حنان الجوهري تكتب: عشان كنا رجالة هانقلع زي الرجالة! حنان الجوهري مشهد نهار حار جاف خارجى ميدان التحرير يوم 3 يونيو شاب واقف بالمايوه قدام شيخ واقف بالمايوه برضك على لجنة شعبية تأمن مداخل الميدان .. الشاب لابس المايوه بس والجزمة والشراب وف ايده قزازة مية وعلم مصر الشيخ : اقلع يا اخى لا يصح الشاب : ما انا قالع اهه يا شيخ الشيخ : لا يا اخى لسه المايوه الشاب اشمعنا الحريم لابسين مايوة وقطعتين كمان ؟ الشيخ : وانت عاوز تلبسه قطعتين ؟ ازاى ؟ الشاب : لا طبعا بس ابقى زيك ما انت اهه لابس مايوة اشمعنى يعنى ما ينفعش اقلعه الشيخ : يا بنى احنا قلنا هنقلع ملط يعنى ملط وانى لما هادخل هاقللللللللع خااالص الشاب : والنبى يا شيخ سيبنى ادخل وهاقلع جوه الشيخ يميل عليه : اوك يالا ادخل بس كمان شوية هادخل اشوفك جوه .. هاشوفك يعنى هاشوفك .. next .......................................................................................................... ليل بارد داخلى ف اوضة فريدة قاعدة على سريرها متغطية باللحاف القطن مش الفايبر لامؤاخذة .. يوم 26 فبراير انا اكتب الآتى : طب بالذمة هيبقى منظرنا ايه لو فعلا خد براءة و كل الصفحات اللىعلى الفيس بوك قالت انها هتقلع لو خد براءة ؟؟ كل اللى هيتصدموا ف القضاء و النيابة و ف حلمهم بالقصاص هيعملوا ايه ؟؟ كانت لازم تاخدنا الحمقة قوى يعنى و نقول هنقلع هنقلع ؟ ع العموم انا عندى حل جميل جدا .. احنا نقلع ............. استنى والنبى يا كابتن أه هنقلع .. ايون كله كله .. بس نخلى الاخوان ينظموا الليلة , الحريم مع بعض و الرجالة مع بعض , لأ لأ استنوا البنات مع بعضهن و المتزوجات مع بعضهن عشان غيره الحريم من بعضيها اصل الجواز بيخلى الواحدة تضرب و تبقى غريبة كده و الهدوم ياما بتستر و لنعتبره حمام التلات أه و الرجالة كلهم مع بعض اصلهم جبلات ما بيفرقش معاهم واحد بكرش ولا معصعص .. ده شايف الكرش عز و نعمة و المعصعص رياضة و صحة . الاخوان بقى يعملوا ايييييه ؟ ينظموا مش هما اللى نظموا الميدان ف الثورة ؟ وستفوا الثوار و جهزوا المولوتوف ايام موقعة الجمل خليهم يشيلوا بقى الليلة .. وانا برضه مش هاسيبهم كده يلوصوا هاقولهم على حل عبقرى .. القلع يبقى جوة ف الميدان و الميدان كله خيام كبيرة و ممكن نستغل الموضوع وما فيش موبايلات و نعمل حمامات سباحة بلاستيك و طبعا الاخوان هيعملوا حمام السباحة بتاعهم اكبر واحد و سماعاتهم اكبر و كده و عشان ما حدش يزعل كل فصيل سياسى يبقى مايوههم بلون الاسلاميين بالاخضر و الاشتراكيين بالاحمر و كده يعنى . ربنا يجنبنا اليوم الفضائحى ده .. عشان حق الدم اللى سال و حق المصابين و امهات الشهدا و حرقة القلب و عشان ما نقلعش و النبى يارب مش عاوزين نقلع .. اصل يومها عجلة الانتاج هتقف فعلا