الاربعاء : 30/9/2011 مفيد فوزى : دعونا نتساءل فى هدوء هل هو عدو أم صديق ؟ هل هو خير أم شر هل هو أداة بناء أ, معول تدمير ؟ هل هو نبع تفاؤل أم بؤرة فشل ؟ هل هو إبحار فى المعرفة أم سقوط فى الهاوية ؟ ههل هو رياضة أم إدمان ؟ الفيسبوك فى حديث المدينة فاصل مفيد فوزى : لقد وصل عدد مشتركى الفيسبوك النشطين عبر العالم مؤخرا إلى 500 مليون شخص وتقدم قصة نجاح الفيسبوك وتحوله إلى ظاهرة إجتماعية وسياسية وثقافية دليلا على الدور المتعاظم الذى تلعبه ثورة الإتصالات فى عالمنا المعاصر حسام صالح يعنى جمعية إنترنت مصر ؟ هل مصر أعطتك تفويضا كل الفيسبوك اللى يبلغ 7 مليون أكونت أعطوك تفويضا لعمل جمعية بأسمهم ؟ حسام صالح: هما مدونيش تفويض هو أحنا عملنا دعوة لإنشاء جمعية لكل المهتمين بالإنترنت فى مصر مفيد فوزى : ما الهدف ؟ حسام صالح: الهدف هو أحنا نعرف نناقش مشاكل الإنترنت نعرف نناقش مستقبل الإنترنت النهاردة أحنا عندنا شركات بتقدم الخدمة مفيد فوزى : مقولتليش ليه نعرف مخاطر الإنترنت ؟ حسام صالح: لأن مخاطر الإنترنت بتيجى مع الإستخدام فأنا عايز الناس تستخدم وعايز الناس تتعمق فى الإستخدام تستخدم تطبيقات وبعد ما تستخدم التطبيقات أبتدى أشوف أيه المخاطر إنما مش عايز أبتدى بالمخاطر الأول مفيد فوزى : خلينى أنا أبدأ بالمخاطر الأول يقولون أن الفيسبوك أثار تشويها للشخصيات والإشاعات لما يطلع إشاعة على فنان أنوا مات والواحد يبقى ربنا مديله مساحة من الحياة أكبر حسام صالح: بس هو لا يخف بردوا هكتب على الفيسبوك أنوا خف مفيد فوزى : يعنى أنت معندكش مانع أنوا الناس يحصلها قلق وفزع جنونى لخبر الوفاة هو المقصود أنك تقول أنوا خف خلاص وحى ؟ مفيد فوزى : يعنى أنت معندكش مانع يا حسام أنوا الناس يحصلها قلق وفزع جنونى لخبر الوفاة ومبسوط أنك هتقول أنوا خف وأنوا خلاص حى ؟ حسام صالح: ما أحنا شايفيين أنوا الفيسبوك هيوصل للناس الإشاعة الغلط مفيد فوزى : الفيسبوك بوك وصل الإشاعة الغلط أليست هذه من مخاطر الفيسبوك ؟ وأنا لست ضده أنا بشوف أنوا هذا الفيسبوك أو هذا العالم الإفتراضى هو عدو وصديق خد بالك أنوا أنا قلت عدو الأول ؟ حسام صالح: أنا بقى شايفه الصديق قبل العدو مفيد فوزى : أحترم رأيك حتى لو رفضته الا تشعر أنوا فى حملات مرشحى الرئاسة المحتملين القادمين ستحدث أشياء كثيرة تضر هؤلاء المرشحين حسام صالح: بالتأكيد أه مفيد فوزى : زى أيه قولى ؟ إدينى أمثلة ؟ حسام صالح: يعنى على الفيسبوك بوك الموضوع بقى سهل قوى إننا أطلع لحضرتك فيديو لقعدة كنت قاعدها من 12 سنة أطلعلك جزء من خطاب أنت كتبته أو قلته أو كتبت مقالة فى جرنال مغمور من 20 سنة وأطلعهالك فى توقيت تكون أنت قلت جملة وأنت بتعمل مرشح الرئاسة وأنت بتعمله رحت قايل جملة أقوم أنا جايبلك عكسها من حاجة أنت قلتها وأقولك شوف التناقض وأفرج الدنيا كلها مفيد فوزى : هل يدرك المرشحين للرئاسة هذه المخاطر الصادة ؟ حسام صالح: أعتقد لو هما مش مدركينها سيطولهم العدو قبل الصديق مفيد فوزى : هل عندهم القدرة للرد على هذه المخاطر ؟ حسام صالح: بقى فيه متخصصين دلوقتى كان زمان الإعلام هو الإعلام الأوحد أنوا أنا بتكلم وبيروح للشخص وخلاص دلوقتى الإعلام فيه ديالوج رسمى وديالوج غير رسمى الديالوج الرسمى بنكلم بعض ونسمع زى ما بنعمل برنامج على الهوا ونسمع الناس على الهوا إنما بقى فيه ديالوج غير رسمى اللى هو بقى كل شخص موجود على الفيسبوك ال7 اللى موجودين على الفيسبوك ال 7 مليون اللى قاعدين على الفيسبوك ال7 مليون دول كلهم بقم إعلام كلهم بقم جهاز تليفزيون كلهم بقوا يقدروا إنهم يقولوا الجملة ومش مستنى الشخص اللى قدامه هيقول أيه ؟ هو بيتكلم وهو عارف كلامه واصل لكل الناس كأنه قاعد فى محطة تليفزيون فى برنامج مفيد فوزى : أنت من فرط تعاملك فى الأروبت مع عمرو أديب واضح أنك إكتسبت مهارة إنك تكلم الكاميرا وماتتواصلش معايا وأنا اللى قاعد معاك صح ؟ حسام صالح: الكاميرا مفيد فوزى : لأ ما أنا بكلمك يعنى أنت وأنت بتكلمنى الكاميرا بتاخد وجهة نظرك حتى فى نظرتك ليا حسام صالح: علشان فى ملايين قاعدة تتفرج عليا مفيد فوزى : ماهى معايا حسام صالح: أه بس هما بيقرونى فى الفيسبوك لوحدى مفيد فوزى : أه بس أنا الجسر مفيد فوزى : نهى أفادك بى أيه الفيسبوك ؟ نهى: هقول لحضرتك يمكن كانت أول حاجة الوصول للصفحات للأصدقاء اللى بيتعامل معاهم أولادى مفيد فوزى : أولادك أعمارهم قد أيه ؟ نهى: 14 سنة و11 سنة مفيد فوزى : دا أمر خطير البنت عندها كام ؟ نهى: 14 مفيد فوزى : أه والولد 11 نهى: والولد 11 مفيد فوزى : وعندهم كمبيوتر يخشوا عبى الفيسبوك ؟ نهى: عندهم كل واحد الكمبيوتر الخاص بيه وعندهم الأكونت بتاعة الفيسبوك وعندهم كل حاجة مفيد فوزى : دخلتى على المواقع بتاعتهم بإذنهم نهى: طلبت من كل واحد أنوا يضفونى كصديقة الأول مفيد فوزى : بمعنى أيه ؟ نهى: بمعنى أننا وصلت الرسالة بطريقة مش مباشرة بدل ما أقتحم صفحاتكم دخلونى بمزاجكم مفيد فوزى : قوليلى قابلوها إزاى ؟ نهى: إستنيت يعنى شوية كده مفيد فوزى : قوليلى الشوية اللى إستنيتوهم دول كان فيهم الجدل شكله أيه ؟ كان دايما الدكتور أحمد عكاشة شديد المثالية وكنت أقوله يا دكتور عكاشة وأنت بتكلم الناس كلمهم بكل الوقاعية المطلقة وأظن أنوا الفيس بوك هو العالم الإفتراضى ولكن فيه الواقعية بتاعة عرض أى شيىء هنا بسألك قوليلى أيه المناقشات اللى حصلت بينك وبين الأولاد ؟ نهى: أول حاجة لقيت إمتعاض فى وشوشهم بشكل قوى جدا وإتخاصمت يومين مفيد فوزى : كمان جوا البيت نهى: طبعا مفيد فوزى : قوليلى نظرة الأب أيه ؟ نهى: لأ هو كان معترض على الفكرة تماما مفيد فوزى :شفتى لما إبتدينا ندخل لجوا إنكشفت الأمور يعنى الأب قال لأ نهى: طبعا مفيد فوزى : ليه ؟ نهى:خوفا من عالم الفيسبوك مفيد فوزى : إعترض ليه فهمينى ؟ نهى: صفحة مخيفة وعالم مخيف كل شيىء فيه ممكن مفيد فوزى : أه اليومين دول اللى كان فيهم الإمتعاض ده كان أيه حجتهم فى النقاش ؟ قبل ما يقبلوكى صديقة ؟ نهى: الخوف من إنى أكون متداخلة معاهم فى حياتهم وأسرارهم دايرة الخصوصية الللى عند كل إنسان أللى هو بيبقى حابب إنوا يبقى عنده حيز من الخصوصية الأم هتدخل الحيز ده مفيد فوزى : وأنتى بنت كان ليكى حيز خصوصية ؟ نهى: طبعا مفيد فوزى : كنتى بتخافى حد يدخل عليه ؟ نهى: أكيد كانت أغلب خلافاتى مع أهلى وخناقاتى إختراق هذ الحيز مفيد فوزى : مين أللى كان واقف معاكى نهى: والدى مفيد فوزى : ووالدتك نهى: ضدى على طول الخط مفيد فوزى : ضدك بمعنى أيه ؟ نهى: الإعتراض الدائم خوفا على أى ضرر يوصلى أو حاجة تألمنى أو تضايقنى فى حياتى مفيد فوزى : أنتى لما كبرتى وإتجوزتى وخلفتى وجبت ولاد أيه الخوف اللى أنت خايفة عليه ؟ نهى: وجود أسرار مفيد فوزى : وضحيلى أكتر يعنى أيه وجود أسرار ؟ نهى: المجتمع بقى مجتمع مفتوح قوى والحياة فيه مبقتش سهلة والأفكار مش سهل الوثوق فيها لو أنا مفيش ما بينى وما بينهم حوار مفتوح ممكن تحصل خطوات هما فاكرينها إنها حاجة سهلة وبسيطة تسبب فى ضرر كبير على الأقل نفسيتهم ودى مش حاجة صغيرة مفيد فوزى : يعنى أنا أحد الناس شاب يعنى بقوله أيه الموقع أللى دخلت عليه ؟ قالى موقع الأديان أيه رأيك أنوا بعض ما فى هذا الموقع يدعوا للكفر ؟ نهى: دا موجود وفى أفكار كتيرة جدا فيه ناس عندها أفكار إيجابية جدا للتطوير وللتحسين ومناقشة فئات ملهاش رؤية داخل المجتمع أو مبنبصلهاش وزى الأطفال اللى عندهم توحد دى مواقع موجودة وفيه مواقع تانية للأصدقاء وللزواج ولمجموعات المطلقين والمطلقات الخاصة وعفوا فى الكلمة حالات الشذوذ اللى موجودة فى المجتمع كل الحاجات دى موجودة مفيد فوزى : وفيه أيضا تذويب القيم نهى: وفيه إنتحال للشخصيات أكبر وشخصيات أصغر أصلا أبنى علشان يدخل على الفيسبوك فيه نقطة مهمة جدا عنده 11 سنة ما ينفعش يعمل أكونت من غير ما يعمل إميل والأميل يمنعه من الدخول قبل سن معين فهوا علشان يعمل الصفحة بتاعته كأصدقاء غير سنه مفيد فوزى : غير تاريخ ميلاده ؟ نهى: طبعا طبعا هو من مواليد التمانينات وحاليا وليس 2000 جوا الإميل بتاعه جو الفيسبوك مفيد فوزى : علشان يسمح يدخل فى الإشتراكات نهى: بالظبط مفيد فوزى : طيب لما دخلتى على العالم بتاعهم هل هما كانوا أدركوا هذا فخدوا حذرهم ؟ لأن الكلام اللى بتقوليه يهم كل بيت مصرى نهى: هقول لحضرتك حاجة بعض أصدقائهم عملوا الخصوصية على الصور وعلى الصفحات بتاعتهم أنوا محدش يشوفها غير بإذنهم مفيد فوزى : بعض أصحابهم ؟ نهى: أيوه وهما فيه بعض التعليقات لما أنا بديت أدخل وأعلق على الجمل اللى بيكتبوها بدأت ما تتكتبش بعد كده زى مثلا حد منهم مضايق فيكتب فى بنوتة صغيرة كاتبة أى هيت ماى لايف فدى صيدا مفيد فوزى : هسألك سؤال لماذا النساء أكثر ترددا على مواقع الفيسبوك من الرجال ؟ نهى: فضى مفيد فوزى : فضى نهى: فضى فكرى وليس فضى وقت مفيد فوزى : فضى فكرى هو دا اللى مخلى مواقع النساء أكثر من الرجال نهى: لأن أحنا فى تربيتنا ما أثرناش أنوا المرأة لازم يكون ليها محور فى الحياة ليها هدف أحنا حياتنا دايما مقفولة أنا عندى بيت وولاد واللى متجوزتش واللى مخلفتش طب واللى إتجوزت وخلفت ومكانتش مبسوطة مفيش حيز تانى جوا المجتمع يبقى ليا فيه دور فبالتالى الحل الوحيد هو أنوا أنا أقعد أتكلم أقعد أقول أنا حاسة بى أيه وحد يسمعنى مفيد فوزى : أه يعنى هو وسيلة لإخراج ما بداخل النفس نهى: أه وحد يرد يقول معلش وحد يرد يقول الله وحد يقول كل سنة وأنتى طيبة النهاردة محدش إفتكر يعنى أنا بطلب من الأخرين إنهم يفتكرا أنوا أنا موجودة ولكن بطريقة سهلة قوى مفيد فوزى : هل هو إثبات الوجود بشكل عام نهى: لأ إثبات أنوا أنا ليا إحتياج مفيد فوزى : أيوه عندك أنت هل هذه الإحتياجات اللى بتعملها البنت أو الولد على الفيسبوك مش موجودة فى الحياة الخاصة ؟ نهى: أو مش قادر يوصل أنوا حد يرد عليه يقولوا أزيك عامل أيه ؟ من غير ما يكون فيه سبب آخر مفيد فوزى : أو ممكن يكون فيه أب مشغول جدا فى حياته لدرجة أنوا لا يعطى الولد أو البنت كمية حنان نهى: حتى لو موجودين فكرة أنوا أنا أخد أبنى أو بنتى أحضنهم أو أعزمهم النهاردة على كوباية شاى زى ما ممكن أخد حد من أصدقائى أو صديقاتى ما بعملهاش مش قصدى أنا أنا بتكلم على أى أم مش بدفع فلوس وبجيب هدوم وعندى مصاريف تانية ولسه كمان هاخدك وأعزمك بره مفيد فوزى : النقطة بقى الجوهرية هى أنوا ممكن الأب والأم يعبروا عن حنانهم وإحتياجات البنات والأولاد ماديا لكن مش إنسانيا يعنى يدفع المدرسة ويدفع الباص نهى: ودى مش كفاية أحيانا أنا بكتب لبنتى على الفيس بتاعها مريم بحبك وبكتبهالها على الصفحة اللى صحابها بيشوفوها علرف لما تكون إديتها حاجة كبيرة قوى مفيد فوزى : وأنتى يا نهى لو أخدتيها فى حضنك وقلتلها بحبك مش دا أقيم من النت ؟ نهى: أحنا بنحب نتيجة للمجتمع اللى أحنا فيه الشو يعنى أنا لما بدخل والاقى بنتى حاطة 350 صورة ليها والاقى صحابها بيحطوا صور بيبقى شونج مره على البحر مرة بلبس مفيد فوزى : هل أقدر أستنبط من كلامك ده أنوا الفيسبوك هو الشو ؟ نهى: مساحة منه كبيرة مفيد فوزى : مساحة من الشو مفيد فوزى : يقول الدكتور جيرالدوا الأستاذ فى كلية علم النفس بجامعة تروفان الفرنسية وصاحب كتاب مخاطر الإنترنت إن هذه الشبكة تم الكشف عنها بالتحديد فى مايو 2001 وهى عبارة عن مجموعة شبكات يديرها مختصون نفسانيون إسرائيليون مجندون لإستقطاب شباب العالم الثالث وخصوصا المقيمين فى دولة الصراع العربى - الإسرائيلى فاصل مفيد فوزى : أستاذ محمد بسيونى هاخدك من المعشوق تعبير المعشوق دا دقيق تعبير المعشوق دا دقيق ولا مبالغ ؟ محمد بسيونى : صحيح المعشوق لكثيرين مفيد فوزى : المعشوق لكثيرين محمد بسيونى : من قبل الثورة مفيد فوزى : يعنى قبل الثورة بكتير الثورة كان فيها عدد قد أيه من الناس ؟ المشتركين فيه محمد بسيونى : 5 مليون من مصر مفيد فوزى : بعد الثورة بقوا كام ؟ محمد بسيونى : هو سمعت 20 بس مفيش حاجة دقيقة يعنى مفيد فوزى : هل هو عدد دقيق؟ محمد بسيونى : هو مفيش إحصاء رسمى وخاصتا أنوا فيه مصريين كتير قاعدين بره بس هما فى الأخر مصريين بردوا وشاركوا فى الثورة الإليكترونية يعنى فيه ناس كتير شاركت من بره مصر إن هما زودوا عدد النبرز اللى شاركوا فى الثورة خلو الناس متخافش وهى نازلة يعنى الفيس بوك أنجح الثورة مش هو اللى صنع الثورة نجحها إزاى ؟ هو خلى الناس متخافش هو خلى الواحد وهو نازل عارف أنوا البلد كلها نازلة بكرة الناس شافت على الفيس فيه ملايين الناس شاركت يعنى الفيسبوك ما صنعش إحتقان هو الإحتقان كان موجود بالفعل والناس عايزة تعمل ثورة بس مش عارفة تعملها إزاى ؟ الناس مش عارفة تتجمع إزاى ؟ يعنى كانوا كل شوية بيتجمعوا فى ميدان التحرير ما قبل 25 يناير ليتم قمعهم أو إحتوائهم بطريقة ما إنما الناس اللى عايزين يعملوا ثورة مش لاقيين حاجة تجمعهم فى يوم واحد يتفقوا عليها لغاية ما جه الفيسبوك اللى قال للناس أحنا ممكن ننزل فى يوم واحد مصر كلها تبقى عارفاه فلما عملوا 25 مصر كلها عرفت إنما مصر كلها ما إتشجعتش إنما يوم 28 الناس شافت 25 ف 28 ليه لأ كلنا هننزل فى يوم واحد فدا السبب لنجاح الثورة الفيسبوك مفيد فوزى : أيه الهاجس وراء أنك عملت كتاب أسمه دولة الفيسبوك ؟ محمد بسيونى : هو الفترة دى بعد مظاهرة 6 إبريل أحداث 6 إبريل بدأ يبقى فيه شيوخ يحرمه الفيسبوك هى طبعا السبب سياسى أولا وأخيرا طبعا الفيسبوك فيه حاجات إباحية كتير مفيد فوزى : أمتى الأزهر كان ليه موقف ؟ محمد بسيونى : لا الأزهر ماكنش ليه موقف إنما بعض الشيوخ السعوديين فيه شيخ سعودى بالفعل فى يناير اللى فات لأ اللى قبله أصدر فتوى أنوا إستخدام الفيسبوك حرام لأنوا جمع البنات بالصبيان وحاجات زى كده كنت حتى رديت على الفتوى دى الفيسبوك أداة زى أداة ممكن نستخدمها كويس وممكن نستخدمها وحش يعنى زى السكينة ممكن الواحد يستخدمها يقطع بيها حاجة زى التليفزيون ممكن يكون له دور إيجابى أو دور سلبى وكده ودور الفسيبوك لما بدأ يبقى قوى جدا ودور الفيسبوك لما بدأ يكون قوى جدا فى دور كبير فى فى السعودية وسوريا رغم أنوا فى السعودى بيقوم بدور هناك الناس قدرت تخترق اللى الحكومة عاملها ودخلت على الفيسبوك وبيتواصلوا بيه مفيد فوزى : أفادك بى أيه الفيسبوك ؟ محمد بسيونى : إتعرفت بناس كتير بشوف مبادرات الشباب بيقوم بيها وبشارك فيها يعنى كل لما عالم أو صاحب فكرة ناجحة والإعلام بيهتم بيها تلاقى الفيسبوك بينزلها لأرض الواقع ويوصل الفكرة دى لملايين الأشخاص مفيد فوزى : هل الفيسبوك عمل إثراء ثقافى ؟ محمد بسيونى : مرحلة الإثراء الثقافى الفيسبوك عمل حاجة مهمة للقراية يعنى الشباب بالذات كان بدأوا ينسوا حاجة أسمها القراية إتعدودوا أنوا هما يشوفوا المديا إنما الفيسبوك رجعهم إن هما يقروا هو بدأت الأول اللى هو يقرا حاجة لطيفة من صاحبه فتعود أنوا يقرا ومن بعدها صوتوا بيرجع تانى يعنى أحنا توقعنا أنوا الكتب دى فى طريقها للإندثار فوجئنا بعد الفيسبوك الكتاب الورقى الشبابى لو تلاحظ من بعد 2006 بدأ بيطلع غير قبل 2006 كان أقل مفيد فوزى : أيه السبب ؟ محمد بسيونى : أنوا الناس إبتدت تقرأ على الفيسبوك مفيد فوزى : دكتور جمال مختار لماذا كتاب بعنوان الفيسبوك عدو أم صديق ؟ جمال مختار : لأن أحنا حسينا أنوا لينا دور كبير فى توعية المجتمع أنوا ياخدوا بالهم من امختار التى تحدث من إستخدام الخاطىء الغير أمن للأنترنت لأن عائلات مش فاهمة حاجة لأن أولاد بتضيع لأن حالات كتيرة قوى من النصب وإنتحال الشخصية ومن سرقة البروفيل وإثارة فتن ونعرات ملهاش لزمة التوقيع بين دول وبعض مناتشات كورة تتوقع فيها بين دول وبعض فلقينا فيه كمية كبيرة جدا من المساوىء يجب التنبيه عنها ولكن ليس أنوا أحنا ضد الفيسبوك ولا حاجة ولكن أحنا بنقول يا جماعة خلو بالكم يا أهالى خالو بالكم يعنى من قبل الثورة قلنا يا حكومة يا أزهر يا بوليس خلو بالكم مما يحدث وخليكوا متفاعلين وإتكلموا مع الناس باللغة اللى الناس يتكلمون بيها كل ساعة واجب إجتماعى أنوا أحنا نطلع الكتاب كمجموعة من الناس مفيد فوزى : فى عبارة وردت فى كلامك بتقول ننبه الناس لنصب عبر الفيسبوك جمال مختار : أول حاجة من السهل أعرف الجريتد كارت رقمه أيه الجريتد كارت بتاعك وعلى بال من أنت تلحق والبنك يلحق هعرف أعمل عملتين تلاتة تانى حاجة كانت العملة المتعارف فيها فى الفيسبوك قبل كارت الشحن بتاعة الموبايل فالبنت تقوله أبعتلى كارت شحن وأنا أكلمك فيرى أو أبعتلى كارت شحن وأنا فتحالك الكاميرا هلقوتلك أو ساعات تعمل كده وساعات ما تعملش كده أو واحد يعرف واحدة ويعمل نفسه بيحبها وولهان فيها ويبتدى يسحب منها فلوس كان عندى مشكلة أنوا فيه واحدة ضحكت على عدد كبير من الشباب كانت بتخليهم يقعوا فى حبها بطريقة ما وبعد كده أنا مضايقة أصل أنا عندى مشكلة وبعدين تبدى ناس تطلع فلوس وطلعت واحدة من النصابين فأحنا قلنا يا جماعة خلو بالكم وخاصتا العاطفيين قوى كعرب مش كمصريين حاجة صعبة قوى أنوا من غير ما أعرف حد وقعدت معاه على الشات خلاص بقيت صاحبها ومتعاطف معاها وطلبت منى فلوس رحت مطلع بمنتهى الأدب فدا كان أحد أنواع النصب ونبهنا لأنواع كتيرة وكل يوم بيحصل حاجة مفيد فوزى : هل البنت المصرية بتتعرض لهذا ؟ جمال مختار : بنسبة كبيرة جدا مفيد فوزى : بسبب أيه غياب البيت؟ جمال مختار : هقول لحضرتك حاجة البنت قاعدة قدام بابها فى الريسبشن أو فى الصالة وفاتحة اللاب توب بهذا الشكل هو قاعد مش شايف الكوارث اللى عمالة تحصل قاعدة قدامه وفاتحة اللاب توب أو الولد وعاملين يشتغلوا يا أما بتتشات يا أما واحد بيضحك عليها وواحد بينصب عليها وواحد بياخد صورها علشان يهددها بيها أو يركب عليها صور كل دا شغال وهى قاعدة فى البيت المصرى قدام الأب وقدام الأم والتليفون زمان كان التليفون بيرن بنعرف دلوقتى التيفون فى جيبها بيرن سايلاند يعمل فايبرجين تقوم واخدله على الحمام أو على البلكونة أو فى أوضتها وشغالة مع واحد ما نعرفش هو بيعمل أيه أو واحدة ما نعرفش بتبثلها سموم شكلها أيه ؟ ما تيجى نجرب شوية حاجات ما تيجى نعمل مش عارف أيه ما تيجى نجرب نخرج الخروجة دى بالمخدرات دى بالشرب ده بأى حاجة ممكن تحصل فأحنا كنا بنقول البنت المصرية بنسبة كبيرة جدا معرضة حصل حاجات كتيرة جدا بردوا كانت من خوفنا قلنا يا جماعة خلو بالكم كمان أحنا قلنا يا أستاذ مفيد للأم المنصرية المودرن هنا اللى شايفة نفسها صغيرة فى السن وقريبة من بنتها أنتى ممكن تكون فى البيت العلة وتكونى مش واخدة بالك يعنى أنتى مش كل اللى هيوصلك هو اللى بيوصلك لأ أنتى لازم يكون ليكى مجهود شخصى الهوم وورك بتاعك أنك تشوفى وتتحاورى وتعرفى أكتر ممكا يعرض عليكى علشان تمنعى كوارث أنها تحصل قد تمنعى كوارث عن طريق صحابتها الأم عاداتا أقرب للبنت من الأب فى مرحلة عمرية معينة أحنا كنا عايزين الأم المصرية فوقى أصحى والبيت المصرى لأن التحكم فى أى حاجة سيئة مش هينفع أنك تجيب بوليس أنت محتاج كام جندى علشان تسيطر على 7 مليون عضو فى الإنترنت لكن ال7 مليون دول هم 7 مليون بيت فالبيت ده فى 7 مليون أم وأب وأخوات أى حد يقدر يوجهم أى حد يقدجر يقول حاجة أى حد يقدر يمنع هيمنع أمتى ؟ لما يعرف أنوا فيه خطر هيعرف خطر أمتى؟ كل واحد يقوم بدوره زى ما حضرتك بتعمل دلوقتى بتبصر الأسرة المصرية خدوا بالكم أنوا فيه حاجات أكتر بكتير من اللى إنتم شايفنها على السطح قد تؤدى إلى كوارث وقد تؤدى إلى فتنة طائفية مفيد فوزى : أنتى بتحظرى بنتك من الدخول لهذا الموقع؟ نهى : طبعا ودايما بقولها بصى على صفحات أصدقائك كل شوية لأنوا الشخصيات بتتغير مفيد فوزى : مش خايفة أنوا حد يضايق من بنتك فيعملها بالطريقة الشريرة صورة تتوزع على المواقع ما بتخافيش ؟ أو مفكرتيش ؟ نهى : موجودة الفكرة وكل حاجة مفيد فوزى : خصوصا لو كان حضرتك بتوزع صورها فى كل حتة مثلا صورها على الشط فى البيلاج نهى : عشان كده بقول فى صور ما تتحطش فيه صحاب ما ينفعش يفضلوا موجودين يعنى فى وقت من الأوقات واحد من الأصدقاء الموجودين فيه بروفيل ما عجبنيش فرحت منادياها لوحدها كده مفيد فوزى : وضحيلى أكتر علشان الناس تفهم ؟ نهى : البروفيل الصور مش لذيذة فيها إيحاءات فيها جمل مش لذيذة يعنى بروفيل مش مريح مفيد فوزى : وضحيلى أكتر ؟ نهى : تعليقات كتيرة عن مشاعر الحب أو ما يتبعه هذه المشاعر مثلا مفيد فوزى : جنس مثلا ؟ دعوة للجنس نهى : إيحائية وليست مباشرة مفيد فوزى : هى بتقرا هذا الكلام وبتشوفا ؟ نهى : طبعا الصفحات مفتوحة مفيد فوزى : مفتوحة أنا فاهم أيه رد فعلها ؟ هل هو أيضا عالم فضول ؟ نهى : أكيد حتى لو مش بشكل مباشر دا سنها أبقى غلطانة لو أنا ما أدركتش أنوا أطفالى فى مرحلة ما هيكون عندهم فضول زى اللى كان عندنا فى نفس السن بل وأكتر لأن المجتمع مفتوح أكتر مفيد فوزى : الفضول كان عندك فى سن ؟ نهى : وأنا فى الجامعة هى عندها النهاردة من سنتين فاتوا مفيد فوزى : أه عندها من سنتين فاتوا يبقى سؤال مهم هل دا بيوسع المدارك؟ ولا ممكن يدمرها فى لحظة ؟ نهى : ممكن مفيد فوزى : وضحيلى ؟ نهى : بيوسع المدارك لو أنا ما بينى وبين بنتى حوار مستمر يعنى ممكن يجيى وقت تقولى أنتى مش مهتمية بيا فبتبص تلاقى أقولها أنتى عندك صحباتك كذا وكذا وكذا وكتبولك واحد وأتنين وتلاتة وأربعة على الوال فبدأت أحس أنها بتهدى حتى لو ما إتكلمتش مفيد فوزى : مش مواجهة حادة شوية ؟ يعنى أنا متصورش وأنا طفل أنوا حد يقولى أنت عملت كذا وأصحابك الفلانيين كذا وأنت قلت كذا طبعا ماكنش فيه أيامها النت لمجرد حتى أنوا يتقالى ده نهى : حضرتك مسكت مرة حد من الوالد أو الوالدة وقلتلههم أنتم ما بتحبوناش أنت مش مهتم ؟ مفيد فوزى : عمرى لا يمكن عايز أقول لا يمكن أظرف نهى : طب ما هى بتقولها فى وشى أنتى مش مهتمية غير فى شغلك أنتى مش مركزة معايا مفيد فوزى : دا على الفيسبوك نهى : لأ أنا ما بتخاطبش على الفيسبوك أنا ببص وبسحبها أم لبنتها قاعدين قدام بعض فى حوارات ما ينفعش أكتبها على الفيسبوك ما ينفعش أخلى حد من أصحابها يقراها ما ينفعش لأعنفها قدام أصحابها أسيبها هى اللى تتحرك لازم هى يكون ليها الإختيار هى عايزة تعمل أيه علشان تعمله بروفة علشان ما تعملش صفحة هى مش عارفاها مفيد فوزى : ويبقى السؤال هل الرقابة ضرورة فى البيت المصرى فى الفيسبوك؟ نهى : كل يوم أكتر من الأول مفيد فوزى : ليه بيتقال أنوا ما ينشر على الفيسبوك بيفتقد أحيان للجدية والدقة محمد بسيونى: والمصداقية مفيد فوزى : والمصداقية هل أنت بتغربل يا محمد ؟ يعنى أنا عايز اسألك سؤال مهم محمد بسيونى: أه طبعا بغربل يعنى مفيد فوزى : الإشاعات بتغربلها ؟ محمد بسيونى: بحطها فى خانة لغاية ما أحكم عليها مع الوقت يعنى أنا مش متأكد دى إشاعة ولا لأ ؟ يعنى الفيسبوك قبل دى حتى ليه دور أويعنى التليفزيون أو الإعلام بصفة عامة أحنا داخلين على إنتخابات رئاسة هنختار مين ؟ وهختاره ليه ؟ التيفزيون والراديو والجرايد علمهم الفيس بوك إن هما يعرفوا الناس يختاروا إزاى ؟ يعنى أنا مثلا كمرشح لحزب ما بطلع فى التليفزيون فالناس بتشوفنى بتعرف أنا هعمل أيه ؟أنا ممكن أقدم أيه ؟ أنا صح ولا غلط وهنا بطلع فى كل الأماكن مفيد فوزى : أيه خطورة التسريبات اللى على الفيسبوك ؟ محمد بسيونى: التسريبات ولا الإشاعات ؟ أصل معنى التسريبات ممكن معلومة تمس الأمن القومى أو ما شالبه تسرب على الفيسبوك ممكن تعمل بلبلة أو ما شابه تبقى إشاعة أكثر مهياش تسريب ؟ ومن ضن الإشاعات إشاعات الفتنة الطائفية الفيسبوك أحيانا بيبقى ليه دور سلبى وأحيانا بيبقى ليه دور إيجابى يعنى معظمها بتبدأ أنوا الناس بتشجع الناس على النزول والمشاركة فى أحداث عنف عن طريق الفيس مفيد فوزى : السؤال هل الفيس بوك أحيانا تحريضى ؟ محمد بسيونى: الفيس بوك زى السكينة كل واحد يستعملها بطريقته فى ناس بتستخدمه فى التحريض ما هو الفيس بوك ده زى التليفزيون زى الجرايد ما هو الجرنال مثلا بيقراه مليون واحد مثلا الفيسبوك عليه 5 مليون حد أدنى يعنى مستحيل يكون أقل من 5 مليون وكل اللى بيقرا على الفيسبوك ما بيصدقش كل حاجة زى اللى بيقرا الجرنال ما بيصدقش كل حاجة بس أحيان العلاقة فى الفيسبوك بتوصل لعلاقة شبه مباشرة يعنى أنا مرشح إنتخابى لما أنزل الدايرة بتاعتى وأكلم الناس وجها لوجه تأثيرى هيبقى مضاعف غير لما يشوف صورتى فى الجورنال مفيد فوزى : أيه أسلوب الفيس بوك فى الفتن الطائفية كمخاطر؟ جمال مختار: خلينا نقول حاجة مهمة قوى لو كنا مؤمنين بربنا ونسمع الأية اللى بتقول يا أيها الذين أمنوا إن جاءكم فاسق بنبأ فتبينوا وللأسف الشديد أنوا مصر لا تتغير أسهل حاجة على أى مواطن يسمع أى حاجة عنده 7 سنين أو 70 سنة أى حاجة تجيله يروح باعتها للأشخاص الأخرين طب هل تأكدت من هذه المعلومة ؟ أنهم يهينون الدين الإسلامى فى مدينة كذا أو الكينسة دى عملت حاجة طب أنت عرفت منين ؟ أو المسلمين حرقوا بيت واحد مسيحى هل تأكدت من حاجة زى كده ؟ لا يتبينوا وبالتالى تنتشر بسرعة جدا جدا ولما تنتشر كل الناس تاخد موقف وبعد كده تكتشف أنك فى مصيبة لحاجة ماحصلتش يبقى دورك بقى هتلم حاجة زى كده المخاطر الرهيبة اللى حصلت بسبب الإنتشار الرهيب للفيسبوك والسطحية الرهيبة اللى عند الناس ونقولهم إذا كنا بنقول أنوا أحنا بلد متدين وشعب متدين يبقى لازم نمشى زى ما بيقول الدين إن جاءكم فاسقا بنبأ فتبينوا مفيد فوزى : الهوس الرياضى بيحصل إزاى فرق الرياضة اللى بتلعب؟ جمال مختار: من ناحية مفيد فوزى : من ناحية الفيسبوك جمال مختار: ما هو كل واحد عامله البروفيل بتاعه وكل واحد عامله المجانين بتوعه ودايما أحنا للأسف عندنا إستقطاب أهلى زمالك يعنى أنتى عدوى علشان أنت زملكاوى فكل واحد بياخد الحتة بتاعته مفيد فوزى : بيحصل إزاى التحريض جمال مختار: يعنى بنسبة كبيرة مثلا يقولك أنوا فيه أيادى خارجية وقعت بين مصلار والجزائر على الفيسبوك فيه ناس ألفت أغانى تشتم فى الجزائر وفيه ناس ألفت أغانى تشتم فى المصريين وأبتدى الموضوع يشعلل وإتنقل على اليوتيوب أللى بقى صوت وصورة وفى أيادى كتيرة جدا دخلت علشان تأجج العلاقات الغير سليمة بينا وبين الجزائريين وحصل بينا وبين السعوديين فى وقت من الأوقات طب حصل بينا وبين دول كتير طب إنتم إزاى تعملوا كده ؟ فأنا بحس أنوا فيه ناس فاهمة اللغة العربية كويس قوى وعندها علم باللغة العامية المصرية كويس قوى وتقدر تشعلل حاجة فى وقت ما بغباءنا يعنى ساعات تلاقى واحد يقولك يا جماعة عيب دا أحنا كويسين قوى مع بعض يعنى تلاقى ساعات أحد الأصوات العاقلة تطلع إنما الباقى كله هوس وجدال ونعرات سياسية ملهاش أى لزمة وملهاش أى مبرر مفيد فوزى : باشمهندس حسام كلامك أنوا كل مشاهد بيشوفنا أب حسام صالح: أنا أبنى أو بنتى بيسنخدم الفيسبوك أولا السن مفيد فوزى : السن حسام صالح: المرحلة السنية من صفر لحد 5 ،6 سنين لحد النهاردجة متخلهوش لايستخدم للكمبيوتر مفيد فوزى : لغاية 6 سنين حسام صالح: خليه يهمل هذا الشيىء هذا الشيىء محتاج تمرين خليه يتمرن على يلاحظ الأشياء يشوفك وأنت بتستخدم الكمبيوتر يقعد جنبك ماشى يعرف إن هذا الجهاز له إحترام وله أهمية وإن الدخول على المواقع دى أو الدخول على العالم بتاع الإنترنت له إحترام وله أهمية فيحس أنوا ممكن يكون ممنوع أو بتاع الكبار فى المرحلة دى هروح لمرحلة تانية هطلع لسن تانى شوية أبتدى خلاص داخل على المدرسة ما ينفعش أنوا أنا أوقفه أنوا هو يستخدم الكمبيوتر أسيبه يستخدم الكمبيوتر وأسيبه يستخدم الإنترنت وأحاول أنوا أنا أعلمه بطريقة الإجتهاد يعنى ما أجبهوش أفتحله الإنترنت أنا أقوله بيتفتح من هنا وأسيبه وأمشى وأسيبه يحتار مفيد فوزى : الرقابة من بعيد كيف تتم ؟ حسام صالح: الرقابة من بعيد اللى فى السن من 8 إلى 9 سنين لحد سن من أول 15 سنة فى الوقت ده الرقابة كل شوية أشوف أيه المواقع اللى هو بيخشها مفيد فوزى : بتدخل عليها هل هى بنتك بتعرف أنك دخلت على هذه المواقع ؟ حسام صالح: وأنا بجاوب فى التليفزيون وهى بتتفرج عليا دلوقتى أه مفيد فوزى : الإجابة أه هل بتبقى ضجرة ؟ حسام صالح: هو يتوقف أنوا أنا بعد ما شفت عملت أيه ؟ ما هو أنت لما تشوف ويطلع الموقع ده مش مناسب ما تجبنيش تزعقلى ما هو أنت لو جبتنى زعقتلى أنا مش هشوف الموقع ده بس ما هو فيه 100 ألف موقع تانى وأنا ما أعرفهمش كلهم وأنا الأب أو الأم ما أعرفهمش كلهم فأنا لازم التوجيه يبقى هو دا لزمته أيه ؟ مفيد فوزى : بشكل عقلانى حسام صالح: بشكل عقلانى ماهو أصل الخطاب بتاع الشاشة خطاب عقلانى الشاشة ما بتزعقش للطفل الشاشة بالعكس بتلونله وبتتحرك قدامه وتعمل صوت وبتناديله مفيد فوزى : وما زالنا داخل صفحات الفيسبوك علامة العصر شبكة الإتصال والتواصل وفى الأسبوع القادم نتواصل داخل جروب محدود فى حديث المدينة ونفتح صفحة جديدة على الفيس بوك.
