اتجاهات

رشا مجدي: مشاهدينا الكرام مساء الخير .. بنرحب بكم مع حلقة جديدة من إتجاهات .. سنوات كثيرة مضت وهناك مطالب بقانون موحد لدور العبادة في مصر دا بهدف القضاء علي سبب رئيسي من أسباب الإحتقان الطائفي وبعد عقود من التأجيل والإرجاء غير المبرر أخذت حكومة الدكتور شرف رئيس الوزراء علي عاتقها مبادرة طرح مشروع القانون في صورته المبدئيه وطرحه من أجل حوار مجتمعي جاد ودا بهدف التوصل الي إتفاق أو التوافق عليه قبل أن يتم إقراره رسميا – مشروع القانون بمجرد طرح وحتي قبل طرحه أثار حاله من الجدل الواسع وأقترن الجدل ده بإشتباكات لفظيه سواء من هنا أو من هناك .. الغريب إن مشروع القانون واللي كان مطلب لن يرضي حتي الآن أي طرف من الأطراف أنا بأتكلم سواء إسلاميه أو مسيحيه علي القانون أو مشروع القانون وسارع كل طرف من إبداء تحفظاته علي عدد من البنود .. البعض بيري فيه إخلال وعدم مساواه ومحاباه لطرف علي حساب الطرف الآخر .. البعض الآخر بيري فيه شروط تعجيزيه لدرجه إنهم وصفوه بإنه ليس قانون دور عباده وإنما قانون للإلغاء دور العباده في حين آخرون طالبوا بإرجاء القانون حتي الإنتهاء من قيام دوله مدنيه .. لجنة العداله المسؤلة عن مشروع القانون بمجلس الوزراء طالبت بعدم إصدار أحكام مسبقه إن مشروع القانون مطروح من أساسه لإجراء حوار جاد حوله وتباين مدي الضعف أو الخلل فيه عشان نصوص القانون تتوائم مع صحيح العبادات ومبدأ المواطنه بعيد عن أي تطرف ديني أو سياسي .
الليله ديه من حلقة إتجاهات حنصب في خانة الحوار المجتمعي وليس الصخب الإعلامي كما قيل عنهم .. الحوار المجتمعي حول مشروع القانون حنستطلع فيه آراء عدد من علماء المسلمين ورجال الدين المسيحي حول مشروع القانون .. خلونا نشوف هذا التقرير ونلتقي بعد هذا التقرير مع ضيوفنا الكرام
فاصل " تقرير "
مشروع قانون دور العبادة .. يتضمن سبع مواف يفوض بموجبها المحافطون كلٌ في نطاق محافظته لمباشرة الإختصاص بالترخيص ببناء دور العباده أو هدمها أو إحلالها أو تجديدها خلال ثلاثة أشهر ..
أن يتناسب عدد دور العبادة لكل ديانة من الديانات المعترف بها في كل قسم أو مركز داخل كل محافظة مع عدد وكفاثة السكان
ألا تقل المسافة بين المكان المطلوب بناء دور العبادة فيه وبير أقرب دور عبادة مماثل عن ألف متر
يشترط عدم بناء دور العبادة علي أرض زراعية إلا في حالة الضرورة القصوي . وبعد موافقة كلٍ من وزارة الزراعة وإستصلاح الأراضي ومجلس الوزراء علي تبوير الأرض الزراعية المخصصة لبناء الدور المطلوب .
لا يجوز البناء علي أرض متنازع علي ملكيتها وألا تقل مساحة بناء دور العبادة عن ألف متر مربع
يحظر إقامة دور العباده تحت العمارات السكنية أو فوقها أو علي شواطئ النيل والترع أو المناطق الأثرية والتاريخية أو أي مناطق أخري محظور البناء فيها وفقا لقانون البناء .
حدد القانون عقوبة علي المخالفين للقانون بالسجن مدة تتراوح السنتين والخمس سنوات ، وبغرامة لا تقل عن مائة ألف جنيه ولا تجاوز ثلاثمائة ألف جنيه وذلك علي كل من أقام أو هدم دور عبادة أو أجري تعديلا بها أو جددها أو وسعها أو رممها بالمخالفة لأحكام هذا المرسوم .
فاصل
رشا مجدي: مشاهدينا الكرام إسمحو لنا نرحب بضيوفنا الكرام معنا في الإستديو ضيافة الأنباء مرقص أسقف شبرا الخيمه وتوابعها أهلا بحضرتك .. ومعنا أيضا الدكتور محمد الشحات الجندي أمين عام المجلس الأعلي للشئون الإسلاميه أهلاً بكم .. مشروع قانون أو قانون كنا مستنيينه من زمان جداً اول ما تم طرح هذا المشروع الجدل بدأ موجود وبشده – يعني إحنا حنخش في تفاصيل مشروع القانون أو الأشياء اللي فيها لكن ليه الجدل ده حاصل قبل أن يبدأ أي شيئ
الأنباء مرقص : هو في الحقيقه طبعا نشكر الناس اللي إبتدوا يعدوا لهذا القانون ولكن كان في الفكر إنهم الأول يلتجأوا لرجال الدين أو يلتجأوا للكنيسه والأزهر يقترحوا بعض بنود القانون لإن دول معنيين بالموضوع لكن اللي حطوه ناس يعرفوا في القوانين آه لكن ربما ما دخلوش قوي في أعماق إحتياجات الناس لبناء الكنائس
رشا مجدي:دا بالنسبه للكنيسه .. والأزهر برضه دا نفس الرأي ؟
د . محمد الشحات الجندي : أولا بسم الله الرحمن الرحيم هو مشروع القانون بالفعل يعني أعتقد إن طرحه في حد ذاته كان طرح أو خطوه متقدمه جداً
رشا مجدي: دا مطلب كان
د . محمد الشحات الجندي : آه وطال إنتظاره مطلب طال إنتظاره ويتعين بالفعل أن نواجه مثل هذه الأمور التي هي بالفعل مطلب الإخوه المسيحيين ولهم الحق في ذلك في كل الأحوال أنا رأيي إنه سواء عرض علي الأزهر أو عرض علي الجنيسه أيضا سيكون هناك مقترحات وسيكون هناك مطالبات وسيكون هناك رأي ورأي آخر أوتحافظات علي ما ورد فيه أو طلب أضافة أشياء أخري
رشا مجدي: يعني اللي بيحصل ده شيئ صحي
د . محمد الشحات الجندي :صحي تماماً ومتوقع تماماً إن يحصل هذا الكلام وبنقول خلينا ناخد ما دام ده مطلب ومطلب جماهيري يبقي إذن نسارع به ونسمع الآراء وخاصةً حضرتك يمكن أشرتي إن الموضوع مطروح لحوار مجتمعي يعني إحنا بالفعل نريد أن نصل
رشا مجدي:يعني كان هناك إتهام إن ده صخب إعلامي وليس إلا
د . محمد الشحات الجندي :لا . لا . لأ
نيافة الأنبا مرقص : لا .. لأ دا مطلوب جداً
رشا مجدي:طيب خلونا نبتدي نمسك بعض البنود كده ويارب وقت الحلقه يسعفنا بده نيافة الأنبا مرقص خلونا نبتدي كان فيه مشكله أنا هأبتدي بالنقاط الساخنه في المشروع ضبط بناء الكنائس والمساجد بعدد المصلين ودا بيتنافي مع حرية العقيده اللي بيكفلها الدستور دا كان من ضمن الأشياء اللي عليها الكلام
نيافة الأنبا مرقص :آه طبعا لما يقول العدد أولا مين اللي حيقول العدد الإحصائية حتيجي منين ؟ يعني مثلا إحنا في منطقه في شبرا الخيمه بيجلنا وافدين كثير جداً من الصعيد مش بيسجلوا أساميهم في مجلس المدينه فلما نيجي إحنا نقول إن إحنا تعداد المسيحيين في المنطقه ديه قد كده إيه الإثبات اللي حيخدوه من عندنا هل الإحصائيه اللي إحنا نقولها وطبعا عندنا المستندات لكن كون إن هو ييجي يقول الإحصائيه نمره واحد حيجيب الأرقام منين ؟ نمره 2 من حق كل إنسان يعبد ربنا من حقه .. يعني نفرض إن فيه مكان فيه 30 عيله مش من حقهم يعبدوا ربنا وجايز أقرب كنيسه لهم تبعد 5 كيلوا زي في القُري وعشره كيلوا حيروحوا إزَّاي عشره ولا خمسه كيلوا يركبوا مواصلات إيه ويروحوا إزَّاي وييجوا إزَّاي
رشا مجدي:لأ ما المسافات ديه لسه حنجي لها في نقطه أنا بأتكلم دلوقت علي عدد
نيافة الأنبا مرقص :ما هو العدد مرتبط بالمسافه
رشا مجدي:ما حأقول لحضرتك حاجه ما هو دا بالنسبه للمساجد أيضاً يعني لو إتكلمنا مثلاً علي شبرا الخيمه مثلا المنطقه ديه فيها عدد من الناس يبقي بكنيسه تسع عدد من الناس أو المسجد يسع عدد من الناس أنا ما بأحسبش بقه اللي جاي من الصعيد والا اللي جاي من بحري والا اللي جاي من ده
