدخلات بمعنى الكلمة بمعنى أن يكون هناك تدخلات ناس تعطى أسماء وتملى لم يكن هناك شئ من هذا القبيل لما كنت الحقيقة الساعة 2 كده قبل ما أروح أفتح التليفزيون ألاقى أحد الزملاء في أحد التليفزيونات مش بس في التليفزيون المصري يعنى ده ما يمنعش إنه كان بيحصل في التليفزيون المصري أيضا إن يقال أن هذا الشخص ظل لفلان الفلانى ويعنى كل هذه كلام غير صحيح أعتقد يوم 12/8 هو يعنى إذا لي أن أقول هو نهاية الفترة الضبابية يعنى كان هناك ضباب في المشهد السياسى يعنى احنا بدأنا المرحلة الانتقالية بعد ثورتنا العظيمة بدأنا المرحلة الانتقالية كان فيها فترات مؤلمة وصعبة حتى وصل وتوجت بانتخاب رئيس الجمهورية ثم تعيين حكومة مسئولة لكن كان هناك ضبابية عند بعض الناس ضبابية مش عند كل الناس ، الناس اللي كانت قريبة من الرئيس كانت تعلم إن مفيش أي ضبابية لكن بعد 12/8 وبعد تلك القرارات انتهت تلك الضبابية ووضحت الرؤية إن زى ما حضرتك ذكرتى أن هناك شرعية واحدة وأعتقد إن هذا ساهم كثيرا في الاستقرار وساهم كثيرا في إعطاء الثقة لهذه الحكومة إن لن يكون هناك تغييرات على العكس من اللي حضرتك بتقوليه أعتقد أن هناك انطباع عام أن هذه الحكومة باقية بإذن الله سبحانه وتعالى إذا كانت تؤدى أداءً طيبا وإن شاء الله تؤدى أداءً طيبا لكن ليس هناك تفكير لتغييرات قريبة في هذه الحكومة
رشا نبيل: هذا قولا قاطعا بس هذا يعنى في المقام الأول أيضا أن حضرتك وحكومتك تتحملون كامل المسئولية
د.هشام قنديل: آه بالتأكيد طبعا
رشا نبيل: يعنى إذن المحاسبة يمكن أن تبدأ من الآن لإن إذا كان هناك مبررات في الماضى فلا مبررات
د.هشام قنديل: أعتقد هي بدأت بالفعل مش كده وللا إيه ؟
رشا نبيل: هنشوف النهاردة
عمرو الشناوى: دكتور هشام قنديل بتنزل الشارع زيارات ميدانية وجولات مفاجئة وما إلى ذلك بتخططها ازاى يعنى امتى بتقرر إن انت تنزل تفتش على مكان معين
د.هشام قنديل: خليني أقول يعنى متى أقوم بتلك الزيارات لإن هناك برضه ضباب إن أنا بسيب شغلى ومكتبى وبنزل في الشارع يعنى أعمل جولات يعنى أنا بحكم المسئولية اللي على وزملائى الوزراء أيضا بنعمل عدد ساعات طويلة يعنى أنا لحضرتك 18 أو 19 يوم عمل لكن احنا بنشتغل 6 أيام ونص في الأسبوع يعنى عمل كامل فالجولة اللي أنا بعملها يا إما وأنا رايح الشغل أو وأنا راجع من الشغل بالليل أو مثلا يوم الجمعة الصبح بخططها في وقت لا يؤثر على عملى المرور يعنى يكون فيه مرور سهل حتى لا آخذ فيه وقت طويل في بعض الأحيان تكون مفاجئة في بعض الأحيان تكون مخططة في بعض الأحيان وده حدث بالفعل إن أنا أشرع بالقيام بزيارة وأعلم أن الغرض تحقق منها فألغيها يعنى فيه مرة كنت نازل جولة في أحد الأحياء عشان أشوف مستوى النظافة فيعنى أخبرت أحد السادة المسئولين إن أنا نازل المنطقة دية أنا وهو نتفقد مستوى النظافة ثم علمت إن هو يعنى قام بأعمال النظافة ونزلت المعدات والأجهزة وبالتالي تحقق الهدف بدون النزول إلى الشارع فكل الزيارات بحاول إن أنا أعملها بأقل دعاية ممكنة عشان إخطار مسبق لإن في بعض الأحيان يعنى الأمن بيحتاج إن احنا نخطر الناس بتكون في أوقات غير أوقات العمل بحاول إنى أخططها بحيث إنى أسأل المسئول يعنى مثلا أعطى مثال زيارة مستشفى القصر العينى والاستقبال أنا عملته كانت الساعة 12 بالليل كنت قرأت في أحد الصحف أن هناك مشكلة طبعا هناك مشكلة حقيقية في استقبال المستشفيات من الناحية الأمنية
رشا نبيل: تعرض الأطباء للاعتداء
د.هشام قنديل: بالضبط اتصلت بالسيد نقيب الأطباء كانت الساعة 8 ونص بالليل كان في رمضان قلت له ييجى يزورني ويعرض على القضية قلت له طيب نروح مستشفى كانت أقرب مستشفى كانت مستشفى القصر العينى وما قالش لحد وفعلا نزلت أنا وهو ودخلنا الاستقبال ولقينا أن هناك تأمين يعنى هناك تأمين كانت فيه عربية مدرعة من القوات المسلحة وهناك يعنى ضابط واثنين عساكر وفيه تأمين من نقطة شرطة وتأمين من البوليس لكن هناك فوضى يعنى هناك تأمين لكن لم يحقق الغرض منه لما بدينا نرى الأمور ونحللها أنا وهو لقينا إن الاعتداءات ليست فقط في نقص الأمن ولكن في نقص التنظيم المريض أو المصاب بيخش المستشفى بالليل معاه 10 من أسرته عايز خدمة في الوقت هو عنده حق هو عنده مصاب
عمرو الشناوى: هل من ضمنها الاعتراض على الإمكانيات يعنى هذه الاعتداءات اللي حصلت جزء منها تزمر من الإمكانيات نقص الإمكانيات ؟
د.هشام قنديل: هو في بعض الأحيان أعتقد إن في بعض المناطق النائية كان أنا فاكر في منطقة كان أحد دخل عشان يشوف بنته أو ابنه قرصه ثعبان أو حاجة زى كده فما لقاش الأمصال موجودة فراح في حتة ثانية فطبعا ده نقص إمكانيات لكن لو قلنا الوصف العام هو نقص تنظيم بالإضافة إلى بعض من الفوضى والتجرؤ على الموظف العام فالحل هو وجود قوات وتأمين ، توفير تنظيم ، معاملة حسنة للجمهور حتى يحصل على الخدمة اللي هو عايزها برضه تواصل حتى لو قعدنا أهله بره يعنى يجب إن احنا نحيطهم علما بما يجرى بالداخل كل شوية المريض بتاعكم ده دخل أوضة العمليات هيخرج بعد ساعتين ، بعد ساعتين حالته مستقرة يعنى نحيطهم علما التواصل والتنظيم والتأمين هذه الوصفة اتفقنا عليها مع السيد نقيب الأطباء ، مع السيد وزير الداخلية ، مع السيد وزير الصحة اتفقنا أن يتم ذلك في 100 مستشفى تحدده وزير الصحة مع السيد نقيب الأطباء بيتم تطبيق ذلك
عمرو الشناوى: في مختلف محافظات الجمهورية
د.هشام قنديل: في مختلف محافظات الجمهورية ولا أدعى نجاح كامل لأن احنا بالتأكيد كل أسبوع ما زلنا نبحث قضايا الأمن فالنجاح في الأول ما كانش فيه نجاح بعد كده بدأت الأمور تتحسن إن شاء الله الأمور تتحسن لكن عايز أقول بس إن مثل هذه الزيارات بتعطينا كمسئولين من الواقع على الأرض نأخذ عليها قرارات تؤتى ثمارها بالتدريج أفضل بكثير من إن احنا نقرأ تقرير ولا نتعب أنفسنا في متابعة مثل هذه الأمور
رشا نبيل: يمكن ده يكون هدف حضرتك لكن أنا عايزة برضه أكون مع حضرتك صريحة وأقول لحضرتك الناس بتفكر ازاى في مصر الناس بتقول والله كان عاجبها إن حضرتك تنزل تمشى في وسط البلد وتروح القناطر الخيرية فقال لك والله رئيس حكومة زينا كده وطبيعى هنا ومستوى عادى زينا لكن في نفس الوقت الناس بتقول إيه اللي بيعمله رئيس الحكومة ده لازم يعرف الهم الكبير اللي مستنيه وإن الحكاية مش مجرد إنه يروح زيارة هو راح المترو قبلها بيومين الناس كانت محبوسة في المترو عشان الكهرباء كانت مقطوعة في وسط البلد كان فيه سيدة راح تزور ناس مريضة تعرضت لحادث اعتداء وتحرش وعدم إقرار الأمن يعنى الناس شايفة الصورة مش وردية كده هو ليه الدكتور هشام بادئ من حيث انتهى الآخرون
د.هشام قنديل: أنا ما أعتقدش إنى إديت انطباع إن الصورة وردية خالص لا الصورة ليست وردية بالمرة التحديات كبيرة جدا لكن أنا بس أريد أن أقول أن تلك الزيارات تعطينا كمسئولين فرصة على اتخاذ قرار أكثر واقعية أكثر اتصالا بالشارع يعطى مردود على الأرض وأعتقد إنه بيعطى أيضا رسالة إن رئيس الوزراء ليس منفصلا عن الشعب فهو متصل بهم وده شئ أنا متخيل إنه شئ طيب ومن ناحية أخرى المسئولين الوزراء والمحافظين بيتبعوا نفس النهج وأعتقد زمان كنا بنشتكى إن المسئولين بيعيشون في برج عاجى ولا يتصلون بأحد فعندما يحدث الاتصال وأريد أن أؤكد مرة أخرى الاتصال لا يعنى إن احنا نقضى أو نقضى جميع أوقاتنا في الشارع أنا قلت لحضرتك يعنى أنا زرت مثلا قسم امبابة بعد صلاة الفجر يعنى نزلت صليت الفجر وأخدت زملاء معايا من الحراسة وطلعنا شفنا على القسم جبنا مدير الأمن واتكلمنا معاه وأعتقد إن بيساعدنى أكثر على فهم التحديات الأمنية اللي بتواجهها الشرطة العملية بالنسبة للشرطة برضه مش سهلة يعنى عودة الأمن كما نريد جميعا مش عملية بسيطة عملية صعبة ليست فقط نزول الشارع مابقاش سهل زى زمان
رشا نبيل: دكتور هشام يعنى خليني برضه أفهم من حضرتك حاجة وصارحنى القول فيها وصارح الرأى فيها النهاردة حضرتك كنت وزير في حكومة الدكتور عصام شرف الأولى والثانية ووزير في حكومة الدكتور الجنزورى أيضا وبالتالي ربما يكون لديك إدراك بحجم المشكلات المحيطة بالمجتمع المصري ولكن حينما أصبحت رئيسا للوزراء هل تغير هذا الإدراك هل أصبحت تشعر أن المسألة لا ده الموضوع كبير أكبر مما كنت أتصور
