مهما عِلي الواطي يفضل للأبد واطي... لإنه مهما ارتفع لأسياده ح يطاطي! افتتاحية اللي بني مصر كان في الأصل حلواني واللي نهب خيرها والِسْ غيرها خَوّاني الحر فيها انكتب قهره علي جبينه والفقر علّة وأهل العلة فاكرينه مش جهل.. لكن عما.. يا تُقل أحزاني فرعون بنا السجن؟ لا.. إحنا اللي بانيينه دا قبر مفحوت لنا واحنا اللي فاحتينه سيوفه من صنعنا والحبل فاتلينه مين اللي كان فرعنك ع البر يا فرعون؟ قال/ عرشي شايخ وخايخ وانتوا ساندينه! واحد وسبعين عمري ما بعت القضية - ولا خاويت مسئولين ولا حد كاسر عينيه - ولا حتي في الزنازين ومازلت م الورشجية - لغز من الفلاحين لذاريحتي مسك وزكية - وكأني م الصالحين وليه عايزني ضحية - يا حثالة المخبرين بتوز خيلك عليه - وكأني م المطلوبين ترمي قصايدي الشجية - بالصمت أو نقد شين وحاكم حصارك عليه- كما اليسار.. اليمين يرحمها أمي عليَّه - أم البنات والبنين كان ليها أجمل وصية - نصفتني دنيا ودين أعيش بروحي غنية - من غير فراغة العنين ماليش مطالب غبية - لأندال تقول لي منين؟ لذا شعري لايق عليه - دواوين علي دواوين شرف ضميري وإيديه - تيجان تزين الجبين لشعبي رؤية وهوية - ولمصر عشق وحنين ح يخلو سيرتي عفيه - علي مدار السنين زيارات رسمية خدّامين خمس نجوم.. في الشوارع بالألوف أصل فيه كائن عظيم له سبع تمن أنوف جاي يزور شعبه القديم اللي ساكن في الحواري واللي سكران م المجاري لحد ما نسي الحروف والمدينة هُسّ فاضية إلا من أوهام وخوف قلق مشروع الشكوك معذباني مكلْبشَة دماغي يا بيه ياتري رغيفي دقيق؟ واللي شاربُه نسكافيه؟! والطماطم دي صناعي؟ والفلافل فول صحيح؟ والأفندي ده صريح؟.. طب بيحلف كدب ليه؟ يا أساطين الفلاسفة من أرسطو أعمل إيه؟ شمروخ (للمثقف) الفصيح داري علي شمعتك يا مِمَسّخ المواويل خبّي غليل أزمتك.. وطبعَك العكننة عن شعبك المهزوم الشعر لو ندّاغة أمضُغها بفصّين توم.. لبانة عند اللزوم لِمّ الحروف النحاس والبمبة والمبروم وف حرفنة فلاح عديم الدم أصبغ جنون القصيدة من غبار الهم إرفع سيوف الابتزاز العويل أو دُق طبل الهلوسة المأزوم وهين النيل مزّع أساطير التاريخ النبيل يا طول طوابير الهموم اللي بتفري القلب وتهد حيل الشعب لو محروم ما هي أصلها ناقصاك تدفن أمل بكرة وتْدرْمغنا بفصاحتك في ذل اليوم! بكل بساطة من غيرك الشمس ح تطلع من غيرك ومسيرك.. الأرض ح تنسي خطوط سيرك مع إنك عشت هَلُمّة وملْو هدومك كعبك بيدق بقوة ذنبك في دماغ قومك طبلك بيشوّش علي خَبَلك علي دقة قلبك.. يقلق نومك يومك.. بيشد جدورك من طمْي امبارح أمجاد وفضايح بيداري العز الرايح خلف الناب الجارح لذا أول ما ح ترخي بناديرك تخجل ألوانها وتبهت قدام الحلم المقهور الصابح يتحدد ببساطة مصيرك زي بساطة مدّ البحر المالح ونسيم الصبحية السارح وبساطة الدود اللي بينهش في جتت امبارح وف لحم ضميرك! من غيرك.. الأسماك في كل بحار الدنيا ح تتلون والندي كل صباح علي ورق العنب اللي بيضلل حتي بيوت الفقرا ح يتكوّن والشعر الشعر اللي أنا بالحب أو الكُره كتبته ح يتغني يمكن.. أو يتنسي من غيري ومن غيرك أوهام العواجيز فارد قلوعك لأحضان السما مشاوير؟ من إمتي قادر ترفرف يا عجوز وتطير كل السنين دي وعجزت تبت في أمرك ضيعت عمرك تقاوح ليه مع المقادير واللي قريته نسيته ولا عطاك تفسير هلوسة شعرية الشعر من تقل هم الناس مهلوسني حالف عليّه كمثل زمان يسَيّسني وانا لخبرة حياتي، عرفت قدراتي.. يادوب باهاتي.. لكنّه السن سوّسني إمتي يا شعبي لما حلمناه.. تَحمّسني؟! أراجوزات مصرية عصرية بلا شماريخ (1) القرية لكل شخص قرين أراجوز فرحان حزين مولود ويّاه عاقل؟.. يجوز ويجوز نرفوز يعْدِل له أو يقلب له قفاه ساعات عَيل ولا فرقع لوز ينسي الحقيقة وهيّه معاه وساعات عجوز لو يضرب بوز ولا وزير وخطفنا عشاه (2) القروى الناصح أراجوز فقير فلْح وفلاح حزني منسّب لجدودي قلبي اتملا في العشق جراح والحظ ضيّق لي حدودي ضِحكت ع التركي السفاح قَتل لي من شنيه قيودي رميت حمولي علي الفتاح