نيافة الأنبا مرقص :ما هوعدد الناس – عدد الناس قد إيه
رشا مجدي:ما هوعلي حسب الكنيسه اللي بتسعه أو المسجد بيسعي القاطنين في هذه المنطقه
نيافة الأنبا مرقص :ما هو يعرف القاطنين المسيحيين دور إزَّاي حيعرفوا منين؟
رشا مجدي:ما هو عدد سكان مش فيه تعداد وعدد سكان المنطقه
نيافة الأنبا مرقص :بيجيبوا التعداد ده منين يعني إفرض النهارده عد من 3 سنين وجاءني وافدين من حتت كتيره في خلال ال3 سنين دول هو عنده عدد غيرنا
رشا مجدي:الوافدين دول أكيد لهم كنائس في منطقتهم أو المساجد برضه
نيافة الأنبا مرقص :لو الوافدين ساكنين دلوقت في شبرا الخيمه مثلاً
د . محمد الشحات الجندي :إذا سمحتوا لي أعتقد إن المسألة ديه بسيطه أو سهله لأنه بالفعل هناك تعداد قد يكون التعداد في حد ذاته جائز حضرتك غير واضح بالصوره الكافيه لكن أنا أري لإن مشروع القانون نفسه قال إيه بعد الحصول علي موافقة وزارة الأوقاف بالنسبة للمسجد والحصول علي موافقة الكنيسه أو الجهة المختصة فإذن في هذه الحاله ممكن الجهة المختصة أنا رأيي إن الجهة المختصه يمكن أن تبدي رأيها وتقول لا والله ده فيه كثافه إنتوا قلتوا إنهم 20 لأ إحنا عندنا 30 علي سبيل المثال وبالتال مادام وافقت الجهة .. لإن حضرتك دلوقت طبقا لمشروع القانون بيقول لي موافقة الجهة الدينية المختصه الأوقاف بالنسبة للمساجد وا
نيافة الأنبا مرقص :بس من ناحية العدد ولا من ناحية المبدأ
د . محمد الشحات الجندي :لأ من ناحية الترخيص
نيافة الأنبا مرقص :آه أصله ربط الترخيص بالعدد
د . محمد الشحات الجندي :ما هو الترخيص بالعدد ما هو ممكن جداً أنا رأيي كما يسير بالنسبه للكنيسه كما يسير بالنسبه للمسجد تماماً
نيافة الأنبا مرقص : ما إحنا بنتكلم علي الإثنين
د . محمد الشحات الجندي :يعني أنا أقصد هنا الجهة الدينيه سواء الأوقاف بالنسبة للمسجد أو الجهة الدينيه المختصه للإخوه المسيحيين ممكن جداً تقول إنتوا الله إحنا المنطقه ديه حيخدمها كنيسه واحده لأ العدد المتوقع او اللي إنتوا بتعلنوا عنه كذا لأ إحنا عندنا العدد وأعتقد تعرفوا برضه العدد
نيافة الأنبا مرقص : آه طبعا
د . محمد الشحات الجندي :وبالتالي إحنا عايزين
رشا مجدي: يعني مثلا كنيسه في شبرا غير كنيسه مثلا في المعادي
نيافة الأنبا مرقص :تمام
رشا مجدي: يعني دا اللي أقصده
د . محمد الشحات الجندي :كثافه سكانيه
رشا مجدي:كثافه سكانيه
نيافة الأنبا مرقص :غير كنيسه في قريه
رشا مجدي:غير كنيسه في قريه
نيافة الأنبا مرقص :وهل هو حدد العدد اللي إحنا من أجله نبني كنيسه ؟ .. ما قلش
د . محمد الشحات الجندي :لأ ديه مذكره ما حضرتك معلهش فيه دلوقت هو المعلوف كده إن أي قانون من القوانين بيبقي له مذكره إيضاحيه مذكره القانون بيشمل خطوطها العريضه فقط – الخطوط العريضه الإطار العام للموضوع أو للمشكله بعد كده والله آه طب حنعمل مسألة التعداد إزَّاي طيب نتغلب عليها إزَّاي أعتقد برضه هو حيحدد رقم معين يعني
نيافة الأنبا مرقص :لما ييجي يقول لي مثلا لما يكونوا 200 عيله إعمل لهم كنيسه طيب أنا عندي قريه فيها 50 عليه مش من حقهم يصلوا
د . محمد الشحات الجندي :من حقهم
نيافة الأنبا مرقص :طيب يبقي ده السؤال بقه العدد مين اللي يحدده .. أنا بأتكلم علي العدد قريه فيها 50 عيله من حقهم يصلوا ولا لأ
د . محمد الشحات الجندي :من حقهم
نيافة الأنبا مرقص :بس هو ده السؤال وبعدين من حقه حندخل في المساحه بتاعة الكنيسه ده وضع تاني
د . محمد الشحات الجندي :ممكن جدا برضه لو عزبه يعني أنا بأتكلم برضه خارج القاهره بالذات أنا ما بأبصش للقاهره وإسكندريه – خارج القاهره أنا ممكن يكون عندي عزبه برضه ممكن قد يتصور في بعض الأحيان إن أنا عندي مثلا العدد 5 آلاف مثلا أو 50 عيله أو 200 عيله أنا وجد عندي برضه عزبه صغيره ما يوصلش هذا العدد بالنسبه للمساجد دا برضه حيضطر نفس الملاحظة هل ينتقل لمكان آخر ولا لأ – أن متهيأ لي دعنا ننتظر لإن كثافة السكان دا أعتقد معيار هام جداً ومعيار موضوعي
نيافة الأنبا مرقص :بالظبط .. صح
د . محمد الشحات الجندي :لإن أحنا فعلا علي أساسه يصدر ترخيص بالبناء ولا ما يصدرش
رشا مجدي: إحنا كده إتفقنا علي الحته ديه
نيافة الأنبا مرقص :آه إتفقنا بس بشرط العدد ده عايز يتنظر له
رشا مجدي: يتم التقاش فيه
د . محمد الشحات الجندي : وهو ما إتحددش كمان حضرتك – عشان نقول
رشا مجدي:ما إتحدش
د . محمد الشحات الجندي: آه مادام ما إتحدش يبقي ننتظر شويه
نيافة الأنبا مرقص :حاجه تانيه من حق كل إنسان يعبد ربنا
رشا مجدي: طبعا يا فندم أنا اللي عايزه أسأله مثلا لو إحنا حنتكلم علي قرية ما أو عزبه ما تعدادها مش حأقول تعدام المسلمين والمسيحيين فيها قد إين لكن فيها
د . محمد الشحات الجندي : عادةً كلها دا ممكن كلها ما توصلش حضرتك في بعض الأحيان نجوع وقري
رشا مجدي: بالظبط بس يبقي فيها كنيسه يبقي فيها مسجد
د . محمد الشحات الجندي :يعني دا ممكن جداً أنا متصور يعني إن ممكن ييجي يقول لك في المناطق التي لا يوجد بها الكثافه السكانيه تكون بعيده يترك للمحافظ أو لرئيس الجهة إن هو يتدخل ويسمح بالبناء كحالات خاصه حضرتك أصل ضروري لكن أنا بأتكلم علي قاعده عامه دائما كده القانون بيتكلم علي القاعدة العامه
رشا مجدي: إحنا معانا الشيخ جمال قطب وهو من علماء الأزهر .. الشيخ جمال مساء الخير
الشيخ جمال قطب :أهلا مساء النور
رشا مجدي:إحنا يعني لسه بادئين النقاش حول النقطه الخلافيه الأولي وهي الكثافه السكانيه بالنسبه لبناء دور العباده رأي حضرتك إيه في هذه النقطه
الشيخ جمال قطب :أنا مع الكلام اللي إتقال من ضيوفك وتمسيلي عليهم
د . محمد الشحات الجندي : أهلا وسهلا
نيافة الأنبا مرقص :أهلا وسهلا بك
الشيخ جمال قطب :وأنا عايز نضيف حاجه المسلمين يعبر عنهم الأزهر ويقول الكثافه بتاعتهم ظاهره عشان الكثره العدديه وإخوتنا المسيحيين لازم نلاحظ حاجه الكنيسه الأرثوذكسيه هي التي صاحبة الحق الأول في هذا الأمر ليه .. الكثافه العدديه المسيحيه للأرثوذكس لكن لازم القانون يبقي فيه مرونه لإن ممكن من إخواننا الكاسوليك أو البرتوستنت خمسه سته عشره في قريه أو في مدينه يقولوا عايزين نبني كنيسه
رشا مجدي:طيب الشيخ جمال أنا عايزه أقف في النقطه ديه يعني حضرتك دخلتنا في الطوائف المسيحيه الثلاثه وأحقيتها في إقامة دور العباده يعني معني كده إن إحنا حنتكلم إن ممكن يبقي فيه ثلاث كنائس في منطقه واحده أمام مسجد
الشيخ جمال قطب :الكلام ده مش مهم إن شاله يبقو عشره قدام جامع أو خمسين مسجد مش ديه القضيه – القضيه إن يبقي فيه حد أدني من العدد للي يتبني له كنيسه ما يجيليش 3 أو 4 أو 5 أو 10 ما طائفه ويقولوا عايزين نبني كنيسه هنا إشمعنا الأرثوذكس عاملين