د.هشام قنديل: هو الموضوع كبير مش أكبر مما كنت أتصور لكن خلينا نقول هو حجم المشاكل حاليا وحجم التحديات أعتقد أنه ليس هناك لبس فيه كلنا نعلم أن هناك تحديات اقتصادية ، تحديات أمنية ، تحديات بيئية في الزراعة ، في الصناعة ، في التجارة ، في التصدير في الموانئ في الشرطة في الحدود في سيناء تحديات واضحة وجمة للجميع لكن أنا عايز أقول إن يعنى الشئ الذى يقلقنى والذى يهمنى أن نوقف التدهور ونبدأ في الصعود وهذا هو يعنى هو ده اللي بنحطه أدامنا يعنى إذا كان الأمن فنحن نحسن الأمن واحنا عارفين المشاكل بتاعت الأمن يجب أن نحسن الأمن لما نقول الأمن بنتكلم على الطرق ، بنتكلم على المرور ، بنتكلم على الكهرباء ، بنتكلم على شرطة المسطحات المائية ، بنتكلم على الإضراب ، بنتكلم على نشاط الأمن المركزي يجب أن يعود النشاط الرياضى يعنى كل هذه الأمور المتصلة بالأمن يجب أن نأخذها في الاعتبار يجب أن ندفع الاقتصاد باهتمام ، يجب أن نعمل ، يجب أن نعمل ونجتهد لأن هذا هو الطريق لتحقيق أهداف الثورة بتذكر أهداف الثورة عيش ، حرية ، عدالة اجتماعية العيش يعنى خبز يعنى قمح يعنى ييجى قمح ونشتغل عليه نجتهد ونعمل حتى نستحقه ونستطيع أن نستمر فيه حرية يعنى مش معناها حرية الاعتداء على الآخرين الحرية هي حرية القول حرية القول الحق القول الذى لا يكون فيه كذب ولا يثير الضغائن لا نتعدى يعنى ليست الحرية إن أنا لا أعمل وأحصل على أجر ليست الحرية إنى أوقف الطريق بالتأكيد هذه جريمة قطع الطريق جريمة يجب يعنى القانون بيعاقب عليها ، عدالة اجتماعية تتطلب منا إن احنا ننظر إلى الفقراء وننظر إلى الفئات المهمشة ، ننظر إلى المعاقين ، المعاقين لسه في دماغى يمكن عشان أنا لسه كنت امبارح في مجلس رعاية المعاقين مجلس إدارة رعاية المعاقين الرقم نسبة المعاقين في مصر خلينا لا نقف كثيرا على النسبة يعنى النسبة من 10 ل 15 % لكن لا يوجد إحصاء دقيق لها وده من ضمن مهام المجلس ، تعريف الإعاقة نختلف فيه أو نتفق عليه لكن المعاقين جزء من الشعب المصري ، جزء لهم حق على توفير الخدمات حق يعنى حقه أن يحصل على التعليم زيه زى الصحيح ، حقه أن يحصل على الخدمات الصحية حق علينا احنا كمجتمع إن احنا نستفيد منه هو ليس عالة علينا هو المعاق لا يستحق الشفقة
عمرو الشناوى: دكتور هشام انت شخصيا كنت مصر النهاردة يبقى معانا زميلنا رضا عشان يبقى معانا عشان يترجم بلغة الإشارة في هذا اللقاء
د.هشام قنديل: حضرتك من ضمن الحاجات اللي اتفقنا عليها امبارح في مجلس الإدارة إن المعاقين لهم حق لو قلنا مثلا إن احنا عندنا دولة إن شاء الله الموارد تزداد والأمور تتحسن لكن قلنا إن احنا مواردنا محدودة الآن فليكن بعض البرامج الاستراتيجية يكون فيها ترجمة للصم والبكم يعنى مثلا حديث رئيس الوزراء يجب أن يترجم يعنى التواصل
عمرو الشناوى: يجب أن يصل إلى كل الشرائح
د.هشام قنديل: أنا عايز أسأل نقطة أخيرة في الموضوع ده موضوع المعاقين لا يستحقوا الشفقة لكن يستحقوا أنا آسف هم حقهم علينا أن ندعمهم حقهم علينا احنا إن احنا نستفيد منهم أحد الزملاء امبارح يعنى هو ضرير قال إن هو يعنى أخد وظيفة في مصنع بويات وهو يملك من القدرات الأخرى الكثيرة فيجب أن نستفيد منه ومن قدراته فاحنا بنحرم المجتمع من قدراته
عمرو الشناوى: وانت بتتكلم وبتحكى عن آمالك وطموحك بالنسبة لمصر في الفترة اللي جاية اتكلمت كثير على ملفات بالأمن يعنى الأمن كان يحتل جانب كبير من التفكير دلوقتى أولوية ملف الأمن وصلته بكل الملفات اللي عايزين نبتدى بها إيه
د.هشام قنديل: أنا الأمن أولوية أولى مفيش كلام أنا أريد يعنى أن أوجه التحية لرجال الشرطة على المجهود الكبير الذى يبذلونه والتضحيات التي يقومون بها يعنى يمكن أنا معايا ملف بس مش هقراه لإن ممكن ناخد فيه ساعة أو ساعة ونص السيد وزير الداخلية أنا على اتصال به يوميا وهو كل أسبوع بيعرض علينا تقرير بالمجهودات سواء بقى إذا كان كشف القبض على الخطرين والهاربين من أحكام تهريب السلاح من الغرب الجرائم ، التحقيقات المرورية ، التعديات على الأراضى الزراعية التعديات على المجارى المائية مكافحة قطع الطرق طبعا المجهود الكبير اللي بتقوم به ضباط الشرطة بجانب القوات المسلحة في عملية نسر في سيناء تحدى إضافى لا أقول إنه كان معلوم أن هناك مشاكل لكن يعنى ظهرت جلية باستشهاد 16 من جنودنا البواسل كان لابد من تحرك سريع وقوى لردع الإرهابيين تحرك ليس فقط تحرك أمنى لكن تحرك أيضا اقتصادى وتحرك حوارى حتى نمنع أن يكون هناك آخرين مشوهى الفكر الذين يعتقدون أنهم عندما يقتلون جنود مصريين يفعلون شيئا جديدا هذا شئ لا يصدقه عقل إن فيه مواطن مصرى يعتقد إن هو لما يقتل جندى مصرى يكون بيعمل عمل ده شئ غير مصدق
عمرو الشناوى: إذا افترضنا إن هو مصرى
د.هشام قنديل: لا فيه منهم مصريين كثير كلهم مصريين حتى الآن اللي قبض عليهم الأمن ملف أساسى نليه عناية فائقة السيد وزير الداخلية وأنا اجتمعت مع مدير الأمن يعنى زرت 3 أقسام شرطة يعنى أنا لا أدع فرصة إنى أتفهم مشاكلهم وأتعرف عليهم وبنتناقش في أعمال التسليح تحديث التسليح ، تحديث التدريب فيه مجهودات على الأرض يمكن أسواق يعنى الباعة الجائلين فيه حملة مستمرة
عمرو الشناوى: حضرتك شخصيا عانيت منها أثناء التجول في وسط المدينة
د.هشام قنديل: على فكرة الجولة كانت في الدقى وليس في وسط المدينة وده يؤكد إن ده ليست تسريبات مننا ولكن يعنى الإعلام اعتقد إن أنا في وسط المدينة
رشا نبيل: طيب ملف الأمن فيه أبعاد كثيرة جدا هنرجع لها لإن النهاردة فيه مواطن مصرى قابلنى وقال لي انتوا هتعملوا حوار في التليفزيون المصري مع رئيس الحكومة قال لي لو سمحتى قولى له كان زمان بيتقال رغيف الخبز أهم حاجة النهاردة الأمن بقى بالنسبة لنا احنا أهم من قضية الخبز لأن مش ممكن تبقى آمن في بيتك ولا بتاكل أي حاجة وانت حاسس إنك غير آمن الملف مفتوح للنقاش مع الدكتور هشام قنديل رئيس الحكومة تابعونا على شاشات التليفزيون المصري بعد فاصل إعلانى نعود إليكم
فاصل إعلانى
عمرو الشناوى: الحقيقة واحنا بنتكلم مع معالى رئيس الوزراء واتكلمنا وابتدينا نفتح في ملف الأمن ، ملف الأمن ملف شائك جدا ولكن هو أهم ملف دلوقتى لازم ندى الأولوية عشان كل الملفات مرتبطة به لو اتكلمنا على استثمار مرتبط بتوفير الأمن ، لو اتكلمنا على اقتصاد مرتبط بتوفير الأمن حتى الصحة زى ما ذكر معالى رئيس الوزراء مرتبطة بالأمن المستشفيات فيها مشاكل ضخمة جدا لو وفرنا كل الإمكانيات حتى الأطباء مش عارفين يشتغلوا كل البلد ماشية كده يا دكتور هشام عاملين إيه للأمن أكثر من كده يعنى ازاى المواطن يبتدى يشارك معاك ويشارك مع وزارة الداخلية ويحس إن هو بدل ما يقطع الطريق يفتح الطريق ويتظاهر على جنب ازاى
د.هشام قنديل: هو طبعا سؤال معقد يعنى خليني بس أقول تصويبين في الأول أنا مواليد 62 مش 56 وأنا رئيس مجلس الوزراء وليس رئيس الوزراء بالنسبة للأمن يمكن أول اجتماع يعنى حلف اليمين كان 2/8 كان يوم الخميس بعد الظهر وخدنا خطاب التكليفات من السيد الرئيس يوم السبت الصبحية كان عندي اجتماع المجموعة الاقتصادية يوم السبت بعد الظهر كان عندي اجتماع بمجموعة الأمن فبالتالي يعنى الملفين دول كانوا على أهم أولوياتنا في بداية عمل الحكومة الأمن متشعب زى ما حضرتك ذكرت هناك لابد من النظر إلى تحسين المرور ، لابد من القبض على نفوذ الشق الجنائى هناك طبعا الباعة الجائلين ده مسئولية المرافق لكن الأمن بيؤمن عمل المرافق وليست المسئولية بس مسئولية الأمن ، الأمن داخل فيه التعديات على أو سرقة الكهرباء التعديات على الأراضى الزراعية ظهرت برضه أشياء جديدة زى موضوع تأمين المستشفيات الذى لم يكن موجودا من قبل فهناك نقطة شرطة صغيرة ليست بغرض الحماية ولكن بغرض عمل المحاضر لما يكون فيه حد دخل مصاب أو هكذا في المستشفى فاتفقنا مع السيد وزير الداخلية أن نتحرك على عدة محاور أول محور إن احنا يعنى نعطى رسالة حقيقة إن هذه الحكومة جادة في تطبيق القانون يعنى جادة وعازمة وثابتة وستقوم بتنفيذ ذلك احنا لازم نتوسع في كل الأشياء نبدأ مثلا بموضوع قطع الطرق ، قطع الطرق هذه جريمة يعاقب عليها قانون العقوبات المادة "176 " آسف "167 " و "168 " من قانون العقوبات
عمرو الشناوى: اضطريت تدرس قانون عشان الجزئية دى
د.هشام قنديل: آه طبعا يعنى بتقول إن اللي بيقطع الطريق أو يوقف سير قطار أو سيارة ولا يحدث أي أذى لأي حد من هذا الموضوع عقوبته 3 سنين سجن تصل بعد ذلك إلى مؤبد إذا تسبب هذا القطع في إيذاء الناس ويصل إلى حد الوفاة أو حد العاهة قد يصل إلى مؤبد فقلنا يجب أن تصل هذه الرسالة إن احنا لن نسمح بقطع الطريق وبالتالي الشرطة كانت بتنفذ هذا الموضوع بكل جدية فيه 9 من أحد المحافظات أخدوا 3 سنين سجن نتذكر جميعا يمكن كانت يوم الوقفة كان الطريق الزراعى توقف فترات طويلة والناس طبعا كانت مسافرة في الأعياد وتوقفت القطارات في بعض من الأحيان قد لا يتمكن من القبض على مثيرى الشغب أو قاطعى الطريق في وقتها لكن قبل 24 ساعة تم القبض على 30 كان 4 منهم كانوا قاطعين الطريق والباقى كان عندهم سلاح أو كانوا هاربين من أحكام دول أخدوا 15 يوم وتم استعجال تقارير المعامل الجنائية يحصلون على محاكمة عادلة إذا وجدوا مذنبين يحصلون على جزاءهم عينى رسالة ثابتة إن احنا لن نتهاون في هذا الأمر
عمرو الشناوى: مش قلقان يا دكتور هشام إن يتقال أن هذا التوجه هيستخدم لقمع المعارضة بشكل أو بآخر
د.هشام قنديل: لا خلينا نكمل الصورة يعنى التوجيه هو يعنى قطع الطريق في بعض من الأحيان يكون نتيجة لنقص خدمات أو مطالب أو ما إلى ذلك أنا عايز أقول إن يعنى إذا كان هناك مطالب فيجب أن يستجاب لها إذا كانت مطالب شرعية فبالتالي توجيهاتنا للمسئولين سواء إذا كان مياه شرب أو صرف صحى أو خدمات أو ما إلى ذلك إن يجب التعامل مع الجمهور والاستماع إليهم والاستجابة لطلباتهم قدر استطاعتهم لكن قطع الطريق يسبب مشاكل كبيرة جدا ولو فيه حد يعنى دخل في منطقة وقعد 3، 4 ساعات يعنى واقف في حتة في مكانك مش عارف تروح فين يعنى مشاكل بتعطل السياحة ، بتعطل التجارة ، بتعطل ورديات المصانع يعنى هذا الملف حسمناه
