جتنا نيله عملنا ثوره وما عرفنا نحميها زرعنا زهره ودوسنا عليها ودم الشهدا ذنبه فى رقابينا أخص علينا لا شرطه قادره تحمينا وجيش لا منا ولا علينا وساسه بلا كياسه تنهش التورته من ايدينا والتورته لسه نيه محتاجه حلوانى من اهالينا وائتلافات بالمئات ضاعت ما بين مليونيه ومين البطل فينا ؟ وسوس بينخر من بواقى نظام عاوز يعمينا بإنتظام بيخنق أمانينا ولسه وشوش مبيختشوش فى الفضائيات بيقسمونا ليبرالى سلفى اخوانى قبطى يسارى والمصرى فين يا أبن أبويا ووقت العمل إضراب والأمل بيعدينا على القهاوى رغى وحكاوى وتحليل ألف حكايه قديمه والمصانع لا حَول ولا حيله ولما يا مصر مرضتى بقى تمانين مليون جراح شاهر مشرطه فى عنينا يا ريتك يا مصر ما ربتينا يا ريتك يا مسكينه فتحنا شبابيك الحريه ولا عرفنا نحميها ولا تحمينا حريتنا بقت فى فوضتنا فى بلطجتنا حريتنا فى قتل بعضنا فى إسقاط جيشنا وإسقاط شعبنا قربنا نفض السيره قربنا نشتت العيله جتنا نيله دوسنا الزهره برجلينا ودم الشهدا فى رقبينا جتنا ستين نيله