رشا مجدي:ماذا لو جأني طلب الآن من الشيعه بأطيافهم ببناء مساجد أخري ما هو زي ما أحنا دخلنا بالمنطق ده أنا ممكن ييجي كذا حد يقول لك أنا شيعي وعندي أطياف أخري وعايز أبني لي مساجد كمان
الشيخ جمال قطب :برضه حضرتك - العبره – شوفي يا أستاذه الفاضله نحن لا نحجر علي أحد
رشا مجدي:أنا لا أقول حجر علي أحد بس أنا أخاف وأخشي أنا كمصريه أخشي من إحياء لطائفيه يا سيدي
الشيخ جمال قطب :لو جم حد زي ما حضرتك ما بتقولي شيعه وتقول عايزين مسجد خاص بينا يكون الرقم القومي بتاعهم بيثبت إن فيه حد أدني في الحي ده 100 أو 150 فرد بطاقتهم بتقول إنهم ساكنين هنا دا كلام لازم يبقي معروف لكن الأرثوذكس عددهم كبير والمسلمين عددهم كبير بقية الطوائف عنينا ليها بس تثبت إن لها في المدينه ديه علي الأقل 100 فرد
رشا مجدي:طيب الأنبا مرقص عنده تعليق إتفضل يا فندم
نيافة الأنبا مرقص :يعني لو 50 فرد يبقي مش من حقهم يعبدوا ربنا
الشيخ جمال قطب : لأ أنا ما بأتكلمش المسأله مش 50 و49
نيافة الأنباء مرقص :ما فضيلتك بتقول 100 فرد
الشيخ جمال قطب :أنا بأتكلم يعني لما يبقي 50 يعملوا و40 يعملوا لكن 5 و7 و 10 ما لهمش سكن كلام خطير
نيافة الأنبا مرقص :لأ طبعا 5 و 10 مين اللي بعربيه دي مافيهاش مشكله لما يكون عدد كبير
الشيخ جمال قطب :أنا حأقول لحضرتك يا نيافة الأنبا أنا جمال قطب عن نفسي والناس كلها سمعاني بأعبد ربنا بمنا لو إن إخوانتنا المسيحيين عايزين يعملوا لكل مواطن كنيسه عنِّي أنا شرعا وقانوناً وعرفاً وسياسةًَ لا يضرني وأساعده لكن أحنا بندور علي تنظيم المجتمع أما عن نفس أنا لو مسؤل اللي عايز يعمل كنيسه يعمل إثنين ولا حاجه لكن بندور علي ترتيب وتنظيم المجتمع مع المشاعر العامه لا أكثر ولا أقل
رشا مجدي: الشيخ جمال قطب وهو أحد علماء الأزهر إحنا بنشكرك شكرا جزيلا علي هذه المداخله
الشيخ جمال قطب :العفو
رشا مجدي: إحنا تقريبا توصلنا الي إتفاق مبدئي علي هذه النقطه – من الموضعات اللي بنتكلم عليها إنه من ضمن مشروع القانون إنه حدد دور العباده بمساحه لا تقل عن 1000 متر
نيافة الأنبا مرقص :دا موضوع عجيب جداً
رشا مجدي: طيب النجع والا القري إللي إحنا بنتكلم عليها اللي هي فيها مثلا عدد 30 والا 50 والا 100 1000 متر
د . محمد الشحات الجندي : لا..لأ هو 1000 متر بالتأكيد عايزه إعادة نظر لإن فعلا دا مساحه كبيره وبعدين أنا لا أدري ممكن جداً بالفعل أنا عندي خارج القاهره مناطق صغيره جداً وعندي نجوع وعندي كفور والحاجات ديه كلها
رشا مجدي: سواء لمساجد أو لكنائس
د . محمد الشحات الجندي : إحنا بنتكلم علي المصريين دلوقت حق كل مصري أن يمارس شعائر دينه أو يمارس طقوس العباده .. إحنا بنتكلم دلوقت بنقول الكفور والنجوع والقري ديه مسأله بالفعل يصح إن يكون 300 متر كفايه صح يكون 200 متر كفايه لإقامة دار العباده سواء مسجد أو سواء بالنسبه لكنيسه فبالتالي ديه مسأله الي حدٍ ما عايزه إعادة نظر
رشا مجدي: حضرتك موافق علي
نيافة الأنبا مرقص :دا مش بس في القري والنجوع حتي في المدن يعني أنا في مدينه إفرضي المتر الأرض ب10 آلاف جنيه لما أجيب أرض 1000 ملتر يعني 10 مليون برضه مبلغ مين يجيب ال10 مليون كبيره
رشا مجدي: طيب أنا عندي كمان مشكله ثانيه يعني إحنا عندنا لو نتكلم بقه علي المدن إحنا عندنا تكدس سكان عدد كبير من السكان المساحات قليله يعني مع التكدس السكاني ده أنا حأجيب منين 1000 متر في كل منطقه إن أنا أعمل فيها
د . محمد الشحات الجندي : بتمثل مشكله بالفعل
رشا مجدي:إنت لو إتكلم عن القاهره عن الإسكندريه عن المحافظات صعب إن إنت تلاقي 1000 متر
نيافة الأنبا مرقص :صعب قوي قوي
د . محمد الشحات الجندي :ديه مسأله أعتقد سيُعاد النظر فيها
رشا مجدي:نيجي عند المساحه وفيها إعادة نظر
نيافة الأنبا مرقص :إعادة نظر قوي
د . محمد الشحات الجندي : وفيه تحفظ علي ال1000 متر ده لأنه بالفعل دا رقم مبالغ فيه أو مساحه كبيره وبالتالي تخضع لإعادة النظر مره ثانيه والقانون أهوه مطروح
نيافة الأنبا مرقص:إلا إذا كانت الدوله حتوفر لنا ال 1000 متر حنقول لها متشكرين
رشا مجدي:حتوفرهم منين
نيافة الأنبا مرقص:مش اللي حط القانون يقول لنا هههههه
رشا مجدي: نيافة الأنبا أنا عايزه أسألك دلوقت ما هو برضه خليني أسألك بقه علي الأديره اللي واخده في الصحراء آلاف الأفدنه ما هو ممكن فيه ناس ييجي يقولوا لك إيه تقنين أوضاع الأديره
نيافة الأنبا مرقص:طيب السؤال بسيط جدا نمره واحد الأديره ديه من زمان من القرن الرابع نمره 2 الأف فدان والا ال2000
رشا مجدي:أنا ما بأتكلمش علي اللي موجوده أنا بأتكلم علي
نيافة الأنبا مرقص:اللي حيتعمل
رشا مجدي:ممكن
نيافة الأنبا مرقص:لم يكن ال1000 فدان ديه بيعملوا بيها إيه دا بيزرعوها عشان يعملوا إنتاج زراعي وبيجيبوا إنتاج حيواني وبيجيبوا إنتاج طيور مش ساكنين في ال 1000 فدان دا الدير بالكثير خالص فدان وبالكثير خالص كنيسه للرهبان الأديره ديه للرهبان بس مش للشعب
رشا مجدي:بس في حرم الدير يعني هو
نيافة الأنبا مرقص:حرم الدير بس زراعه بيزرعوها مش بيصلوا فيها
د . محمد الشحات الجندي:أيوه بس جزء حضرتك يعني في رحاب وحرم – هل يجوز إنها مطروحه للمواطنين أو للناس العامه إنهم ييجو هذا المكان ولا يعتبر جزء لا يتجزأ من دار العباده ديه وبالتالي
نيافة الأنبا مرقص:لا.. لأ دا مش جزء من دار العباده ديه دار العباده اللي هو دير الكنيسه
د . محمد الشحات الجندي:يعني أي واحد يدخل فيها
نيافة الأنبا مرقص:آه طبعا أي واحد بيخش وبيزور
د . محمد الشحات الجندي: بيزور لكن في النهايه هي جزء
رشا مجدي:هي ملك للدير
نيافة الأنبا مرقص: آه طبعا بلا شك وبتعمل بها إيه لازم نعرف بيتعمل بيها إيه هل بتصلي فيها
د . محمد الشحات الجندي:خدمات
نيافة الأنبا مرقص: خدمات
د . محمد الشحات الجندي:حضرتك ما هو مشرع قانون قال هذا الكلام قال ممكن دلوقت حضرتك يكون في هذا المكان اللي هو دار عباده في أسفله أو الدور الأول منه لخصص للخدمات يعني أعتقد مشروع القانون ما أغفلش النقطه ديه برضه
نيافة الأنبا مرقص:هأزرع في ال1000 متر
رشا مجدي:لأ ما أنا حأقول لحضرتك حاجه ما هو إنت هنا خدمات ما إحنا ممكن نلاقي بقي دار مناسبات مستوصف ما هو برضه كل واحد بيأخذ
نيافة الأنبا مرقص:أنا بأقول زراعه ليه إحنا عندنا الراهب لازم يشتغل – الراهم ما بينامش في الكنيسه ليه نظام صلوات وله نظام شغل وعندنا مبدأ من لا يعمل لا يأكل فلازم يشتغل بس حيشتغل إيه في الدير بيشتغل في إنتاج الخشب إنتاج حيواني منتجات ألبان في الزراعه فيه نسخ كتب فيه حاجات في الكمبيوتر يعني بيشتغلوا الرهبان
رشا مجدي:ماهو ده ممكن يحصل برضه جامع يقول لك أنا عايز آخذ المساحه ديه وأعمل
نيافة الأنبا مرقص:يا ريت .. ياريت