حبيبتي.. لهفت مجهودي! (3) العاشق المفلس أنا اللي زاد بيّه هوايا.. عن الفلوس اللي ف جيبي داير طاحونة.. ورحاية ولا مرّة كسبت يا ناصيبي يا حبيبتي لو راضية.. كفاية تقولي مرْسييه يا حبيبي قومي اشوي قلبي لعشايا بس استري في عرضك عيبي! (4) الخشب أنا أسطي نجار فصّلني بإيدين طوال من غير قدمين جنني بالفن هبلني أنا شلت أحزان العاشقين وغلبته في الحب.. فصَلني وفاتني أزُك ف جهل وطين وفاق.. سَبَق قال حصّلني وعارف إني ماليش رجلين! تلوث تاريخى بقعة نفط (زيت) مشيت في هوج الحياة... قصدي البشر.. حَجّيت.. وهبت لِك مِلّتي في دنيتي وديني.. وما خلّيت.. كتبت في حبك قصايد ياما.. لو.. وياريت!! وقلت ياما.. ولهواك غنيت قطعت بي في السوق تباريح الهموم والخوف الناس دي مش هيّة اللي راهنت عليهم اللي زمان عشموني بحب كان في عينيهم شبَطت علي صدرهم شبيّت علي إيديهم وف حوشهم الدافي بالحنيّة.. حِبِيت حَبّيت فأطعموني وسقوني شبعت واستكفيت وعن الحرام بالحلال المرّ فطموني وأنا استغنيت! إيه اللي بدّل ملامحهم.. وبدلني عارف انتي عارفة أكيد مين اللي بهدلهم.. وبهدلني.. وبادلْني بأرخص تمن وكدب قوّلني.. بس انتي قلبك خفيف خايف يجاملني.. وأنا الضعيف.. اللي شايل كتفه عَتب البيت إذا ما تقلْقل أساسه لو في يوم نخيت اتهد فوق راسي وهوّ؟.. يفضل كما هُو فوق دمنا بيعوم.. كبقعة زيت!! استحالة حتي لو الدولة بكل قواها وقفت جنبك إوعي تفكر إنك ممكن ح تفِرّ بذنبك فيه شيء دايماً للمظاليم كامن في الغيب لا حبيب ولا عدو، لكنه ضميرك يعصر قلبك! قوانين السما والأرض لحكمة أبدعهم ربك تحريم ياتري ح تسمح لي أشوف (كارمينا بورانا) واسمع بصوت ألف ليلة بيانو (سيميتانا) وإلا ح ترمي الموسيقي في ركوة التحريم يبقي الباليه كالحريم.. عوْرة خطايانا بلا لون ولا لحن.. شومة الجهل عاميانة فى المعرض الفنى فاروق يا حسني صلاة الزين علي عيونك أنا شفت في معرضك تشكيلة لفنونك خطرت في بالي ألاعيب سيرك بالشقلوب من غير قلوب أو بشَر كان ربنا في عونك الفن أيوه جنون! فين عقلُه لجنونك؟ المضيفة تفرد المضيفة حصيرتها هذه المرة كاملة لشاعر جديد شاب من أبناء عصر الاستقرار الزؤام فاجأني بشماريخ صارخة وشارخة أدهشتني رغم أنه لا يدعي أنه «أراجوز».. وإنما مواطن مصري بسيط من «الزاوية الحمرا» لم يتلوث بعد بصياغات المثقفين ولا بصراعات السياسيين..اسمه محمد صلاح باعوا القطاع العام باعوا القطاع العام وخصخصوا الشركات سألنا بعتوا بكام قالولنا ده إحنا اخوات وزيفوا الأرقام وزوروا الحسابات وكل واحد لهف عمولة ومقاولة وخزاين الدولة كنسوها بمقشات وسرحوا العمال في البيت وع القهوة والله وصدق من قال للمال صحيح شهوة تبدل الأحوال والطبع علي سهوة وتخلي عم الشيخ ممكن يبيع دينه علشان رغيف فينو وفنجانين قهوة على الجدار عَلّي الجدار يا بطل بينك وبين غزة وسوق علينا الهطل ما هو للهبل لذة عند اللي عقله اتصطل بالوسكي والمزّة لا عروبة ولا إسلام ليهم ما بينا مكان ماتوا وعملنا صوان والكل راح عزي سامحينا يا فلسطين إحنا في زمن أقزام مافيهوش صلاح الدين غير بس في الأفلام وعرّة السلاطين والأمراء والحكام قاعدين علي عروشهم ومرتاحين البال وبيجمعوا الأموال من كل سكة حرام قطع غيار انسان ساكن في عشة صفيح في حَيّ عشوائي يضرب حيطانها الريح تجف أوراقي الفقر والتجريح ألد أعدائي واكمني مصري بسيط وظهري مش محمي دللت علي لحمي وبعت أعضائي من يشتري كليتي خد فكرة ياعيان عمَلِت لي إيه صحتي ده أنا ياما نمت جعان جنسيتي لعنتي بتهان في كل مكان آه يا بلد فيكي رخصت واتذليت وخلتيني بقيت قطع غيار إنسان مبروك عليكو مبروك عليكو الكاس يا ناس يا مصطولة في الجوزة والأنفاس واخدين كذا بطولة معندكوش إحساس ولا نخوة ورجولة في الكورة والمتشات بتفرغوا همومكو وتقوموا من نومكو بناطيلكو مبلولة شعوب بتتقدم في آسيا وأوروبا وإحنا بنتكلم عن إيتو ودروجبا لا مؤاخذة يا معلم جاتنا ميتين كُبَّة ادونا علبة صفيح وقالولنا يا أبطال لكن في كل مجال ضربونا بالركبة