عمرو الشناوى: بعتدى على حرية الغير
د.هشام قنديل: حرية الآخرين آه ، موضوع البلطجة ، موضوع البلطجة أيضا لن نسمح به لن نتهاون فيه يمكن حضراتكم والسادة المشاهدين شافوا إن الفيديو اللي كان على اليوتيوب وانتشر كان على اليوتيوب وانتشر كان فيه مجموعة من البلطجية في اسكندرية وكانوا بيتصوروا صور واضحة وكان يعنى شئ مفزع يعنى أنا عايز أقول إن في قانون العقوبات برضه المادة "375 " بتقول إن التلميح بالقوة ، التلميح بالقوة عقوبته سنة لخمس سنوات التلميح يعنى لو حد كده ماسك سنجة وللا ماسك خرطوش حطه مثلا كده على الترابيزة تلويح بالقوة وترويع الآمنين ده عقوبته سنة فتم ضبط مجموعة منهم 5 منهم وتم تحديد المحرضين وسيتم ضبط المحرضين والتقديم لمحاكمة عادلة وإذا كانوا فعلا هم دول مذنبين يتم تطبيق العقوبة عليهم لكن لا نتوانى في هذا الأمر فدول يعنى الشق الجنائى والشق اللي كان قاطع الطريق لن نتهاون معهم بالتأكيد خلينا نقول يعنى في النقاط الأخرى يعنى مثلا المرور التركيز فترة مع وزير الداخلية
عمرو الشناوى: اسمح لي يا دكتور قبل ما ننتقل إلى المرور عشان أهمية هذه الجزئية أفراد كثير من الشرطة سواء ضباط أو أمناء شرطة أو أي أفراد شرطة عاديين لما بييجى يواجه أي حالة انفلات بيبقى متخوف جدا جواه تجارب سابقة اتعرض فيها زملاء له للمساءلة ومحاكمة وتم معاقبتهم عشان دافعوا واستعملوا حقهم استعمل سلاحه الميرى أو قابل أي اعتداء عليه واحنا فاكرين اللي حصل في الفندق اللي جنبنا وحضرتك زرتهم النيابة حولت الضابط للمحاكمة بتهمة القتل العمد
د.هشام قنديل: أعتقد هو لم يحول للمحاكمة لكن ده كان إجراء إدارى خلينا نقول أولا إن يجب تطبيق القانون يعنى الضابط بيستخدم القوة لما بيتبع الإجراءات القانونية باستعمال سلاحه بالتأكيد لا يحدث ولا يضار لكن إذا أساء استخدامه حضرتك هو توازن يعنى لابد من استخدام القوة في محلها إذا أسيئت استخدام القوة يجب أن يحاسب طبقا للقواعد والقوانين يعنى احنا لا نريد أن نطلق اليد بحيث ننتقد إن يكون فيه قوة غاشمة ولا نريد أن تغل اليد بحيث أن المجرم يعنى يعتقد خطئا إن هو يقدر يستخدم سلاحه وضباط الشرطة أو أمين الشرطة لا يستخدمه
رشا نبيل: طيب دكتور هشام فيه هنا مشكلة مطروحة على الساحة المصرية بقى لها يومين بعض التسريبات وبعض الأنباء أنكم قد تضطرون كحكومة مرة أخرى في إعادة قانون الطوارئ لمواجهة أعمال البلطجة والعنف هذا من وجه نظر البعض يعنى حضرتك كل الكلام اللي قلت عليه في تطبيق القانون يتعلق بقانون العقوبات فالناس بتقول إذا كان هناك مواد في قانون العقوبات تتيح للدولة أن تعيد هيبتها وقبضتها وباستخدام القانون العادي لماذا إذن التفكير في قانون الطوارئ
د.هشام قنديل: هو حضرتك يعنى ليس هناك أي طرح يسمح حاليا لاستخدام تحديد قانون الطوارئ يعنى حتى الآن إن احنا بقانون العقوبات الحالى وبالإجراءات الحالية وبالجدية وبالإصرار أعتقد إن احنا نستطيع أن نعيد للشارع المصري الأمن والأمان
عمرو الشناوى: دون إعادة قانون الطوارئ تحت أي مسمى وبأى
د.هشام قنديل: حضرتك هذا ليس على أجندة الحكومة نقاشات النقاشات تتم في موضوعات كثيرة يعنى النقاش صحى لكن حاليا ليس مطروح على أجندة الحكومة موضوع قانون الطوارئ
عمرو الشناوى: نكمل بقى حضرتك كنت بتتكلم في المرور
د.هشام قنديل: المرور يعنى نركز في موضوع السير عكس الطريق في الركن يعنى صف ثاني وفى القيادة بدون رخصة يمكن أتذكر النهاردة إحصائية واحدة بقول لحضرتك وزير الداخلية كل أسبوع في مجلس الوزراء يعطينا إحصائية متكاملة كان فيه خلال جمهورية مصر العربية خلال هذا الأسبوع فقط 136 مخالفة 136000 مخالفة ، من الأشياء الإيجابية اللي ذكرها وزير الزراعة النهاردة إن حصل تعدى التعديات بتحصل على مساحات صغيرة يعنى فحصل تعدى على 160 فدان تعديات صغيرة مجموعة كلها 160 فدان تم إزالة التعديات على 120 فدان فهو يعنى الإزالة والمخالفات بس هو يعنى احنا وجدنا عندنا مشكلة في موضوعات الدراجات النارية تم مصادرة يعنى نتيجة لبدون ترخيص تم مصادرة 12000 دراجة نارية 12000 وجدنا صعوبة في تخزينهم اتكلمنا مع المحافظات على توفير أماكن لتخزينها عشان نقدر يعنى
عمرو الشناوى: هل القانون يسمح بالمصادرة وإعادة بيعها بأسعار رمزية حضرتك ؟
د.هشام قنديل: لا لابد من تعديل تشريعى حتى نصادرها يعنى لو حد ما معهوش رخصة وحضرتك تحفظت عليها المصادرة والبيع ده موضوع آخر يعنى
رشا نبيل: طيب دكتور هشام حضرتك أثرت نقطة في غاية الأهمية منذ دقائق وهى مسألة المعضلة الخاصة بالمعادلة الخاصة بطرفى الأمن كيف تقرر الأمن وتطبق القانون مع احترام كامل لحريات وحقوق الإنسان حتى ولو كان مجرما يعنى المسألة إنه حتى لو كان مجرم هناك إجراءات للقبض والتحويل والتحقيق وما إلى ذلك بمعنى ما يتحدث عنه الحقوقيون بمعايير حقوق الإنسان واحترام حقوق الإنسان حتى ولو كان مجرما أعتقد إن دى المعادلة أو التحدى اللي بيواجه الأمن اللي حضرتك بتسعى له
د.هشام قنديل: حضرتك ده تحدى من ضمن التحديات بالتأكيد اللي بنواجهها في موضوع الأمن يعنى يمكن أنا بقول لحضرتك برضه من الزيارات الميدانية أنا تفقدت الحجوزات يعنى شفت الحجوزات وشفت الأماكن اللي بيتم فيها يعنى تنفيذ بعض الأحكام وتحدثنا مع السيد وزير الداخلية في التوسع أو إنشاء بعض السجون الجديدة حتى نستطيع أن يكون فعلا السجن زى ما بيقال
رشا نبيل: تهذيب وإصلاح
د.هشام قنديل: تهذيب وإصلاح وليس العكس المواطن طبعا أو المتهم برئ حتى تثبت إدانته ، حسن المعاملة والحصول على حقه الشرعى في الدفاع وما إلى ذلك مكفول بالقانون لكن تطبيقه بلا شك يشوبه ويحتاج إلى بعض تعديلات أو بعض يعنى الجدية الأكثر في تطبيقه لكن برضه فيه جزء إن احنا إن شاء الله سبحانه وتعالى نجتهد في وضع التشريعات التي تنمى أو تساهم في دعم حقوق الإنسان ومن ناحية أخرى برضه تساهم في تطبيق القانون بما يسمى العدالة الناجزة
رشا نبيل: طيب في معضلة الأمن لدينا ركنين لابد أن يتوفروا هم الإرادة السياسية لهذه الحكومة في تطبيق الأمن ورئيس الحكومة يؤكد أنها موجودة وشق آخر مرتبط بالإمكانيات والقدرات العملية لرجال الأمن ده هنناقشه مع حضرتك ولكن لدينا تقرير يرصد ما يريد المصريون من رئيس الحكومة نشوفه مع حضرتك ونرجع نكمل كلامنا
تقرير
مواطن: بنتمنى أولا إن يعاد هيكلة جهاز الشرطة دى حاجة بمعنى إن المواطن المصري لما ييجى يخش قسم أو يتعامل مع ضابط شرطة أو يخش يقضى مصلحة في قسم يخش يتعامل باحترام وبمنتهى الكرامة
مواطن1: صورتنا في الخارج من الاستثمار ومن السياحة ومن جميع الاستثمارات مرتبطة بالأمن مش هييجى مستثمر يستثمر فلوسه من بره ومفيش أمن
مواطنة: أهم حاجة البطالة يهتم بالبطالة نمرة 1 و 2 و 3 أهم حاجة دية ويبقى فيه عدل شوية يعنى ندخل السنترالات ندخل أي هيئات حكومية ادخل سنترال شبرا أهه جنبنا تلاقى موظف قاعد وتلاقى 10 لا نهتم بقى شوية بالبلد
مواطن2: والنظر إلى الشباب والشابات خريجى الجامعات ولم يتعين حتى تاريخه منذ 10 سنوات لم يتم تعيين أي فرد وبرضه نظرة ثانية الشركات التي كانت تعمل وبها أعداد كبيرة من العاملين وتم خصخصتها وخروج العاملين والشباب والوقوف ع النواصى والقاعدة على القهوات بدون دخل
مواطن3: اللي بطلبه سيادتك من رئيس الوزراء
المذيع: آه
مواطن3: إنه ينظف الوزارات والهيئات الحكومية من الموظفين المرتشين والحرامية اللي فيها والمرتبات العالية اللي في الشركة المصرية للاتصالات والكهرباء والكلام ده كله يعنى يبقى مدير عام وياخد 10000 جنيه مرتب رئيس قطاع ياخد 200.000 جنيه مرتب ليه
مواطنة1: الميه مشكلة مهمة جدا لإن بنغسل بها وبناكل بها كل حاجة بنستعملها هي الميه فالميه لازم تكون يعنى نعرف نشربها ونعرف نرتاح منها لإن احنا بنشربها من هنا وبنتلوث منها من ناحية ثانية
مواطن4: السلبيات اللي موجودة في الكهرباء تتحل بسرعة لإن بيحصل عندنا ساعات كابل الكهرباء بيضرب أو بيحصل فيه عطل أو كده مفيش استجابة سريعة والضغوط الثانية فيه سرقة كهرباء كثيرة على مستوى الجمهورية ومحدش بيحرك لنا ساكن
مواطن5: والمرور كمان نفسه مش موجود في الشوارع فين المرور وفين التكدس المرورى تعالى شوف دلوقتى على أي إشارة تلاقى تكدس مرورى رهيب هو فين رئيس الوزراء من الكلام ده ما بينزلش ليه الشارع ويشوف الناس ويشوف مطالب الشارع لا مؤاخذة فين البلطجة اللي في الشارع وكل شوية عمالين نتهدد كل شوية احنا وأولادنا ، لا مؤاخذة فين الزبالة اللي مرمية في الشارع اللي ريحتها لا إله إلا الله محمد رسول الله أنا بقول له لو سمحت انزل الشارع وشوف ابعت الناس اللي شغالة معاك تنزل وتشوف ابعت الكاميرات تنزل وتشوف البلد لا مؤاخذة
عمرو الشناوى: أهلا بكم مرة ثانية وهذا اللقاء التليفزيونى الأول الذى نستضيف فيه الدكتور هشام قنديل رئيس مجلس الوزراء كى يواجه الشعب دكتور واحنا بنتكلم عن الأمن ما نقدرش نعديه ونخش في أي محور ثاني قبل ما نتكلم على ما حدث في سيناء اتكلمنا كتير على سيناء وبقى لنا سنين طويلة بنتكلم على سيناء جايز من 56 واحنا بنتكلم على سيناء الموضوع تحول في السنين القليلة اللي فاتت لمجرد أغانى هل دلوقتى هنبتدى نغير نظرتنا ونغير أداءنا بالنسبة لسيناء