د . محمد الشحات الجندي:يعني هو لو سمحت حضرتك يعني هو برضه تساؤل آه إحنا لا نجادل ولا ننازع في إن مسألة الخدمات ده جزء وده شيئ طيب جداً ويمارس برضه بيخدم نفسه ويجد يشيئ بيعمل به لكن بأسأل هل بالضروره التوسع أفقي والا رأسي يعني أنا ممكن جدا دار العباده يكون دور واحد أنا ممكن في الدور الأرضي أعمل الخدمات اللي أنا عايزها اللي حضرتك بتقوله ده وبعد كده يتعمل
نيافة الأنبا مرقص:لأ إحنا بنعمل كده لإن المساحه كبيره معلهش إحنا فيه كنايس بنعمل كده لكن الأديره ديه صحراء
رشا مجدي:أنا بأتكلم علي الأديره
نيافة الأنبا مرقص:دا إحنا بنستصلح الصراء دا المفروض يعني يُشكروا إنهم بيعملوا حاجه زي كده
رشا مجدي:ما هو ممكن يكون هناك مطالبات من البعض في تقنين الوضع
نيافة الأنبا مرقص:ياريت .. ياريت الجامع يعمل في الصحراء ويعمل ياريت دي حاجه كويسه بس مين حيروح يصلي في جامع في الصحراء
رشا مجدي:أنا بأقول لحضرتك ليه الكلام ده أنا ما زلت متخوفه بإن التحدث عن المساحات والمسافات وا وا وا يتحول حديث عن العدديه والأقليه والأغلبيه والدراسات الديمغرافيه
نيافة الأنبا مرقص:لأ المقارنه تكون سليمه يعني أنا الكنيسه في المدينه
رشا مجدي: ما أنا برضه مش عايزه حد يوديني الي خلاف طائفي نخرج
د . محمد الشحات الجندي: وحنخرج عن القضيه الأصليه لقضايا فرعيه
نيافة الأنبا مرقص:مين اللي بيثيرها
د . محمد الشحات الجندي: الملاحظه تعرف حضرتك فعلا دلوقت الكلام ده بالفعل نحتاجه لإن فعلا أمام إخواننا المسيحيين أنا عندي الكنيسه الارثوذكسيه عندي الكنيسه الكاثولكيه عندي الكنيسه الإنجيليه عندي ثلاثه فده برضه فكرة فعلا إن أنا ما أعددش وديه فكره ضروري آخد بالي منها لإن حتوزع المسأله والقضيه حتتسع جداً وقد إيه والمساحه يعني بالفعل
نيافة الأنبا مرقص:أنا عايز أوضح موضوع الأديره ده موضوع الأديره ده في الصحراء بيعمروا الصحراء وبيزرعوا الصحراء
رشا مجدي:ولكن هناك من سيصعد ويطالب بتنقني الأوضاع
نيافة الأنبا مرقص:الأوضاع يعني بالمثل
د . محمد الشحات الجندي:المساواه ما أنا بأقول لحضرتك إديني فرصه ليكن الصحراء - الصحراء ديه دوله ملك دوله معلهش المصريون جميعا سواء أنا حضرتك إديتني حتة صحراء لمسجد حق حضرتك أنا عايز حته قدها لكنيسه ولا منازعه في ذلك وحقه تمام يقول هذا الكلام بغض النظر ديه صحراء والا أرض زراعيه
نيافة الأنبا مرقص:بس الأديره علي فكره بتشتري الأراضي مش بتأخذها هبه
رشا مجدي:ما جيشتروا
نيافة الأنبا مرقص:طيب ما خلاص حد منع إحنا ما لناش صلاحيه إن إحنا دا بالعكس دا إحنا بنرحب ياريت كل الناس تعمر الصحراء ياريت
رشا مجدي:بس دا لازم يبقي في القانون معهش
د . محمد الشحات الجندي:لأ وطبقا لقواعد عامه وموضوعيه وتسري علي الكافه
نيافة الأنبا مرقص:أوي
د . محمد الشحات الجندي:يعني فعلا سيطرح هذا الكلام ويثار
رشا مجدي:حيفتح باب واسع جداً صدقني
نيافة الأنبا مرقص:حنقفل الأديره دا بالعكس دا إحنا حنشجع الناس إنها تستصلح الصحراء دا فيه حتي هيئة تعمير الصحاري – فيه هيئه في مصر لتعمير الصحاري وأستصلاح الأراضي
د . محمد الشحات الجندي:هيئة تنمية المجتمعات العمرانيه
نيافة الأنبا مرقص: طيب يعني كل ديه حاجات كويسه
رشا مجدي:خلونا نرجع لسنة 34 العزبي باشا أصدر كان وكيل وزارة الداخليه أصدر قانون " القانون ده مهم جداً"يجعل المسافه بين دور العباده والأخري لا تقل عن 100 متر دلوقت بعد 70 سنه من الكلام ده مع الزياده والكثافه السكانيه الألف متر المطروحه ديه منطقيه ؟
نيافة الأنبا مرقص:لأ طبعا
د . محمد الشحات الجندي:هذا الكلام – كان في الوقت ده شوف عدد سكان مصر قد إيه
رشا مجدي:الكلام ده سنة 34
د . محمد الشحات الجندي: دا بيؤكد تماماً فعلا إن ال1000 متر ده مبالغ فيه جداً ومساحه زائده وبعدين أنا عندي كثافه سكانيه عندي إزدحام سكاني كبير جدا عندي إعتداء علي الأرض أو مطالبه بإن الأراضي ديه وخصوصاً كثير منها أراضي زراعيه
رشا مجدي:لأ أنا بأتكلم علي المسافه ما بين دار العباده والأخري لا تقل عن 100 متر
د . محمد الشحات الجندي: لأ 100 متر ربما حضرتك صغيره شويه
رشا مجدي:المفروض تبقي أزيد من كده
د . محمد الشحات الجندي: لأ تبقي أزيد من كده
نيافة الأنبا مرقص: صغيره جداً
د . محمد الشحات الجندي:يعني خير الأمور الوسط كما يُقال يعني
رشا مجدي:طيب المدن الجديده – إحنا عندنا مدن جديده والمدن ديه شاسعه فيها ربع الكثافه السكانيه برضه نطبق عليها
نيافة الأنبا مرقص:لأ الحقيقه المدن الجديده إحنا بنشكر الوزاره إنها بتحدد أماكن لدور العباده علي الخريطه هم بيعملوا المدينه وديه حاجه حلوه قوي بيحددوا مثلا يقولوا 5 آلاف متر لكنيسه 7 آلاف أو 5 آلاف متر لجامع يبقي فيه مسجدين
د . محمد الشحات الجندي:التخطيط العمراني نفسه
نيافة الأنبا مرقص:آه لأ ديه حاجه صح جداُ وإحنا نرجو إنها تستمر إن كل مدينه جديده وكل منتجع جديد يخصص فيها أماكن للعباده تخصيص ولا يستعمل إلا للعباده
رشا مجدي:طيب دا مع كبار السن يعني إحنا لو زودنا المسافه
نيافة الأنبا مرقص:لأ إحنا ما نزودش المسافه يعني لما يكون 200 – 300 متر الواحد يقدر يمشي 200 – 300 متر لكن ما يقدرش يمشي كيلوا
د . محمد الشحات الجندي: والا 500 متر مناسبه جداً
رشا مجدي: 500 متر
د . محمد الشحات الجندي: يعني لو وصلنا ل 500 متر
نيافة الأنبا مرقص:لأ هو الأول ليه نحدد المسافه ما تسبوها للظروف
د . محمد الشحات الجندي: يعني أنا شايف حتي لو 500 متر أو 400 متر دا دا ربما بالنسبه يعني إسمح لي للمسلمين أكثر شويه ليه بقه لإن المسلمين بيترددوا في اليوم 5 مرات يعني الصبح مثلا فيه ناس متعوده تصلي الفجر في المسجد يعني وفيه ناس متعوده الظهر العصر المغرب العشاء
نيافة الأنبا مرقص:طيب ليه يحددوا مسافه
د . محمد الشحات الجندي: هو طرح
نيافة الأنبا مرقص:لا لأ يسوبوها حسب ظروف كل مكان
د . محمد الشحات الجندي:لا لأ ما تتسابش مطلقه أنا رأيي ضروري يكون فيه معيار عشان ما نفتحش
رشا مجدي:معيار عشان ما نرجعش نفتح باب آخر
نيافة الأنبا مرقص:تفتكر لو هم سابوها حآجي النهارده أبني كنيسه وعلي بعد 10 والا 20 والا 200 متر حأبني كنيسه ثانيه والا الجامع حيعمل كده
د . محمد الشحات الجندي: أيوه وارد
رشا مجدي: وارد
د . محمد الشحات الجندي: وارد معلهش
رشا مجدي:ما أنا السؤال الي بعده حتعرف إنه وارد حأقول لحضرتك لما كده ده حيوصلني لإشتراطات البناء واللي جيه عليها إعتراضات من الجانبين نيجي نتك لم علي أول حاجه عدم بناء المساجد والكنائس أسفل العمارات آهوه دا وارد والا لأ عندك كام زاويه وكام حاجه تحت العمارات
د . محمد الشحات الجندي: دا كتير جدا علي فكره وفي القاهره وحدها
رشا مجدي:مش ممكن – ما هو خلاص بقه
