ايه حكاية الريس مرسي ؟ .. كل يوم جمعة يسحب الحرس بتاعه على الجامع ، والمرور يقف وإجراءات أمنية مشددة واللي يدخل يصلي يمر من البوابة الالكترونية ويتفتش .. واللي يشكوا فيه يقلعوه بلبوص .. وكل واحد داخل لا مؤاخذة الحمام يخرج يلاقي عسكري واقف له ع الباب ، ويدخل بعده ويفتش المكان .. ويجي يتوضى يلاقي خمسة فوق راسه .. ويا سلام بقى لو عايز تنال شرف انك تصلي جنب الرئيس . دي محتاجة قبلها بشهر طلب وورقك يروح لأمن الدولة ويفتحوا الدفاتر والكمبيوتر .. ويشوف تاريخك ان كان لك عداء سابق بالإخوان ، او انك من المعارضين عمال على بطال ، ففي الحالة دي تبقى بتحلم لم سمحوا لك بالصلاة مجاورا للرئيس مرسي .. اما اذا ثبت انك من عشاقه ومريديه فصلي جنبه .. بس لازم تكون " متبرفن " وريحتك حلوة.
وسؤال عايز إجابة عليه من لجنة الفتوي بالأزهر الشريف : هو ممنوع على الرئيس اللي م الإخوان انه يصلي في بيتهم ، قصدي في المسجد اللي جوه قصر العروبة .. هل هذا غير جائز شرعا على اعتبار ان كل خطوة يخطوها مشيا للمسجد تتحسب له حسنات .. بس هو مش بيروح المسجد على رجليه .. ده راكب سيارة وحواليه حراسة وموتوسيكلات .. يعني مفيش حسنات ولا حاجة .. ويمكن تكون سيئات على اعتبار تعطيل مصالح الناس وإخضاعهم للتفتيش الدقيق عشان رايحين يصلوا الجمعة .
وعلى رأى ابراهيم عيسى - مع اني مش بحب اجيب سيرته كتير في اى مقال عشان محدش يفتكر حاجة كده ولا كده - المهم ابراهيم عيسى في برنامج " هنا القاهرة " ناقش هذا الموضوع وكان متغاظ - وعنده حق - وقال والعهدة ع الراوي " انا شخصيا معنديش اى معلومات " .. ان صلاة الريس مرسي بتكلف الدولة حراسة وعربيات وكاميرات وبوابات الكترونية للتفتيش حوالى 4 مليون جنيه .. فليه ندفع أكتر لما ممكن ندفع اقل او مندفعش خالص .
ما يصلي في مسجد الرياسة ، ويجيب اللي هو عايزهم يصلوا معاه ، ويختار الخطيب اللي بيحبه ، ايكش حتى يجيب الطبلاوي .. ويدفع له من جيبه مش من جيوبنا احنا .. هو يبقى الناس مش لاقية تاكل ولا تشرب ، وانا كل جمعة ابعزق 4 مليون جنيه ، وانا ممكن أوفرهم ، وعندي " هم ما يتلم " ناس اولى بالفلوس دي .. عايز تدخل الجنة ؟ .. ادخلها يا سيدي وربنا يسهل لك .. بس مش على حسابنا .. عايز تصلي كل جمعة في مسجد غير اللي قبله ؟ .. صلي براحتك .. بس مش من ميزانية الرياسة اللي فلوسها من جيوبنا وضرايبنا!
ومين عارف .. تروح تصلي على حسابنا.. ويمكن تدعي علينا ، بدل ما تدعي لينا .. ما احنا مشاكلنا كتير ونجيب صداع لأى حد مسؤول عننا .. بس انت قبلت ورضيت انك تبقى الرئيس .. بل بالعكس بقى .. ده انت كنت حتموت على الرياسة وربنا نفخ في صورتك ونصرك على شفيق .. الحمد لله .. فضل ونعمة .
أشوف بقى مصالح الناس بجد.. ولا كل جمعة أروح أصلي في مكان والتليفزيون يصوّر .. خلاص عرفنا انك مؤمن وراجل بتاع ربنا .. والصلاة مش عايزه دعاية .. مش حنتاجر بيها .. دي حاجة بينا وبين خالقنا.. فمفيش اى مشكلة انك يوم الجمعة - كده من سكات - تقوم تتوضى وتنزل ع الجامع اللي في القصر .. ولا كاميرا ولا أمن ولا بوابات الكترونية .. وممنوع طبعا اى حد يصلي في مسجد الرئاسة من بره القصر .. كده حتصلي براحتك والحرس بتاعك مش حيبقى مشدود .. وبالمرة يصلوا معاك هما كمان.