د.هشام قنديل: يعنى خليني أقول يعنى لابد من التعامل مع الملف في سيناء يمكن في الأول ملف اقتصادى فقط يعنى لابد من تنمية سيناء حتى نوفر فرص عمل وما إلى ذلك يعنى لكن ظهر تحديات أمنية تلك التحديات يجب أن تواجه ، يجب أن تواجه بالقوة يعنى الناس اللي هم تعدوا على الجنود المصريين يجب أن ينالوا جزاءهم وأعتقد الداخلية والقوات المسلحة يقوموا بجهد طيب في هذا المجال وإن شاء الله تكلل هذه الجهود بالنجاح لكن من ناحية أخرى لاحظنا إن الناس اللي تعدت على الجنود المصريين زى ما ذكرت عندهم تشوه فكرى فلابد من معالجة هذا التشوه الفكرى حتى نمنع إن يأتيهم آخرين لإن الناس اللي احنا يعنى الناس اللي احنا قبضنا عليهم منهم ناس من محافظات لا تنتمى إلى سيناء فبالتالي هناك تحدى ، تحدى فكرى وثقافى حتى نصحح المفاهيم عند بعض المفاهيم المغلوطة عند بعض الناس من ناحية أخرى يجب أن نعجل بمشروعات التنمية تم اتخاذ قرار بإنشاء جهاز تنمية سيناء الجهاز دوة القانون اللي بينظم عمل الجهاز دخل أعتقد من أيام الحكومة الأولى حكومة الدكتور عصام شرف تم إصداره في يناير 2012 تم اختيار رئيسه في شهر 5 النهاردة بس اعتمدنا اللائحة التنفيذية له
عمرو الشناوى: ليه بناخد كل الوقت ده
د.هشام قنديل: بطئ شديد ، استغراق في الإجراءات يعنى خلينا نقول احنا الحكومة وأعتقد الشعب سواء إذا كان في سيناء أو في باقى جمهورية مصر العربية هناك تصميم وعزم على تغيير ذلك ، تنمية في جميع المجالات النهاردة رئيس الجهاز اللي هو الأخ محمد شوقى أنا في الفترة اللي فاتت قلت له تقعد معايا في المجلس بحيث أشوفك الظهر وأنا رايح وأنا راجع وأقعد أتكلم معاك شوية كل يوم أشوف إيه الأخبار عشان خاطر ندفع العمل في اللائحة التنفيذية ووضع بعض البرامج يعنى بصورة عاجلة منظمة ويدفعها إلى الأمام قريبا ثاني اجتماع لمجلس إدارة الجهاز أول اجتماع بعد اجتماع اللائحة التنفيذية كان يوم الاثنين هيكون التعديلات في مشروعات بمليار و200 مليون جنيه على العام المالى الحالى تمويل من جهات أجنبية ، تمويل من الحكومة المصرية ، تمويل من القوات المسلحة المشروعات محددة
عمرو الشناوى: تمويل في صورة قروض وللا استثمار مباشر
د.هشام قنديل: لا استثمار وإنشاء يعنى مثلا إنشاء ميناء للصيد ، استثمار زراعى ، طرق ، خدمات صحية ، مدارس ، آبار ، مصانع يعنى يمكن النهاردة برضه عايز أقول لحضرتك جدية في الجزء الشمالى أو الجزء الوسط أو الجزء الجنوبى هيكون فيه برضه استثمارات سياحية يعنى نجد جدية من الحكومة ومن المستثمرين والقانون الموجود حاليا اللي بينظم الملكية لسيناء وبينظم حق الانتفاع في سيناء بيعطى مناخ جيد جدا للاستثمار ويمكن مصادفة النهاردة كان عندي سفراء أحد الدول الشقيقة وقال إن هو عنده مشروع في سيناء ب300 مليون دولار
عمرو الشناوى: سياحى وللا صناعى ؟
د.هشام قنديل: لا صناعى ومعاه ميناء ومحطة كهرباء ويعنى مشروع متكامل يعطى فرص عمل كبيرة وحسب كلامه هو جاهز لعمل هذا المشروع قصدى يعنى عايز أقول إن زراع التنمية انطلقت لسيناء إن شاء الله بشراكة مع أهالى سيناء والوادى والمستثمرين والحكومة والقطاع الخاص ندفع صورة كبيرة التنمية في سيناء وأنا أصريت إن أنا ما أزرش سيناء قبل ما يكون الجهاز انتهى من إنشائه واللائحة التنفيذية والقانون صدر وتحددت المشروعات حتى إن شاء الله تكون الزيارة القادمة يعنى وضع خطط على الأرض وإن شاء الله يكون زيارة بعض المشروعات اللي يتم تنفيذها
رشا نبيل: طيب كان فيه بعض الأنباء بتشير أن سيكون هناك مؤتمرا صحفيا قريبا تعلن فيه الحكومة المصرية عن المتورطين في أحداث رفح وكانت هناك بعض وكالات الأنباء الأجنبية اللي أشارت إلى تورط عناصر أجنبية أو عرب كمان في هذه الهجمات ما لاحظته في كلام حضرتك النهاردة إن حضرتك قلت كل من تم القبض عليهم هم مصريون
د.هشام قنديل: أنا قلت يعنى أغلب من تم القبض عليهم هم مصريون ويعنى خلى المؤتمر الصحفى مش عايزين نستبق عملية المؤتمر الصحفى لكن أقول لحضرتك العملية عملية نسر مستمرة وبتعمل يعنى خليني أقول العمل وسط المدن والقرى يتطلب حكمة يعنى زى العملية الجراحية لا تستطيع أن تستخدم يعنى نوعيات معينة من الأسلحة لإن لا قدر الله إذا تم استهداف حد وسط مدنيين قد يكون هناك مزيد من الضحايا العكس مش صحيح يعنى المجرمين لا يراعون ذلك لكن الدولة القوات المسلحة والشرطة بتراعى ذلك فعشان كده العملية يعنى قد تظهر إنها تتقدم ببطئ لكن هي تتقدم بخطوات واثقة نتيجة للظروف اللي قلت لحضرتك عليها
عمرو الشناوى: العملية نسر في نفس الوقت محتاجة مرونة كبيرة مرونة في توفير أفراد ، معدات ، نوعية سلاح في مرحلة من المراحل أو في وقت معين سببت توتر مع إسرائيل هل فتحنا خط مع إسرائيل عشان لو احتجنا نضاعف المعدات أو الأفراد نتجنب أي توتر
د.هشام قنديل: طبعا الحكومة وحتى قبل تشكيل الحكومة وقبل الانتخابات ذكر جميع المسئولين إن احنا نحترم معاهداتنا السابقة عندما يحدث أي تنقل يعنى عندما يحدث أي تعديل في أعداد القوات المقررة بالتنسيق مع الجانب الآخر فبالتالي عند وضع هذه القوات يكون هناك تنسيق وأعتقد إن ليس هناك توتر يعنى
رشا نبيل: طيب حضرتك أشرت إلى نقطة معينة أن المتورطون في هذه العملية هم من لديه فكر متطرف وما تسميه بعض وكالات الأنباء الجماعات التكفيرية حضرتك قلت إن الدولة عليها دور في هذه المسألة لكن البعض بيلحظ أن ما حدث خلال الفترة السابقة هو نشاط لبعض التيارات السلفية لبعض الجماعة الإسلامية أنهم سيقومون بزيارات إلى سيناء لمحاولة المساهمة في تغيير هذا الفكر هل هذا فقط أم للدولة دور في هذه المسألة
د.هشام قنديل: خلى بال حضرتك إن تغيير الأفكار بياخد وقت طويل والأفكار ليست منفصلة عن الحالة الاقتصادية يعنى الفقير بيكون فريسة سهلة للأفكار المتطرفة يجب أن نعمل على محاور ليس فقط رجال الدين لكن أيضا على المستوى الثقافى على مستوى الإعلام يعنى بندعو أنا بتكلم في التليفزيون المصري بندعوا الإخوة الإعلاميين أن يطرحوا مثل هذه الموضوعات نناقش مثل هذه الأفكار حتى يتم يعنى معالجتها بصراحة يجب أن نواجهها على جميع الأصعدة سواء إذا كان في التعليم سواء إذا كان في الثقافة ، سواء إذا كان في الإعلام ، سواء إذا كان على منابر المساجد مواجهة شاملة لهذا الفكر المتطرف
عمرو الشناوى: دكتور هشام اسمح لنا محتاجين نخش في برنامج ال100 يوم محتاجين نتعرف على ما حدث في هذه اللحظة وما هو متوقع من الحكومة في الفترة اللي جاية عايزين نشوف مع بعض تقرير حول برنامج ال100 يوم وبعدين نبتدى نناقش كل المجالات
تقرير
مواطن: الحد الأدنى والحد الأقصى اللي هم اتكلموا فيها دى محدش سمع حاجة عنها دلوقتى
مواطنة: يعمل مشاريع إسكان للشباب اللي طالعة يعينهم يعنى الناس اللي طالعة يطلعهم في 55 مش مهم ويعين اللي هم لسة مستجدين اللي هم لسه شباب اللي هم لسه مش لاقيين شغل
مواطن1: عايزين من رئيس الوزراء إنه يدعم الشباب في كل شئ يبدأ يحطهم في المواقع اللي هي المطلوبة يبدأ إن هو يشوف مشاكل الشباب على أرض الواقع إيه
مواطن2: الملف الصحى يبقى فيه اهتمام بتوفير السراير ، الملايات ، الأدوية ، الدكاترة حضرتك ساعات بتروح المستشفى الحكومية ما بتلاقيش سراير ما بتلاقيش أدوية أي حاجة يقول لك روح هات من برة
مواطن3: أطلب منه إن هو يبقى فيه مراقبة جيدة الدكتور مش يروح الساعة 8 ويطلع الساعة 8 و 10 من المستشفى
صعيدى: عندنا في الصعيد مفيش فيه اهتمام بالصحة خالص محافظة قنا وسوهاج وأسيوط والمحافظات كلها مفيش في المستشفيات مفيش اهتمام خالص بالمريض
مواطن4: يعنى أنا دلوقتى في مدرسة قريبة منى ابنى خلص ابتدائى عايز أدخله إعدادى يقول لك لا شوف مدرسة ثانية احنا ما عندناش مكان هل ده يصح
مواطن5: نتمنى منه توسيع المدارس إنشاء عدد كبير من المدارس تقليل كثافة الفصول من الطلبة عايزين نقول إعداد المدرسين إعداد جيد وعمل لهم برامج ودورات جيدة المدرس هو اللي بيدى الطابع عن الطالب
مواطن6: أول حاجة إصلاح العملية التعليمية وإلغاء الدروس الخصوصية وعمل قانون لتجريم أي مدرس يدى درس خصوصى يبقى فيه قانون يجرم موضوع الدروس الخصوصية ده لأن ثلاثإرباع دخل أولياء الأمور بيصب في مصلحة الدروس الخصوصية
مواطن7: لابد من تطهير مؤسسات الدولة جميع مؤسسات الدولة بصبغة اليود من الفساد لا مؤاخذة البيروقراطية بتاعت مبارك زى ما هي بقى لنا 17 شهر أو 18 شهر زى ما احنا مش هنتقدم لو انت طهرت يا دكتور هُشام صدقنى لو طهرت ونظفت صدقنى هتلاقى الشارع انضبط
رشا نبيل: متواصلين في حوارنا مع حضراتكم ومع الدكتور هشام قنديل رئيس الحكومة ويمكن قبل الفاصل كان فيه تقرير بيرصد مطالب المصريين والتحديات اللي المصريين شايفينها أمام رئيس الحكومة الدكتور هشام كان عنده تعليق على ما جاء في هذا التقرير هنقوله لكن هنستكمل مع بعض برضه الحديث عن التحديات ولكن بعد هذا التعليق اتفضل
د.هشام قنديل: هو التقرير طبعا تقرير جميل لكن هو لم ينقل جميع التحديات يعنى هو لم يتحدث مثلا عن مجموعة الفلاحين ولم يتحدث عن الصناعة لم يتحدث عن التحديات البيئية لم يتحدث عن المياه لم يتحدث عن الطاقة لم يتحدث عن الكهرباء ، لم يتحدث عن الطاقة فالتحديات يعنى كبيرة بلا شك لكن من ناحية أخرى التحديات مش عايز أقول يمكن يجب تحويلها إلى فرص وهذه هي مهمتنا مع الشعب فيتم تحويلها إلى فرص عن طريق العمل الجاد والتكاتف سويا هو دوة اللي إن شاء الله اللي نقدر نعمله في الفترة القادمة