نيافة الأنبا مرقص:ما عندناش كده لكن إحنا عندنا حاجات الآتي فيه منتجعات صغيره جدا مثلا فيها 10 - 15 عيله فيه منتجعات صغيره موجوده في بحري فمثلاً بيروحوا قايلين البيت ده حنخصص الحجره ديه للصلاه حجره موجوده في البيت يخصصوها للصلاه فلو عملوا كده ممنوع
رشا مجدي:ما هي ديه سبب مشاكل حصلت زي ما شوفنا لسه قريبا في القاهره مش في حته تانيه قالوا لك إن ده بيت وعملوه
د . محمد الشحات الجندي: سؤال طيب الحل إيه
رشا مجدي:أحنا عندنا مشاكل تحت العمارات عشان كانوا بيتهربو من الضرائب كان كلها عباره عن زوايه تحت
نيافة الأنبا مرقص:السؤال ال 10 عائلات بدل ما يبنوا كنيسه فيه بيت يقول إن أنا حأخصص حجره ما هو الناس حتيجي تعبد ربنا في الحجره
د . محمد الشحات الجندي:ما هو حضرتك ليكن يعني أنا أمنع بما إن المشكله – المشكله علي فكره طبقا للواقع اللي إحنا بنعيشه بالفعل إحنا عندنا كم من زوايا تحت أو أسفل العمارات كم كبير جداً مش عايز أقول لحضرتك إذا كان في المنطقه فيها مسجد واحد إضرب مثلا 5 زوايا كمان في شارع واحد تجد زاويتين ثلاثه في الشارع فبالفعل هذا الموضوع يجب سده
نيافة الأنبا مرقص:لأ إحنا عدد قليل عندنا
رشا مجدي:هي المشكله ديه موجود هذا الجانب أكثر من هذا الجانب أكيد عند المسلمين لكن فيها مشكله عند المسيحيين أو الأقباط أنا بأحب أقول الأقباط لإن إحنا كلنا أقباط لإن المشكله هذه الغرف أو هذه الشقق مش واخده تصريح أو بيبقي ليها شكل فبتعمل مشكله كتير وبتعمل مشكله .. طيب إسمحوا لنا نرفع آذان العشاء ثم نعود ونستكمل الحوار
فاصل " آذان العشاء "
رشا مجدي: مشاهدينا الكرام نحييكم من جديد ونعود لإستكمال الحوار وكنا قد توقفنا علي الإعتراضات هي تقريباً توافقات بعدم بناء المساجد والكنائس أسفل العمارات أو بداخل شقق يعني إحنا كنا وصلنا ديه يعني القانون لازم يتضمن
نيافة الأنبا مرقص: يقنن وضع معين
رشا مجدي:أو يضع تصوُّر قاعده
نيافة الأنبا مرقص:قاعده لكن ما يسبهاش كده
د . محمد الشحات الجندي: أنا شايف من المهم جداً إن فيه قاعده القاعده تحكم هذا المسلك سواء ما جانب المسلمين أو سواء من جانب الإخوه المسيحيين
رشا مجدي:ويشيل إعفاء الضرائب دا بقه
د . محمد الشحات الجندي: آه طبعا في كل الأحوال لا يوجد حتي لو حصل هذا الكلام في ظل القاعده ده ما فيش حاجه إسمها إن أنا دوله تتنازل عن حقها في إنها تأخذ الضرائب في كل الأحوال ديه مسأله الله اللي بيعمل دار عباده طبقاً للقاعده وطبقا للوضع المقنن ده دا عايز يقترب لربنا وبالتالي ما يطلبش من وراء هذا الكلام إن هو يعفي من الضريبه أو أو الي آخره
رشا مجدي:دا بالنسبه للمسلمين لكن بالنسبه للمسيحيين هم يعني أعتقد لو غرفه أو شقه أو مكان بيتعمل لدور عباده لإن العدد قليل مظبوط
نيافة الأنبا مرقص:آه طبعا
رشا مجدي:لازم يتم إبلاغ أو الكنيسه بتبلغ إن المكان ده
نيافة الأنبا مرقص: أيوه يخصص لعباده
رشا مجدي:يخصص لعباده ويتم التبليغ رسمي عنه وإن
نيافة الأنبا مرقص:آه دا تمام أصل عندنا مثلاً نيافة الأنبا باخوم في البحيره عنده أماكن ضخمه جداً ما يقدروش يبنوا كنيسه العدد ما يسمحش كمان لبناء كنيسه – بيت مقتدر بيقول أنا حأخصص الغرفتين دول للعباده خلصت
د . محمد الشحات الجندي:بس إبلاغ الجهات
نيافة الأنبا مرقص:آه صح أنا موافق ديه مهمه قوي
د . محمد الشحات الجندي:وأنا بأقول علي الطرفين برضه يعني بلاش أتصرف تصرف إنفرادي بعيد عن أياً كانت الدوافع بتاعتي أنا أعلم إن الدوافع دوافع مبررة ومشروعه وبرضه فيه مطلب ومطلب جماهيري لكن فيه دوله وفيه جهة سواء تبلغ وزارة الأوقاف أو سواء الكنيسه أو الجهة الدينيه
رشا مجدي:أنا عايزه أقول مش من ناحية الكنيسه من ناحية الأزهر أو ما ناحية الجانب المسلم
د . محمد الشحات الجندي: المسؤول عن المساجد الوزاره وزارة الأوقاف
رشا مجدي:مش كده كمان بقه يعني لو أنا فيه جامع في آخر الشارع ما أعملش زاويه أو أعمل تحت العماره مالهاش لازمه
د . محمد الشحات الجندي: حضرتك الزوايه إتجاه مشروع القانون إن ما فيش زوايه دا للعلم يعني
رشا مجدي:طيب واللي موجوده ديه العدد الهائل من الزوايه
د . محمد الشحات الجندي:لأ العدد دا ممكن يتاخد إجراء بالنسبة له يعني نشوف بس يعني يُعاد النظر لإن برضه الكلام ده حيفتح مجال كتير يعني الأوضاع القائمه دلوقت ديه لها معالجه ثانيه غير اللي بتكلم عنها القانون يعني نفصل بين حاجتين القانون بيقول أنا عايز عندي قواعد لكيفية بناء دور العباده إصلاح دور العباده ترميم دور العباده مين المختص بهذا الكلام المساحه قد إيه الكثافه السكانيه الي آخره فده بتكلم علي الأوضاع اللي هي مستجده النهارده وأو بعد صدور القانون علي طول لكن الأوضاع الثانيه ديه – ديه عايزه معالجه بقه – يعني عايزه معالجه بأمر إنتقالي يعني بشيئ أو بآخر
رشا مجدي:طيب معانا الأستاذ هاني عزيز أمين عام جمعية محبي مصر السلام – أستاذ هاني مساء الخير
الأستاذ هاني عزيز : أهلا يا فندم أهلا بك وأهلا بضيوفك في الإستديو الأخ مرقص والأخ العزيز د. الشحات
رشا مجدي:أهلا أستاذ هاني – أستاذ هاني أحنا وصلنا تقريبا لتوافقات كثيره حول هذا القانون لكن إسمح لي البعض بيتحفظ علي إحنا داخلين في نقطه مهمه جداً اللي هي تفويض المحافظ في بناء الكنائس أو تجديدها ويطالب بقصر ذلك علي المجالس المحليه برغم إن المحافظ والمحليات حاجه واحده يعني أنا مش عارفه إزَّاي فاصلين المحافظ عن المحليات طيب إزَّاي أنا أقدر أحتكم للمحافظ في نفس الوقت لو حصل خلاف علي المجلس المحلي رغم إن الموضوع واحد
أستاذ هاني : هو مش المجلس المحلي هو رئيس الحي الذي يتبع له يعني هو رئيس الحي الذي يتبع للمحافظه
رشا مجدي:ما إختلفتش كتير
أستاذ هاني : هو أنا معاك أنا بس عايز أقول لحضرتك أولا القانون ما طلعش بالصيغة التي ممكن نتناقش فيها أولا
رشا مجدي:ما إحنا بنتناقش آهوه والمجتمع كله بتناقش يا أستاذ هاني
أستاذ هاني :ما أنا عايز أقول لحضرتك لسه القانون نفسه ما بقاش فيه مواقف الكل يتكلم فيها ديه بدأه أنا عايز أقول نقطة التحفظ ديه أنا إنه يبقي المحافظ او رئيس الحي أنا أري إن رئيس الحي بيتبع المحافظ فعمل ما رئيس حي حيأخذ قرار إلا من خلال المحافظ فهي هي
رشا مجدي:طيب لو إختلفت مع رئيس الحي ما هو المحافظ حييجي مع رئيس الحي مش حييجي معايا يعني أنا عايزه أقول إن الناحيتين جهة واحده دا اللي أنا أقصده
أستاذ هاني :كويس فإحنا عندنا وزير للجهه المحليه يعني ألجأ لوزير مختص يرأس كل المحافظين ويرأس كل الأحياء وهو اللي بيعين رئساء الأحياء ألجأ لوزير التنميه المحليه يكفي هذا وبعدين انا كان لي رأي في بدء الأمر ودا يحسم حاجات كتيره جداً إن إحنا عندنا الرقم القومي أصبح موجود في متناول إيد كل المصريين تقريبا أو الغالبيه العظمي وعندنا سجل عيني في بعض المحافظات فأصبح الإحتكام لعدد الكنائس أو دور العباده يرتبط بالعدد اللي في المنطقه ديه محتاجين كام كنيسه أو كام جامع يبقي ده هو اللي يؤخذ به من خلال الرقم القومي