وبالمناسبة بقى يا ريس مرسي .. مفكرتش مرة كده وانت بتصلي وبتسمع الإمام وتتمعن فيما يقرأه .. مفكرتش أبدا في مصابي الثورة .. انا شفت بعضهم امبارح في برنامج " بلدنا بالمصري " .. وجلالة الله اتغميت زي ما يكون مات لي ميت .. شباب زي الورد نايم في المستشفى .. اللي بقاله 18 شهر واللي أقل شوية .
اللي جات له رصاصة في عموده الفقري واتشل واللي جاله شلل رباعي واللي عنده قرحة فراش .. ومفيش حد منهم والمراسل بيسأله .. الا وجاب سيرتك يا ريس : هو فين الريس مرسي .. من ساعة ما بقى رئيس محدش شافه ولا سمع حسه ولا جاب سيرتنا لا بطيب ولا بردي .. كان علينا بإيه مستقبلنا يضيع ونقضي بقية عمرنا نايمين ع السرير او على كرسي .. هو مش من حقنا ع الدولة اللي اتصبنا عشانها انها تعالجنا وتشوف اللي محتاج يسافر بره تسفّره .. واللي كان بيصرف على عيلته .. تصرف هى عليها .. فين الريس مرسي اللي بقى رئيس جمهورية بجهادنا احنا وتضحيتنا احنا .. احنا مش بنشحت منه ولا من غيره .. احنا لينا حق في البلد دي .. ولا هى مبقتش بلدنا ؟ .. احنا الأولى بالرعاية والاستضافة ام الفنانين .. مع كل الاحترام لهم جميعا ؟.. احنا الأولى بلفتة إنسانية واجبة ولا ناس تانية؟ .. احنا اللي ضحينا ومتنا عشان بلدنا ولا ناس غيرنا؟
أسئلة تقطّر مرارة ووجعا يسألها الشباب الورد الذين كانوا يتمنون الموت ونيل الشهادة بدلا من العيش كأموات.. ومفيش بني ادم يسأل عليهم غير أصحاب القلوب الرحيمة بجد والمصريين على حق وما أقلهم .. ونسيهم من أخذتهم مصالحهم والتكويش على التورته وما أكثرهم .. والنتيجة ضياع مستقبل وضياع أمل .. وضياع ثقة في أناس وثقوا بهم وخذلوهم.
نرجع لمرجوعنا .. مش حتدخل الجنة يا ريس مرسي بصلاتك كل جمعة في مسجد .. طبعا الصلاة واجبة وفرض على كل مسلم ، لكنها ليست وحدها التي ننال بها جنة الرحمن .. فكيف يقبل الله لنا صلاة وحقوق الناس مُهدرة .. كيف يتقبل منا سجودنا وركوعنا وناس مشلولة ومش قادرة تتحرك وتنتظر تحركنا نحن كجهة مسؤولة لتسفيرهم للخارج للعلاج .. يمكن يرجعوا لنا ماشيين على رجليهم .. كيف يتقبل الله منا الدعاء ولا يزال هناك منا من يصارع الكلاب والقطط على صناديق الزبالة ليعود بأى لقمة تسد جوع عياله.
صلي في مسجد القصر يا مرسي .. ووفّر الفلوس للمحتاجين .. 4 مليون كل أسبوع مش مبلغ قليل أبدا .. يروحوا للي محتاجين ليها وساعتها ثوابك عند ربنا حيكون اكبر من ثواب صلاتك .. مصر مليانة غلابة يا ريس مرسي وانت عارف اكتر مني .. فبلاش بعزقة ع الفاضي .. واسأل لجنة الفتاوي في الأزهر ان كنت قلقان : هل يجوز لرئيس الجمهورية الصلاة في مسجد بيته ، أم لزاما عليه الخروج للصلاة في مسجد بعيد ؟ .
واسألهم برضه : هل يتقبل الله صلاة رئيس الجمهورية بدون تصوير وكاميرات وتفتيش ، أم لزاما عليه بحكم المنصب أن يفعل ذلك ؟ .. وأخيرا اسألهم : اللي الناس وثقوا فيه وفرحوا بتوليه منصب الرئاسة وضحوا من أجل ذلك بالكثير .. هل يتقبل الله منه صلاة وصوما وزكاة وحجا ، إذا نسيهم او تناسهم؟