رشا نبيل: طيب أنا بتكلم مع خبير مصرى له باع كبير جدا في خبرة كبيرة جدا في الشئون أو الموارد المائية وخلينى أنقل الصورة لحضرتك بصراحة في إجازة العيد تحديدا لو حضرتك يا دكتور هشام لو كنت رحت أي قرية في أي محافظة في القليوبية ، في الدقهلية ، في دمياط أي قرية صغيرة وقررت إنك تفتح حنفية الميه في بيت من بيوت القرية دى وأخدت كوباية ميه كنت حضرتك هتشوف منظر الميه وكنت حضرتك أكيد هتكون مختلف عن نظرتى كمواطنة عادية لكن مش عايزة أقول الميه ملوثة أو الميه فيها مشاكل تؤدى إلى التسمم لكن الميه من النظرة الأولى يا دكتور هشام لا تصلح للاستخدام
د.هشام قنديل: لا خلينا نذكر أولا نتفق إن منهجنا في هذه الحكومة هو الشفافية والصراحة يعنى والصدق فيما نقول والمواجهة يعنى ده اللي حصل في الكهرباء مشكلة الكهرباء يعنى أنا خرجت وشرحت بالكامل بما حدث في هذا الموضوع في موضوع المياه أنا تابعته مع السيد وزير الصحة والسيد المحافظ والدكتور عبد القوى خليفة وزير البنية التحتية للمياه والصرف الصحى لأن كانت أزمة وكان لابد أن نقول الحقيقة يعنى خلينا نقول إن الأزمة دى لما حصلت كان أول حاجة فيه أزمة صحية فلابد من الخدمات الطبية حتى يتم إسعاف الناس اللي عندهم تسمم دى نمرة 1 ، نمرة 2 لابد إن احنا نوفر مصدر مياه سريع للناس حتى نستطيع
رشا نبيل: عشان الإصابة ما تزيدش
د.هشام قنديل: نمرة 3 لابد من تحديد المشكلة أين المشكلة يعنى لإن كان فيه مصادر مياه متعددة فيه مصدر مياه جوفية من الترمبات الحبشية وهى ليست مياه جوفية ، مياه سطحية وفى أغلب الأحيان لا تكون من نوعية جيدة ، مصدر ثاني من آبار حكومية ، مصدر ثالث من آبار يعنى
عمرو الشناوى: ومحطات تحلية كمان
د.هشام قنديل: أفندم
عمرو الشناوى: وفيه محطات تحلية بيتم خلطها
د.هشام قنديل: لا محطات التحلية يمكن في السواحل لكن باقى المناطق لا يكون فيها محطات تحلية حتى الآن فقلنا نحدد المشكلة ونشوف ما هي حتى نقدر نعالجها واتبعنا منهج الصراحة ونقول للناس فيه مشكلة لو سمحت يا جماعة ما حدش يشرب ميه خلينا بس نشوف نعالج الناس خلينا ناخد المشاكل خلينا نحدد الإجراءات وخدنا تحليلات خدنا عينات من جميع مصادر المياه دى وأخدنا عينات من المرضى حتى نستطيع أن نحدد بالضبط إيه هي المشكلة بالضبط ونحدد الحل و الحقيقة لم نخجل أن نقول في الآخر الحمد لله أن نقول في الآخر أعتقد النهاردة بعد أن كل الحالات بالتأكيد كل الحالات خرجت بإذن الله وبفضل الله سبحانه وتعالى لم يحدث أي وفيات لا دى مش مشكلة ميه كانت مشكلة إن بعض الأهالي ربطوا الطرمبات الحبشى بالشبكة اللي بتوصل الميه إن بئر الأهالي دوة كانت مياهه غير نقية وكان هناك سوء استخدام ، إن الشبكة لم يتم غسيلها بصورة جيدة كان فيه شك أيضا إن لم يتم استخدام الكلور فبالتالي المسئولين عن ده اتحولوا للتحقيق ويلقوا يعنى جزاءهم ونأخذ إجراءات وتم اتخاذ إجراءات حتى يتم تحسين الوضع ومراجعة الوضع في القرى الأخرى وفى المدن الأخرى حتى نتجنب ذلك هل معنى ذلك أن ذلك لن يحدث بالتأكيد سوف يحدث لكن إن شاء الله لا قدر الله حتى لو حدث سوف نقضى على هذا الأمر مرة أخرى مواجهة سريعة يعنى إجراءات سريعة حتى نتجنب ذلك لكن إذا حدث يتم مواجهته بسرعة
عمرو الشناوى: مش هتستنى لما يحصل
د.هشام قنديل: ما أنا بقول لحضرتك أنا زى ما قلت لحضرتك خلينا بس على سبيل المثال حدث في الشرقية تسمم بعدها بيومين واعتقدت الناس إنها من الميه وفيه تصريحات خرجت من بعض المسئولين قالوا الميه مرة ثانية يا دكتور قلت لهم يعنى رجاء التمهل إلى أن تخرج النتائج وحصل تسمم غذائى زى ما حضرتك ذكرتى من الترمس وكانت الأسر كثيرة في فرح وتم برضه معالجتهم والحمد لله ماحدش برضه حصل له حاجة يعنى
رشا نبيل: هكلمك بصراحة يا دكتور ما أزعج هو ما صدر عن رئاسة الجمهورية الدكتور ياسر على لما كانت فيه مشكلة المنوفية قال إن فيه مشكلة في البنية التحتية في بعض المناطق أدى إلى تسرب مياه الصرف الصحى واختلاطها بمياه الشرب حضرتك فاكر في الثمانينات كنا بنقعد في المناسبات السعيدة وغير السعيدة نقول ده احنا عملنا بنية تحتية احنا صرفنا 15 مليار دولار على البنية التحتية الناس قلقانة أن يكون هناك تحدى جديد يواجه رئيس الحكومة في مسألة البنية التحتية
د.هشام قنديل: لا أخفيكى سرا أن هناك تحدى في البنية التحتية من ضمن التحديات التي لم تذكر في التقرير الكثافة السكانية المرتفعة جدا في الوادى في الدلتا فأنا عايز أقول يعنى برضه العشوائيات المحيطة بالمدن نتيجة لإن التنمية لا تصل إلى الصعيد ، لا تصل إلى الجهات النائية ، لا تصل إلى الجنوب لا تصل إلى الغرب لا تصل إلى الشرق التنمية تركزت في أوقات كثيرة حوالين الوادى والدلتا و حوالين المدن الرئيسية أنا أعتقد وإن إذا وإن شاء الله يعنى يتم ذلك لما نضع الاستثمارات في سيناء ووضع استثمارات في الساحل الشمالى في الجنوب وفى الغرب وفى الشرق سوف يساهم بصورة كثيرة أو صورة كبيرة بتقليل الكثافة السكانية التي ترى الضغوط على البنية الأساسية يعنى حضرتك مثلا مشاكل انقطاع الكهرباء التي حدثت في شهر رمضان المبارك خلال 10 أيام من هذا الشهر من ضمن المشاكل التعديات على الأراضى الزراعية اللي أنشأت يعنى كيانات جديدة وبدأت تستخدم ميه وبدأت تستخدم تطلب صرف صحى وبدأت تسرق الكهرباء أنا عايز أقول إن فيه قرى بأكملها بتسرق الكهرباء في مصر على الطرق الزراعية والطرق الصحراوية باعة كثيرين يسرقون الكهرباء فيعنى الحقيقة في الفترة الضبابية الماضية تسببت في كثير من المشاكل الإضافية عن التحديات اللي كانت موجودة لكن برضه أنا عايز أقول إذا كانت الصورة ليست وردية لكن بالتأكيد العمل والتكاتف والجدية إن شاء الله نعبر هذه المرحلة الحرجة
عمرو الشناوى: قبل ما نسيب ملف مياه الشرب بعد إذنك دكتور هشام في بداية الصيف مرسى مطروح مثلا تعرضت لمشكلة شديدة القسوة توفير مياه الشرب وزى ما قلت حضرتك برضه هو فيه شبكة مياه وخط مياه لكن فيه تعديات كثيرة قوى من اسكندرية إلى مرسى مطروح على هذا الخط نحلها ازاى
د.هشام قنديل: هو يعنى يمكن دوة أنا كنت اشتغلت في الموضوع ده كثيرا لما كنت وزير الموارد المائية والرى أولا احنا عندنا ترعة اسمها ترعة الحمام ، ترعة الحمام كان ساعتها وزير الرى والموارد المائية عشان يوصل مياه الشرب للمحطة المحطة في نهاية الترعة كنا بنطلق 5 أضعاف الكمية المطلوبة نتيجة لإن هناك تعديات على مصائب الترعة التعديات على أراضى لم تكن مقننة الرى والناس بدأت تزرع ، أراضى كان المفروض تزرع بالرى الحديث انقلبت إلى نظام رى قديم وأراضى رملية ، أراضى مقننة الرى لكن لم تدخل بها البنية الداخلية وبالتالي ملاك الأراضى قرروا أن يأخذوا القانون جائلين ويبدؤوا في الزراعة
عمرو الشناوى: يعنى برضه محتاجين تفعيل القانون
د.هشام قنديل: أنا مش عايز أقول بس تفعيل القانون أنا عايز أقول أنا قعدت في الحقيقة في لقاء مع السيد وزير الزراعة والسيد وزير الموارد المائية والرى يعنى درسنا هذا الموضوع بصورة جيدة لابد من تقنين الوضع ، لابد من إن احنا نعاونهم ونساعدهم ونؤكد عليهم في استخدام نظم الرى الحديثة لإن ده طبعا هيقلل كثيرا من كمية المياه لكن ليست هذه فقط يعنى لإن الميه لما تصل محطة العلمين حتى تصل إلى مطروح خط مواسير طوله 200 كيلو فخط المواسير الناس بتتعدى عليه في السكة مع إن المثل بيقول لك الميه ما تعديش على عطشان يعنى لا الميه بتعدى عليه بيخرم الخط ده وبياخد الميه بيروى بها ويشرب منها
عمرو الشناوى: الناس بتروى فعلا جناين هناك
د.هشام قنديل: بتروى يعنى التين اللي حضرتك بتاكله في الساحل الشمالى ده كله مروى بمية شرب القرى السياحية اللي كانت المفروض تعمل محطات تحلية لم تلتزم ، نقل الميه أساسا في خط 200 كيلو هذا المنطق يعنى منطق خاطئ تماما لابد من إنشاء محطات لتحلية مياه الشرب على فكرة فيه قرار من مجلس الوزراء في 2009 على ما أعتقد بإن في المناطق الساحلية يتم الاختصار على التحلية في التوسعات بالذات فهو المنهج عشان نحسن إن شاء الله لابد من تدخل لمنع التعدى على الأراضى الزراعية ، لابد من التوسع في محطات تحلية المياه سواء للقرى أو سواء على المدن لإن نقل المياه 200 كيلو متر ده سيفشل لا نستطيع أن نحرس خط 200 كيلو سيكلفنا الكثير التكلفة قريبة من تكلفة التحلية فلماذا لا نعمل محطات تحلية يعنى هو الحل المتكامل دوة إن شاء الله هياخد فترة لكن أنا أكدت على الزملاء ووزير الموارد المائية والرى والسيد وزير الزراعة وعلى السيد المحافظ أن نبدأ فورا في هذا الموضوع حتى تكون الحالة أفضل الصيف القادم حتى تنتهي بعد سنوات قليلة إن شاء الله
رشا نبيل: دكتور هشام فيه تحديات كثيرة فيه تحديات وفيه مطالب لكن أكيد المسألة الحاسمة في هذا الأمر هي الموارد التي سيعتمد عليها رئيس الحكومة وحكومته في تحقيق مطالب المواطنين حضرتك خدت هذه الحكومة ولديك عجز في الموازنة أكثر من 135 مليار والحقيقة إن العجز ده مرشح من وجهة نظر خبراء اقتصاديين إلى الزيادة ما لم تكن هناك حلول عاجلة من حضرتك أو من المجموعة الاقتصادية اللي مع حضرتك اللي يستمع إلى وزير المالية اللي مع حضرتك في حكومة حضرتك ما ألاقيش إجابة شافية يعنى ربما التصريح الوحيد اللي نقل نسب لحضرتك أنك تؤكد أنك ستمول عجز الموازنة من الاقتراض عايزين نقرب من الموضوع ده