رشا مجدي: ما هو دا اللي أنا بأقوله قلته في أول الحلقه يمكن حضرتك ما سمعتنيش
أستاذ هاني :للأسف ما سمعتكيش
رشا مجدي:التعداد شيئ مهم جداً حتي نعرف عدد
أستاذ هاني :أنا متفق معاك من غير ما أسمعك
رشا مجدي:دا أعتقد لازم يبقي واضح حتي لو التعداد مش مكتمل أو حصل مثلا عدد مواليد يعني آخر تعتداد عملناه دا لازم الموضوع دا يتظبط عشان نعرف عدد الناس القاطنين هنا قد إيه وعدد الناس اللي هنا قد إيه
أستاذ هاني :حضرتك دلوقت الرقم القومي أصبح غالبية المصريين بيحملوا هذا الرقم وبعدين إحنا نبدأ حتي من العدد اللي هو يسمح إنه يروح الكنيسه لواحده أو يروح الجامع لواحده مش الأطفال يعني – يعني الأطفال مش حنحسبهم في التعداد المهم إنما علي الأقل
رشا مجدي:هو الإنسان دائما سر من الأسرار تعداد المسيحيين في مصر قد إيه يعني أنا لغاية دلوقت دائما الموضوع ده عمرنا ما وصلنا لرقم
أستاذ هاني :أنا أتعجب لماذا لم يتم حصر الأقباط ودا سهل جداً جداً والإعلان عنه أسهل منه ما فيش بس هناك تحفظات
رشا مجدي:أعتقد إن الكنيسه المصريه لديها عدد المسيحيين قد إيه يعني ممكن يقولوا
أستاذ هاني :لأ ما أنا عايز أقول لحضرتك حاجه الجهات الرسميه إحنا عندنا جهاز الإحصاء وبرئاسه راجل كُبَّاره رجل محترم قوي سيادة اللواء الجندي يعني هو المفروض
رشا مجدي:ابو بكر الجندي أيوه
أستاذ هاني :سيادة اللواء أبو بكر المفروض إن هو اللي يبادر ويطلع هذا وإحنا في عصر ما بعد الثوره ما فيش أي تحفظ كل شيئ النهارده مفتوح للجميع واللي يقدر
رشا مجدي:يعني إنتوا ما تعرفوش يا أستاذ هاني شخصيا
أستاذ هاني :أنا أري من 10 الي 12 مليون
رشا مجدي:تقريبا الرقم ده ؟
نيافة الأنبا مرقص:هو 12 مليون من 5 سنين دا اللي جوه مصر إحنا عندنا 3 مليون بره مصر يبقي 12 مليون جوه مصر من 5 سنين
أستاذ هاني :السلام لك يا سيدنا
نيافة الأنبا مرقص:السلام لك إزيك يا هاني
أستاذ هاني :الله يخليك يا سيدنا يعني إحنا مش مختلفين برضه يا سيدنا هو الروند 12 مليون
نيافة الأنبا مرقص:تقريبا 12 مليون
رشا مجدي: طبعا العدد ممكن يبقي فيه زياده
نيافة الأنبا مرقص:5 سنين يعني
رشا مجدي:يعني عدد تعدادنا كلنا زدنا كمصريين كلنا عددنا زاد يعني من 5 سنين
نيافة الأنبا مرقص:طبعا
رشا مجدي:طيب أستاذ هاني إحنا بنشكرك شكراً جزيلا
أستاذ هاني : وأنا بأشكر حضرتك سلامي وتحياتي للدكتور الجندي وضيوفك بأشكرك
د . محمد الشحات الجندي: أهلا يا فندم
رشا مجدي:شكرا يا فندم .. يعني برضه حتة المحافظ ديه أنا نيافة الأنبا إيه رأيك فيها إن هو بناء الكنائس
نيافة الأنبا مرقص: في الحقيقه أنا لي رأي بناء كنيسه جديده أو دور عباده جديده ممكن يلتزم به المحافظ تحت شروط مش من حقه يقبل ولا يرفض يعني مثلا يحط مثلاً 10 شروط أنا قدمت ال 10 شروط وال 10 أوراق خلاص
رشا مجدي:جهة تنفيذيه يعني
نيافة الأنبا مرقص:بالظبط
رشا مجدي:إنت عايز توصل إنها جهة تنفيذيه
: نيافة الأنبا مرقص: دا البناء الجديد لكن الترميمات ممكن من حق المجالس المحليه وطبعا مجالس المدن ليه لإن ديه حاجات بسيطه وبعدين حكاية 3 أشهر ديه كتيره دا قانون البناء العادي بيقول شهر الترميم لو قلنا 3 أشهر لنفرض إن فيه حاجه آيله للسقوط نستني 3 أشهر وبعدين فيه مشكله ممكن بعد 85 يوم يروح قايل إنت ناقص لك الورقه الفلانيه يبقي ال 3 أشهر بقة 6 أشهر عشان كده بنقول يتحط شروط واضحه نتفق عليها جميعا في المستندات المقدمه بحيث إن مش يقبل النهارده مستند ويقول لي بعد شهرين إنت ناقصك المستند الفلاني لأ ومش من حقه يقبل ولا يرفض ليه طالما أنا إلتزمت بالقواعد المنصوصه زي بناء العماير واحد بيبني بيت فيه شروط بتتحط لما أقدمها يبقي من حقي آخد رخصه
رشا مجدي:دا المخالفات للركب هههههه
نيافة الأنبا مرقص: لأ أحنا مش عايزين ..ما ندخلش في الموضوع ده بس إحنا بنقول
د . محمد الشحات الجندي: أنا متهيأ لي مسألة الأوراق المطلوبه أو الشروط اللي هي بالنسبه لبناء أي دور عباده حتي انا ليه بأقول الكلام ده لأن في الأوقاف حتي عشان يتبني جامع فيه شروط معلنه
نيافة الأنبا مرقص:لازم
د . محمد الشحات الجندي:شروط معلنه حضرتك واللي ما بيستوفهاش ويدع مبلغ مالي معين والمكان برضه مسافه معينه والي آخره والترخيص برضه يودع مبلغ فديه موجوده بالفعل ودا يُعلن عنها لكن برضه مشروع القانون بيقول 3 شهور دا حد أقصي يعني حضرتك يصح قوي بعد شهر واحد تلاقي المسألة إتحسمت
نيافة الأنبا مرقص:وليه بعد 3 أشهر يعني ديه دراسه تبقي فيه لجنه موجوده أنا حأقدم لها ال 10 ورقات المطلوبين
د . محمد الشحات الجندي:ولو ما ردتش الجهة في خلال 3 شهور بيعتبر موافقه طبقا للمشروع حضرتك
نيافة الأنبا مرقص:ليه ما أخليهاش شهر زي قانون البناء العادي وبعدين النقطه الأخطر إن الترميم لنفرض إن حيطه آيل للسقوط سقف آيل للسقوط وقدمت طلب يا جماعه إلحقوا السقف آيل للسقوط يقول لي إستني 3 أشهر دا يكون الدنيا جرالها اللي جرالها
د . محمد الشحات الجندي: لأ إسمح لي يا سيادة الأنبا يعني زي ما بأشرح كده ماعدا حالة الضروره دائما
رشا مجدي:مين اللي حيحددها حالة الضروره
د . محمد الشحات الجندي:الجهة الإداريه حضرتك بتطلع معاينه – بتنزل معاينه وتشوف والله إذا كان الوضع علي الواقع آه دا فيه شروخ دا فيها تشققات دا فيه – فيه وفي الحاله ديه
نيافة الأنبا مرقص:إحنا نرجوا إن الجهات الإداريه بعد الثوره تكون غير قبل الثوره
د . محمد الشحات الجندي:ديه الجهة الإداريه لأ – لأ وبعدين الموقف يختلف
رشا مجدي:د. محمد أنا بقه عايزه أجيلك في نقطه مهمه جداً يعني إحنا إتكلمنا هنا علي حته تخص الأقباط فيه حته تخص المسلمين وأنا عندي مثل صارخ الآن هو المشروع بمنع إقامة دار العباده علي أرض متنازع عليها أنا طبعاً أذكر في ذلك مسجد النور بالعباسيه دا نموذج عشان ده مبرر لإيقاف بناء ممكن بعد كده يبقي مبرر لإيقاف البناء أو يحصل مشكله زي ما حاصله دلوقت مع مسجد النور
د . محمد الشحات الجندي: لأ هو طبعاً المسألة تختلف أرض متنازع عليها دا أنا أري إن هذا الكلام له محله تماماً لأنه بالفعل
رشا مجدي:حتي لو بيت من بيوت الله
د . محمد الشحات الجندي: آه طبعا .. هو بيت من بيوت الله يبني علي منطقه غير مرصوبه مثلا أو فيها واحد بيقول أنا معايا مستندات ملكيه لهذا المكان .. بس بالمناسبه مسجد النور يختلف عن هذا الكلام يعني مسجد النور لأنه .. يعني الوزاره أنا معلوماتي من المجلس الأعلي للشئون الإسلاميه دا جزء من الوزاره يعني هو كان بدأ علي حسب ما أعلمه لكن بعد كده الوزاره هي التي أقامت هذا المبني لكن علي أي الأحوال فيه حكم قضائي والمسأله يعني
رشا مجدي: هو دا موضوع علي أساس لو فيه مكان متنازع عليه – عدم البناء علي مكان متنازع عليه حتي لو بيت من بيوت الله
د . محمد الشحات الجندي: أيوه دا متفق عليه
نيافة الأنبا مرقص: أنا عايز أقول نقطه في التنازع حضرتك بس نفسرها شويه أنا قدمت طلب ترخيص ثاني يوم واحد راح قال الأرض ديه ملكي ويجيب عقد مزور يبقي حِلِّنا .. لأ أنا قدمت طلب ترخيص ومعايا العقود الثابته يقولوا لي إبني وبعدين القضاء يفصل في الموضوع
د . محمد الشحات الجندي: لأ إسمح لي بس يا سيادة الأنبا يعني أنا أفهم دلوقت حاجه كده يلجأو لقاضي الأمور الوقتيه يعني في الحاله اللي حضرتك قلت عندي دلوقت أهوه وأنا مقدم مستندات مزوره دلوقت نفترض حضرتك عايز يتبني دور عباده سواء للمسلمين أو
نيافة الأنبا مرقص:مسجد أو كنيسه
د . محمد الشحات الجندي: أنا تقدمت بعقود مزوره أو بأوراق مزوره في الحاله ديه ممكن جداً أحنا عندنا علي فكره القضاء المستعجل
نيافة الأنبا مرقص:ياريت لو يتحط شروط كده في القضاء المستعجل يبت يبقي خلاص
د . محمد الشحات الجندي: يبقي إن مسألة إبعاد دار العباده سواء مسجد أو كنيسه عن الأرض متنازع عليها دا قضيه جوهريه جداً أنا إزَّاي أعمل
نيافة الأنبا مرقص: أنا بس بأحط في الإعتبار ممكن واحد بعد ما يقدم رخصه واحد يقول لأ دا الأرض ديه ملكي
د . محمد الشحات الجندي: وارد بس ممكن تتحل
نيافة الأنبا مرقص:ممكن تتحل
رشا مجدي:ما هي ديه المشكله – معنا الآن الدكتور عارف الدسوقي نائب رئيس حزب الغد .. د. عارف مساء الخير
د.عارف الدسوقي : مساء النور أهلا أستاذه رشا مساء الخير
رشا مجدي: أهلا بك يا دكتور
د.عارف الدسوقي : مساء الخير عليك وعلي ضيوفك الدكتورمحمد والأنبا مرقص
د . محمد الشحات الجندي ونيافة الأنبا مرقص:أهلا وسهلا
رشا مجدي: أهلا وسهلا بك حضرتك متابع حديث الحلقه
د.عارف الدسوقي : آه متابعه كويس
رشا مجدي:طيب إحنا دلوقت بنتكلم علي هي كانت باديه بنقاط خلاف وأصبحت نقاط توافق الحمد لله في القانون الموحد لدور العباده .. كنا الآن نتحدث عدم التصريح ببناء بيت من بيوت الله أنا بأتكلم علي بيت من بيوت الله في أرض بيتم التنازع عليها يعني عندنا مثال صارخ اللي هو مسجد النور بالعباسيه رأي حضرتك
د.عارف الدسوقي : أولا يمكن الموضوع اللي فتحتوه النهارده للنقاش هو أمر يهم المجتمع ككل مسيحيين ومسلمين وهو يسبب نقطة حساسيه يجب التخلص منها والقفز بعيداً عنها حتي لا تحدث أي نوع من أنواع الفتن أو الحقن الطائفي .. بالنسبه لدور العباده طبعا القانون الموحد هذا الترميم والصيانه والحاجات ديه كلها يجب أن تكون روتينيه حتي مش محتاجه لكذا هدم وبناء أيضا علي نفس المساحه يجب أن يكون الموافقه صريحه وبسرعه بناءاً علي التصميم الجديد علي نفس المساحات والحاحات ديه كلها .. البناء بقه علي أرض زراعيه أو علي أرض متنازع عليها يجب أن يكون هناك تحفظ – الأرض الزراعيه لا تبوَّر ولا يُبني عليها لا مسجد ولا كنيسه إلا يعني في أضيق الحدود أما الأرض المتنازع عليها فلا يمكن البناء عليها إلا بعد إنهاء النزاع القائم عشام ما يكنش مثار مشاكل فيما بعد
رشا مجدي:هي حتة الأرض الزراعيه هنخش فيها في إشكاليه شويه مع تكدس السكان يا دكتور عارف يعني لو حنتكلم علي بناء مسجد جديد أو بناء كنيسه في منطقه مثلا في قريه من القري ما هو حيبني فين ما هو حيبني علي أرض زراعيه ياإما حنرجع الي نظام الشقه أو زي ما كنا بنتكلم
د.عارف الدسوقي : لأ للضروره – أن يكون الأمر ضروري في بناء علي أرض زراعيه أبورها لأن بيتم اللي عايز يبص علي محور المنيب حيجد مساجد بتبني في أرض زراعيه لمسافه زمنيه كبير وبعدين ينشأ حواليها العمران هذا أمر غير مستساغ ديه نقطه – النقطه اللي أنا عايزه أتكلم عليها يمكن بإعتبار أنا تخصصي في الإحصاء والبيانات والتعدادات والحاجات ديه كلها أنا أعلم يقيناً إن هناك تعدادات دقيقه جداً لمصر سنة 86 وسنة 96 وسنة 2006 تحدد الأعداد طبقا لكل حي ولكل شارع ولكل مساحه كمان
رشا مجدي: ما هو ده اللي قالوا نيافة الأنبا مرقص لما قال إحنا من 5 سنين كان تعدادنا كذا يعني هي من 2006اللي هو آخر تعداد تم عمله في مصر
د.عارف الدسوقي : لأ ما أنا حأقول لحضرتك حاجه 2006
رشا مجدي:أيوه ما إحنا دلوقت 2011 وهو قال من 5 سنين
د.عارف الدسوقي : معدلات النمو السكاني معروف
رشا مجدي: د. عارف الدسوقي إحنا بنشكرك شكرا جزيلاً علي هذه المداخله نيابة الأنبا مرقص أنا عايزه أدخل معاك في نقطه مهمه جداً هل ترفض الكنائس في ظل قانون العباده الموحد اللي بيطبق حيطبق علي الجميع أم يطبق علي الكنائس من ناحيه ما يطبق علي المساجد لمراقبة التمويل الخضوع للجهاز المركزي للمحاسبات يعني طالما حنتكلم عمالا لمبدأ المساواه وتحقيق لسلطة الدوله ؟
نيافة الأنبا مرقص:من ناحية الرقابه الماليه كل كنيسه عندنا لها رقابه ماليه داخليه بتقدم تقريرها للجهات المعنيه كنائسيا ليه متي تراقب الدوله مال لما يكون الدوله طرف في المال لكن الدوله ما إدتنيش حاجه الناس هي اللي تبرعت تلقائيا للتبرعات ديه ودا اللي إتبرع جاب أربان ودا اللي إتبرع جاب حاجه للكنيسه ودا اللي إتبرع جاب نجفه هيتعاد إزَّاي ثم ديه تبرعات تلقائيه من الشعب هل من حق الحكومه إن واحد إتبرع تلقائيا تقول له إنت إتبرعت ليه وجبت كام ودفعت كام وصرفوا كام لما الحكومه تديني فلوس تحاسبني عليها
رشا مجدي: لأ ما هو برضه فيه مراقبه علي المساجد
نيافة الأنبا مرقص:لأ أصل وزارة الأوقاف ديه تبع الحكومه وبتمول من الحكومه
رشا مجدي: طيب ما إحنا كلنا نتبع الحكومه .. ما إحنا كلنا بقه فيه مبدأ المساواه يا فندم أنا بأتكلم علي
نيافة الأنبا مرقص:يعني الحكومه حتصرف علي الكنيسه لو حتصرف علي الكنيسه خلاص تحاسب الكنيسه
د . محمد الشحات الجندي:طيب هو بس ملحوظه أولا حضرتك اللي أنا أعلمه إن بالفعل كانت هناك أوقاف الكنيسه ووزارة الأوقاف أعطت الأوقاف المسيحيه للكنيسه
نيافة الأنبا مرقص:الأوقاف بتقدم تقريرها للجهاز المركزي
د . محمد الشحات الجندي:لو سمحت لي الأزهر لم يستوفي أوقافه حتي الآن من وزارة الأوقاف وأعتقد فيه مطالبات معلومات علي أساس إن أنا عضو في مجمع البحوث الإسلاميه إن فيه مطالبات من من الأزهر دلوقت إعطونا الأراضي الموقوفه علي أساس إن إحنا نصرف منها علي المعاهد الأزهريه وعلي فكره المساجد والوزاره بتتبع فعلا سيادة الدوله في هذا الموضوع مش مسألة تبرعات وأنا حأقول لك لو قلت لك تبرعات من جانب الإخوه المسيحيين لبناء كنيسه ممكن جداً مسلمين أيضاً يتبرعوا لبناء مسجد فهل في هذه الحاله لا يخضعوا للجهاز المركزي للمحاسبات أو للتفتيش المالي ما أنا حأفتح مجال هنا
نيافة الأنبا مرقص: أنا حأقول لحضرتك حكاية الأوقاف إحنا عندنا هيئة الأوقاف