د. هشام قنديل: طيب خلينا نشرح إن عجز الموازنة زى ما ذكرتى حضرتك وزى ما ذكر الخبراء الاقتصاديون إن عجز الموازنة 135 مليار ومرشح للزيادة متى يزيد يعنى هو عبارة عن مصروفات وإيرادات فإذا كنت تريد أن تقلل المصروفات أكثر من الإيرادات فالحل الوحيد إنك انت ترشد من الإنفاق وتحاول تزيد من الإيرادات إذا لم ترشد من الإنفاق وإذا لم تزيد من الإيرادات ممكن أن يزيد عجز الموازنة يعنى لو قلنا إن احنا محتاجين لو قلنا إن احنا هندفع الاستثمار يمكن أنا استقبلت ما لا يقل عن 14 أو 15 زيارة خلال أيام العمل ال19 بتاعت الوزارة من جهات دولية مختلفة ومستثمرين أنا كان عندي سفير إحدى الدول النهاردة زى ما ذكرت بيتكلم عن 300 مليار ، 300 مليون آسف في سيناء ومشروع يفتتح قريبا في دمياط للمنسوجات مشروع تكلف حوالى مليار ونصف وإن شاء الله يوجد 1500 فرصة عمل لو قلنا أن هناك تدافع وتزاحم على الاستثمار في مصر والرسائل الإيجابية التي ظهرت مؤخرا من القيادة السياسية ومن الحكومة بدأت تؤتى ثمارها في التدافع والإقبال على الاستثمار بدأت تؤتى ثمارها يعنى حتى لا يكون كل الأخبار ليست جيدة بيمثل الاحتياط النقدى إن شاء الله الشهر ده سوف يزيد ولن يزيد فقط لإن احنا حصلنا على قرض من قطر نص مليار لكن هيزيد أكثر من كده نتيجة لبعض الإجراءات التي اتخذتها الحكومة التصنيف الائتمانى لمصر يعنى كان مرشح إن هو يعنى يبقى أسوأ لكن لم يحدث ذلك
عمرو الشناوى: احتفظنا بالتصنيف بتاعنا
د.هشام قنديل: هو ليس جيدا لكن لن يسوء يعنى فيه إشارة على تكافؤ الاقتراض أمريكا بتعطى سندات خزانة بتكون تكلفتها مثلا 2.4 قبل الثورة كانت مصر بتضع تكلفة إضافية 2% عن ال2.4 من شهرين وصلت هذه التكلفة إلى 7% الأسبوع اللي فات انخفضت إلى 5% فوجدت مؤشرات إيجابية المؤشرات ليست فقط كلام يعنى المؤشرات قرارات رئيس الجمهورية 12/8 وضحت إن ليس هناك ضباب واضح أن هناك خريطة واضحة الجمعية التأسيسية بتعمل على الدستور بتعمل يعنى بجدية وتوافقية يعنى التوافق ليس من خلافات ، من خلافات يتم التناقش عليها ويتم حلها بصورة وبعدين حضرتك بتتابعوا معانا يعنى لجان الحوار حوار راقى جدا وكلنا بنسعى به الدستور ينتهى حسب اللجنة التأسيسية حسب الجمعية التأسيسية في نهاية سبتمبر يطرح الحوار ويتم الاستفتاء عليه بعد ذلك يتم عمل انتخابات برلمانية يعنى هناك خريطة واضحة ليست هناك لبس هذه إشارة إلى أن الدولة مستقرة
رشا نبيل: الخطوات المرتبطة بالتحول السياسى أو بالاستقرار السياسى مهمة بالنسبة للاقتصاد
د.هشام قنديل: الحكومة الإشارات التي تعطيها زيارة رئيسة صندوق النقد الدولى بعد إسبوعين من عمر الحكومة إشارة إيجابية ، أول قرض وقعته بعد أيام قليلة كانت ليلة 27 رمضان كان من البنك الدولى كان ب200 مليون دولار وهو cash for work يعنى فلوس نعطيها للفقراء مقابل عمل يعطى فرص عمل يعنى على الأرض وده كان مبدأ أنا الحقيقة حرصت في المؤتمر الصحفى ساعتها أقول إن هذه رسالة لابد أن نعمل كما فعل السابقون أن يكون الثروة على مجموعة قليلة ومن المتوقع أن الثروة سوف تتساقط على باقى أفراد الشعب
عمرو الشناوى: لازم تتسرب في كل الشرعية
د.هشام قنديل: فاحنا بدأنا أول تمويل جاء لنا كان تمويل لدعم الطبقات الفقيرة من الشعب المصري عن طريق هذا القرض
رشا نبيل: ازاى يا فندم يعنى عايزة أعرف الناس لما تسمع الرقم ده النهاردة من حضرتك كرئيس حكومة تقول لك طب فين بقى الفلوس دى راحت فين أنا عايزة أشرح ده يعنى
عمرو الشناوى: عايزة ألف دولار مثلا
د.هشام قنديل: لا أنا ما أعتقدش إن الأستاذة رشا من الناس اللي ممكن تاخد هذا القرض
رشا نبيل: لسه شوية يعنى
د.هشام قنديل: أولا الفقراء لا يأخذون أي قروض يعنى هذه أعمال كثيفة العمل بتحددها الجهات الحكومية وبتتعاقد مع مقاولين وبتشترط عليها يعنى مثلا لو قلنا
عمرو الشناوى: شبكات النظافة مثلا وجمع القمامة مثلا
د.هشام قنديل: مثلا ممكن يكون جزء منها ، موضوعات تبطين الترع والقنوات يعنى تطهير وتكبيش وتبطين ممكن برضه يخلق جنبه فرص عمل بعد كده يكون فيه منتزه صغير الناس تتنزه فيه ويكون فيه كافيتيريا أو ما إلى ذلك من فرص العمل البسيطة بحيث إنك انت تدفع في الاقتصاد المصري فلوس نقدية لما بتدفع للناس دى يبتدى هم يشتروا فبالتالي انت يعنى بتحط كاش بسرعة فيها بس كلمة بسرعة دى أي عمل مع منظمة دولية بيأخذ وقت علشان تقدر تحصل على تمويل فأنا كنت حريص إنى أنا أسأل امتى هنحصل أول دفعة من التمويل فإن شاء الله ده يكون في شهر ديسمبر لكن المشروعات محددة وجاهزة مع الصندوق الاجتماعى وتبدأ إن شاء الله التنفيذ بدءً من شهر ديسمبر أو أواخر ديسمبر أو في شهر يناير ماذا نفعل في عجز الموازنة ليس هناك حل يعنى للعجز الحالى غير الاقتراض ، الاقتراض لابد منه شر لابد منه لو اتفقنا إن احنا عندنا عجز كبير ولابد إنه يغطيه بالاقتراض يبتدى ينطبع إلى الذهن قال لك قرض من الداخل أم نقترض من الخارج ما هي المميزات
عمرو الشناوى: أيهما أقل تكلفة
د.هشام قنديل: أيهما أقل تكلفة أيهما يعنى له تأثير إيجابى على الاقتصاد المصري يعنى في السابق كان التوجيه على الاقتراض الداخلي وصلنا حاليا إلى نسبة 67 % من الناتج المحلى يعنى الديون بالنسبة للناتج المحلى 67% أصبحت الحكومة بتنافس القطاع الخاص يعنى كبنك لو عندي النهاردة فلوس وعايز استثمرها ، استثمرها مع القطاع الخاص وللا استثمرها مع الحكومة ، الحكومة أأمن وأسرع ولا تحتاج إلى متابعة وبالتأكيد سوف توحى بنوعية دفع وما إلى ذلك ولا تتعثر يعنى إن شاء الله من ناحية أخرى الفائدة وصلت حوالى 16% مثلا لما أقول من 12 ل 16 حسب البنك 16%
عمرو الشناوى: بس بالجنيه المصري
د.هشام قنديل: بالجنيه المصري لكن الاقتراض من صندوق النقد الدولى أو من دولة السعودية أو من قطر دول اللي احنا يعنى أخدنا منهم بالفعل قرض أو إن احنا نتناقش مع صندوق النقد الدولى للحصول على قرض مماثل الموجود هو 1% و1% دى بتعريف الاقتصاديين هي خدمة دين خصوصا مع وجود فترة سماح وفترة سداد
رشا نبيل: بعد 39 شهر تقريبا
د.هشام قنديل: هذه خدمة دين 1% مش هنقول ب16% قارنها ب 12 % ، قارنها إنك انت لا تتنافس مع القطاع الخاص والشئ الجيد في موضوع صندوق النقد الدولى إنك انت تحصل أيضا على شهادة تلك الشهادة يعنى صندوق النقد الدولى هو الجهة الدولية المنوطة بمساعدة الدول حدوث أزمات مالية والاقتصادية يعنى مصر عضو فيها ومن حقها أن تحصل على دعم عندما تحتاج
عمرو الشناوى: يعنى شهادة من صندوق النقد أن اقتصاد مصر يتحمل
د.هشام قنديل: يتحمل وقادر على أن يسدد تلك الشهادة مطلوبة من الكثيرين الممولين سواء ممولين دوليين أو أشقاء من دول أخرى بيطلبوا تلك الشهادة لأن هذه الشهادة بيقدمها خبراء دوليين هم أعضاء في صندوق النقد الدولى ما يقدمه النقد الدولى لنا هو تسهيلات يعنى يمكن أن آخذ جزء منها أو لا آخذها بس أنا طبعا بحكم انطباعى عن الملف المالى والاقتصادى بعتقد إن احنا هناخدها ، هناخدها وهنستهلكها الجزء يعنى برضه الإيجابى الآخر إن طرح هذه الشهادة تكلفة الاقتراض في المستقبل بتقل فتكلفة خدمة الدين اللي بتمثل 20 % من الموازنة بتاعتنا بتقل عباءة دين ولا تزداد يعنى في المستقبل لكن يعنى هل يعنى عشان مبدأ المصارحة هل كل هذه الأمور إيجابية وللا يوجد أي محاذير
رشا نبيل: الجزء الخاص بالانطباع القديم عن أن قروض صندوق النقد الدولى تشترط على الحكومات تخفيض الدعم ، بتشترط على الحكومات التعامل بحزم وبصرامة في برامج الإصلاح الاقتصادى الخاص بها والأهم أنه كانت هناك انتقادات دائمة لعدم مراعاة البعد الاجتماعى في معظم السياسات الاقتصادية وإن كانت الموضوعية هنا تقتضى أن تقول أن هناك مراجعات تمت في عمل صندوق النقد خلال السنوات الماضية نتيجة هذه السلبيات لكن اسمح لنا يا دكتور ناخد فاصل قصير لإن هذا الموضوع موضوع مهم جدا هنواصل فيه الحديث مع رئيس الحكومة المصرية الدكتور هشام قنديل بعد الفاصل
فاصل إعلانى
عمرو الشناوى: أهلا بكم مرة ثانية واحنا بنتكلم مع الدكتور هشام قنديل رئيس مجلس الوزراء حول الاقتصاد المصري قلنا إن احنا محتاجين نقترض عشان نغطى جزء كبير من العجز في الموازنة العامة للدولة ولكن الاقتراض ممكن يوفر لنا بعض المبالغ يا دكتور هشام ممكن نستغلها في مشروعات قومية كثيفة العمالة عشان نشغل ونغطى بعض المشاكل زى مشكلة البطالة ولكن لا غنى في المقابل عن الاستثمار المباشر لصناعات لأيدى عاملة إيه الميزة اللي احنا ممكن نقدمها في مصر للاستثمار المباشر من العالم كله يعنى بنشوف دولة زى الجزائر بتعرض أراضى بنص دولار دولة زى دبى في الخليج بيعرضوا نظام ضرائبى يعنى مرن جدا وضعيف جدا مغرى لناس كثير دولة زى بولندا مثلا بتغرى المستثمر بالأيدى العاملة المدربة المؤهلة بكميات كبيرة خريجى جامعات بمئات الآلاف على أعلى مستوى من التأهيل إيه اللي احنا ممكن نقدمه للمستثمر عشان نغريه وييجى يشتغل عندنا ويشغل ولادنا