رشا مجدي: هي هيئة الأوقاف القبطيه بتتبع
نيافة الأنبا مرقص: بتقدم تقرير
رشا مجدي: بتقدم تقرير
نيافة الأنبا مرقص: آه تقرير للجهاز المركزي للمحاسبات في ميعاده تماما التمام
د . محمد الشحات الجندي:مش تقرير ما يكفيش لإن أنا بالفعل لا يمكن أن يكون هناك إساءة إستخدام للموارد الماليه من جانب القائمين علي دار العباده سواء كان مسجد وارد ولا مش وارد سواء مسجد أو كنيسه هل أنزع سلطة الدوله هو ده السؤال
نيافة الأنبا مرقص:حأقول لحضرتك أنا راجل أتبرعت ب 10 جنيه الدوله تحاسب ليه إن أنا وديتها فين إزَّاي إيه علاقة الدوله بإن أنا إتبرعت ب 10 جنيه إديتها للكنيسه
د . محمد الشحات الجندي:هذا الكلام يطبق علي الجميع
نيافة الأنبا مرقص:آه طبعا
د . محمد الشحات الجندي:طيب أين سلطة الدوله ؟
نيافة الأنبا مرقص:سلطة الدوله لما تديني فلوس
رشا مجدي: طيب ما الهيئات والجمعيات أي تبرع بيحصل فيها وفيه وزارة التضامن ما ننكرش برضه علي الموضوع ده
نيافة الأنبا مرقص: تمام
رشا مجدي: ليه ما نخدش بمبدأ المساواه
نيافة الأنبا مرقص:عارفه ليه وزارة التضامن
رشا مجدي: .. ليه هيئة الأوقاف القبطيه ما تبقاش زي وزارة
نيافة الأنبا مرقص:ما هي بتعمل كده هيئة الأوقاف بتقدم تقرير مالي
د . محمد الشحات الجندي: زي هيئة الأوقاف الإسلاميه
رشا مجدي:زي هيئة الأوقاف الإسلاميه
نيافة الأنبا مرقص:دا تمام
رشا مجدي:إحنا بنتكلم علي المساواه بقه بدأَ
نيافة الأنبا مرقص: دا فيه مساواه 100% زي هيئة الأوقاف عندنا
د . محمد الشحات الجندي:تقنين الأوضاع بس تقنين الأوضاع إنت حضرتك قلت كلمه هامه جداً إحنا عايزين نقنن أوضاع هذا الأوضاع مادام قننتها يعني جعلتها في قواعد عامه متطبق علي الجميع وبغض النظر بقه فيه تبرعات وارد التبرعات لكن ما دام أنا إتبرعت يبقي إنفصلت الفلوس اللي أنا إتبرعت بها ما أتكلمش فيها بقي بقة ملك للجهة وبالتالي بتخضع بقه لتفتيش الدوله لتفتيش الجهاز
نيافة الأنبا مرقص:ما أنا حأقول لحضرتك هيئة الأوقاف عندنا ما يخضعش ليها الكنائس القبطيه الكنائس القبطيه تخضع للباترريكيه وللموترانيات أما هيئة الأوقاف يتبعها بعض منشآت بعض مدارس بعض مستشفيات بعض أراضي وبتقدم عنها الجهاز المركزي تقرير وبيفتش الجهاز المركزي زي ما هو عايز
د . محمد الشحات الجندي: ده غير ده
نيافة الأنبا مرقص:آه ديه حاجات وديه حاجه تبع هيئة الأوقاف وهيئة الأوقاف ديه بيصدر بها قرار بالتشكيل من وزارة الأوقاف ومن رئاسة الجمهوريه لكن الكنائس ككنائس تتبع يا المترانيات مترانيات باترريكيه وبتقدم حساباتها للمترانيات
د . محمد الشحات الجندي: دا من الناحيه الدينيه إحنا بنتكلم علي نقطة
رشا مجدي: المترانيات بقه ليه ما تقدمش .. يعني أنا عايزه أفهم الناحيه الماليه نحن الآن نتحدث عن إن
د . محمد الشحات الجندي: إحنا بنتكلم علي الناحيه الماليه ما بنتكلمش علي الناحيه الدينيه لا شك إن الكنيسه
رشا مجدي: الدوله سوف تشرف فيه قانون دلوقت حيبقي موجود موحد للمسلمين والمسيحيين زي ما بيحصل هنا يحصل هنا ليه رافضينه
نيافة الأنبا مرقص: أنا أقول لحضرتك الجوامع بتتبع وزارة الأوقاف والوزاره ديه تبع الدوله لكن الكنائس لا تتبع وزارة الأوقاف ولذلك الكنائس لا تخضع مالياً للدوله لكن الجوامع بتخضع ماليا لوزارة الأوقاف ووزارة الأوقاف بتخصع للدوله لأنها بتمول من الدوله
د . محمد الشحات الجندي: تمول لأ ما أنا حأقول لحضرتك يعني هي المسأله ببساطه شديده أنا لوقلت دلوقت إنه معني إن المساجد بتتبع وزارة الأوقاف معناها مادام حأقول إن وزارة الأوقاف لو حضرتك بتقول إنها جزء من الدوله صح كوزاره لكن أنا دلوقت برضه رغم إنها جزء بأقول خلاص يبقي هي تحاسب الناس بتوع المساجد وتشرف عليهم لكن الناحيه الماليه إنفصلت عن وزارة الأوقاف وممكن ييجي الجهاز المركزي للمحاسبات ويقول إن فيه إنحرافات ماليه في المسجد الفلاني بغض النظر بقه
نيافة الأنبا مرقص: لأنها تتبع وزارة الأوقاف
د . محمد الشحات الجندي:نفس الوضع الناحيه الماليه لا تتجزأ .. أنا ما بأتكلمش علي الناحيه الدينيه الناحيه الدينيه تبع الكنيسه
نيافة الأنبا مرقص:لأ ما أنا ما بأقلش الدينيه الجامع تبع وزارة الأوقاف ووزارة الأوقاف تتبع الدوله من ناحية التنظيمات والماليات كل حاجه لكن الكنيسه عندنا لا تتبع وزارة الأوقاف وبالتالي لا تمول من الدوله ولا تخضع ماليا للدوله
د . محمد الشحات الجندي:طيب أراضي الكنيسه حضرتك جايه منين مش أوقاف مش كانت أوقاف
نيافة الأنبا مرقص:من الناس لأ أراضي الأوقاف تبع الأوقاف
د . محمد الشحات الجندي:كانت أوقاف كنائسيه
نيافة الأنبا مرقص:فيه أراضي تبع الأوقاف بتقدم عنها للجهاز المركزي الحسابات بتاعتها
د . محمد الشحات الجندي:كانت بتمثل كام في المئه
نيافة الأنبا مرقص:لأ أنا ما أعرفش ما عنديش إحصائيه بحاجه زي كده
د . محمد الشحات الجندي: لأ أنا كده بأجزأ سيادة الدوله معلهش أنا بأجزأ سيادة الدوله حأقول والله الناحيه الماليه المساجد تخضع والكنيسه لا تخضع
نيافة الأنبا مرقص:لأ ما أنا حأقول لحضرتك الدوله تشرف علي ما يخصها ديه وزارة الأوقاف – وزارة الأوقاف ديه مش تبع وزارات بيصدر بها قرار جمهوري ووزير أوقاف بيطلع بقرار جمهوري لإن ده وزير الأوقاف وبتمول من مالية الدوله
د . محمد الشحات الجندي:أيوه بتمول
نيافة الأنبا مرقص:طيب إحنا عندنا الكنيسه ما بتمولش من مالية الدوله خالص
د . محمد الشحات الجندي:من الأوقاف اللي أخذتها من وزارة الأوقاف
نيافة الأنبا مرقص:لا .. لأ الأوقاف لا تصرف علي الكنائس
رشا مجدي: طيب أحنا ديه نقطة خلاف بقه ووصلنا
د . محمد الشحات الجندي:لأ مش تصرف أنا ما بأتكلمش علي تصرف
رشا مجدي:د. محمد إحنا تقريبا وقتنا خلص ديه نقطة الخلاف اللي بيننا بس قبل ما نختم نيافة الأنبا مرقص عايزه أسألك سؤال لاقدر الله إذا لم يتم التوافق هناك من أعلن من ثوار زي ما بيسموه أقباط ماسبيور إن هم لو حصل إذا لم يتم التوافق هم راجعين يوم 7 يوليو ثاني والكنيسه قالت لهم لأ وهم قالوا لأ راجعين تاني
نيافة الأنبا مرقص:لأ المفروض لو هم ولاد الكنيسه لازم يسمعوا كلام الكنيسه ما فيش 7 يوليه مافيش 7 يوليه اللي حيطلع يبقي ده مخالف لنظام الكنيسه أو لقرار قداسة البابا اللي بينصه وما أعتقدش إن ولادنا يخالفوا قرار قداسة البابا أبدا
رشا مجدي:نيافة الأنبا مرقص أسقف شبرا الخيمه وتوابعها د. محمد الشحات الجندي أمين عام المجلس الأعلي للشئون الإسلاميه نشكركم كنتم أبطال حلقة اليوم إنتوا اللي قمتم بيها أنا كنت ضيفه عليكم إحنا بنشكركم شكرا جزيلاً .. مشاهدينا الكرام ومازال هذا مشروع القانون تحت الحوار المجتمعي والحوار بين كل أطياف المجتمع المصري نشكركم ونترككم الآن مع نشرة التاسعة