د.هشام قنديل: خليني يعنى أوضح حاجة من باب الشفافية والصدق يعنى زى ما ذكرنا إن قرض صندوق النقد الدولى دوة بيعالج بالأساس عجز الموازنة وبالتالي يجب على الحكومة عندما تقترض تتأكد إنها بتعالج العجز اللي بقى عجز هيكلى بقى عجز متكرر فلابد من اتخاذ مجموعة من الإجراءات حتى نقلل من هذا العجز على مدى من الزمن حتى ينتهى لا نستطيع أن نعالجه هذه السنة فقط لكن اللي احنا عايزين نعمله الإجراءات اللي احنا بنعمل لها تصميم وهنتخذها بإذن الله سبحانه وتعالى وليس لنا خيار غير اتخاذها هي إجراءات تستهدف إلى تخفيض عجز الموازنة على سنوات حتى لا يكون العام احنا هنفترض العام القادم حتى الأعوام القادمة مستمرة في الاقتراض
عمرو الشناوى: فيه ريحة دعم في الموضوع كده
د.هشام قنديل: انت حضرتك أصبت تماما يعنى أولا زى ما قلت لحضرتك لابد من ترشيد النفقات نتفق تماما أن لابد من ترشيد الدعم لأن الدعم لا يصل إلى مستحقيه خلينا نأخذ مثال من الأمثلة يعنى مثال موضوع أنابيب البوتاجاز أنبوبة البوتاجاز متسعرة ب2 جنيه ونص 5 جنيه سعر بسيط بتذهب أغلبها
رشا نبيل: ب 40 وب 50 جنيه
د.هشام قنديل: أفندم
رشا نبيل: ب40 وب50 جنيه والناس بتموت عشانها يعنى
عمرو الشناوى: بس بيروحوا لمين
د.هشام قنديل: بتروح بتهرب ، بتذهب إلى مزارع الفراخ ، بتذهب إلى قماين الطوب بعض الناس بتعمل بها حاجات يعنى بتشغلها مصدر طاقة لمصانعها يعنى اختراعات كثيرة جميلة جدا من الشعب المصري والمهندس المصري لكن يعنى بالتأكيد لابد من إن احنا نوقف هذا النزيف بدعم طبقات لا تستحق الدعم إلى أن نتأكد أن الدعم يصل إلى مستحقيه هو موضوع الكوبونات مثلا عندنا لجان لمتابعة هذا الموضوع حتى يتم تطبيق موضوع الكوبونات إن شاء الله في أقرب فرصة أنا مش هذكر التاريخ حتى أتأكد تماما أن هناك جاهزية لتطبيق نظام الكوبونات
عمرو الشناوى: بس تمت الموافقة على المبدأ
د.هشام قنديل: المبدأ تمت الموافقة عليه يعنى أنا مش عايز أقول يعنى هذه الحكومة عندها تحديات وعندها حلول ويمكن يعنى لا أدعى الشجاعة ولكن أدعى أن ليس هناك خيارات كثيرة غير إن احنا نأخذ الإجراءات المطلوبة بطريقة علمية ومحددة حتى نضمن أن الدعم يصل إلى مستحقيه
رشا نبيل: هتعرف ازاى حضرتك إذا لم تكن هناك خلال السنوات الماضية قاعدة بيانات أساسية لدى الحكومة المصرية تقول أن هؤلاء هم فقط من يستحقون الدعم
د.هشام قنديل: يعنى فيه أمور سهلة يعنى موضوع البوتاجاز هناك 15 مليون أسرة عندهم البطاقات عندهم نظام البطاقات الذكية ممكن عن طريق هذه البطاقات يحصلوا على كوبونات برضه بنحاول إننا نطور النظام ده بحيث يكون نظام بطاقات ذكية يحصلوا بها على أنابيب البوتاجاز وبالتالي الدعم يصل إلى مستحقيه بنحاول نتفق مع المستودعات البوتاجاز ومع العاملين حتى لا يحدث يعنى تذمر من ناحيتهم يحصلون أيضا على ما يعتقدون أنه نصيبهم نعتقد أو نتفق معهم أنه هامش ربح جيد حتى لا يكون هناك فساد في المنظومة بالإضافة طبعا زى ما اتفقنا إلى تطبيق القانون بكل حزم وقوة لكن إن احنا ندعم قطاع خاص يعنى لا يستحق الدعم في مادة زى البوتاجاز يجب ألا تستمر وأيضا
عمرو الشناوى: لسه بنزين ، سولار ، غاز والكهرباء طبعا
د.هشام قنديل: يعنى خلينا برضه نقول موضوع الكهرباء احنا ذكرنا برضه الموضوع جامد جدا موضوع الكهرباء احنا بننتج غاز طبيعى 5.8 مليون قدم يوميا نحن في أوقات الذروة نستهلكهم بالكامل في توليد الكهرباء ، الكهرباء
عمرو الشناوى: بدون تصنيع في بتروكيميكالز ( petrochemicals) وبدون تصدير وبدون أي حاجة
د.هشام قنديل: أنا يمكن أنا آسف أخطأت بنستهلكهم بالكامل في السوق المحلى لا طبعا هي الكهرباء بتستهلك حوالى 58 % الباقى في التصنيع واستخدامات المنزل والسيارات وما إلى ذلك عايز أقول بس إن احنا لا يوجد أي تصدير لإن الناس كانت بتعتقد إن احنا بنصدر الغاز إلى الخارج أو بنصدر الكهرباء لا واقفين عقود التصدير سواء للغاز الغاز بس عشان أبقى دقيق بنصدر حوالى 54 مليون قدم يوميا إلى الأردن وده يعنى الحد الأدنى الذى يحافظ على الخط اللي هو موجود وهو لا يمثل 1% من إنتاجنا الغاز لو احنا فضلنا نستهلكه أسوأ شئ تعمله للغاز إنك انت تحرقه لكن لو استهلكته في مصانع بترو- كيماويات فانت بتعظم القيمة المضافة من الغاز مش كده وبس انت لو استغليته في صناعة كبيرة زى بترو -كيماويات مع شبه الاستثمارات والتدريب ممكن أن تنشئ صناعات صغيرة ومتوسطة فبالتالي أسوأ شئ تعمله لروحك ولبلدك إنك انت تحرق الغاز فعشان كده كنا بنقول مجموعة ترشيد الطاقة في غاية الأهمية من ضمن الأشياء موضوعات الترشيد إن احنا لا ندعم الأغنياء في الطاقة
رشا نبيل: أنا عايزة أعرف بقى لإن حضرتك حطيت إيدك على نقطة في غاية الأهمية هتلاقى رجال الأعمال اللي حضرتك كنت لسه بتقول إن أنا محتاج لهم وده القطاع الخاص اللي هينشط الاقتصاد المصري هيصرخوا ويقولوا يعنى إيه دلوقتى في مرحلة الركود الاقتصادى يتم رفع الدعم ويبيع لنا الطاقة بأسعار مرتفعة مجموعة اقتصاديين زى الدكتور حازم الببلاوى هيقول إن ده هيؤدى إلى ارتفاع في الأسعار من يتضرر
د.هشام قنديل: انتى قلتي لي حاجة أنا ما قلتهاش أنا ما قلتش هرفع الطاقة لإن الأمور دى هامة حتى لا نسبب ذعر
رشا نبيل: لا أنا قلت حضرتك حطيت إيدك على نقطة ممكن تكون حساسة ومقلقة لرجال الأعمال
د.هشام قنديل: بالتأكيد
رشا نبيل: لكن فيه ناس بتقول برضه مش هنفضل طول عمرنا نزيد الأغنياء غنى ونزيد الفقراء فقرا يعنى المصانع والاستثمارات كثيفة الاستخدامات للطاقة تحقق أرباح طائلة كصناعة الصلب كصناعة الأسمنت كهذه الصناعات لابد آن الأوان
د.هشام قنديل: ألغى فعلا الدعم في شهر فبراير اللي فات يعنى ده موضوع يعنى انتهى لكن خلينا نقول أنا عايز أقول إن احنا لا ننظر تحت أقدامنا ولكن ننظر إلى المستقبل يعنى هناك اقتراحات مثلا استخدامات الطاقة الشمسية الطاقة المتجددة يعنى مصر من أكثر الدول في العالم سطوعا للشمس كيف لا نستخدم الطاقة ونستمر في استخدام الطاقة غير المتجددة زى البترول والغاز والمازوت وما إلى ذلك ولا نستعين بالطاقة الشمسية هناك مقترحات جدية بندرسها لإنشاء محطات للطاقة الشمسية أو طاقة الرياح وعايز أقول إن السوق اللي هيستخدم لإن الطاقة دى مرتفعة الثمن حتى الآن السوق موجود من القطاع الخاص فبالتالي أنا كحكومة أو كوزارة كهرباء قد أستخدم الشبكة بتاعتى كمجرد ناقل للكهرباء وأدخل عليها رسوم يعنى هو القطاع الخاص ده قطاع خاص وأنا دورى يعنى محفز ومسهل لهذا الأمر يعنى السوق لتوريد الكهرباء يعنى للطاقة المتجددة موجود السوق القطاع الخاص الذى يرغب في الحصول على هذه الطاقة برضه تقديم القطاع الخاص لنفسه إن هو بيستخدم طاقة نظيفة ده شئ إيجابى وبيساهم في رفع سعر المنتج بتاعه حتى خاصة إذا كان هذا المنتج يعنى سياحى أنا برضه عشان أنا يعنى
رشا نبيل: أنا بس عايزة حضرتك تسامحنى في حاجة البحث عن مصادر بديلة عن الطاقة دى مسألة في غاية الأهمية لكن التحدى والمواجهة القادمة لحضرتك هي ماذا ستفعل مع القطاع الخاص في مسألة استهلاك الطاقة يعنى
د.هشام قنديل: وأنا فعلا كنت عايز أرجع للإجراءات اللي احنا بنتخذها فهى إجراءات لترشيد الاستخدامات وإجراءات أيضا لترشيد النفقات وإجراء ثاني لزيادة الإيرادات يعنى مثلا توسيع نطاق المجتمع الضريبى يعنى هناك اقتصاد غير رسمى كبير جدا هناك رغبة بينهم إنهم يبقوا اقتصاد رسمى مش طبعا يعنى هم طبعا نحسبهم مواطنين شرفاء يريدون أن يساهموا في بناء الوطن ويدفعوا ما عليهم من ضرائب لكن هم أيضا مش عايزين يعملوا تأمينات ، مش قادرين يحصلوا على تمويل إن هم غير معترف بهذا الكيان فهو هناك رغبة إن هذا الكيان يعترف به لما كان يعترف به يحصل على حقوق ويؤدى ما عليه من واجبات فبالتالي نقدر نوسع في المجتمع الضريبى ونزيد من الإيرادات فهى ترشيد تدريجى لا يؤثر على الفقراء زيادة في النفقات تدريجية بالتأكيد لا يزيد من أعباء المواطن المصري هذا هو البرنامج اللي بيتم تصميمه ويتم مناقشته مع صندوق النقد الدولى والذى سيتم عمله بشفافية كاملة أنا عايز أقول لحضرتك مقترح سوف نعلن عنه قريبا يعنى إن احنا سوف ننشئ ما يسمى بمجلس اقتصادى بيسموه economic commission أو economic advised report هذا المجلس سوف يمثل فيه الاقتصاديين الكبار يعنى في مصر تمثل فيه الكثير من الأعمال
عمرو الشناوى: بدون الاقتصار على توجه معين
د.هشام قنديل: بالتأكيد
عمرو الشناوى: يعنى عشان لا يتم مهاجمته قبل ما يبتدى
د.هشام قنديل: الغرض إن يكون فيه منتدى يعنى يتم فيه نقاش صحى لأي توجهات اقتصادية حتى إذا كان فيه تعديلات نعدلها يعنى بلا شك احنا نريد أن نستمع ونتطلع إلى أي رأى
عمرو الشناوى: لن تنفرد الحكومة بوضع السياسات الاقتصادية وإنما هتعتمد على أفكار هذه المجموعة
د.هشام قنديل: أحب أقول إن احنا ننظم موضوع العصف الذهنى والحصول على أفكار والنقاش فهذا التنظيم الدول الأخرى دول نامية ودول متقدمة عملت مؤسسة بتسميها المجلس الاقتصادى أو الاستشارى أو المجموعة الاقتصادية الاستشارية حتى يتم فيها مناقشتها لكن لا نستطيع أن نناقش ذلك بصورة دورية في الصحف يعنى طبعا عملية مرهقة ولن نصل إلى نتائج ولكن من خلال هذه المؤسسة من خلال هذا المنتدى نستطيع أن نحصل على الآراء التي يعنى أو نعرض أفكارنا ونحصل على آراء ونمضى في البرامج يكون فيها مجموعة من التوافق المجتمعى وحضرتك ذكرتى يعنى فعلا مشكورة المجتمعى فيها سيكون ممثلين المجتمع المدنى ، مجتمع رجال الأعمال مثل هذا المجلس
رشا نبيل: طب مش هقدر أخلص من النقطة دى يعنى أخلص من النقطة بتاعت الاقتصاد من غير ما نطرح الأفكار المطروحة الخاصة بفكرة الضرائب التصاعدية الناس بتقول لحضرتك غير منطقى حتى الآن أن يتساوى جميع المصريين أيا كانت دخولهم في الأعباء الضريبية فكرة الضرائب التصاعدية هي فكرة في صلب العدالة الاجتماعية كيف يمكن لرئيس حكومة أن يظل مساوى على قواعد أو محتفظ بقواعد قديمة في نظام ضريبى لم يكن بأى حال من الأحوال يراعى العدالة الاجتماعية في توزيع الأعباء ، الأمر الآخر أيضا له علاقة بالدعم فكرة إن طول الوقت هناك فئات تستفيد من الدعم وهى غير مستحقة له
د.هشام قنديل: أعتقد إن احنا هنضم حضرتك للمجلس الاقتصادى يعنى لإن طبعا هي دى الحاجات اللي احنا بنناقشها وأشياء أخرى يعنى كما ذكرت إن لابد من ترشيد النفقات وزيادة الإيرادات أنا عايز أقول إن الاقتراض وسد عجز الموازنة وحده غير كافى بالمرة فلابد كما ذكرت يا أستاذ مصطفى موضوع لابد من توفير حوافز للاستثمار ولابد من تشجيع الاستثمار يمكن السيد وزير الصناعة ذكر في الأيام الماضية قيل ماضيا أنه هيطرح 14 رخصة للأسمنت قريبا والطاقة بتاعتها لن تكون طاقة عادية هتكون طاقة متجددة أو ممكن تكون طاقة من موارد طبيعية لكن لن تلتزم الحكومة بتوفير الطاقة فدى فرص عمل برضه بعض الحوافز في المناطق الصناعية والمناطق الحرة الأجواء الموجودة حاليا حتى بدون تعيينات تشريعية ليست سيئة لكن ضمن الأشياء التي كلف بها كل الوزراء المنوطين إن هم يضعوا تعديلات تشريعية وحوافز لمستثمرين حتى يعنى تدفع بنظام الاستثمار في مصر يمكن من أهم الأشياء اللي اشتغلنا عليها الحقيقة من أول يوم ، من أول يوم فعلا يعنى يوم السبت بعد الظهر هو ضرورة تسوية المنازعات لإن المستثمرين اللي ما كانش لهم أي ذنب في أعمال الفساد لكن مشروعاتهم بالمليارات
رشا نبيل: المستثمرين العرب
د.هشام قنديل: العرب التي توفقت يجب أن نأخذها مأخذ الجد وأن أحل هذه المشاكل لإن دى بتعطى صورة جيدة هو نفسه كمستثمر بالتأكيد استثماراته متوقفة لابد أن يضخ استثمارات جديدة وسوف يعطى صورة سلبية لزملاؤه
رشا نبيل: لو رجع للتحكيم الدولى بالمناسبة يا دكتور فيه تكهنات كثير بتقول إنه مش هيبقى لصالحنا
عمرو الشناوى: التحكيم الدولى حتى لو كان لصالحنا فهو يعطى انطباع سيئ جدا في المستقبل
د.هشام قنديل: من هذه الروح أعتقد سوف تصدر أخبار طيبة قريبا لحل بعض المشاكل اللي هي مشاكل يعنى مستعصية لكن مع حل هذه المشاكل وكما سمعت من الزملاء في المناطق العربية في الدول العربية بالتأكيد سوف تساعد في ضخ الاستثمارات يعنى عايز أقول لحضرتك عجز الموازنة في حد ذاته شئ عاجل ويتطلب قروض ويتطلب إجراءات لكن غير كافى لابد من دفع الاستثمار لا نستطيع أن ننتظر حتى ندفع الاستثمار حتى يسد عجز الموازنة فالاثنين مع بعض في غاية الأهمية
عمرو الشناوى: محتاجين إجراءات سريعة ومحتاجين فكر أكبر
د.هشام قنديل: في جميع الأحوال نجاح ده ونجاح ده الأمن مطلوب بصورة هامة جدا
عمرو الشناوى: دكتور هشام قنديل رئيس الوزراء ، رئيس مجلس الوزراء يعنى وقتنا تقريبا خلص فاضل 5 دقائق ومحتاجين نتكلم في حاجات كثيرة قوى الحقيقة ولكن خلينا نتكلم في صورة تلغرافات السياحة أحد أعمدة الاقتصاد المصري المهمة جدا لقطاع عريض من هذا المجتمع نظرتك إيه للسياحة ؟
د.هشام قنديل: السياحة أحد القطاعات اللي أنا بقول إن لها ثمار يعنى واضحة ويمكن أن نقطفها سريعا جدا يعنى هناك دول
عمرو الشناوى: السياحة الترفيهية وللا الثقافية وللا الاثنين
د.هشام قنديل: الاثنين بس عايز أقول إن السياحة الترفيهية الحمد لله الأمور معقولة فيه إشغالات جيدة جدا يمكن بس حسب ما أنا فاهم من الزملاء في السياحة المنتج السياحى بيبيع برخيص شوية لكن مثلا النهاردة أنا علمت من السفير التركى أن هناك رحلات تبدأ في أكتوبر 8 رحلات كل أسبوع بتأتى من تركيا لشرم الشيخ والغردقة طبعا ده معناه انتعاش سياحة ليس من تركيا فقط لكن من دول أخرى فالسياحة الشاطئية بتمشى بصورة مرضية ممكن التحسين لكن السياحة المتوقفة الحقيقة هي السياحة الثقافية عشان كده الدكتور مرسى زار الصعيد الأقصر وأسوان ، عشان كده أنا رحت الهرم ، عشان كده احنا أصرينا على الحقيقة أنا أثمن على جهود وزير السياحة السابق والدكتور الجنزورى
رشا نبيل: السيد منير فخرى عبد النور
د.هشام قنديل: آه كان إصرار على إنه يمشى المركب النيلى رحلة نيلية من القاهرة لأسوان أول مرة من 15 سنة
عمرو الشناوى: ثقة في الأمن المصري الحقيقة
د.هشام قنديل: ثقة في الأمن المصري وبعدين رسائل متعددة يعنى أنا بقول حضرتك إن شاء الله لما ننجح في رفع التحذير عن السفر للقاهرة وللصعيد هناك يعنى مبانى جاهزة للفنادق ، هناك عمالة مدربة ، هناك مرشدين ، هناك معابد وآثار ، هناك نهر النيل فدوة يتم توفير فرص عمل فورية فاحنا بنعمل عليها بجهد السيد وزير السياحة في الصين وأنا مع الدول التي تهتم بالسياحة الثقافية نعمل معهم ونأمل إن هذه الجهود تكلل على جميع الأصعدة الحقيقة يعنى على مستوايا أنا وعلى مستوى وزير الخارجية وعلى مستوى رئيس الجمهورية لإن احنا مدركين تماما إن هذا القطاع قطاع حيوى ويعطى ثمار فورية
رشا نبيل: صحيح وخاصة إن العاملين في مجال السياحة قالوا لي مرة ما هي الدول بتغير وجهاتها السياحية مش هتستنى لما انتى تعملى أمن والدولة بتاعتك تبقى آمنة وتبعت لك أفواج بتغير على طول الوجهة السياحية بتاعتها وعشان حضرتك تستعيدها ثاني ده محتاج فترة لكن المسألة الرئيسية في السياحة هي الأمن نرجع للملف اللي قالق ناس كثير وهو الإعلام هناك مخاوف من أن تكون هناك قبضة جديدة على حرية الإعلام والإبداع في مصر هذه مخاوف يشترك فيها الجميع وربما كانت بعض رسائل في الفترة القادمة التي أصابت الإعلاميين بحالة من الربط بما يحدث
د.هشام قنديل: أنا ما اعرفش إذا كان السيد وزير الإعلام قال لكم كده وللا لا بس أنا في مقابلة معاه أيام يعنى السهرات لما كنا بنشكل الحكومة قلت له معالى الوزير أو إن شاء الله إذا كلفت بهذا الملف أرجو أن تعمل على أن تكون آخر وزير للإعلام فلابد من قلت له طبعا ده موضوع لا يتم بطريقة فوقية ولكن يأتى من يعنى الإعلاميين نفسهم كيف يريدون أن يدار هذا المرفق الهام والحيوى والذى قد يؤثر سلبا أو إيجابا على الأمن القومى المصري يعنى أنا يعنى بنسمع وعايز أقول إن الإعلام ساهم وأنا يعنى آسف إن أنا أقول كده ساهم في ضبابية المشهد في فترة من الفترات بصورة كبيرة جدا وبنتطلع له في الفترة القادمة أن يساهم بصورة إيجابية في إظهار ما يتم على الأرض لمصلحتنا جميعا
رشا نبيل: ادونا معلومات يا دكتور هشام ما أنا أصلى برضه هتكلم عن الجانب الموضوعى في هذه المسألة نحن كإعلاميين نتحرك من خلال معلومات ادونا معلومات ونحن مسئولون عن توصيلها للرأي العام لكن ما يكونش احنا أصلا عندنا حالة ضبابية في المعلومات فبنبدأ نلجأ لباب التكهنات والتوقعات وده اللي بيزعل الناس مننا
عمرو الشناوى: تطلب إيه من الإعلام يا دكتور هشام
د.هشام قنديل: أنا أعتقد إن أنا يعنى مجيئى النهاردة لمبنى الإذاعة والتليفزيون وحديثى مع حضراتكم إن شاء الله تكون بداية صفحة جديدة للتواصل ما بيننا وما بين الإعلام ، التواصل والتصارح والمكاشفة حتى نقضى على هذه الضبابية يعنى تكون ذهبت بلا رجعة أطلب من الإعلام إن هو يقول الحقيقة يعطى الصورة بجوانبها ليست فقط الصورة السلبية لكن أيضا الصورة الإيجابية حتى نشجع بعضنا البعض
عمرو الشناوى: الصورة الكاملة الواضحة بشكل محايد ونزيه من خلال هذا الإعلام
رشا نبيل: عشان الوقت أنا بس عايزة أقول لحضرتك حاجة لو الحكومة بتشتغل والإعلام ده قدم صورة غير صحيحة صدقنى يا دكتور هشام الناس هترفض هذا النوع من الإعلام
د.هشام قنديل: معلش هدى لحضرتك مثال أثناء مظاهرات 24 أغسطس كان هناك 50 فرد أمام المنطقة الشمالية و2 مليون على البحر يعنى 2 مليون على شواطئ اسكندرية يستمتعون بالشواطئ و50 متظاهر الكاميرات لم تركز إلا على ال50 يعنى هذا مهم وهذا أيضا وقع هذا واقع ومهم وهذا واقع ومهم يعنى
عمرو الشناوى: هي مدارس يا دكتور هشام ونتمنى إن المدرسة يعنى الإيجابية لمصر هي اللي تتغلب في النهاية من خلال الإعلام المصري والحكومى وحضرتك في التليفزيون المصري الرسالة اللي توجهها لكل الشعب اللي بيشاهد هذه الحلقة الآن
د.هشام قنديل: يعنى أنا عايز أقول يعنى للشعب المصري حكومة وشعب نحن في قارب واحد هذا القارب هو طافى وسوف يطفوا ويصل بإذن الله إلى بر الأمان بدعو جميع طوائف الشعب المصري وأنا طبعا لما أدعو الشعب المصري أنا فيه إلى العمل بجد وإخلاص وحب لرفعة شأن هذا الوطن اسم مصر ذكر في التوراة ذكر في الإنجيل ذكر في القرآن يستحق منا إن شاء الله أن نعمل جميعا لرفع شأن هذا الوطن أنا ذكرت ده وأذكره ثاني نحن حاليا نصنع التاريخ نصنع مستقبل مشرق .